Pa Medio di Sentimentu Nos ta Optené Poder ku Dios
Ora nos ta buska unidat di sentimentu, nos lo yama e poder di Dios abou pa hasi nos esfuersonan kompletu.
Gordon su mama a bisé si e kaba ku su tareanan, e lo traha un tèrt pe. Su sorto faboritu. Pa e so. Gordon a bai sigui traha pa kaba ku e tareanan, i su mama a lora e tèrt. Su ruman muhé mas grandi Kathy a bini den kas ku un amigu. El a mira e tèrt i a puntra si e i su amigu por haña un slais.
“No,” Gordon a bisa, “ta mi tèrt. Mama a trahé pa mi, i ami a gané.”
Kathy a rous su ruman chikí. E ta asina egoséntriko i poko generoso. Kon e por warda tur esaki pa e so?
Oranan despues ora Kathy a habri porta di outo pa hiba su amigu kas, ei riba e stul tabatin dos napkins nèchi doblá, dos fòrki ariba poné, i dos pida tèrt grandi riba tayó. Kathy a konta e historia aki na Gordon su entiero pa mustra kon e tabata dispuesto pa kambia i mustra amabilidat na esnan ku no tabata meresé semper.
Na 1842, e Santunan tabata trahando duru pa edifiká e Tèmpel di Nauvoo. Despues di a funda e Sosiedat di Sokoro den mart, e Profeta José tabata bin hopi biaha na nan reunionnan pa prepará nan pa e konvenionan sagrado, i di union ku pronto nan lo hasi den e tèmpel.
Riba 9 di juni, e Profeta “a bisa ku e lo bai prediká di mizerikòrdia[.] Suponiendo ku JesuCristu i [e] angelan mester a rabia ku nos pa kosnan frívolo, kiko lo ta di nos? Nos mester ta mizerikòrdioso i sera wowo pa kosnan chikitu.” Presidente Smith a sigui, “Ta duel mi ku no tin komunion mas kompletu—si un miembro ta sufri tur ta sintié—pa medio di unidat di sentimentu nos por optené poder ku Dios.” 1
E frase kòrtiku aki a dal mi manera welek. Mediante uninidat di sentimentu nos ta optené poder ku Dios E mundu aki no ta loke mi ke pa e ta. Tin hopi kos ku mi ke influensiá i hasi mihó. I frankamente, tin masha oposishon pa loke mi ta spera pe, i tin biaha mi ta sinti mi impotente. Ultimamente, mi a puntra mi mes preguntanan di investigashon: Kon mi por komprondé hende rònt di mi mihó? Kon mi por krea e “union di sentimentu” ora tur kos ta asina diferente? Kua poder di Dios mi por tin akseso na dje si mi ta djis un tiki mas uní ku otronan? For di mi buskedá di alma, mi tin tres sugerensia. Kisas nan por yuda boso tambe.
Tin mizerikòrdia
Jacob 2:17 ta bisa, “Pensa riba boso[rumannan] meskos ku riba boso mes, i sea familiar ku tur i liberal ku boso poseshonnan, pa nan por ta riku meskos boso.” Laga nos reemplasá e palabra poseshon ku mizerikòrdia—sea liberal ku boso mizerikòrdia pa nan por ta riku meskos ku boso.
Hopi biaha nos ta pensa di poseshon den tèrmino di alimento òf plaka, pero kisas loke nos tur tin mester mas ta nos ministrashon den mizerikòrdia.
Mi mes su presidente di Sosiedat di Sokoro a bisa resientemente: “E kos ku mi … ta primintí … bo ta ku lo mi tene bo nòmber seif. … Lo mi mira bo pa ken bo ta na bo mihó momentu. … Nunka lo mi bisa nada tokante bo ku no ta amabel, ku no ta bai elevá bo. Mi ta pidi bo pa hasi meskos pa mi pasó mi ta morto spantá pa desepshoná bo. …
José Smith a bisa e rumannan riba e dia ei di juni 1842:
“Ora personanan manifestá e menor bondat i amor pa mi, O ki poder e tin riba mi mente. …
“… Mas serka nos yega na nos Tata Selestial, mas dispuesto nos ta pa mira ku kompashon na e almanan ku ta peresé— [nos ta sinti ku nos ke] pa tuma riba nos skoudernan, i benta nan pikánan tras di nan lomba. [Mi diskurso ta inteshoná pa] henter e Sosiedat aki—si boso ke pa Dios tin mizerikòrdia ku boso, tene mizerikòrdia un na otro.” 2
Esaki tabata konseho spesífikamente na e Sosiedat di Sokoro. Laga nos no huzga otro òf laga nos palabranan morde. Laga nos tene otro su nòmber safe i duna e don di mizerikòrdia. 3
Laga Boso Boto Balansá
Na 1936, un tim di rema poko konosí di e Universidat di Washington a biaha pa Alemania pa partisipá na Weganan Olímpiko. Tabata e periodo mas difísil di e Gran Depreshon. Tabata muchanan hòmber di e klase di obrero ken su suidat chikitu di mina i palu a hasi donashon di poko plaka pa nan por a biaha pa Berlin. Tur aspekto di e kompetensia tabata parse di ta kontra nan, pero algu a sosodé den e race. Den e mundu di remamentu nan ta yamé “balansá.” Skucha na e deskripshon aki basá riba e bukiTheBoys in the Boat[E Muchanan Homber den e Boto]:
Tin un kos ku ta pasa tin biaha ku e ta difísil pa logra i difísil pa definí. E ta wòrdu yamá “swing.” E ta sosodé solamente ora tur ta remando den union perfekto ku ni un solo akshon ta for di sinkronisashon.
