O Le Aso Nei
Tatou te manaomia uma Lana fesoasoani e aloese ai mai le leaga o le faatuai i mea e ao ona tatou faia iinei ma le taimi nei ina ia maua ai le ola faavavau.
E i ai se tulaga matautia i le upu, “e i ai se aso,” pe afai o lona uiga o le, “e le o le aso nei.” “E i ai se aso ou te salamo ai” “E i ai se aso ou te faamagalo ai ia te ia.” “E i ai se aso ou te talanoa ai i la’u uo e uiga i le Ekalesia.” “E i ai se aso o le a amata ai ona ou totogiina le sefuluai.” “E i ai se aso ou te foi ai i le malumalu.” “E i ai se aso… .”
Ua faamanino mai e tusitusiga paia le leaga o le faatuai. O lona leaga, atonu tatou te iloa ane ua le lava so tatou taimi. O le Atua o le o loo tuuina mai ia i tatou ia aso taitasi o se oa, o le a [Ia] manaomia mai se lipoti. O le a tatou fetagisi, ma o le a tutulu o Ia, pe afai na tatou fuafua tatou te salamo ma auauna atu ia te Ia i se aso o lumanai lea e le’i oo mai lava pe moomoo foi i aso ua mavae atu, lea ua te’a atu ai ma le avanoa e fai ai. “O le aso nei,” o se meaalofa faapelepele a le Atua. O le manatu, “E i ai se aso o le a ou,” e mafai ona avea o se gaoi i avanoa o le aso nei ma faamanuiaga o le faavavau.
O loo i ai se lapataiga mausali ma se fautuaga i upu o loo tusia i le Tusi a Mamona:
“O lenei foi, e pei ona ou muai fai atu ia te outou, ona ua ia te outou nei molimau e toatele, o le mea lea, ou te aioi atu ai ia te outou, aua tou te faatuai le aso o lo outou salamo e oo i le iuga; aua pe a mavae atu le aso nei o le ola ua tuuina mai e sauniuni ai i le ola faavavau, faauta, afai tatou te le faaaoga o tatou aso manu o i lenei olaga, ona oo mai ai lea o le po o le pogisa, e le mafai ona fai ai se galuega e tasi.
“Pe a oo ia te outou lena iuga matautia, tou te le mafai ona faapea atu, ou te salamo, ou te foi atu i lo’u Atua. E leai, tou te le mafai ona faapea; aua o lea lava agaga o i ai i o outou tino i le aso tou te tetea ai ma lenei olaga, e i ai le pule i lea lava agaga e toe foi atu i o outou tino i lena olaga faavavau.”1
Ona lapatai mai lea o Amoleka e faapea, o le faatuai o lo outou salamo ma le auaunaga e mafai ona avea ma mafuaaga o le alu ese mai o le Agaga o le Alii mai ia te outou.
Ae, faatasi ai ma le lapataiga na tuuina mai ai lenei faamoemoe: “Ou te iloa foi lenei mea, aua ua fetalai mai ai le Atua, e le afio o Ia i malumalu e le paia, ae afio o ia i loto o e amiotonu; ioe, ma ua fetalai mai foi o ia, e nonofo o e amiotonu i lona malo, e le toe ulufafo ai; a e peitai, e faasinasinaina o latou ofu i le toto o le Tamai Mamoe.”2
Ua tumu tusitusiga paia i faataitaiga o auauna atamamai a le Atua, o e na faatauaina aso na latou ola ai, ma filifili ai e fai mea latou te mafaia ina ia faamamaina ai i latou. O Iosua o le tasi lea: “Ina filifili ia o outou i le aso nei, po o ai tou te auauna i ai … ,” fai mai a ia, “a o au nei ma lou aiga, matou te auauna ia Ieova.”3
O le auauna atu ia te Ia e valaaulia ai le Agaga Paia e faatasi ma i tatou. Ma o le Agaga Paia o le faamama agasala.
E oo lava foi i le Faaola, o le sa leai se agasala, na faia se faataitaiga o le tatau ona ‘aua nei faatuai. Na fetalai o Ia:
“E tatau ona ou faia galuega a le ua auina mai au, manu o ao: e oo i le po, e le mafaia e se tasi ona galue ai.
