Sea Alerta, i Hasi Orashon Semper
Awe, mi ta ekspandé mi yamada pa orashon na tur pueblo di tur pais rònt mundu.
Mi kerido rumannan, durante di e delaster siman di Su ministrashon mortal, Jesus a siña Su disípulonan pa “Sea Alerta, i Hasi Orashon Semper, pa boso wòrdu konsiderá digno pa skapa di tur e kosnan aki ku tin ku bini, i para dilanti di e Yu di hòmber. ”1
Entre e “kosnan aki ku tin ku bini” promé ku Su Segunda Benida ta “guera i rumornan di guera[,] … hamber, i mizeria, i temblor, na diferente lugá. ”2
Den e Doktrina i Kombenionan e Salbador ta bisa, “I tur kos lo ta den konmoshon; … pasó temor lo bini riba tur pueblo.“3
Sigur ta, [ku] nos ta biba den un tempu durante ku kosnan ta den konmoshon. Hopi hende ta miedu di e futuro, i hopi kurason a kita bai for di nan kreensia den Dios i Su Yu, JesuCristu.
Reportenan notisiero ta yená ku relatonan di violensia. Drnigrashon moral ta wòrdu publiká online. Santananan, iglesianan, meskitanan, snoanan, i santuarionan religioso a wòrdu vandalisá.
Un pandemia global a alkansá virtualmente tur skina di mundu: miones di hende a wòrdu infektá; mas di un mion a muri. Gradushonnsn di skol, servisionan di iglesia, kasamentunan, servisio mishona, i un gran kantidat di otro eventonan importante di bida a wòrdu strobá. Ademas, kantidat innumerabel di hende a wòrdu lagá nan so i den isolashon.
E komoshonnan ekonómiko a kousa desafionan pa asina tantu, spesialmente pa esnan mas vulnerabel di nos Tata Selestial su yunan.
Nos a mira hende ku pashon ehersé nan derechi pa protestá pasífikamente, i nos a mira gruponan di hende den disturbionan furioso.
Na e mes momento, nos ta sigui mira konfliktonan rònt mundu.
Mi ta pensa hopi biaha riba boso ku ta sufri, preokupá, tin miedu, òf ta sinti soledat. Mi ta sigurá kada un di boso ku Señor konosé boso, ku E ta konsiente di boso preokupashon i angustia, i ku E ta stima boso—intimamente, personalmente, pronfundamente i pa semper.
Kada anochi ora mi ta hasi orashon, mi ta pidi Señor pa bendishoná tur ku ta kargá ku pena, doló, soledat, i tristesa. Mi sa ku otro lidernan di Iglesia ts hasi mes un orashon. Nos kurason, individualmente i kolektivamente, ta ku boso, i nos orashonnan ta bai na Dios pa boso bienestar.
Mi a pasa vários dia aña pasá den e parti nòrtost di Merka bishitando sitionan di historia Merikano i di Iglesia, bishitá reunionnan ku nos misioneronan i nos miembronan, i bishitando lidernan gubernamental i di negoshi.
Riba djadumingu, 20 di òktober, mi a papia na un gran reunion pegá ku Boston, Massachusetts. Mi tabata papia, mi a wòrdu inspirá pa bisa, “Mi ta roga na bo … pa hasi orashon pa e pais aki, pa nos lidernan, pa nos pueblo, i pa e famianan ku ta biba den e gran nashon fundá pa Dios aki.”4
Mi a bisa tambe ku Merka i hopi di e nashonnan riba mundu, manera den tempunan di pasado, ta na un otro krusada krítiko i tin mester di nos orashonnan.5
Mi ruego no tabata den mi remarkenan prepará. E palabranan ei a bini na mi ora mi a sinti e Spiritu inspirá mi pa invitá esnan presente pa hasi orashon pa nan pais i nan lidernan.
