Laga Pasenshi Tin Su Obra Perfekto, Tené Komo Goso Kompletu!
Ora nos ehersé pasenshi, nos fe ta krese. Manera ku nos fe ta oumentá, asina nos goso tambe.
Dos aña pasa mi ruman hòmber mas chikitu, Chad, a pasa dor di e velo. Su transishon pa e otro banda a laga un buraku den e kurason di mi kuñá, Stephanie; nan dos yunan chikitu, Braden i Bella; tambe e restu di e famia. Nos a haña konsuelo den e palabranan di Elder Neiil L. Andersen den e konferensia general, e siman promé ku Chad a fayesé: “Den e krisol di e prueba nan di mundu, avansá ku pasenshi i e poder sanadó di e Salbador lo trese lus pa bo, komprendementu, pas i speransa” (“Wounded,” Liahona, Nov. 2018, 85).
Nos tin fe den JesuCristu; nos sa ku nos lo djòin Chad atrobe, pero pèrdè su presensia físiko ta hasi doló! Hopi a pèrdè sernan kerí. E ta duru pa tin pasenshi i warda riba e momentu ku nos lo bolbe djòin nan.
E aña despues ku el a fayesé nos a sinti manera un nubia skur a tapa nos. Nos a buska refugio dor di studia e skrituranan, resa ku hopi fervor i asistí na tempel ku mas frekuensia. E frase nan di e himno aki a kaptura nos sintimentunan na e momentu ei: “E dia ta habri, e mundu ta for di soño, e nubianan di skuridat di anochi ta bulando ta bai” (“The Day Dawn Is Breaking,” Hymns, no. 52).
Nos famia a determiná ku 2020 lo bira un aña refreskante! Nos tabata studiando nos lèsnan di Bin, Sigui Mi den e Tèstamentu Nobo den buki di Santiago na fin di Novèmber 2019 ora ku un tema a revelá su mes na nos. Santiago, kapítulo 1, versíkulo 2 ta bisa: “Mi rumannan, konta tur bo goso ora ku boso kai den aflikshon ” (Jose Smith Tradukshon, Santiago 1:2 [in Santiago 1:2, nota na final di página a]). Den nos deseo pa habri un ana nobo, un dekada nobo, ku alegria, nos a disidi ku den 2020 nos lo “Tené komo goso kompletu.” Nos a sinti asina fuerte tokante e ku Pasku último nos a duna nos rumannan T-shirtnan ku ta bisa den lèter diki, “Tené Komo Goso Kompletu.” E aña 2020 sigur lo ta un aña di alegria i regosiho.
Wèl, ata nos aki—2020 na lugá [di esaki] a trese e pandemia mundial COVID-19, disturbio sivil i desafionan ekonómiko. Nos Tata Selestial kisas ta dunando nos tempu pa reflekshoná i konsiderá nos komprendimentu di pasenshi den nos desishon konsiente di skohe goso.
For di e momentu ei e buki di Santiago a haña un otro nifikashon pa nos. Santiago, kapítulo 1, versíkulo 3 i 4 ta sigui:
“Sabiendo ku, e pruebanan di boso fe ta produsi perseveransha.
“I laga pèrseveransia tin su resultado perfekto, pa boso por ta perfekto i kompleto, sin falta di nada.”
Den nos esfuerso pa haña goso meimei di nos pruebanan, nos a lubidá ku tin pasenshi ta e yabi pa laga e pruebanan funshoná pa nos bon.
Rey Benjamin a siña ku bo pa pone hòmber natural un banda i kombertí den “un santu pa medio di Ekspiashon di Cristu e Señor i [bira] manera un mucha, mansu, sumiso, humilde ku pasenshi, yen di amor, dispuesto pa someté na tur kos” (Mosiah 3:19).
