O Le Perisitua— o se Meaalofa Paia
O lo tatou tiutetauave o le ola lea i o tatou olaga ina ia tatou agavaa pea mo le perisitua o loo tatou tauaveina.
Uso e, ua tatou faapotopoto i lenei afiafi o se tino tele o le perisitua, o e o loo iinei i le Maota Autu o Konafesi faapea isi nofoaga i le lalolagi atoa. Ua faamamaluina a’u i le avanoa e lauga atu ai ia te outou. Ou te tatalo ina ia taitaiina e musumusuga a le Alii o’u manatu ma ia musuia a’u upu.
I nai vaiaso ua tuanai atu, a o o’u mafaufau po o le a se mea ou te lauga atu ai ia te outou i le afiafi nei, sa ou mafaufau ai pea lava i le faamanuiaga lea ua ia i tatou o loo tauaveina le perisitua paia a le Atua. Afai tatou te vaavaai i le lalolagi atoa, ma se faitau aofai e silia ma le 61/2 piliona tagata, ona tatou iloaina ai lea o i tatou ua na o se vaega toaitiiti, ua filifilia. O i tatou o e ua umia le perisitua, “o se tupulaga filifilia, o le nuu paia”1 o upu ia a le Aposetolo o Peteru.
Na faauiga e Peresitene Iosefa F. Samita le perisitua o “le mana o le Atua ua faasafua mai i le tagata e galue ai i le lalolagi mo le faaolataga o le aiga o tagata, … lea e mafai ai e [tagata] ona tautatala i le finagalo o le Atua e pei ona fetalai mai o agelu lava ia; lea e faatagaina ai tagata e soo se mea e fusifusia i le lalolagi e fusifusia foi i le lagi, ma o mea e tatalaina i le lalolagi e tatalaina foi i le lagi.” Na faaopoopo mai Peresitene Samita, “[O le perisitua] e paia, ma e ao ona tausia i le paia e tagata.”2
O’u uso e, o le perisitua o se meaalofa e aumaia ai e le gata na o faamanuiaga faapitoa ae faapea foi ma tiutetauave paia. O lo tatou tiutetauave o le ola lea i o tatou olaga ina ia tatou agavaa pea mo le perisitua o loo tatou tauaveina. Ua tatou ola i se taimi o loo siomia ai i tatou e le tele o mea ua faamoemoe e faatosina atu ai i tatou i ala e mafai ona faatafunaina ai. Ina ia aloese mai ala faapena e moomia ai le naunautaiga ma le lototele.
E taulia le lototele. Na oo mai lenei upumoni ia te au i se tulaga sili ona manino ma tulaga ese i le tele o tausaga ua mavae. Sa ou auauna atu o se epikopo i lena taimi. O le sauniga aofai o le matou konafesi a le siteki sa faia i le Maota o Potopotoga i le Lotoa o le Malumalu i le Aai o Sate Leki. Sa toe faatulagaina le au peresitene o le matou siteki. O le Perisitua Arona, e aofia ai le au epikopo, sa saunia musika mo le konafesi. A o faaiu le matou pese na usuina muamua, sa savali atu Peresitene Iosefa Filitia Samita, o lo matou ta’ita’i na asiasi atu i le konafesi, agai i le pulelaa ma faalau mo se palota lagolago ia igoa o le au peresitene fou o le siteki. Ona ia ta’ua lea o Percy Fetzer, o le na avea ma o matou peresitene fou o le siteki, ma John Burt, o le na avea ma fesoasoani muamua—sa taufai avea i la’ua ma fesoasoani i le au peresitene na i ai muamua—na la silafia o la’ua valaauga a o lei amataina le konafesi. Peitai, sa ia ta’ua faapea o a’u, lea ua tofia e avea ma fesoasoani lua i le au peresitene fou, e le’i iloaina muamua le valaauga ma o lea ua faatoa faalogo i ai mo le uluai taimi, a o faalau mai lo’u igoa mo le palota lagolago. Ona ia faalau mai lea, “Afai e fiafia Uso Monson e talia lenei valaauga ina ia avea ma se fesoasoani i le au peresitene o le siteki, o le a tatou fiafia foi e faalogo atu ia te ia.”
A o o’u tu i le pulelaa ma sioa atu i le anoanoai o foliga eseese, sa ou manatuaina le pese lea sa matou faatoa usuina. E faatatau i le Upu o le Poto ma sa faaulutalaina, “Ia Lototele, Lo’u Atalii e, e Fai Atu e Leai.” O lena aso na ou filifilia ai e avea ma a’u autu o le taliaina le, “Ia Lototele, Lo’u Atalii e, e Fai Atu Ioe.” E oo mai pea e le aunoa ia i tatou taitoatasi le valaau mo le lototele—o le lototele e tu mausali mo o tatou talitonuga, o le lototele e faataunuuina o tatou tiutetauave, o le lototele e faamamaluina lo tatou perisitua.