“Manu o ou i ai i le lalolagi, o au o le malamalama o le lalolagi.”4
O le avea ai ma Faaola toetu, o Ia o le Malamalama o le Lalolagi i le aso nei e oo lava i le faavavau. O Ia lea o loo valaauliaina i tatou ina ia o mai ia te Ia ma auauna atu ia te Ia, e aunoa ma le faatuai. O Lana faamalosiauga lenei ia te outou ma au: “Ou te alofa atu ia i latou o e alofa mai ia te au; o e sailiili mai foi ia te au, latou te maua au.”5
E tutusa lava le moni o lena mea mo aso taitasi pei lava o le olaga atoa. O se tatalo i le taeao ma se suesuega o tusitusiga paia i le taeao po ina ia iloa ai le mea e ao ona tatou faia mo le Alii, e mafai ona faatulagaina ai se aluga o se aso. E mafai ona tatou iloa ai po o le fea le galuega mai na galuega uma tatou te ono filifilia, e sili atu ona taua i le Atua ma faapena foi ia i tatou. Ua ou iloaina o se tatalo faapena e taliina mai i taimi uma pe afai tatou te ole atu ma mafaufau loloto e pei o le gauai atu a se tamaitiiti, ma saunia e faatino e aunoa ma le faatuai e oo lava i auaunaga e sili ona faatauvaa.
O le tele o aso, o le faia o mea e sili atu ona taua o le a le faigofie. E le o le tulaga lena e i ai. O le fuafuaga a le Atua i le foafoaga o le tuu lea o i tatou e faataitai i tatou lava. Na faamalamalama mai le fuafuaga ia i tatou i le lalolagi o agaga ae tatou te le’i fananau mai. Na lava lo tatou faamaoni iina e agavaa ai mo le avanoa e filifili ai mai faaosoosoga iinei e saunia ai mo le ola faavavau, o le meaalofa aupito sili lea o meaalofa uma a le Atua. Sa tatou olioli i le iloa o le faataitaiga o le faamaoni lea ma le usiusitai e ui ina o le a le faigofie: “Ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua.”6
E ui lava ina sa tatou iloa o le a faigata le faataitaiga, ae sa tatou lagonaina le olioli aua sa tatou lagona le mautinoa e mafai ona tatou pasia. O lo tatou lagona mautinoa na oo mai i le iloaina o le a afio mai Iesu Keriso i le lalolagi e fai ma o tatou Faaola. O le a Ia faatoilaloina le oti. O Ia o le a mafai ai ona tatou mama mai ia tatou agasala e ala i le agavaa ai i le mana o Lana Togiola.
Na tatou iloaina foi nisi o upumoni aiai e uiga i le mea e ao ona tatou faia ina ia maua ai le faamamaina lea o le a tatou manaomia. O mea uma lava e manaomia e lena faamamaina o le a moomia ai le—papatisoina i le pule tatau, mauaina o le Agaga Paia e ala i aao o i latou ua faamaonia o loo umia le perisitua, manatuaina o Ia ma maua ai Lona Agaga e faatasi ma i tatou, sosoo ai ma le tausiga o Ana poloaiga—o le a mafai ia mea uma mo le faamaulaloina o i tatou. O le a le manaomia ai se atamai maualuga atu, pe manaomia ai foi le tele o oa, po o le ola tului. Ma, na tatou iloaina o le a faalatalata atu i tatou e le Faaola ia te Ia, ma o le a i ai le mana e fesoasoani ia i tatou pe afai o le a faigata le faataitaiga, ma maoae le faaosoosoga e faatuai. Na faamatala e le perofeta maoae o Alema le ala na maua ai e Keriso lena malosi:
“E maliu foi o ia, e onosai i mea tiga, ma puapuaga, ma tofotofoga uiga eseese; e faapea foi ina ia faataunuuina le upu ua faapea mai, na te ave i ona luga puapuaga ma ma’i o lona nuu.
“Na te ave foi le oti i ona luga, ina ia tatalaina e ia noanoaga o le oti o loo ua noanoatia ai nei lona nuu; Na te ave foi i ona luga o latou vaivai, ina ia faatumuina lona alo i le alofa e tusa ma le faaletino, ina ia silafia e ia e tusa ma le tino le ala e tausi ai lona nuu e tusa ma o latou vaivai.”7
Tatou te manaomia uma Lana fesoasoani e aloese ai mai le leaga o le faatuai i mea e ao ona tatou faia iinei ma le taimi nei ina ia maua ai le ola faavavau. O le toatele o i tatou, o le faaosoosoga e faatuai e oo mai i se faalogona se tasi po o le lua. E matuai eseese lava: o le tasi ina ia faamalieina i mea ua uma ona tatou faia; ma le isi, ina ia lagona le lofituina i le tatau ona faia o ni mea se tele atu.
