Ia Savavali i le Ala
O nisi taimi tatou te mafaufau ai e mafai ona tatou ola i le faatausiusiuga ae tumau lava lo tatou amioatua.
I se tasi o alasopo i se ana i talaane o lo’u fale, o loo i ai se faailo faapea, Ia Savavali i le Ala. A o amata ona savali se tagata i luga o lena alasopo, e vave ona matua manino o se apoapoaiga poto tele lea. E i ai a’ega ma afega ma vaega tifato. O nisi vaega e le mau lelei le eleele i luga atu o le ala, ma e i ai vaitau patino o le tausaga, e vaaia ai se gata uogo. O la’u savali mo outou taitoatasi i le po nei, o le savali lava e tasi e pei o le savali a lena faailo—Ia Savavali i le Ala.
I nai tausaga ua mavae, sa matou o ai ma se vaega o tamaitai talavou i se malaga ma ato faafafa i le Mauga o Teton i Wyoming. O se malaga sopo faigata, ma i le aso lona lua, sa matou taunuu ai i se vaega aupito matautia o le savaliga. Sa tuu matou te o e sopo i le Hurricane Pass—ua talafeagai lava le faaigoaina ona o matagi malolosi e masani ona agi ai iina. Sa faatonu i matou e se alii ofisa e vaaia lea nofoaga, ia savavali i le moa o le ala, ia savavali faano’uno’u i le mea sili e mafaia i le vaega o le alasopo e leai ni laau o i ai, ia tuu uma mea i totonu o a matou ato, ma savavali faanatinati. E le pueina ni ata ii pe faifaiaga ai foi. Sa matuai ou toafilemu ma fiafia ina ua pasia ma le saogalemu e tamaitai talavou taitoatasi lena eria. Tou te silafia—e leai ma se tasi o i latou na fesili pe o le a le latalata e mafai ona latou savavali ai i le faatausiusiuga!
O nisi taimi a o tatou savalia le ala i le olaga, tatou te mananao e faamaimau taimi i nofoaga matautia, ma mafaufau e malie ma sagisagi fiafia ai ma o lea tatou te pulea lava i tatou. O nisi taimi tatou te mafaufau ai e mafai ona tatou ola i le faatausiusiuga ae tumau lava lo tatou amioatua. Peitai, o se vaega matautia tele lena. E pei ona ta’u mai e le Perofeta o Iosefa Samita ia i tatou, “O le fiafia o le faamoemoega lena o lo tatou i ai iinei; ma o le iuga foi lena, pe afai tatou te tulimatai atu i le ala e tau atu i ai; ma o lena ala o le amioatua” (History of the Church, 5:134–35).
O le apoapoaiga a le Alii ia Ema Samita i le Mataupu Faavae ma Feagaiga vaega e 25, o Lana apoapoaiga foi lea i Ona afafine faapelepele uma. O iina ua aumai ai ia te i tatou se mamanu o le amio ma ua fautuaina ai ina ia “savavali i le ala o le lotomama” (f. 2). O le amioatua “o se ata vaaia o mafaufauga [po o] amioga e faavae mai tulaga faatonuina maualuluga o le amio” (Tala’i La’u Talalelei [2004], 121). O a la tulaga maualuluga faatonuina o le amio e fesoasoani ai ina ia tatou amioatua?
O le amioatua e aofia ai le tausaafia—i mafaufauga, gagana, lavalava, ma le amio. Ma o le tausaafia o le faavae lea o le ola mama. E pei lava ona le savali sopo se tasi e aunoa ma ni seevae i auala e nofoia e gata uogo, e faapena foi i le lalolagi i aso nei, e alagatatau i lo tatou lava saogalemu le tausaafia. A tatou tausaafia, ua tatou ta’u atu i isi tatou te malamalama i lo tatou sootaga ma lo tatou Tama oi le Lagi i le avea ai ma ni Ona afafine. Tatou te faaali atu tatou te alolofa ia te Ia ma o le a tatou laulaututu e fai ma molimau ia te Ia i mea uma. O le tausaafia e iloa ai e isi, tatou te “faapelepeleina le amioatua” (“Dearest Children, God Is Near You,” Viiga, nu. 96). O le tausaafia e le faatatau i ni “sitaili.” O se tulaga e faatatau i le loto ma le paia. E le faatatau i ni sitaili fou. E faatatau i le faamaoni. E le faatatau i le avea ma se [teine] mamafa. E faatatau i le amio mama ma le tausia o feagaiga. E le faatatau i le lauiloa, ae o le mama aiai. O le tausaafia e faatatau uma i le tuuina saogalemu o o tatou vae i le ala o le ola mama ma le amioatua. Ua manino lava o le amioatua o se tulaga e manaomia mo le faaeaga. Ma ua fesoasoani mai Mamona ia tatou malamalama o le amio mama ma le legavia o “le mea ua sili ona pele ma taua ai mea uma lava” (Moronae 9:9). E le mafai ona tatou le popole pe latalata tele atu foi i le faatausiusiuga. O se nofoaga matautia lena mo soo se afafine o le Atua e savali ai.
