O Le Vavega o le Tusi Paia
O i tatou o tagata talitonu moni ma atoatoa i le Alii o Iesu Keriso, faapea ma Lana afioga ua faaalia mai e ala i le Tusi Paia.
Ou uso e ma tuafafine, o le Tusi Paia o se vavega! O se vavega ona o le 4000 o tausaga o talafaasolopito paia ma faalelalolagi o le Tusi Paia, na tusia ma faasaosaoina e perofeta, aposetolo, ma failotu musuia.
O se vavega lo tatou mauaina o aoaoga mamana, mataupu faavae, solo, ma tala o le Tusi Paia. Ae o le sili o na mea uma, o se vavega matagofie ona ua ia te i tatou tala i le soifuaga, galuega, ma afioga a Iesu ia sa puipuia mai Tausaga Pogisa, ma mai i feteenaiga a le anoano o augatupulaga ina ia mafai ona tatou mauaina i aso nei.
O se vavega le i ai moni i le Tusi Paia i ona itulau le Agaga faaliliu, le [Agaga] faamalolo, o Keriso, lea na liua ai loto o tagata i le tele o seneturi, ma taitaiina i latou e tatalo, ia filifili le ala sa’o, ma ia saili ia maua lo latou Faaola.
Ua fetaui lava le faaigoaina o le Tusi Paia. E paia aua o loo aoao mai ai upumoni, e paia aua e faamafanafana ai i tatou e lona agaga, e paia aua e aoao ai i tatou ia iloa le Atua ma malamalama i Ana feutagaiga ma tagata, ma e paia aua o loo molimau mai ona itulau uma i le Alii o Iesu Keriso.
Fai mai Aperaamo Linikone e uiga i le Tusi Paia: “O lenei Tusi Maoae … o le meaalofa sili lea ua tuuina mai e le Atua i le tagata. O mea lelei uma na tuuina mai e le Faaola i le lalolagi, sa ta’ua e ala mai i lenei tusi. Ana leai, tatou te le iloa le sa’o mai le sese” (Speeches and Writings, 1859–1865 [1989], 628).
E le o se laki pe na faafuasei ona tatou mauaina le Tusi Paia i le aso. Na musuia e le Agaga ia tagata amiotonu ina ia tusitusia mea paia na latou vaaia ma upu musuia na latou faalogoina ma talanoaina. O isi tagata faamaoni na musuia e puipuia ma faasaosaoina nei faamaumauga. O tamalii e pei o Ioane Uikilifi, o le au lototele o Viliamu Tinitale ma Johannes Gutenberg na musuia e ui i le tetee tele ina ia faaliliu le Tusi Paia i gagana e mafai ona malamalama ai tagata, ma lomia i ni tusi e mafai ona faitau e tagata. Ou te talitonu e oo lava i le au faitofa a King James na maua ni uunaiga faaleagaga i la latou galuega faaliliu.
O Tausaga Pogisa na pogisa aua sa natia mai tagata le malamalama o le talalelei. E le’i i ai ni a latou aposetolo po o ni perofeta, ma latou te le’i maua foi le Tusi Paia. Na teu lilo e faifeau ia tusitusiga paia ma na le maua ai e tagata. E tele le tatou aitalafu i le au totoa na maliufasia ma tagata vavae e pei o Matini Luteru, ma Ioane Kalavine ma John Huss o e na finauina le saolotoga e tapuai ai ma ia maua e tagata uma ia tusi paia.
Na tuuina mai e Viliamu Tinitale lona ola ona sa matuai talitonu o ia i le mana o le Tusi Paia. Fai mai a ia “O le natura o le afioga a le Atua e faapea, po o ai lava e faitau i ai pe faalogo i ai, e faamalamalamaina lelei ma finauina ia te ia lava, o le a amata i le taimi lava lena ia te ia ona faasolo ina avea ma se tagata lelei, seia oo ina avea ma se tagata atoatoa.” (in S. Michael Wilcox, Fire in the Bones: William Tyndale—Martyr, Father of the English Bible [2004], xv).