Kapítulo 6 di Prediká mi Evangelio ta siña atributo nan klave di Cristu ku por kambia nos: “Pasenshi ta e kapasidat pa soportá retraso, problema, oposishon òf sufri sin bira rabia, frustra òf angustia. E ta e abilidat pa hasi Dios Su boluntat i aseptá Su timing. Ora bo tin pasenshi bo por wanta e preshon i ta kapas pa enfrentá atversidat ku kalmu i speransa” (Prediká Mi Evangelio: Un Guia pa Servisio di Misionero rev. ed. [2019], 126).
E obra perfekto di pasenshi tambe por wòrdu ilustrá den e bida di un di e disípulonan di Cristu, Simon e Kananeo. Zealots tabata un grupo di nashonalistanan Hudiu ku tabata oponé fuertemente nadom e doninio Romano . E moveshon Zealot tabata boga pa violensia kontra e Romanonan, nan kolaboradornan Hudiu i e Saduseonan dor di hasi invashon en buska di provishon i pursiguiendo otro aktividatnan pa yuda nan kousa (wak Encyclopedia Britannica, “Zealot,” britannica.com). Simon e Kananeo tabata un Zealot (wak Lukas 6:15). Imaginá bo Simon tratando pa kombensé e Salbador pa kue arma, guia un grupo militante òf krea káos den Yerusalèm. Jesus a siña:
“Bendishoná ta e mansu nan: paso nan lo heredá e mundu. …
“Bendishoná ta esun miserikordioso: pasó nan lo optené miserikòrdia. …
“Bienaventurá ta e pasifikadónan: pasó nan lo wòrdu yamá yunan di Dios” (Matthew 5:5, 7, 9).
Simon por a brasa i defendé su filosofia ku entusiasmo i pashon pero e eskrituranan ta sugerí ku pa medio di e influensha i ehèmpel di e Salbador, su enfoke a kambia. Su disipulado di Cristu a bira e enfoke sentral den e esfuerso nan di su bida.
Segun ku nos ta hasi i warda kombenionan ku Dios, E Salbador por yuda nos “nase di nobo; si nase di Dios, kambia di [un] estado karnal i dekaí pa un estado di rektitut, siendo liberá dor di Dios i bira Su yunan” (Mosiah 27:25).
Di tur e empeñonan sosial, religioso i esfuerso polítiko di nos dia, laga pa disípulo di JesuCristu ta nos afiliashon mas pronunsiá i afirmá. “Pasó kaminda boso tesoro ta, einan boso kurason tambe lo ta.”(Mateo 6:21). Laga nos no lubidá, ku asta despues ku e disípulonan fiel “a hasi e boluntat di Dios,” nan “[tabatin] mester di pasenshi” (Hebrews 10:36).
Meskos ku prueba nos fe ta produsí pasenshi den nos, ora ku nos ehersé pasenshi nos fe lo oumentá. Manera ku nos fe ta oumentá, asina nos goso tambe.
Mart pasa nos di dos yu muhé, Emma, manera hopi otro misionero na Iglesia mester a bai den isolashon obligatorio. Hopi misionero a bini kas. Hopi misionero ta wardando pa un asignashon nobo. Hopi no a risibí nan bendishonnan di tèmpel promé ku nan sali pa kampo misional. Danki misioneronan. Nos ta stima boso.
Emma i su kompañera na Hulanda a wòrdu proba emoshonalmente den e promé simannan ei—asina difikultoso ku nan saka lágrimanan den hopi kaso. Ku solamente oportunidat kòrtiku di interakta ku persona i un limitashon pa sali pafó, Emma su konfiansa den Dios a oumentá. Nos a hasi orashon kuné on line i a puntra kon nos por a yud’é. El a puntra nos pa konektá ku amigunan ku e tabata siña on line!
