Wowo pa Wak
Pa medio di e poder di e Spiritu Santu, Cristu lo permití nos wak nos mes i wak otronan manera E ta hasié.
Wak e man di Dios
Mi ta stima e historia di Tèstamènt Bieu di un hóben ku a sirbi e profeta Eliseo. Un mainta, e hóben a lanta bai pafó tempran i a haña e siudat rondoná di un gran ehérsito ku tabata intentá distruí nan. El a kore bai serka Eliseo: “Alas, mi maestro! kon nos lo hasi?”
Eliseo a kontestá, “No tene miedu: pasó esnan ku ta ku nos ta mas ku esnan ku ta ku nan.
Eliseo tabata sa ku e hóben tabata tin mester di algu mas pa wòrdu trankilisá; e t tabatin mester di vishon. I e ora ei “Eliseo a hasi orashon,… Señor, …habri su wowonan, pa e por mira. I Señor a habri e wowonan di e hóben; i el a mira: i ata ki e seru tabata yená ku kabainan i garoshinan di kandela rònt di Eliseo” 1
Por tin momentunan kaminda abo manera e sirbidó ta enkontrabo bo mes luchando pa wak kon Dios ta obra den bo bida—tempu kaminda bo ta sinti bo oprimí i ataká—kaminda e pruebanan di bida terenal ta pone bo na rudia. Warda i konfia Dios i den Su tempu pasó bo por konfia Su kurason ku henter esun di bo. Pero tin un di dos lès aki. Mi kerido rumannan, bo tambe por hasi orashon pa Señor habri bo wowonan pa wak kosnan ku normalmente lo bo no wak.
Mira Nos Mes manera Dios ta Mira Nos
Kisas e kosnan mas importante pa nos wak ku klaridat ta ken Dios ta i ken nos ta realmente—yunan di mayornan selestial, ku un “naturalesa divino i destino eterno.” 2 Puntra Dios pa revelá e bèrdatnan aki na bo, banda di loke E ta sinti tokante bo. Mas bo komprondé bo berdadero identidat i propósito den profundidat di bo alma, mas e lo influensiá tur kos den bo bida.
Wak Otronan
Komprondé kon Dios ta mira nos ta prepará e kaminda pa yuda nos mira otronan manera E ta hasié. E kolumnista David Brooks a bisa: “Hopi di e problemanan grandi den nos sosiedat ta bin for di personanan ku no ta sinti ku nan ta wòrdu mirá i konosé . … Tin un karakterístika … esensial ku nos tur tin ku … mehorá [den i ku esei] ta e karakterístika di wak otro profundamente i wòrdu mirá profundamente.” 3
JesuCristu ta mira hende profundamente E ta wak individuonan, nan nesesidatnan i ken nan por yega na ta. Kaminda otronan a mira piskadó, pekador òf publikanonan, Jesus a mira disípulonan; kaminda otronan a mira un hòmber poseé pa demoñonan, Jesus a wak mas leu di un angustia eksterno, rekonosé i a sana e. 4
Asta den nos bida okupá nos por sigui e ehèmpel di Jesus i mira individuonan—nan nesesidatnan, nan fe, nan lucha i ken nan por yega di ta. 5
Ora mi resa pa Señor habri mi wowonan pa wak kosnan ku normalmente mi no ta mira, hopi bes mi ta hasi mi mes dos pregunta i mi ta pone atenshon na e impreshonnan ku ta bin: “Kiko mi ta hasiendo ku mi tin ku stòp di hasi?” i “Kiko mi no ta hasiendo ku mi tin ku kuminsá hasi?” 6
Algun luna pasá durante Santa Sena mi a puntra mi mes e preguntanan aki i mi tabata sorprendí ku e impreshon ku mi a risibí. “Stòp di wak bo telefòn ora ku bo ta para den fila.” Wak mi telefòn den retnan a bira kasi outomátiko; Mi a hañ’é un bon momentu pa hasi tareanan múltiple, wak mailnan, wak titularnan, i skrol dor di mensahen riba medianan sosial.
E siguiente mainta, Mi a haña mi mes ta warda den un rei largu na e tienda. Mi a warda mi telefòn i a kòrda riba e impreshon ku mi a risibí. Mi a warda mi telefòn i a wak rònt. Mi a mira un ansiano den e rei dilanti di mi. Su garoshi tabata bashí ku eksepshon di algun bleki di kuminda di pushi. Mi a sinti mi un poko inkòmodo pero mi a bisa algu realmente inteligente manera, “Mi por mira ku bo tin un pushi.” El a bisa ku un tormenta tabata biniendo i ku e no tabata kier a keda pegá sin kuminda di pushi. Nos a kombersábreve i despues el a bira bisa mi, “Bosa mi no a bisa niun hende e kos aki ainda, pero awe ta mi kumpleaño. Mi kurason a dirti. Mi a dese’é un felis kumpleaño i mi a ofresé un orashon silensioso di agradesimentu pasó mi no tabata den mi telefòn i a pèrdè e oportunidat di wak di bèrdat i konektá ku otro personanan ku tabata tin e nesesidat.