Awe, mi ta ekspandé mi yamada pa orashon na tur pueblo di tur pais rònt mundu. No ta importá kon boso ta hasi orashon òf na ken boso ta hasi orashon, por fabor ehersé boso fe—kua kreensia ku boso por tin—i hasi orason pa boso pais i pa boso lidernan nashonal. Manera mi a bisa òktober pasá na Massachusetts, nos ta para awe na un gran krusada den historia, i e nashonnan di mundu ta den nesesidat desesperá di inspirashon i guia dibino. Esaki no ta tokante polítika òf maneho. Esaki ta tokante pas i sanashon ku por bini na almanan individual igual ku e alma di e paisnan—nan suidatnan, barionan—pa medio di e Prinsipe di Pas i e fuente di tur sanashon, e Señor JesuCristu.
Durante e delaster lunanan mi tabatin e impreshon ku a bini na mi ku e mihó manera pa yuda e situashon aktual di e mundu ta pa tur hende konfia mas kompletamente riba Dios i pa bira nan kurason na DjE pa medio di orashon sinsero. Humiyá nos mes i buska inspirashon di shelu pa soportá òf konkistá loke nor tin nos dilanti lo ta nos forma mas sigur pa avansá ku konfiansa den e tempunan difísil aki.
E skrituranan ta destaká orashonnan ofresé pa Jesus meskos ku Su siñansanan tokante orashon durante su ministerio mortal. Boso lo kòrda Señor su Orashon:
“Nos Tata ku ta na shelu, Santifiká sea bo nòmber.
“Bo reino bin. Bo boluntat sea hasí na tera, meskos ku ta na shelu.
“Duna nos awe nos pan di kada dia.
“I pordoná nos nos debenan, meskos ku nos ta pordoná nos debedónan.
“I no laga nos kai den tentashon, pero libra nos di e malu: Pasó di Bo e reino ta, i e poder, i e gloria, pa semper. Amèn.”6
E orashon bunita i enfoká aki, hopi biaha ripití den henter e Crist ianismo, ta laga kla ku e ta apropiá pa pidi direktamente na “Nos Tata ku ta den shelu” pa kontestanan pa lokual ta prekupá nos. P’esei, laga nos hasi orashon pa guia divino.
Mi ta invitá boso pa hasi orashon semper.7 Hasi orashon pa boso famia. Hasi orashon pa e lidernan di nashonnan. Hasi orashon pa e hendenan ku kurashi ku ta dilanti den e batayanan aktual kontra plaganan sosial, ambienta:, polítiko, i biológiko ku ta impaktá tur hende rònt mundu, e riku i e pober, esun yòn i esun bieu.
E Salbador a siña nos pa no limitá pa ken nos ta hasi orashon. E la siña un doktrina nobo: “Stima bo enemigunan, bendishoná esnan ku ta maldishoná bo, hasi bo na esnan ku ta odia bo, ora na esnan ku ta usa bo malamente, i ta persiguí bo.”8
Riba e krus na Kalvario, kaminda Jesus a muri pa nos pikánan, El a praktiká lokual ku El a siña ora El a pidi, “Tata, pordoná nan; pasó nan no sa kiko nan ta hasi.”9
Sigur ku hasi orashon pa esnan ku por wòrdu konsiderá nos enemigunan ta demostrá nos kreensia ku Dios por kambia nos kurason i e kurason di otronan. Tipo di orashonnan aki mester fortalesé nos resolushon pa hasi kualke kambio ku ta nesesario den nos mes bida, famia, i komunidatnan.
Desinteresadamente unda boso ta biba, kua idioma boso ta papia, òf kual desafionan boso ta enfrentá, Dios ta skucha i ta kontestá boso den Su mes manera i den Su mes tempu. Pasó nos ta Su yunan, nos por aserké pa buska yudansa, konsuelo, i un deseo renobá pa hasi un diferensia positivo den e mundu.
Hasi orashon pa rektitut, pas, e pober, i esnan malu hopi biaha no ta sufisiente. Despues ku nos hinka rudia den orashon, nos tin ku lanta for di rudia i hasi lokual nos por pa yuda nos mes i otronan.10
E skrituranan ta yen di ehèmpel di hende di fe ku a kombiná orashon ku akshon pa hasi e diferensia den nan mes bida i esun di otronan. Den e Buki di Mormon, por ehèmpel, nos ta lesa tokante Enos. A wòrdu opservá ku “banda di udos tersera parti di e buki kòrtiku aki ta deskribí un orashon, òf serie di orashonnan, i e sobrá ta bisa kiko el a hasi komo konsekuensia di e kontestanan ku el a risibí.”11
Nos tin hopi ehèmpel di kon orashon a hasi un diferensia den nos mes historia di Iglesia, kuminsando ku José Smith su promé orashon vokal den un parti habrí di un mondi serka di kas palu di su mayornan den e primavera di 1820. Buskando pa pordon i direkshon spiritual, José su orashon a habri e shelulnan. Awe, nos ta e benefisiarionan di José e Profeta i otro hòmbernan i muhénan Santunan di e Delaster Dianan fiel ku a hasi orashon i a aktua pa yuda establesé E Iglesia di JesuCristu di e Santunan di e Delaster Dianan.