Nos famia a kuminsá konektá on line, unu pa unu, ku amigunan di Emma na Hulanda. Nos a invitá nan pa tur siman djòin nos on line i ku un famia amplio nos studiaBin, Sigui Mi. Floor, Laura, Renske, Freek, Benjamin, Stal, i Muhammad tur a bira nos amigunan. Tin par di nos amigunan di Hulanda a drenta “di e porta smal” (3 Nefi 14:13). Nan ta mustrando otro “kon smal e kaminda ta i kon smal e porta, via kual nan tin drenta” (2 Nefi 31:9). Nan ta rumannan den Cristu. Tur siman nos “ta konta ku goso” segun ku nos ta traha huntu den nos progreso den e kaminda di kombenio.
Nos “ta laga pasenshi hasi su trabou perfekto” (Santiago 1:4) den nos inkapasidat pa topa personal komo famianan di misa pa un temporada. Pero nos ta konta komo goso e ktrdr,rmtu di nos famianan su fe dor di konekshon di teknologia i estudio di Bini, Siguí Mi di e Buki di Mormon.
Presidente Russell M. Nelson a primintí, “Boso persistensha konsistente den e esfuerso aki—asta durante e momentonan ei ura bo ta sinti ku bo no ta siendo partikularmente éksitoso—lo kambia bo bida, esun di bo famia i di e mundu” (“Go Forward in Faith,” Liahona, May 2020, 114).
Kaminda nos ta hasi kombenionan sagrado ku Dios—e tèmpel—ta sera temporalmente. Kaminda nos ta warda kombenionan ku Dios—e hogar—ta habri! Nos tin oportunidat pa studia na kas i reflekshoná riba e kombenionan eksepshonal di tèmpel. Asta ora ku nos no por drenta den e lugá físiko sagrado, nos “kurason … lo regosihá hopi komo konsekuensha di e bendishon nan ku lo wòrdu drama” (Doktrina i Kombenionan 110:9).
Hopi a pèrdè trabou; otro nan a pèrdè oportunidatnan. Nos ta alegrá huntu ku Presidente Nelson, ku resien a deklará: “E ofrendanan di ayuno di miembro nan aktualmente a oumentá meskos e kontribushonnan boluntario na nos fondo nan humanitario. … Huntu nos lo superá e tempu difísil aki. Señor lo bendishoná bo ora ku bo sigui bendishoná otronan” (Russell M. Nelson’s Facebook page, post from Aug. 16, 2020, facebook.com/russell.m.nelson).
“Sea di bon animo” ta e mandamentu di Señor, no tene miedu (Mateo 14:27).
Tin biaha nos ta bira impasiente ora nos pensa ku nos ta “hasiendo tur kos bon” i ainda nos no ta risibí e bendishonnan ku nos ta deseá. Enok a kana ku Dios 365 aña promé ku e i su pueblo a wòrdu trasladá. Tres shen sesenta i sinku aña di lucha pa hasi tur kos korekto, i despues el a tuma lugá. (Wak Doktrina y Kombenionan 107:24.)
E fayesimentu di mi ruman hòmber Chad a sosodé un par di luna despues di nos relevo for di e presidensia di Mishon Utah Ogden. Tabata un milager ku miéntras nos tabata biba na Süit di California, di tur e 417 mishon nan ku nos por a wòrdu asigná na e den aña 2015, nos a wòrdu asigná na Nòrt di Utah. E kas di mishon tabata 30 minüt kore for di e kas di Chad. E kanser di Chad a wordu diagnostika despues ku nos a risibi nos asignashon di mishon. Asta den e sirkunstansianan mas difísil nos tabata sa ku nos Tata Selestial ta atento pa nos i ta yuda nos haña goso.
Mi ta testifiká di e poder redimido, santifikado, humilde i gososo di e Salbador JesuCristu. Mi ta testifiká ku ora nos hasi orashon na nos Tata Selestial den e nòmber di Jesus, E lo kontesta nos. Mi ta testifiká ku si nos skucha, skucha i pone atenshon riba e bos di Señor i Su profeta bibu, Presidente Russell M. Nelson, nos por “laga pasenshi hasi su trabou perfekto” i “konta esaki komo goso.” Den e nòmber di JesuCristu, amèn.