Ku henter mi kurason mi no kier ta manera e saserdote òf e levita riba e kaminda pa Yériko—un ku ta mira i pasa bai. 7 Pero frekuentemente Mi ta pensa ku mi ta.
Wak e Enkargo di Dios pa mi.
Resientemente mi a siña un lès balioso tokante wak profundamente for di un mucha muhé hóben yama Rozlyn.
E historia a wòrdu kompartí ku mi dor di mi amiga ku tabata desolá na momentu ku su kasá pa 20 aña a bai for di kas. Ku su muchanan kompartiendo tempu entre mayornan, e idea pa bishita iglesia nan so no ta parse alentador. El a bisa:
“Den un iglesia kaminda e famia ta di sumo importansia, sinta bo so por ta doloroso. E promé djadumingu mi a kana drenta hasiendo orashon pa niun hende no papia ku mi. Apénas mi por a keda trankil i e lágrimanan tabata kasi saliendo. Mi a sinta na mi lugá di kustumber, sperando ku niun hende lo a ripará kon bashí e banki tabata parse.
“Un mucha muhé hóben den nos bario a bira i wak mi. Mi a pretendé di hari. El a hari bèk. Mi por a wak e preokupashon den su kara. Mi a supliká den silensio pa e no bin papia ku mi—Mi no tabata tin nada positivo pa bisa i mi tabata sa ku lo mi yora. Mi a bolbe wak mi skochi i a evitá kontakto ku wowo.
“Durante e siguiente ora mi a nota ku e tabata wak mi okashonalmente. Manera e reunion a kaba el a bin dirèkt serka mi. ‘Kon ta Rozlyn,’ Mi a susurá. El a tene mi den su brasanan i a bisa: ‘Ruman Smith, Mi por bisa ku awe ta un mal dia pa bo. Ta duel mi. Mi stima bo.’ Manera a wòrdu pronostiká, e lágrimanan a bin ora ku el a bolbe brasa mi. Pero ora ku mi a kana bai, mi a pensa pa mi mes, ‘Kisas mi por hasi esaki tòg.’
E hobensita dushi di 16 aña ei, ménos ku mitar di mi edat, tabata haña mi tur djadumingu durante e sobra di e aña ei pa brasa mi i puntra mi, ‘Konta ku bo?’ El a hasi un diferensha riba e manera ku mi tabata sinti biniendo iglesia. E bèrdat ta ku mi a kuminsá konfia den e brasa nan ei. Un hende a mira mi. Un hende tabata sa ku mi tabata ei nan. Un hende a preokupá.”
Maneraku tur donnan ku e Tata ta ofresé boluntariamente, mira profundamente ta eksigí pa nos puntra E—i despues aktua. Puntra pa wak otronan manera E ta hasi—komo Su bèrdadero yunan hòmber- i muhé ku un potensial infinito i divino. Despues aktua stimando, sirbiendo i afirmando nan balor i potensial segun wordu indiká na bo. Segun esaki ta bira e patronchi di nos bida, nos lo kombertí den siguidónan bèrdadero di …JesuCristu.” 8 Otronan lo por konfia nos kurason ku di nan. I den e patronchi aki tambe nos lo deskubrí nos propio identidat i propósito bèrdadero.
Mi amiga ta kòrda otro eksperensia ku e tabatin miéntras e tabata sinta riba e mesun banki bashí, su so, puntrando si 20 aña di esfuerso pa biba e evangelio den su kas tabata pòrnada. E tabatin mester di algu mas ku wòrdu trankilisá; e tabatin mester di vishon. El a sinti un pregunta den su kurason: “Di kon bo a hasi e kosnan aki? Bo a hasié pa un rekompensa, e elogio di otronan òf pa e resultado ku bo tabata deseá?” El a duda un ratu, a eksaminá su kurason i tabata kapas pa duna un kontesta ku konfiansa, “Mi a hasié pasó mi Stima e Salbador. I mi Stima Su evangelio.” Señor a habri su wowo nan pa yud’é mira. E simpel pero poderoso kambio di vishon a yud’é sigui dilanti ku fe den Cristu, apesar di su sirkunstansianan.
Mi ta testigu ku JesuCristu ta stima nos i ta duna nos wowo pa mira—asta ora e ta difísil, asta ora ku nos ta kansá, asta ora ku nos ta solitario i asta ora ku e resultado no ta manera nos a spera. Pa medio di Su grasia: E lo bendishoná nos i oumentá nos kapasidat. Pa medio di e poder di e Spiritu Santu, Cristu lo permití nos mira nos mes i mira otronan manera E ta hasié. Ku Su yudansa nos por distinguí kiko ta mas nesesario. Nos por kuminsá na mira e man di Señor obrando den i dor di e detayenan ordinario di nos bida—nos lo mira profundamente.
I despues, riba e gran dia, “ora ku e paresé nos lo ta manera Epasónos lowak manera e ta; ku nos por tin e speransa aki” 9 ta mi orashon den e nòmber di JesuCristu, amèn.