O se Tapeneko i le Vao
O se nofoaga tulaga ese ma le matagofie lenei e potopoto ai.
I lenei aoauli, uso e ma tuafafine, ua tatou toe potopoto ai i lenei Tapeneko logologoa, lea sa tatou potopoto ai muamua i le tele o taimi.
Sa faia le faafouga ma le toefaatulagaga tele o lenei fale ina ia talafeauga ma tulaga faaonaponei e puipuia ai mai mafuie. Ona o lena galuega, matou te faamoemoe ma tatalo e lei faaleagaina ai ona foliga faatalafaasolopito.
O nisi o nofoa tuai sa faasaoina ma o le a faaaogaina pea. Ae pei ona outou matauina, o nofoa fou e malo e pei foi o nofoa tuai!
Ua faaopoopo faitotoa e ulufafo ai ina ia fetaui ma tulaga manaomia faaonaponei. O poutu tetele o loo faia i maa, ia e aofia ai puipui i fafo, ua matuai faamalolosia ma faaleleia. Ua faamalosia foi le taualuga i le faaopoopo i ai o ni iviivi u’amea, ma le taualuga fou ua tuu i ai.
Ou te faamanatu atu ia te outou, o suiga i lenei fale e le fou. E oo lava foi ina ua mavae ni nai aso talu ona fausia, sa toe suia ai. I le taimi muamua, sa leai se fogafale faataamilo, ma o lea na faaopoopo i ai.
I le tele o nei tausaga, sa avea lenei fale ma nofoaga tulaga ese ma le matagofie e potopoto ai. E toatele alii ma tamaitai sa saunoa atu iinei, ma molimau atu ai i le Toefuataiga o le talalelei a Iesu Keriso. Mai le taimi o Polika Iaga seia oo mai i le taimi nei, o perofeta uma lava sa tulei saunoa atu mai lenei pulelaa. Sa saunoa atu ai foi alii ma tamaitai lauiloa, e aofia ai peresitene eseese o le Iunaite Setete. Sa avea ma nofoaga mo faiva alofilima ma aganuu a lenei alalafaga. Sa muai faaaogaina e le Aufaaili a Utah o se nofoaga e faafiafia ai. Sa faia foi iinei faaaliga maoae o faatufugaga, e pei o le Messiah ma le Tanner Gift of Music. Sa faia iinei sauniga o maliu o alii ma tamaitai lauiloa. Sa avea moni lava ma vaaiga taula’i a lenei alalafaga i nei tausaga e tele.
O se fale e tulaga ese lenei, e tasi lava ia i lona ituaiga i le lalolagi atoa. Ua toetoe lava atoa le seneturi ma le afa talu ona fausiaina i ona po o le mativa o o tatou tagata. O le mea moni lava o se Tapeneko sa fausia i le vao. E lei taitai ona uma le malumalu i lena taimi. O i latou na fauina le Tapeneko sa latou fausia ma le faatuatua, faapea foi i o latou tomai faatusiata taufaata’ita’i. O tagata masalosalo, lea e toatele pea lava, sa taumateina faapea afai e aveese le fatamanu, o le a pau ifo i lalo le taualuga. E lei tupu lena mea, ma sa tumau ai pea i aso lagilelei faapea foi ma afa i nei tausaga e tele.
Ua lauiloa i le lalolagi atoa o le nofoaga mautu o le Aufaipese a le Tapeneko, lea ua sili atu ona umi ona faalogoina ana faasalalauga faalevaiaso i le leitio nai lo se isi lava polokalama o faasalalauga, ua silia ma le 75 tausaga, talu mai le 1929.
O lea la, o aso Sapati taitasi, o le a toe avatu ai foi i le lalolagi le Musika ma le Afioga Tulei mai lenei Tapeneko i “fetaulaigaala o Sisifo.” O le a toe avea foi ma nofoaga autu o le Aufaipese a le Tapeneko ma le Aufaaili a le Lotoa o le Malumalu, ma o le a faia ai foi le tele o isi faaaliga ma faamoemoega. O le a faaaoga mo konafesi a siteki ma risone, mo saunoaga faalauaitele, o konaseti faamusika, ma isi faafiafiaga.
