Bira Manera E

Pa Elder Scott D. Whiting

Di e Setenta

Solamente ku e Salbador Su ayudo divino nos tur por progresá pa yega na bira manera E.

Hasta pa un studiante kuidadoso di e bida i e ministerio di JesuCristu, e atmonishon di e Salbador di ta “manera Ami ta” ¹ ta mustra di ta intimidá i aparentemente inalkansabel. Kisas abo ta manera mi—demasiado konsiente di bo falta i fayonan, p’esei lo bo hañ’é mentalmente mas konfortabel pa biba un bida ku poko kresementu. “Sigur ku, e enseñansa aki ta irealístiko i eksaherá,” nos ta nashonalisá segun nos ta skohe konfortablemente e ruta di ménos resistensha, asina kimando ménos kaloria di e kambio nesesario.

Pero kiko lo pasa si bira “asta manera [E ta]” no ta figurativo, asta den nos kondishon mortal? Kiko lo pasa si e ta, te na sierto punto alkansabel den e bida aki, i defakto un rekisito eksigí adelantá pa por ta huntu ku nE atrobe? Ki ta pasa si “hasta manera Mi ta” ta eksaktamente loke e Salbador kier men? Kiko e ora ei ? Ki grado di esfuerso nos lo ta dispuesto pa duna pa invitá Su poder maravioso den nos bida di manera ku nos por kambia nos naturalesa propio?

Elder Neal A. Maxwell a siña: “Miéntras nos ta meditá di a wòrdu mandá dor Jesus pa bira manera E, nos ta wak ku nos sirkunstansha aktual ta un ku nos no nesesariamente ta malu, mas bien, ta un ku nos ta ménos entusiasmá kuné i ta karesé di entusiasmo pa Su kousa—kual ta nos kousa tambe! Nos ta alabá pero masha poko biaha nos ta aspirá di ta manera E.” ² Un minister yòn, Charles M. Sheldon, a ekspresá sintimentunan similar di e manera aki: “Nos Cristianismo ta stima su fasilidat i komodidat demasiado pa aseptá algu asina duru i pisa manera un krus.” ³

Defakto, nos tur ta instruí pa ta manera E, meskos ku JesuCristu a bira manera e Tata. ⁴ Segun nos ta progresá, nos ta bira mas kompletu, akabá, i kompletamente madurá. ⁵ Enseñansanan asina no ta basa riba doktrinanan di ningun sekta pero ta bin direktamente for di E Maestro mes. Ta dor di e lèns aki mester biba e bida, tin komunikashon, i fomentá relashonnan. Di bèrdat no tin otro forma pa kura e heridanan di relashonnan kibra òf di un sosiedatfrakturá si no ta ku nos kada unu tin ku trata di ta kompletamente manera e Prínsipe di Pas. ⁶

Laga nos konsiderá kon pa kuminsá un buskeda, deliberadamente i intenshonalmente pa bira manera E ta, atkeriendo e mesun atributonan di JesuCristu.

Resolvé i Komprometé

Algun aña pasa, mi kasa i ami tabata para na subida di e seru mas haltu di Yapon, seru Fuji. Ora ku nos a kuminsá subi nos a wak e distansha leu i a puntra nos mes si nos por a yega aya.

Imagen

Mount Fuji

Segun nos ta avansá, kansansio, doló di múskulo i e efektonan di haltura a kuminsá. Mentalmente, el a bira importante pa nos djis enfoká riba e siguiente stap. Nos lo a bisa,“Kisas mi no ta logra yega pronto na e tòp, pero mi por dal e siguiente stap awor aki.” Segun tempu e tarea desalentador, finalmente a bira alkansabel—stap pa stap.

E promé stap den e kaminda pa bira manera JesuCristu ta di tin e deseo pa hasié. Pa komprondé e atmonestashon pa bira manera E ta bon, pero e komprondementu ei mester ta kompañá ku un anhelo pa transformá nos mes, stap pa stap, mas ayá di e hòmber natural. ⁷ Pa desaroyá e deseo, nos mester sa ken JesuCristu ta. Nos mester sa algu di Su karakter, ⁸ i nos mester buska su atributonan den eskritura, sirbishinan di adorashon i otro lugánan santu. Segun nos kuminsá konosé mas di DjE nos lo mira Su atributonan reflehá den otro nan. Esaki lo enkurashá nos den nos propio búskeda, pasó si otronan por alkansá den sierto forma, su atributonan, nos tambe por.

Si nos ta honesto ku nos mes, e Lus di Cristu ⁹ den nos ta flùister ku tin un distansia entre kaminda nos ta den komparashon ku e karakter deseá di e Salbador. ¹⁰ E tipo di honestidat aki ta vital si nos ke progresá i bira manera E. Enbèrdat, honestidat ta un di Su atributonan.

Imagen

Desformashon dor di spil den kas di divershon

Awor nos ku ta balente lo mester konsiderá pa puntra un miembro di famia di konfiansa, kasá, amigu, òf lider spiritual, kua atributo di JesuCristu nos tin nesesidat di dje—i kisas nos mester ta prepará pa un kontesta Tin biaha nos ta wak nos mes den spilnan ku ta laga nos mira nos mes tur desformá ku ta mustra nos mas rondó òf muchu mas delegá kunos ta di bèrdat.