O le faamalieina [o le tagata lava ia] o se mea matautia mo i tatou uma. E mafai ona oo mai i le autalavou e vaivai mafaufau o e lagona o le a tele lava le taimi i le lumanai mo mea faaleagaga. Atonu latou te manatu ua lava mea ua latou faia e fua i le taimi puupuu ua latou ola ai. Ua ou iloa mai aafiaga le ala e mafai ai e le Alii ona fesoasoani atu i na ituaiga talavou, ina ia iloa ai, o loo i ai o ia i le ogatotonu o mea faaleagaga, i le taimi nei. E mafai ona fesoasoani atu o ia ina ia e iloa o loo vaavaai atu tamaiti tou te vasega faatasi ia te outou. E mafai ona fesoasoani atu o Ia ina ia e iloa o o latou lumanai e faavavau, e i ai se aafiaga mai mea latou te matauina o loo e faia pe le o faia foi. O lau faafetai faatauvaa mo a latou faatosinaga mo le lelei ia te oe, e mafai ona siitia ai i latou e sili atu nai lo mea e te manatuaina. Pe a e ole atu i le Atua, Na te mafaia ma o le a Ia faaali atu ia te oe avanoa e siitia ai Isi mo Ia, lea na Ia tuuina atu i ou tafatafa mai lava i lou laitiiti.
O le faamalieina [o le tagata lava ia] e mafai foi ona aafia ai le tagata matua ua agavaa. O le lelei lava ma le umi e te auauna ai, atonu o le tele foi lena ina tuu e le faaosooso ia lenei pepelo i lou mafaufau: “Ua tatau ona e malolo.” Atonu ua faalua ona e peresitene i le Peraimeri a le tou paranesi toagaogao. Pe, atonu ua leva ona e galue malosi i lau misiona ma tele se osigataulaga na e auauna atu ai. Pe, atonu foi o oe o le paionia i totonu o le Ekalesia i le mea o loo e alala ai. E ono oo mai le manatu, “Aisea e le tuu atu ai le galuega i tagata fou. Ua uma ona fai la’u vaega.” O le faaosoosoga o le a i ai, ia e talitonu e i ai se aso, o le a e toe foi atu e toe auauna atu.
E mafai ona fesoasoani atu le Alii ina ia e iloa le matautia o le faia o se malologa, aua ua e manatu ua lava au mea na fai. Sa Ia fesoasoani mai ia te au e ala i le tuuina o au ma te talanoa ma se tasi o Ana auauna matua. Ua toeaina o ia, na vaivai lona tino ona o le tele o tausaga o galue faamaoni faapea ma ma’i. Na le toe faatagaina o ia e ana fomai e alu ese mai lona fale. I lana talosaga, na ou lipoti atu ai i se malaga na ou alu ai mo le galuega a le Alii, i nisi o malo, i ni fonotaga se tele, ma le tele o faatalanoaga patino, e fesoasoani ai i tagata taitoatasi ma aiga. Na ou tauina atu ia te ia e uiga i le agaga faafetai o tagata na faaalia mo ia ma le tele o tausaga o lana auaunaga. Na fesili mai o ia ia te au pe i ai se isi ou tofiga i se taimi lata mai. Na ou tau atu i ai e uiga i se isi malaga umi o le a sosoo ai. Na ia faateia au, ma tuuina mai ia te au se puipuiga mai le faamalieina [o au lava] lea ou te faamoemoe o le a tumau e faavavau, ina ua ia tosoina lou lima ma fai mai: “Oi, faamolemole, alu ma avatu au.”
E faigata ona iloa le taimi e lava ai mea tatou te faia mo le Togiola e suia ai o tatou natura ma tatou agavaa ai mo le ola faavavau. Ma tatou te le mailoa pe fia ni aso o le a tatou maua e tuuina atu ai le auaunaga e tatau mo lena suiga tele ia oo mai. Ae ua tatou iloa, o le a lava ma totoe aso o le a tatou maua pe afai o le a tatou le faamaimauina ia aso. O le tala fiafia lenei:
“Ua faalevalevaina aso o le fanauga a tagata e tusa ma le finagalo o le Atua, ina ia salamo i latou a o i le tino; o lea, ua avea ai o latou ola ma ola faataitai, ma ua faalevalevaina o latou aso e tusa ma poloaiga na aumaia e le Alii le Atua i le fanauga a tagata.”8
O lena faamautinoaga mai le Matai e mafai ona fesoasoani ia i tatou o loo lagonaina le lofituina ona o tulaga [o tatou i ai]. I tofotofoga aupito sili ona faigata, afai o ia te oe le mana e tatalo ai, e mafai ona e ole atu i se Atua alofa: “Faamolemole sei ou auauna atu, i le aso nei. E le afaina ia te au po o a lava ni nai mea e mafai ona ou faia. Tau lava ia faailoa mai ia te au mea e mafai ona ou faia. O le a ou usitai i le aso nei. Ou te iloa e mafai ona ou faia, faatasi ai ma Lau fesoasoani.”
