Tautinoga i le Alii
O le taimi lenei e fai ai sau lava tautinoga i le Alii, pe o le a le ituaiga tagata o le a avea ai oe i lenei olaga faataitai.
Talofa uso e ma tuafafine. Ou te fia talanoa atu i le autalavou a le Ekalesia i lenei taeao e pei o loo ma fautuaina ma Sister Dickson lo maua lava aiga.
Matou te iloa ua outou i ai i se augatupulaga o le autalavou ua maoae le atamamai, ma o le a le toe umi ae outou tauaveina o matou tulaga o ni taitai i le aiga, i le galuega, i le alalafaga ma le Ekalesia.
E alofa lo outou Tama Faalelagi ia te outou taitoatasi, ma ua auina mai outou i le lalolagi ma se faamoemoega. Ua Ia faailoa mai se fuafuaga o le fiafia, lea, afai e mulimulitaia, o le a iu ina aumaia ai outou i Lona afioaga, ua manumalo i tofotofoga ma luitau o lenei lalolagi. O le faia o sau lava tautinoga i le taimi nei e ola i le mamanu ua faatulagaina e le Alii, o le a e maua ai le malosiaga sili i le faaaogaina lelei o lau filifiliga saoloto. O tautinoga faamaoni e te faia ia te oe lava ma le Alii o le a taua tele. Ua tatou aoao mai i le tusi o Salamo “ia e tuuina atu lou ala ia Ieova; … ona faia lava lea e Ia” (Salamo 37:5).
Ua outou o mai i lenei lalolagi i se taimi na valoia mai le amataga—o se taimi a o lumanai le Afio Mai Faalua o le Alii, lea, i se isi itu, ua toefuatai mai ai le Talalelei a Iesu Keriso i lona atoatoa, ae i le isi itu, ua maoae le faigata, le mautonu ma le amioleaga. O le lalolagi o tofotofoga ua faapea ona outou fananau mai i ai e matagofie, ua i ai le tele o avanoa, ae o le taimi lava foi lea, ua matuai faateleina le leaga, e oo lava i le leaga o le tagata lava ia. O le taimi lenei e fai ai sau lava tautinoga i le Alii, pe o le a le ituaiga tagata o le a avea ai oe i lenei olaga faataitai. Faatasi ai ma o outou matua, perofeta soifua ma tusitusiga paia, o le a fesoasoani atu le Agaga Paia ia te outou ia iloa le eseesega o le lelei ma le leaga, ina ia mafai ona [outou] faia filifiliga sa’o.
E faamoemoe o le a outou suesueina ma le agaga tatalo le tamaitusi, Mo Le Malosi o le Autalavou, ma faamanatu ma feaveai i lau atotupe, le kopi o le faapuupuuga o le tamaitusi. O le a oo atu ia te oe le fiafia tele i lenei olaga ma le faavavau pe a e filifili i le taimi nei e ola i le mamanu ua faamatalaina i ona itulau.
Sei ou fesoasoani atu ia te outou ia malamalama i le auala e mafai ona fesoasoani atu ai lenei mamanu o le vave faia o tautinoga, e ala i le faamatala atu o se aafiaga a se tasi o taitai o le Ekalesia. A o avea ma se alii talavou, na tonu ia te ia o le a ia tausia i taimi uma le Upu o le Poto, ma lē faaaogaina lava le ava malosi po o le tapaa. Na te le manatua pe o le a le mea na faaosofia o ia e faia lena tautinoga taua i lena taimi, ae o se faaeaina taua na manumalo i lona loto, ma na tootuli ai ma faia se tautinoga ma le Alii o le a ia tausia e le aunoa lena poloaiga. I le mavae ai o tausaga, na leai ni valaaulia mo ia e faaaogaina nei mea, ae na ia aoaoina o le “leai, faafetai” o se tali lelei. Sa leai se taua patino ma le Upu o le Poto aua o tausaga na muamua atu, na ia faia ai se tautinoga i lona loto, ma na ia faia ma le faamaoni se tautinoga i le Alii e usitai i lena tulafono.
A o e saili e maua faamanuiaga a le Tama Faalelagi e uiga i le Upu o le Poto, ia faaaofia ai se tautinoga e te le tagofia lava fualaau faasaina lea ua matuai malosi i le lalolagi i aso nei. O le a laitiiti lava se mana o le tiapolo e faaosoosoina oe i mea e te le’i tagofiaina.
I le avea ai ma tagata o le Ekalesia, ua papatisoina i tatou ma ua osi feagaiga e tauave i o tatou luga le suafa o Iesu Keriso ma tausi poloaiga a le Atua. Afai e faia ni mea sese, e faatagaina i tatou e le talalelei e salamo faamaoni ma ia faamagaloina. O lau tautinoga e mafai ona amata atu i le tulaga o loo e i ai nei, pe laitiiti pe matua, e aofia ai le salamo ma lafoai agasala pe afai ua faia ni agasala.