Po o fea lava tatou te o i ai, tatou te o faatasi ma lo tatou perisitua. Pe o tatou tutu ea i “nofoaga paia”?3 Na saunoa ai Peresitene J. Reuben Clark, Jr., o le sa avea mo le tele o tausaga o se fesoasoani i le Au Peresitene Sili, “O le Perisitua e le faapei o se suti e mafai ona e toese ma toe faamaulu. E faalagolago ia te outou lava, o se faaeega e faavavau.”Sa ia faaauau, “Afai e ia i tatou moni lena talitonuga … lea e le mafai ona tatou faataatiaese [le perisitua], ma o le a faamasinoina i tatou e le Atua pe afai tatou te [tuumaualaloina], o le a faasaoina ai i tatou mai le faia o ni mea se tele, e faasaoina ai i tatou mai le o atu i ni nofoaga se tele. Afai o taimi uma e amata ai ona tatou o ese mai le ala sao ma le vaapiapi, o le a tatou manatua ai, ‘O loo o’u tauaveina le Perisitua iinei. Pe tatau ea ona ou faia lenei mea?’ o le a le umi ae toe faafoi i tatou i le ala sao ma le vaapiapi.”4
Na saunoa Peresitene Spencer W. Kimball, “E leai se tapulaa i le mana o le perisitua ua outou umia. E oo mai le tapulaa pe afai tou te le ola e tusa ai ma le Agaga o le Alii ma ua outou faatapulaaina outou lava i le mana ua outou faaaogaina.”5
O’u uso e o le perisitua—mai e laiti e oo i e matutua—pe o outou ola ea i ni olaga e tusa ai ma le mea o loo manaomia e le Alii? Pe o outou agavaa ea e tauaveina le perisitua a le Atua? Afai e leai, ia fai nei le faaiuga iinei, ia maua le lototele e faia ai, ma faatulagaina soo se suiga e moomia ina ia oo lou olaga i le mea e tatau ona i ai. Ina ia folau saogalemu i vasa o le olaga nei, tatou te manaomia le taitaiga a lena tautai faavavau—o Ieova le silisiliese. Afai o loo tatou i ai i le galuega a le Alii, ua i ai foi le tatou aia tatau mo fesoasoaniga a le Alii.
E anoanoai taimi i lo’u olaga atoa, na oo mai ai Lana fesoasoani ia te au. I le faagasologa o laasaga faaiu o le Taua Lona II o le Lalolagi, sa atoa ai lo’u 18 ma sa faauuina ai a’u o se toeaina—i le toe tasi le vaiaso ae ou malaga ese mo tiute i le Neivi. Sa i ai se uso o le au epikopo o le matou uarota i le nofoaga o nofoaafi e faamavae atu ia te au. A o lei oo i le taimi o le nofoaafi, sa ia tuuina mai i lo’u lima se tusi lea ou te uuina atu i o outou luma i lenei afiafi. O lona igoa: O Le Tusitaulima a le Faifeautalai. Sa ou ata ma faapea atu, “O lea ou te alu i le Neivi—ae le o se misiona.” Sa ia tali mai, “Ave pea. Atonu lava e aoga.”
Sa aoga. I le faagasologa o a matou aoaoga amata na faatonuina ai i matou e lo matou taitai e faatatau i le auala sili e teu ai o matou lavalava i se ato tele e faaaoga i le sami. Sa ia fautua mai, “Afai e i ai se mea malo laumiumi faatafafa e mafai ona e tuuina i le pito i lalo o le ato, o le a matuai maopoopo lelei ai ou lavalava.” Sa ou mafaufau, “O fea a ou maua ai se mea malo laumiumi faatafafa?” Na faafuasei ona ou manatuaina le mea laumiumi faatafafa—O Le Tusitaulima a le Faifeautalai. Ma sa faapena ona tautua ai mo le 12 vaiaso i le pito i lalo o le ato i le sami.
I le po a o lumanai le matou malologa o le Kerisimasi, sa matou mafaufau ai lava i aiga, e pei ona masani ai. Sa toafilemu le nofoaga atoa. E lei leva ae ou iloaina o la’u uo i le isi moega ma te sosoo—o se tagata o le Ekalesia, o Leland Merrill—sa oi i le tiga. Sa ou fesili atu, “O le a le mea ua tupu, Merrill?”
Sa ia tali mai, “Ua ou ma’i. Ua ou matuai ma’i lava.”
Sa ou fautuaina o ia e alu i le falemai a le neivi, ae sa tali mai ma le iloa afai e faia lena mea, e ono taofia o ia mai le alu i lona aiga i le Kerisimasi. Ona ou fautuaina lea e aua le pisa nei feala uma mai fitafita.
