O Le Mana e Faafailele Ai i Viiga

Elder Jay E. Jensen

O Le Au Fitugafulu

O viiga e i ai so latou sao taua i le faaleagaga, faaaliga, ma le liuaina.

Ata

Ua tuuina mai e lenei aufaipese ofoofogia ni lauga musuia. O le mea moni lava, “o nisi o timaiga musuia tele lava e tuuina atu lea i le lagiina o viiga.”¹ O la’u molimau ma lo’u liua i le talalelei toefuataiina sa musuia malosi e le lagiina o viiga o Siona a o ou laitiiti. Na ou ola ae i si tamai nuu o Mapleton, Iuta, ma auai atu i sauniga i le mea ua taua nei o le “falesa paepae tuai.” O loo nofo ai lava lo’u tina ua 95 ona tausaga i Mapleton. Afai ou te asiasi atu ia te ia, ou te pasia le “falesa paepae tuai” ma e tele ni mea matagofie ou te manatua ma e faatumulia ai lo’u mafaufau. O se tasi o ia mea e manatua o le mana faaliliu lea o viiga na matou lagiina i sauniga perisitua, Aoga Sa ma sauniga faamanatuga. E tai pei foi o’u aafiaga o aafiaga o Peresitene Hinckley i le taimi a o avea ma se tiakono, sa auai atu ai o ia faatasi ma lona tama i se sauniga perisitua a le siteki. Sa latou lagiina le “Viia Le na Fetaia’i ma Ieova.”² Mulimuli ane sa fai mai o ia, “Na ou maua se lagona lea e le’i aveesea lava ma au, e moni lava o Iosefa Samita o se perofeta a le Atua.”³ Ou te talitonu o le toatele o le tatou Au Paia ua oo faafia i lenei aafiaga. O viiga e i ai so latou sao taua i le faaleagaga, faaaliga, ma le liuaina.

O Viiga e Valaaulia ai le Agaga

O viiga o se “vaega taua o a tatou sauniga lotu. [Latou] te valaaulia le Agaga o le Alii.”⁴ Ma e masani ona vave ona latou faia lenei mea nai lo se isi lava mea e mafai ona tatou faia. Na saunoa Peresitene J. Reuben Clark Jr., “Tatou te latalata atili atu i le Alii e ala i musika nai lo se isi lava mea sei vagana ai le tatalo.”⁵

E toalua ni faifeautalai sa aoaoina se ulugalii matutua i totonu o le la fale i Peru, ae faasalaveia i le taunuu atu o le atalii o le ulugalii, faapea lona toalua, ma le fanau e toatolu. Sa faailoa atu e alii faifeautalai i laua ma le mea na la faia. Sa masalosalo le atalii i faifeautalai, o lea na iu ai i se tulaga faalelelei. Sa tatalo le leoa le soa laitiiti, “Le Tama Faalelagi e, o le a se mea ma te faia?” Na oo mai le musumusuga e pepese. Sa la usuina le pese “O Au se Atalii o le Atua.”⁶ Na pai atu le Agaga i loto o lenei aiga e toalima. Sa le na o le toalua ni tagata na liliu mai, ae na avea uma le toafitu ma tagata o le ekalesia, lea na muai tosinaina e se viiga.

O musika i sauniga ma vasega a le Ekalesia e tatau ona faaosofia ai se agaga tapuai, faaaliga, ma le molimau. Mo sauniga faamanatuga, o le au epikopo po o le au peresitene o le paranesi e nafa ma le filifilia po o le faamaoniaina o musika. Latou te faamautinoa o musika, o upu, ma mea fai musika e paia, mamalu, ma o le a siitia ai le agaga tapuai ma faaaliga. E avea musika ma faafiafiaga pe a taulai atu i le musika lava ia. O tausaga ua mavae, na ou nafa ai ma musika o se sauniga lea na avea ai se musika faapitoa ma se faafiafiaga. O se mea sa le manuia. Sa tau leai se agaga o le tapuaiga.

O Viiga e Valaaulia ai Faaaliga

O viiga e “faatupuina se lagona o le migao.”⁷ O upu migao ma le faaaliga e pei o se masaga e fiafia le tasi i le i ai o le isi. Pe a valaaulia le Au Fitugafulu ma le Au Epikopo Pulefaamalumalu i fonotaga ma le Au Peresitene Sili ma le Toasefululua, e faamanatu mai ia i matou e tatau ona matou vavevave atu ma faalogologo ma le migao i musika e muai tataina. O le faia o lea tulaga e valaaulia ai faaaliga ma saunia ai i matou mo le fonotaga.