O le suesue faamaoni ma le maelega i le Tusi Paia e avea ai i tatou ma tagata lelei sili atu, ma e tatau ona tatou manatua pea le toatele na maliufasia o e na iloaina lona mana, ma e na tuuina atu o latou ola ina ia mafai ai ona tatou maua i ona upu le ala i le fiafia faavavau ma le filemu o le malo o lo tatou Tama Faalelagi.
E ui ina sa tasi nei Kerisiano vavae anamua i le tele o mea, ae na iu ina latou feteenai i le tele o manatu i aoaoga faavae. O lenei tulaga na iu ai i le faatulagaina o le tele o ekalesia Kerisiano. Na tusia e Roger Williams, o se [tagata] na lagolagoina anamua ia saolotoga faalelotu, na faaiu faapea sa “leai se Ekalesia faavaeina lelei i le fogaeleele, e lei i ai foi se tagata ua faatagaina e faataunuu soo se sauniga o le Ekalesia; e le mafai foi ona i ai, sei iloga e auina mai ni aposetolo fou e le Faaao sili o le Ekalesia, lea ou te sailia lona afio mai“ (tagai William Cullen Bryant, ed., Picturesque America, or, the Land We Live In, 2 vols. [1872–74], 1:502).
E faitau miliona tagata taitoatasi ua i ai le faatuatua i le Atua ma Iesu Keriso, e ala i le sailia o le upumoni i le Tusi Paia. E le masino le toatele o i latou na leai lava se isi mea ae na o le Tusi Paia e fafagaina ma taialaina ai lo latou faatuatua.
Ona o taumafaiga a tagata vavae, ua avea ai le Tusi Paia ma meatotino a aiga. “Na faitauina le afioga a le Atua i talaane o magalafu a aiga maualalalo faapea foi ma fale o aiga mauoa” (Elder John A. Widtsoe, Conference Report, April 1939, First Day—Morning Meeting, p.20).
E faitau miliona aiga na o mai faatasi e saili ina ia maua le Ekalesia a Iesu Keriso, e ala i a latou suesuega i le Tusi Paia. O se tasi o na aiga, i le amataga o le vaitaimi o le 1800, i Niu Ioka i matu, o le aiga o Iosefa Samita le Matua. O se tasi o ona atalii o Iosefa Samita le Itiiti, o le na suesue i le Tusi Paia, i le sailiga e fia iloa po o le fea o le mau lotu, o le Ekalesia na faatuina e Iesu Keriso. Na musuia o ia i upu o le Tusi Paia ina ia tatalo mo se malamalamaaga atili i le faaleagaga ma se poto mai le Atua. I lona pulunaunau e saili le poto ua folafolaina mai i tusitusiga paia, na tootuli ai Iosefa i le tatalo faamaulalo i le amataga o le tautotogo o le 1820. E maeu, le ofoofogia o le malamalama ma le upumoni na tuuina atu ia te ia i lena aso, a o ia vaaia le faaaliga mamalu o le Atua le Tama ma le Alii o Iesu Keriso! Ua toe valaauina ai nei e le Atua se perofeta e pei ona Ia faia i aso o Noa, Aperaamo, ma Mose.
E matuai tatau lava ona tatou faafetai mo le Tusi Paia. O totonu [o le Tusi Paia] e mafai ona tatou aoaoina ai e le gata o le soifuaga ma aoaoga ma mataupu a Keriso, tatou te aoao ai foi i Lana Ekalesia ma Lana perisitua ma le faalapotopotoga na Ia faatuina ma faaigoa o le Ekalesia a Iesu Keriso i na aso ua mavae. Tatou te talitonu i lena Ekalesia, ma tatou te talitonu O Le Ekalesia a Iesu Keriso o le Au Paia o Aso e Gata Ai o le ekalesia lava lena e tasi, ua toefuataiina mai i le fogaeleele, ua atoatoa faatasi ma lena lava faatulagaga ma lena perisitua e tasi.
Ana le seanoa le Tusi Paia, semanu tatou te le iloaina Lana Ekalesia i lena taimi, semanu tatou te le maua foi le atoatoaga o Lana talalelei i le taimi nei.