Ua alu lava le taimi; ua faateteleina lona oi. I le naunautai, sa ia musumusu mai ai, “Monson, e le o oe o se toeaina?” Sa ou faailoa atu o lea lava, o lea sa ia aioi mai ai, “Tuu mai so’u faamanuiaga.”
Na ou matuai malamalama lelei ou te le’i tuuina atu lava se faamanuiaga. E le’i faia foi so’u faamanuiaga faapena; ou te le’i molimauina foi le tuuina atu o se faamanuiaga. O la’u tatalo i le Atua o se olega mo le fesoasoani. Na oo mai le tali: “Vaai i le pito i lalo o le ato mo le sami.” O lea, i le 2.00 i le vaveao sa ou sasaaina ai i luga o le fola ia mea uma sa i totonu o le ato. Ona ou aveina lea i le malamalama lena mea e laumiumi faatafafa, le Tusitaulima a le Faifeautalai, ma faitau ai i le auala e faamanuia ai le ma’i. Tusa ma le 120 seila sa vaavaai atu ma le fia iloa, a o ou faatinoina le faamanuiaga. A o le i maea la’u faamanuiaga, ua matuai moegapepe ia Leland Merrill e pei o se tamaitiiti.
O le taeao na sosoo ai sa faliu mai ai ia te au Merril ma ataata ma fai mai, “Monson, ou te faafetai ona o loo e umia le perisitua!” Sa faaalia lona fiafia ae sa sili atu ai lo’u loto faafetai—e faafetai e le gata mo le perisitua, ae mo le agavaa e taliaina le fesoasoani sa ou moomia i se taimi sa manaomia ai ma faaaogaina le mana o le perisitua.
Uso e, ua fetalai mai lo tatou Alii ma le Faaola, “Sau, ma mulimuli mai ia te au.”6 Afai tatou te talia Lana valaaulia ma savavali i Ona tulagaaao, o le a Ia taialaina o tatou ala.
Ia Aperila o le 2000, sa ou lagonaina ai se taitaiga faapena. Sa ou mauaina se telefoni mai ia Rosa Salas Gifford, o se tamaitai ou te le masani ai. Sa ia faamatalaina mai faapea o ona matua o loo asiasi mai Costa Rica mo ni nai masina ma pe toe vaiaso maua lona valaauga, sa maua ai lona tama o Bernardo Agusto Salas, i le kanesa o le ate. Sa ia faailoa mai faapea ua logoina e fomai le aiga e faapea e le o toe umi ni aso e ola ai le tama. O le faanaunautaiga sili o lona tama, o le feiloai mai lea ia te a’u a o le’i maliu. Sa ia tuu maia lona tuatusi ma sa fesili mai pe mafai ona ou alu atu i lona fale i le Aai o Sate Leki e feiloai i lona tama.
Talu ai ona o fonotaga ma isi tuatuagia, na tuai ai ona ou tuua lo’u ofisa. Ae peitai, ou te le’i alu sao i le fale, aua sa uunaia au e tatau ona ou tietie atu pea i saute e asiasi ia Uso Salas i lena lava afiafi. Faatasi ai ma le tuatusi i lo’u lima, sa ou taumafai loa e saili le nofoaga. I le pisi o taavale, ma le mumu itiiti o moli, sa ou tietie atu ai ma pasia le nofoaga lea sa tatau ona i ai le auala i le fale. E leai se mea na ou vaaia. Peitai, ou te le fiu gofie. Sa ou tietie faataamilo i le atufalega ma toe foi mai. E leai lava se mea. Sa ou toe taumafai, ae leai lava se faailo o le auala. Sa amata ona ou lagonaina ua faamaonia lo’u toe foi loa i le fale. Sa ou faia se taumafaiga lototele ae le’i faamanuiaina i le sailiga o le tuatusi. Nai lo lo’u toe foi, sa ou faia se tatalo lemu mo se fesoasoani. Na oo mai le musumusuga e tatau ona ou agai atu i le eria lena mai le isi ituala. Sa ou tietie teisi atu ma liliu le taavale ma o lea ua ou i ai nei i le isi itu o le auala. O le alu agai i le itu lea, e faaleai ni taavale. A o ou taulalata atu i le nofoaga, sa mafai ona ou iloaina atu i se moli mumu itiiti, se faailo o le auala sa pau i lalo—o loo taatia mai i autafa o le auala—ma se auala e tau le iloa e tau atu i se tamai fale mau totogi ma se tamai fale e tumamao ese mai le alatele. A o o’u tietie agai atu i fale, sa talotalo mai se teineitiiti e ofu paepae ia te a’u, ma na ou iloa ai ua ou maua le aiga.