E remadónan tin ku kontrolá nan independensia fuerte i na mesun momento mantené firme na nan kapasidatnan individual. E race no por wòrdu ganá pa clone. Bon timnan ta bon meskla—un persona pa guia e otronan, un persona pa tene algu den reserva, un otro pa hiba e lucha, un otro ku ta pasifikadó. Ningun remadó ta bal mas ku e otro, tur ta propiedat di e boto, pero si nan tin ku rema huntu, kada un mester adaptá na e nesesidatnan i kapasidat di e otronan—esun ku brasa kòrtiku rèk un poko mas leu, esun ku brasa mas largu tin ku hala dun tiki aden.
Diferensianan por kambia den bentaha enbes di desbentaha. E ora ei so lo sinti manera ku e boto ta moviendo di su mes. E ora ei so doló ta duna lugá pa gritu di legria. Un bon “swing” ta sinti manera poesía. 4
Kontra di opstakulonan imponente, e tim aki a haña swing perfekto i a gana. E oro Olímpiko tabata estimulante, pero e union ku kada remadó a eksperensiá e dia ei tabata un momento ku a keda ku nan pa e restu di nan bida.
Eliminá e Malu mes Lihé ku e Bon Por Krese
Den e alegoria ekskisito den Jacob 5, e Señor di e biña a planta un bon palu den bon tera, pero el a bira putrí despues di tempu i a duna fruta silvestre. E Señor di e biña a bisa ocho biaha: “Ta duel mi [pa] pèrdè e palu aki.”
E sirbiente a bisa na e Señor di e biña: “Spar [e palu] un poko mas. I e Señor a bisa: Si, lo mi spar e un poko mas.” .5
I despues ta bin instrukshon ku por wòrdu apliká na kada un di nos ku ta purba koba rònt i haña bon fruta den nos mes kunuku chikitu di biña: “Boso lo eliminá tur esun malu mes lihé ku e bon lo krese.” 6
Union no ta sosodé mágikamente; e ta tuma trabou. E ta kompliká, i tin biaha inkonfortabel, i ta sosodé gradualmente ora nos eliminá e malu mes lihé ku e bon por krese.
Nunka nos no ta so den nos esfuerso pa krea union. Jacob 5ta sigui, “E sirbidonan a bai i a traha ku tur nan forsa; i e Señor di e biña tambe a traha ku nan.” 7
Kada un di nos lo bai haña eksperensianan di heridanan profundo, kosnan ku no mester sosodé nunka. Kada un di nos tambe lo, na vários okashon, pèrmití orguyo i altura pa korompí e fruta ku nos ta karga. Pero JesuCristu ta nos Salbador den tur kos. Su poder ta alkansá ta na e fondo i ta disponibel pa nos ora nos tin mester di Dje. Nos tur ta roga pa mizerikòrdia pa nos pikánan i frakasonan. E ta duné libremente. I E ta puntra nos si nos por duna e mesun mizerikòrdia i komprondementu ei pa otro.
E Salbador a poné bon kla: “Sea un; i si boso no ta un boso no ta di mi.” 8 Pero si nos ta un—si nos por spar un pida di nos tèrt pa nos talentonan individual pa asina e boto por swing perfekto den union—despues nos ta di E. I E lo yuda eliminá e malu mes lihé ku e bon ta krese.
Promesanan Profétiko
Por pasa ku ainda nos no ta kaminda nos ke ta, i nos no ta awor kaminda nos lo ke ta. Mi ta kere ku e kambio ku nos ta buska den nos mes i den e gruponan na kua nos ta pertenesé ta bini ménos dor di aktivismo i mas dor di aktivamente purba kada dia pa komprondé un na otro. Di kon? Pasó nos ta edifikando Siòn—un pueblo “di un kurason i un mente.” 9
Komo muhénan di konvenio, nos tin influensia amplio. E influensia aki ta apliká den momentunan diario ora nos ta studia ku un amigu, hiba muchanan kama, papia ku persona sintá banda di bo den bus, preparando un presentashon ku un kolega. Nos tin poderpa kita prehuisio i edifiká union.
Sosiedat di Sokoro i Mujeres Jovenes no ta simplemente klasnan so. Nan por ta tambe eksperensianan inolvidabel kaminda diferente muhé ta drenta den mes un boto i ta rema te ora nos haña nos swing. Mi ta ofresé e invitashon aki: sea un parti di un forsa kolektivo ku ta kambia e mundu pa bon. Nos tarea di konvenio ta pa ministrá, pa lanta e mannan ku ta kologá abou, pa pone hende ku ta luchando riba nos lomba òf den nos brasanan i karga nan. No ta kompliká pa sa kiko pa hasi, pero hopi biaha e ta bai kontra di nos interesnan egoista, i nos tin ku purba. E muhenan di e Iglesia aki tin potensial sin limite pa kambia sosiedat. Mi tin konfiansa spirtual kompletu ku, ora nos buska union di sentimentu, nos lo yama e poder di Dios abou pa hasi nos esfuersonan kompletu.
Tempu Iglesia a konmemorá e revelashon na 1978 di saserdosio, Presidente Russell M. Nelson a ekstendé un bendishon profétiko poderoso: “Ta mi orashon i bendishon ku mi ta laga riba tur ku ta skuchando ku nos por vense kualke peso di prehuisio i kana firme ku Dios—i huntu ku otro—den pas i harmonia perfekto.” 10
Ku nos por atraé e bendishon profétiko aki i uza nos esfuersonan individual i kolektivo pa oumentá union den e mundu. Mi ta laga mi testimonio den e palabranan di Señor JesuCristu su orashon humilde i eterno: “Pa nan por ta un; manera abo ta den mi, i ami den bo, pa nan tambe por ta un den nos.” 11 Den e nòmber di JesuCristu, amèn.