Hopi biaha mi ta pensa riba e orashonnan di muhénan fiel manera Mary Fielding Smith ken, ku yudansa di Dios, ku kurashi a guia su famia for di persekushon kresiente na Illinois pa seguridat den e vaye aki kaminda su famia a prosperá spiritualmente i temporalmente. Despues di orashon sinsero na rudia, el a traha duru despues pa vense desafionan i bendishoná su famia.
Orashon lo elevá nos i trese nos huntu komo individualnan, komo famia, komo Iglesia, i komo un mundu. Orashon lo influensiá sientifikonan i yuda nan pa deskubrí bakunanan i medikamentunan ku lo kaba ku e pandemia aki. Orashon lo konsolá esnan ku a pèrdè un ser kerí. E lo guia nos den s kiko pa hasi pa nos protekshon personal.
Rumannan, mi ta urgi boso pa dupliká boso kompromiso ku orashon. Mi ta urgi boso pa hasi orashon den boso kashinan, i den boso kaminata di tur dia, den boso barionan, i semper den boso kurason.12
Na nòmber di e lidernan di E Iglesia di JesuCristu di e Santunan di e Delaster Dianan, mi ta gradesí boso pa boso orashonnan pa nos. Mi ta urgi boso pa kontinuá hasi orashon pa nos por risibí inspirashon i revelashon pa guia e Iglesia den e tempunan difísil aki.
Orashon por kambia nos mes bida. Motivá pa orashon sinsero, nos por mehorá i yuda otronan pa hasi meskos.
Mi konosé e poder di orashon pa mi mes eksperensia. Resientemente mi tabata mi so den mi ofisina. Mi a kaba di pasa den un prosedura médiko na mi man. E tabata pretu i blou, hinchá, i e tabata doloroso. Ora mi a sinta na mi eskritorio, mi no por enfoká riba asuntunan importante pasó mi tabata distraí pa e doló aki.
Mi a bai na rudia den orashon i a pidi Señor pa yuda mi enfoká pa asina mi por a realisá mi obra. Mi a lanta para i a bai bèk na e monton di papel riba mi eskritorio. Kasi imediatamente, klaridat i enfoke a bini na mi mente, i mi por a kompletá e asuntunan importante mi dilanti.
E mundu su situashon kaótiko aktual por parse abrumador ora nos konsiderá e multitut di problemanan i desafionan. Pero ta mi testimonio ferviente ku si nos ke hasi orashon i pidi Tata Selestial pa bendishonnan i guia nesesario, nos lo yega na sa kon nos por bendishoná nos famianan, bisiñanan, komunidatnan, i asta paisnan na unda nos ta biba.
E Salbador a hasi orashon i despues El “tabata pasa hasi bon obra”13 dor di alimentá e pober, duna balor i apoyo na esnan den nesesidat, i aserkando den amor, pordonamentu, pas, i sosiegu na tur ku a bai serka Dje. E ta sigui na aserká nos.
Mi ta invitá tur miembronan di Iglesia, i tambe nos bisiñanan i amigunan di gruponan di otro kreensia mundialmente, pa hasi manera e Salbador a konsehá Su disípulonan: “Keda alerta, i hasi orashon semper“14 pa pas, pa konsuelo, pa seguridat, i pa oportunidatnan pa sirbi otro.
Kon grandi e poder di orashon ta, i kon nesesario nos orashonnan di fe den Dios i Su Yu Stimá ta den e mundu awendia! Laga nos kòrda i apresiá e poder di orashon . Den e nòmber di JesuCristu, amèn.