Sa faasino atu au i totonu o le fale ona agai atu ai lea i le potu sa taoto ai Uso Salas. Sa siosiomia le moega e ona afafine e toatolu ma se atalii faaletulafono e toatasi, faapea foi Tuafafine Salas. O i latou uma e mai Costa Rica sei vagana ai le atalii faaletulafono. O foliga vaaia o Uso Salas sa atagia ai le mafatia o lona tulaga. O se fasi ieie susu e masaesae pito—e le o se solo po o se fasi solo taele ae o se ieie susu e masaesae pito—sa i luga o lona muaulu, e faailoa mai ai le maualalo o le tulaga o le tamaoaiga o le aiga.
Faatasi ai ma sina uunaiga, sa pupula mata o Uso Salas, ma se ataata vaivai i ona laugutu a o o’u uuina lona lima. Sa ou fai atu, “Ua ou sau ta te feiloai.” Sa maligi ona loimata ma e faapena foi au.
Sa ou fesili pe manaomia se faamanuiaga, ma sa tali uma mai tagata o le aiga i le ioe. Talu ai e le’i umia e le atalii faaletulafono le perisitua, o lea sa ou faaauau ai na o au ma tuuina atu se faamanuiaga faaleperisitua. Na foliga mai na oo mai lava upu latou i le taitaiga a le Agaga o le Alii. Sa ou tuu i ai ma afioga a le Faaola o loo maua i le Mataupu Faavae ma Feagaiga, vaega 84, fuaiupu 88: “Ou te muamua atu i o outou luma. Ou te i ai foi i lo outou itu taumatau ma lo outou itu tauagavale, a o lo’u Agaga o le a i o outou loto, e siomia foi outou e a’u agelu, e lagolagoina outou.” Ina ua maea le faamanuiaga, sa ou tuuina atu ni nai upu faamafanafana i le aiga faanoanoa. Sa ou tautala ma le faaeteete ina ia latou malamalama i la’u faaPeretania. Ona ou faailoa atu lea i si a’u faaSipaniolo feoloolo lo’u alofa ia i latou ma o le a faamanuia i latou e lo tatou Tama Faalelagi.
Sa ou fesili atu mo se Tusi Paia a le aiga ma faasino i latou i le 3 Ioane, fuaiupu e 4: “E leai so’u fiafia e sili i lenei, pe a ou faalogo ua savavali la’u fanau i le upumoni.” Sa ou fai atu ia i latou, “O le mea lenei e manao lou toalua ma lo outou tama ia outou manatua a o ia sauni e tuua lenei olaga faalelalolagi.”
Faatasi ai ma loimata sa tafe ifo i ona foliga, sa talosaga mai le faletua o Uso Salas pe mafai ona ou tusia atu mau e lua ia sa ou faasoaina atu ia i latou ina ia mafai e le aiga ona toe faitau i ai. I le leai ma se mea sa ia te au e mafai ona ou tusitusi ai, sa aapa ifo Tuafafine Salas i lana ato ma toese mai se fasi pepa. A o o’u aveeseina mai ia te ia, sa ou iloaina ai o se lisiti sefuluai. Sa ootia lo’u loto i lo’u iloaina lea, e ui i tulaga maualalo o loo ola ai le aiga, ae sa latou faamaoni lava i le totogiina o a latou sefuluai.
Ina ua uma ona matou faamavae, sa toe taitai atu au i la’u taavale. A o o’u tietie atu agai i le fale, sa ou toe tomanatu i le agaga faapitoa sa matou lagonaina. Sa ou iloaina ai, e pei ona i ai i le tele o taimi, se lagona o le faafetai ona ua talia e lo’u Tama Faalelagi le tatalo a se isi tagata e auala ia te au.
O’u uso e, ia tatou manatua pea lava o le perisitua a le Atua o loo tatou tauaveina o se meaalofa paia lea e aumaia ai ia i tatou ma i latou o e tatou te auauna atu i ai ia faamanuiaga o le lagi. Ia tatou faamamaluina ma puipuia lena perisitua i soo se mea tatou te i ai. Ia tatou i ai pea lava i le galuega a le Alii, ina ia tumau pea ona tatou maua le fesoasoaniga a le Alii.
O loo i ai se taua o loo faia mo agaga o tagata—o outou agaga ma au. O loo faaauau pea e aunoa ma se faavaivaia. E pei o se valaau manino le oo mai o le afioga a le Alii ia te oe, ma au, ma e uma ua umia le perisitua i soo se mea: “O lea, ia taitoatasi ai le tagata ma aoaoina lana tiute, ma galue i le tofi ua tofia ai o ia, i le maelega atoatoa.”7
Ia tatou maua le lototetele e faia ai faapea, ou te tatalo ai, i le suafa o Iesu Keriso, amene.