O le valaaulia filemu ia te oe, atonu o le faia o se mea faatauvaa e pei o le faamagaloina o se tasi na faatiga ia te oe. E mafai ona e faia lena mea mai se moega i se falemai. Po o lou alu atu e fesoasoani i se tasi o fiaai. Atonu e te lagonaina foi le lofituina i lou lava mativa ma galuega o le aso. Ae afai e te filifili ina ia e le faatali seia e maua se malosi sili atu ma tele atu ni tupe, ma afai e te tatalo mo le Agaga Paia a o e alu atu, o le a e iloa pe a e taunuu atu le mea e ao ona fai ma le auala e fesoasoani ai i se tasi e sili atu le mativa nai lo oe. Atonu o le a e iloaina pe a e taunuu atu, sa latou tatalo ma faamoemoe o le a oo atu se tasi e pei o oe, i le suafa o le Alii.
Mo i latou o e o loo lotovaivai ona o o latou tulaga, ma faapea ai ona faaosoosoina i lagona e le mafai ona latou auauna atu i le Alii i le aso nei, ou te fai atu ia te outou ni folafolaga se lua. Po o le a lava le faigata e foliga mai ua i ai le tulaga i le aso lenei, o le a lelei atu i le isi aso e sosoo ai, pe afai e te filifili e auauna atu i le Alii i le aso nei ma lou loto atoa. Atonu o le a le faaleleia ou tulaga i mea uma o loo e manao i ai. Ae o le a tuuina atu ia te oe le malosiaga fou e tauaveina ai au avega ma se lagona mautinoa fou, e faapea, afai ae mamafa tele au avega, o le Alii, o le na e auauna atu i ai, o le a tauaveina mea e le mafai ona e tauaveina. Na te silafia le ala e fai ai. Ua leva ona saunia o Ia. Na mafatia o Ia i au agasala ma ou faanoanoaga a o i ai o Ia i le tino, ina ia mafai ona Ia silafia le ala e fesoasoani ai ia te oe.
O le isi folafolaga ou te faia ia te outou e faapea, o le filifili e auauna atu ia te Ia i le aso nei, o le a e lagonaina ai Lona alofa ma faatupulaia ai lou manao e alofa atili atu ia te Ia. Atonu tou te manatua le mau:
“Ou te fai atu ia te outou, o lou manao ia outou manatua e taofi lea suafa, ia tusia ai i o outou loto … ina ia outou lagona ma iloa le leo e valaauina ai outou, atoa foi ma le igoa na te valaau a’i outou.
“Aua, pe faapefea ona iloa e le tagata le alii e le’i auauna i ai o ia, o le tagata ese foi ia te ia, ma ua manao i manatu ma manao o lona loto?”9
O le auauna atu ia te Ia i le aso nei, o le a iu ina e iloa lelei ai o Ia. O le a e lagonaina Lona alofa ma lona agaga faafetai. O le a e le manao e faatuai le mauaina o lena faamanuiaga. Ma o le lagonaina o Lona alofa o le a tosoina atu ai oe i Lana galuega, e soloia ese uma ai le faamalieina [o le tagata lava ia] ma le lotovaivai.
A o outou auauna atu ia te Ia, o le a iu ina outou iloa lelei le leo o le a valaauina ai outou. Pe a e alu e te moe i le faaiuga o le aso, atonu o le a toe oo atu ia upu i lou mafaufau: “Ua lelei ia, le auauna lelei e, ma le faamaoni: ua e faamaoni i nai mea iti.”10 Ou te tatalo mo lena faamaoniga i lenei aso, i aso uma lava, ma i o tatou olaga.
Ou te iloa o loo soifua le Tama Faalelagi ma e tali mai ia tatou tatalo. Ou te iloa o Iesu o le Keriso soifua, le Faaola o le lalolagi, ma e mafai ona tatou filifili e lagonaina le olioli ma le filemu i Lana galuega i le aso nei. I le suafa o Iesu Keriso, amene.