Amigu i famianan di konfiansa por yuda nos wak nos mes mas presis, pero asta nan, komo ser kerí i servisial ku nan lo ke ta, por mira kos di un manera imperfekto. Komo resultado, e ta vital tambe pa nos puntra nos Tata Selestial kiko nos mester i riba kiko nos mester enfoká nos esfuersonan. E tin un bista perfekto di nos i lo mustra nos, nos debilidatnan ku tur su amor. ¹¹ Kisas lo bo siña ku bo mester tin mas tantu pasenshi, humildat, karidat, amor, speransa, [mester] ta diligente òf obediente, djis pa menshoná algun. ¹²

No muchu tempu pasa mi tabatin un eksperensha spiritual signifikativo na momentu ku un lider di Iglesia hopi kerí a duna un sugerensha hopi direkto ku mi por a hasi mas tantu uso di un sierto atributo. Ku amor el a kòrta den tur distorshon. E anochi ei, m a kompartí e eksperensha aki ku mi kasá. E tabata miserikordiosamente karitativo hasta ora ku el a bai di akuerdo ku su sugerensha. E Spiritu Santu a konfirmá na mi ku su konseho tabata di un Tata Selestial amoroso.

E por ta útil tambe pa honestamente kompletá e aktividat di atributo manera Cristu na kapítulo 6 di Prediká Mi Evangelio. ¹³

Una bes ku bo hasi un análisis honesto i ta kla pa kuminsá subi e seru, lo bo mester arepentí. Presidente Russell M. Nelson ku amor a siña: “Ora ku nos skohe pa arepentí, nos ta skohe pa kambia! Nos ta pèrmití e Salbador pa transformá nos den e mihó vershon di nos mes. Nos ta skohe pa krese spiritualmente i risibí goso—e goso di redenshon den DjE. Ora nos skohe pa arepentí, nos ta skohe pa bira mas manera JesuCristu.” ¹⁴

Bira manera JesuCristu lo rekerí un kambio di nos kurason i mente, di bèrdat, nos propio karakter, i hasiendo esaki lo ta posibel solamente dor di e grasia di JesuCristu. ¹⁵

Identifiká i Aktua

Awor ku bo a disidí na kambia i arepentí i a buska guia pa medio di orashon, honestidat meditá, i posiblemente konsultando ku otronan, lo bo mester skohe un atributo ku bo lo enfoká riba dje. Bo lo mester komprometé pa realisá un esfuerso signifikativo. E atributonan aki lo no wòrdu optené fásil i lihé, pero dor di su grasia nan lo bin segun bo ta traha duru pa logra.

Atributonan similar na esnan di Cristu ta donnan di un Tata Selestial amoroso pa bendishoná nos i esnan rondó di nos. Por lo tantu, nos esfuersonan pa optené e atributonan aki lo rekerí ruego profundo pa su asistensha divino. Si nos buska e donnan aki pa sirbi otronan mihó, E lo bendishoná nos den nos esfuersonan. Búskeda egoista di un don di Dios lo terminá den desapunto i frustrashon.

Dor di enfoká profundamente riba un atributo nesesario, segun bo ta progresá pa optené e atributo aki, lo bo kuminsá akumulá otro atributonan. Un hende ku ta enfokando profundamente riba karidat no por oumentá den amor i humildat? Un hende ku ta enfokando pa ta obediente no por bira mas diligente i [haña mas] speransa? Bo esfuersonan signifikante pa haña un atributo ta bira e marea ku ta eleva tur e barkunan den e haf.

Graba i Mantené

E ta importante pa mi pa segun mi ta esforsá pa bira manera E mi registrá mi eksperenshanan i loke mi ta siñando. Ora ku mi studia ku un di Su atributonan profundo den mi mente, e eskrituranan ta bira nobo si mi mira ehèmpel di e atributonan ei den Su enseñansanan, Su ministerio i Su disípulonan. Mi por enfoká mihó pa rekonosé e atributo den otronan. Mi a opservá hendenan maravioso tantu paden i pafó di Iglesia ku tin atributonan ku ta igual na DjE. Nan ta ehèmpelnan poderoso di kon e atributonan aki por manifestá den un simpel ser mortal dor di Su grasia amoroso.

Pa por mira un progreso real bo mester pone esfuerso sostené. Meskos ku subi un seru ta rekerí preparashon adelantá i resistensha i perseveransha durante subimentu, asina tambe e biahe ta rekerí un esfuerso i sakrifisio real. Ser un Cristian di berdat, kaminda nos ta rdforsá pa bira manera nos Maestro semper a rekeri nos mihó esfuerso. ¹⁶

Awor un atvertensha kòrtiku. E mandamentu pa ta manera DjE no ta ku e intenshon pa laga bo sinti bo kulpabel, indigno òf no stima. Nos eksperensha mortal kompletu ta trata di progresá, purba, frakasá i tin éksito. Maske ami i mi kasa a deseá di por a sera nos wowo i transportá nos mes di un manera mágiko na e tòp, esei no ta loke bida ta enserá.

Bo ta sufisiente bon, bo ta wòrdu stima, pero esei no ta nifiká ku bo ta ya bo takompletu . Tin trabou pa wordu hasi den e bida aki i den e siguiente. Solamente ku Su ayudo divino nos tur por progresá pa yega na bira manera E.

Den e tempunan aki ora ku “tur kos [ta parse] di ta un beheit; i … temor [ta aparentemente] riba tur hende,” ¹⁷ e úniko antídoto, e úniko remedi, ta lucha pa ta manera e Salbador, ¹⁸ e Redentor ¹⁹ di hinter humanidat, e Lus di mundu, ²⁰ i pa buska Esun ku a deklará, “Ami ta e kaminda.” ²¹

Imagen

E Redentor

Mi sa ku bira manera E ta alkansabel stap pa stap dor di su yudansa divino i fortalesa. Si no ta asina, E lo no a duna nos e mandamentu aki. ²² Mi sa esaki—por parti paso mi ta mira e atributonan di E den hopi di boso. Di e kosnan aki Mi ta tèstifiká den e nòmber di JesuCristu, amèn.