O le Millennial Star, sa lolomiina i Egelani, na tusia i le Aso Toonai, 9 o Oketopa, 1875, e faapea na tuuina atu e Ioane Teila se tatalo umi ma le auiliili e faapaiaina ai lenei maota paia i ni nai tausaga ina ua mae’a lona uluai faaaogaina.
O lenei la, o’u uso e ma tuafafine, a o tatou faaiuina lenei sauniga, ou te valaaulia outou uma ina ia tatou auai faatasi e ala i le punonou o outou ulu ma moeiini o outou mata a o tatou tuuina atu se tatalo o le toe faapaiaga.
Tatalo o le Faapaiaga
Le Atua e, lo matou Tama Faavavau, matou te ifo ma o atu i Lau Afio i le migao i lenei faatasiga taua. Ua matou potopoto i lenei Tapeneko maoae, lea ua toe faafou ma toe faamatagofieina ina ua mavae le silia ma se seneturi o faaaoga.
E tusa ai ma le pule o le perisitua paia ma le suafa o Iesu Keriso, matou te faapaia, ma toe faapaiaina ai, ma faasaina lenei, le Tapeneko o Sate Leki, i Lau Afio ma Lou Alo Pele, ina ia avea i le tele o tausaga o le a oo mai o se nofoaga e mafai ona potopoto ai Lou nuu mo le tele o mafuaaga.
A o tatou manatunatu i lenei faatasiga, e liliu atu o tatou mafaufauga i le Perofeta o Iosefa, o le sa avea ma se meafaigaluega i Ou aao i le toefuataiina o le talalelei faavavau a le Alii o Iesu Keriso faatasi ai ma meaalofa uma ma le pule ma faamanuiaga e aumai faatasi ai.
Matou te faafetai atu i Lau Afio ona o le faatuatua tele o o matou tagata o e sa tutuliese mai Navu, ma o ē, e ui i puapuaga tele, e aofia ai le maliliu o le toatele, ae sa sopoia ia Iowa ina ia faatuina Uinita Kuota ma iu ai ina faia le savaliga umi lea na aumaia ai i latou mai Uinita Kuota i lenei vanu o le Vaituloto Masima Tele.
Matou te faafetai atu i Lau Afio mo le taitaiga musuia a Peresitene Polika Iaga, o lē e lei tagai muamua i lenei vanu, sei vagana ai i le faaaliga, na ia taitai mai o matou tagata iinei. Sa laitiiti lava se mea na ia silafia e uiga i lenei eria. Sa lei masani o ia i le eleele po o le tau, o le vai po o isi tulaga. I lenei nofoaga toafa sa suotosina ai e na paionia ma toto, ma fai vaita’i, galueaiina, ma selesele fua o a latou galuega. Sa latou faavaeina se aai, lea ua matua faateleina lava i le fiaselau afe o tagata ua nofoia.
I se tasi taimi o le toatele o le Au Paia o Aso e Gata Ai sa nonofo ai iinei i lenei vanu ma isi eria taulalata mai lea na faavaeina ai nuu. O lenei, ua ola Lau galuega ma ua salalau i le lalolagi seia oo ina tele atu tagata o le ekalesia i fafo atu nai lo lenei atunuu.
Le Tama Pele, faamolemole ia faaauau ai pea ona faaolaolaina Lau galuega. Ia faatupu ina ia faateleina ma ia ola. Ia faamanuia tagata a o latou foai atu a latou sefuluai ma taulaga ina ia mafai ai ona ola ma salalau. Talosia ia agai atu i luma ma faatumulia ai le lalolagi atoa e pei o le maa na tofia mai le mauga e aunoa ma lima o loo taavalevale atu seia tumu ai le lalolagi atoa. Se’i faatula’i e Lau Afio ni taitai malolosi i augatupulaga o le a oo mai, ma ia olioli Lou nuu ma maua le fiafiaga sili i lo latou auauna atu ai i Lau galuega.
O lea, matou te faapaiaina ai, ma toe faapaia, ma faasaina ai lenei maota paia, ma e matou te faia nei mea uma ma ole atu ai i le suafa paia o Iesu Keriso, amene.