Ou te fiafia i le Tusi Paia. Ou te fiafia i ana aoaoga ma ana lesona ma lona agaga. Ou te fiafia i tala faatauanau ma le moni o le Feagaiga Tuai, ma ona Perofeta maoae o loo molimau mai e uiga i le afio mai o Keriso. Ou te fiafia i malaga faaaposetolo ma vavega ma tusi a Paulo i le Feagaiga Fou. Ae sili ai lava, ou te fiafia i tala vaaitino o afioga ma faataitaiga ma le Togiola a lo tatou Faaola o Iesu Keriso. Ou te fiafia i le faamoemoega ma le filemu lea e oo mai i le faitauina o le Tusi Paia.
Uso e ma tuafafine, ou te mautinoa e toatele outou na oo i ai le aafiaga o le faalogoina o tagata o faapea mai “O Mamona e le o ni Kerisiano ona o loo i ai lava le latou Tusi Paia, o le Tusi a Mamona.” I soo se tasi e talitonu i lenei manatu sese, matou te faapea atu, matou te talitonu i le Alii o Iesu Keriso o lo tatou Faaola, ma o le pule o lo tatou faaolataga, ma matou te talitonu, faaaloalo ma alolofa i le Tusi Paia. E i ai a matou tusitusiga paia faaopoopo e aofia ai le Tusi a Mamona, ae e lagolago atu i le Tusi Paia, e le faoa pe suitulaga ai.
Na aoao mai Iesu e ao ona tatou “suesue i tusi; aua … o loo molimau ia te au” (Ioane 5:39). O nei upu ua tuuina mai ai aoaoga ma musumusuga ia i latou uma o e saili faamaoni ina ia iloa ma malamalama i le upumoni e uiga ia Iesu Keriso. E tamaoaiga tusitusiga paia i le talafaasolopito, aoaoga faavae, tala, lauga, ma molimau, o ia mea uma e taulai tonu atu i le Keriso faavavau ma Lana misiona faaletino ma le faaleagaga i fanau a le Tama Faalelagi.
E talitonu tagata O Le Ekalesia a Iesu Keriso o le Au Paia o Aso e Gata Ai, “o Tusi Paia uma lava e mai le Agaga o le Atua ia, ma e aoga” (2 Timoteo 3:16). Tatou te fiafia i le Tusi Paia ma isi tusitusiga paia. Atonu o se mea lena e faateia ai isi o e atonu e le o silafia lo tatou talitonuga o le Tusi Paia o se afioga ua faaalia mai a le Atua. O se tasi o poutu o la tatou talitonuga, o se molimau mamana i le Faaola ma le faatosinaga faifaipea a Keriso i olaga o i latou o e tapuai ma mulimuli ia te Ia. O le tele lava o lo tatou faitau ma suesue i le Tusi Paia ma ona aoaoga, o le manino foi lena o la tatou vaaiga i aoaoga faavae autu o le talalelei toefuataiina a Iesu Keriso. E foliga tatou te fiafia i tusitusiga paia o loo faaaluina ai lo tatou taimi. E ono manaomia ona faapaleni a tatou suesuega ina ia mafai ai ona tatou fiafia ma malamalama i tusitusiga paia uma.
Ae maise lava outou tupulaga talavou, aua nei [outou] manatu mama pe tauleaogaina le Tusi Paia. O le faamaumauga paia, ma le mamalu o le soifuaga o le Alii. O le Tusi Paia o loo i ai le faitau selau o itulau e sili atu ai nai lo le tuufaatasiga o isi a tatou tusitusiga paia. O le faavae o le faaKerisiano uma. Tatou te le faitioina pe ta’u faatauvaaina talitonuga o se tasi. O la tatou matafaioi autu i le avea ai o ni Kerisiano o le faasoa atu lea o mea uma ua faaalia mai e le Atua i Ona atalii ma afafine uma.
O i latou o e auai i lenei Ekalesia, latou te le lafoaiina lo latou faatuatua i le Tusi Paia—latou te faamalosia ai. O le tusi a Mamona na te le suia pe tuuitiitia pe le faamamafaina le Tusi Paia. Nai lo lena, na te faalauteleina, faasafua atu, ma faaeaina. O le Tusi a Mamona e molimau i le Tusi Paia, ma e taufai molimau uma i laua ia Keriso.