Ua fautuaina i tatou i le Mataupu Faavae ma Feagaiga vaega e 25, e tatau ona tatou piimau i a tatou feagaiga (tagai f. 13). O le piimau o lona uiga ia te au o le pipii i ai, ia tumau, ma ia taofi mau lava i folafolaga ua tatou faia ma le Alii. O a tatou feagaiga o le a faamalolosia ai i tatou e tetee atu i faaosoosoga. O le tausia o a tatou feagaiga o le a faatumauina ai i tatou i le ala o le amioatua. A o tatou tausia feagaiga na tatou osia i le papatisoga, o le a tatou tumau ai i le moa o le ala. Ua faamanatu mai e Elder Jeffrey R. Holland ia i tatou:
“E amatalia i lo tatou papatisoga, tatou te osifeagaiga ai ao tatou mulimuli i lena ala e oo atu i le ola faavavau, ma tatou te tumau ai i le auala e ala i le tausia o ia feagaiga… .
“… O musumusuga a le Agaga Paia o le a lava ma totoe mo o tatou manaoga, pe afai tatou te tumau i feagaiga na tatou faia. O lo tatou ala e faigata i le tele o aso, ae o le fesoasoani tatou te maua e foia ai luitau e matuai paia lava. O loo ia i tatou ia sui e toatolu o le Aigaatua—o le Tama, o le Alo, ma le Agaga Paia—e fesoasoani mai ia i tatou ona o feagaiga ua tatou osia.
“Ina ia faamanatu mai ia i tatou e uiga i na feagaiga, tatou te fetagofi ai i le faamanatuga i vaiaso taitasi. I le tatalo e faia mo le areto, tatou te ‘molimau atu ia te oe, le Atua e, le Tama Faavavau, [tatou] te loto ina ave i o [tatou] luga le suafa o lou Alo, ma manatua pea o ia, ma tausi i ana poloaiga ua ia tuuina mai ia te i [tatou]; ina ia [tatou] maua pea lona Agaga e faatasi ma i [tatou]’ [MFF 20:77]” (“O Mea Ou te Manao e Iloa e Tagata Fou Uma o le Ekalesia—ma ia Manatua e Tagata ua Leva i le Ekalesia,” Liahona, Oke. 2006, 11–12).
A taitaiina e Lona Agaga, o le a e maua le lagona mautinoa ma fiafia, ma o le a teuteuina ou manatu i le mama e le aunoa. Ua faamatalaina e le Tusi a Mamona le mea na tupu ina ua tausia e se nuu atoa a latou feagaiga ma ola i ni olaga mama ma amioatua: “E moni lava, e le mafai ona sili i ai le fiafia o se tasi nuu o nuu uma lava ua faia e le aao o le Atua” (4 Nifae 1:16). A taitaiina e le Agaga Paia, o le a avea foi oe ma se faatosinaga amiotonu i isi.
O loo i ai i lou ofisa le ata o le augatupulaga o tamaitai o lou aiga—o le tina o le tina o lo’u tina, o le tina o lo’u tina, o lo’u tina ma la’u tama teine o Emi. O o latou soifuaga o le faamaoni ma le faatuatua i le fuafuaga ua fesoasoani ai ia te au ia ou faia ma ausia ni mea e sili atu. O le vaavaai atu i lena ata i le taimi nei, e mafai ona ou iloa lelei atu ai le taua o le ola i se olaga amioatua. O le aso, e le gata ina i ai sau tama teine e toatasi, ae e toalima foi au fanau teine faaletulafono, ma le toalima o fanau teine laiti a lau fanau e faaopoopo atu i lena ata. Ua ou lagonaina se matafaioi loloto ina ia ou ola i se olaga lelei o le amioatua ma le paia i o latou luma. E tusa lava pe o oe e muamua i le laina o augatupulaga e sosoo mai ai, ua i ai foi sau matafaioi ia i latou o le a tupuga mai ia te oe.