Ua folafola mai e le Alii ni folafolaga maoae, ma faavavau i Ana fanau amiotonu, ma ua salamo, ae i le silafiaina o loo i ai se tulaga matautia tele i lenei olaga, ua Ia poloaiina ai i tatou, e faapea “Ia faaeteete ia te outou lava, ma gauai ma le filiga i upu o le ola faavavau” (MFF 84:43). Talu ai ona e alofa o Ia ia i tatou ma finagalo ia tatou toe foi atu, o lenei poloaiga ia “faaeteete ia te [i tatou] lava” e faaosofiaina i tatou ina ia faaeteete i mea uma ua siomia ai i tatou—o ituaiga nofoaga faafiafia tatou te ulufale atu i ai, o mea tatou te vaai ma faitau i ai, o ala o faasalalauga ma faafiafiaga tatou te filifilia, o musika tatou te faalogologo i ai, ma le anoano o isi mea.
O le faatulagaina o se mamanu o le vave faia o se tautinoga e taua tele. Mo se faataitaiga, ina ia maua faamanuiaga ua folafolaina mai ia i latou o e totogi sefuluai ma taulaga, e tatau ona outou tautino nei e totogi le sefuluai i tupe maua uma. O le totogiina o le sefuluai e fesoasoani ai ia i tatou e tuuitiitia le manatu faapito ae ia avea atili ai e pei o lo tatou Tama Faalelagi, o le e finagalo e faasoa mai mea uma o loo ia te Ia i Lana fanau amiotonu. O le faia o lena filifiliga o le a matuai taua lava. E malie i le matau, e pei o le sefuluai, o poloaiga uma ua fuafuaina mo lo outou fiafia e faavavau ma fesoasoani ia te outou ia avea atili ai e pei o lo outou Tama oi le Lagi. Ia filifili nei ia pei o Nifae o anamua, o le na matuai naunau lava e “alu atu ma fai ia mea [na] poloaiina e le Atua” (1 Nifae 3:7).
Ia tatou mafaufau nei i isi tautinoga o le a faamanuiaina ai o outou olaga. Pe e le matagofie ea pe afai, e tusa lava po o a mea a isi tamaiti i le aoga e fai, e amata atu i le taimi nei, o le a iloa oe i lou faamaoni aiai ma lau gagana mama? Ia filifili nei o le a e le kopi lava; o le a mama lau gagana; pe o le a lava le umi e te ola ai, o le a le alu atu lava mai ou laugutu ni upu masoa po o ni upu tausua [le mama]. O tautinoga nei e mafai ona e faia i le filemu o lou potu ma i ou tulivae. O le a oo mai le faamanuiaina ia te oe ao e alu atu i le faamaoni, agaga tatalo ma le lotomaulalo i le Alii. Ua aoao mai tusitusiga paia, “Ia e loto maulalo; ona taitaiina ai lea o oe e le Alii lou Atua, ma tali atu i au talosaga” (MFF 112:10).
O le a e manao foi e faia ni tautinoga e uiga i le tauagafau o lavalava ma ituaiga amioga pe a e tafao faamasani. O le tausia o tulaga faatauaina a le Alii e masani ona faigofie atu pe afai ua uma ona e iloiloina lau taga e fai pe a e fetaiai ma ni filifiliga a o faatasi ai lau uo faamasani, uo po o [lau] tupulaga. Atonu o le a le malamalama nisi tagata i ou tulaga faatauaina a o e mulimuli i mataupu faavae amiotonu ma tausia au tautinoga, ae e mautinoa lava o le a latou faaaloalogia ma faamemelo ia te oe, ma moomoo maimau pe ana latou pei o oe.
O isi tulaga faatauaina e mafaufau loloto i ai ma tautino i ai: o le mama atoatoa ma le mama mai feusuaiga, tausia o le Aso Sapati, sauniuniga mo ni misiona ma le malumalu, ma se naunautai e ‘ai ma inu e le aunoa ma le agavaa i le faamanatuga.
E alofa Peresitene Hinckley i le autalavou ma ua faafia ona faamalosiau atu ia te outou ina ia mulimuli i tulaga faatauaina ua faatulagaina e le Alii. O le mulimuli i uunaiga ma fautuaga a se perofeta soifua, o le a taitaiina atu ai oe i se ala i le faavavau po o le fiafia e faavavau.
A o outou tautino nei e faia le finagalo o le Alii, o le a Ia fesoasoani atu ma faamalolosia outou. O lo outou faatuatua, faalagolago ma le naunau e mulimuli ia te Ia, o le a avea ma a outou ki maoae i le faamanuiaina. Ou te iloa e alofa lo tatou Tama Faalelagi ia te outou taitoatasi, o lea na Ia auina mai ai Lona Alo Pele e Toatasi e fesoasoani ia te outou ina ia mafai ona outou manumalo ma le mamalu a o outou tautino atu ma le faamaoni e mulimuli ia te Ia. I le suafa o Iesu Keriso, amene.