O le molimau muamua ia Keriso o le Feagaiga Tuai o le Tusi Paia, lea na muai faailoaina mai ma valoia le afio mai o le Faaola, o Lona soifuaga matagofie, ma Lana Togiola faasaoloto.
O le molimau lona lua a le Tusi Paia ia Keriso o le Feagaiga Fou, lea o loo tusia ai Lona fanau mai, Lona soifuaga, Lana galuega, Lana talalelei, Lana Ekalesia, Lana Togiola, ma Lona Toetu, faapea foi ma molimau a Ana Aposetolo.
O le molimau lona tolu ia Keriso o le Tusi a Mamona, lea foi o loo muai tauina mai ai le afio mai o Keriso, ua faamautuina ai le tala a le Tusi Paia i Lana Togiola laveai, ona faaali mai lea o le asiasi atu a le Alii toetu i le isi itu o le lalolagi. O le ulutala lagolago o le Tusi a Mamona, o le faamoemoega manino ma le faamatalaga o loo lomia i luga o le faavaa o kopi uma lava o le “O Se Tasi Molimau ia Iesu Keriso.”
O nei molimau taitasi e tolu o se vaega atoa o le afioga maoae, ma le le mavavaeina a le Alii i Lana fanau. O loo i ai afioga a Keriso lea na apoapoaiina i tatou ina ia fiafia i ai o se auala e agavaa ai mo le ola faavavau (tagai 2 Nifae 31:20). O i latou o e manatu o le isi itu e sili atu le taua pe sili atu le moni nai lo isi itu, ua latou misia nisi o mea matagofie ma atoatoa o tusitusiga paia ua aloaia le taliaina.
Ma o i latou o e manatu o tagata O Le Ekalesia a Iesu Keriso o le Au Paia o Aso e Gata Ai e le talitonu ia Iesu Keriso po o le Tusi Paia, e tatau ona faaalu se taimi e malamalama ai i le Ekalesia, le taua o lona igoa, ma le mana o lana savali.
Ou te le malamalama i se tasi e fesiligia le talitonu i lenei Ekalesia i le Tusi Paia ma lo tatou tulaga o ni Kerisiano. O le igoa o le Ekalesia O Le Ekalesia a Iesu Keriso o le Au Paia o Aso e Gata Ai. I le tatou konafesi aoao ua tuanai atu, i totonu o lenei maota, na toeitiiti faa 200 ona sii mai e o tatou taitai o le Ekalesia [upu] mai le Tusi Paia. O lenei Ekalesia o loo faatulagaina ma faagaoioia e pei o le Ekalesia na faatuina e Keriso ma Ana Aposetolo i le Feagaiga Fou. O loo susū atu i le tulaga i le aso ia perofeta ma aposetolo a le Alii o Iesu Keriso.
Ou te molimau faamaoni atu o i tatou o tagata talitonu moni ma atoatoa i le Alii o Iesu Keriso, faapea ma Lana afioga ua faaalia mai e ala i le Tusi Paia. E le gata ina tatou talitonu i le Tusi Paia—tatou te taumafai foi e mulimuli i ana mataupu ma aoao atu lana savali. O le savali a o tatou faifeautalai o Keriso ma Lana talalelei ma Lana Togiola, ma o tusitusiga paia o le matua o le upu o lena savali. Matou te faapea atu i tagata uma, “Matou te ofo alofa atu ia te outou ma valaaulia outou e o mai, sei o matou faasoa atu mea uma ua faaalia mai e le Atua.”
Ou uso e ma tuafafine, e tatau ona tatou fesoasoani atu i tagata uma, e aofia ai o tatou lava tagata auai, ia malamalama i le mana ma le taua o le Tusi Paia. O le Tusi Paia o le tusi e paia e taitai atu ai i tatou ma tagata uma ia talia Iesu Keriso o lo tatou Faaola. Talosia ia toina mai e le Atua ia i tatou le manao ma le mana e talia ai ma ola i Ana aoaoga, o la’u tatalo lea ma le lotomaulalo i le suafa o le Alii o Iesu Keriso, amene.