Na aoao mai Peresitene Packer e faapea o le tagata e taina lemu ia “musika e muai tataina mai le tusi o viiga, na te faamālūina o tatou lagona ma matua’ia ai ona tatou toe mafaufau i upu ia e aoao mai ai mataupu tau i le filemu o le malo. Afai tatou te faalogologo lelei, o loo latou aoaoina mai le talalelei, aua o viiga o le Toefuataiga, e moni lava, o se lesona lava o aoaoga faavae!”⁸

O Viiga e Valaaulia le Liuaina

O viiga o le Toefuataiga e aumaia faatasi ai ma le agaga o le liuaina. E oo mai o se taunuuga o le ositaulaga. O viiga e pei o le “Viia Le na Fetaia’i ma Ieova,”⁹ “O Mai, O Mai, Outou le Au Paia,”¹⁰ “Outou Faifeau o Isaraelu,”¹¹ “Ia Viia Oe le Atua,”¹² “Faaola o Isaraelu,”¹³ ma le tele o isi e toe faamalosia ai upumoni maoae o le Toefuataiga—e pei o le paia o le Tama ma le Alo, o le fuafuaga o le togiola, faaaliga, tusitusiga paia o aso e gata ai, o le faapotopotoina o Isaraelu, o le perisitua paia, ma sauniga ma feagaiga. O nei viiga faafailele e fatuina ai se siosiomaga e valaaulia ai le Agaga lea e taitaiina atu ai i tatou i le liuaina.

O le a matuai le atoatoa lava ma noa le tulaga e oo i ai sauniga faamanatuga pe a aunoa ma viiga o tapuaiga.¹⁴ O viiga e sili ona paia, o viiga na e faapupula mai ai le taulaga ma le faamaligiina o le toto o Iesu Keriso ma Lana Togiola e le iu.

O mea muamua lava e sili ona ou manatuaina i le mana faamalolo o le Faaola e o faatasi lea ma viiga faamanatuga. O lenei fuaiupu e matuai moni lava ia te au: “Ou te tu ma ofo i le alofa o Iesu, Ma leiloa le ala ua ia alofa ai ia te au.”¹⁵

O lo’u malamalamaaga i aoaoga faavae o le Togiola e fesootai ma viiga. O lenei fuaiupu o se faataitaiga:

“Ma’eu mamalu, ma atoa, 
Le ata o le olataga,
Faamasino tonu ma alofa
Ua tasi i Le paia!”16

O le Aoaoina o Fanau i Viiga e Amata i le Aiga

O le usuina o viiga ma le faalogologo i musika lelei e amata i le aiga. Ua faamanatu mai e le Au Peresitene Sili ia i tatou:

“E tatau i le Au Paia o Aso e Gata Ai ona faatumulia o latou aiga i leo o musika lelei.

“… Matou te faamoemoe o le a avea le tusipese ma se tasi o tusi taua i o tatou aiga faatasi ma tusitusiga paia ma isi tusi faalelotu. E mafai e viiga ona aumai i aiga le agaga o le filemu ma le matagofie ma e mafai ai foi ona uunaia le alofa ma le lotogatasi i tagata o le aiga.

“Aoao a outou fanau ia fiafia i viiga. Pepese ai i le Sapati, i afiafi [faaleaiga], i le taimi e suesue ai i tusitusiga paia, ma taimi o talosaga. Pepese ai a o outou galulue, a o outou taaalo, ma a o outou malaga faatasi. Usu viiga e fai ma pese faamoepepe e atiina ae ai le faatuatua ma le molimau ia outou fanau laiti.”¹⁷

Ia Tapuai Atu ma le Loto Atoa e Ala i Viiga

O lesona taua ua ou aoaoina ma taumafai e ola ai e uiga i viiga o le:

Taumafai ia vave taunuu i sauniga, nonofo filemu ma faalogologo i musika e muai tataina, ma ia maua le migao ma faaaliga.
Ia tuua ia sauniga i se agaga e sili atu ona migao, e mafai ai e le musika o loo tata pe a mae’a ona faalauteleina atu le agaga o le sauniga.
Pepese i viiga. Ua ou vaai i isi tagata e i ai tusipese ae le pepese.
Ia filifili viiga e fetaui ma le sauniga ma savali.
Faaaoga viiga e faailoa atu ai pe faamamafa atu ai ni mau ma upumoni o le talalelei i lesona ma vasega.
Ia faalogologo soo i viiga i totonu o o tatou aiga, e valaaulia ai le Agaga ia mafuta ai.

Ou te tatalo ia mafai ona tatou lafoai soo se musika e lē talafeagai mai o tatou olaga ae mulimuli i le fautuaga a le Au Peresitene Sili: “Uso e ma tuafafine, ia tatou faaaoga viiga e aumai ai le Agaga o le Alii ia tatou potopotoga, o tatou aiga, ma o tatou lava olaga taitoatasi. Ia tatou taulotoina ma manatunatu i ai, tauloto ma usuina, ma taumamafa i a latou tausiga faaleagaga. Ua outou silafia o le pese a le amiotonu o se tatalo lea i lo tatou Tama o i le Lagi, ‘ma o le a tali i se faamanuiaga i o [outou] luga.’”¹⁸ Ou te molimau atu ai i nei upumoni i le suafa o Iesu Keriso, amene.