Lata mai nei, na ou amata savali ai i lena lava malaga sopo i Teton lea na ou taua muamua, ae o le taimi lenei na faatasi ai ma lou toalua ma se vaega o uo matou te tupulaga. Ina ua matou amata, sa manaia ma faigofie, peitai, ae matou te le’i oo atu i le matou taunuuga, sa matou le lavava ma na ou iloaina ua tupu le faalavelave ia te au. Ou te le’i saunia lelei faaletino mo le savaliga sopo, e pei ona sa ou faia i le taimi na matou savavali sopo ai ma tamaitai talavou i tausaga na muamua atu—ma sa ou le magafagafa i le teuina o au mea na ave ona sa tele naua. O le mamafa i lou papatua na amata ona ou vaivai ai ma ou sauni ai e togi le solo. Na lagona foi e isi le faigata o le maualuga, le tifato o le eleele, ma le mamafa o faafafa. Na iloa e lou toalua lenei tulaga ma topetope ai i luma. Na ou lagonaina le tuulafoaiina o au. Ae peitai, i le mavae ai pe tusa o se itula, na ou iloa atu lou toalua ua faaifoifo mai i le auala i le isi itu o le vanu. Na tamoe agai mai ia te au. Ina ua oo mai ia te au, sa ia aveina lau faafafa, solo ou loimata, ma taitai atu au i le taunuuga—o se vaituloto mama ma manino na siomia i paina uumi. Ona toe liliu lea o ia, ma toe foi atu i le ala, ma fai faafa lenei lava mea e tasi mo isi vaega o le au sopo. Ao ou vaavaai atu ia te ia, na ou salamo, ona sa matuai ou le saunia ma na atili ai lou salamo ona o le tele o au mea faaopoopo i totonu o lau ato faafafa, lea na faaopoopo atu i le mamafa lea na ia tauaveina mo au. Ae sa matuai ou faafetai lava ona o lona malosi, mo lona le manatu faapito, mo lana tapenaga, ma mo lona alofa.
A o outou feaei i mauga o le olaga, ia tumau ai i le ala o le amioatua. O le a i ai isi e fesoasoani atu ia te outou—o ou matua, tagata o lou aiga, epikopo, faufautua, ma uo amiotonu o soo se matutua. Ma afai tou te vaivai pe uia foi se ala sese, ia sui lou ala ma toe sau i le ala o le amioatua. Ia manatua i taimi uma o loo i ai le Faaola iina mo outou. O le a Ia faatagaina outou e salamo, faamalosi outou, faamamaina a outou avega, solo o outou loimata, faamafanafana ia te outou, ma faaauau ona fesoasoani atu i lou savali ai i le ala.
O le Faaola o le faataitaiga sili lea o le amioatua. Ina ua femaliuai Iesu i magaala o le Nuu Paia, sa “femaliuai o Ia ma agalelei” (Galuega 10:38). Sa Ia faamalolo i e mamai, ma faapupula i e tauaso ma faatutu mai e na oti. “Na Ia aoao atu upumoni o le faavavau, o le tulaga moni sa tatou i ai i le muai olaga, o le faamoemoega o lo tatou ola ai i le fogaeleele, ma tulaga e mafai ona [tatou] ausia [o ni] … afafine o le Atua i le olaga a sau” (tagai “O Le Keriso Soifua: O Le Molimau a le Au Aposetolo,” Liahona, Ape. 2000, 2–3). Fai mai se tasi o mau e sili ona ou fiafia i ai: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala” (Faataoto 3:5–6).
Ou te molimau atu e moni lenei mea. E le gata ina Ia faataatia le alafua, ae na Ia fesoasoani foi ia te au. “O Lana ala o le ala lea e tau atu i le fiafia i lenei olaga ma le ola e faavavau i le lalolagi a sau” (“O Le Keriso Soifua,” Liahona, Ape. 2003, 3). Ou te molimau atu ia te outou o loo soifua o Ia! O le a Ia faafofogaina a outou tatalo ma taitaiina o outou ala. O Iesu Keriso o lo tatou Faataitaiga ma lo tatou Taiala. Ia savavali i le ala! Ia tausaafia. Taofimau ia outou feagaiga ma ia agavaa mo le mafutaga a le Agaga Paia. Ua folafola mai e le Alii: “Ia fiafia pea, aua o le a ou taitaiina outou. O le malo e o outou lava ma faamanuiaga o i ai e o outou ia, ma oa foi o le faavavau e a outou ia” (MFF 78:18). E moni, ou te tu ma ofo i “Lona soifua le mafaatusalia ma le aoga e le gata mai o Lana taulaga togiola sili” (“O Le Keriso Soifua,” Liahona, Ape. 2000, 2; faaopoopo le faamamafa). I le suafa o Iesu Keriso, amene.