Fil-Fond ta’ Qalbna
Il-Mulej qed jipprova jgħinna—lkoll kemm aħna—inwasslu l-evanġelju Tiegħu aktar fil-fond ta’ qalbna.
Ħuti Xi żmien meraviljuż qed ngħixu fih. Hekk kif qed niċċelebraw il-bidu tar-Restawrazzjoni hu xieraq ukoll li niċċelebraw ir-Restawrazzjoni kontinwa li aħna lkoll xhieda tagħha. Flimkien magħkom nħossni ferħan li ninsabu ngħixu f’dan iż-żmien.1 Il-Mulej ikompli jwettaq, permezz tal-profeti tiegħu, dak kollu meħtieġ biex jgħinna nitħejjew ħalli nirċevuh.2
Waħda minn dawn l-affarijiet meħtieġa hi l-inizjattiva Tfal u Żgħażagħ. Ħafna minnkom intom familjari mal-enfażi li dan il-programm qed jagħmel fuq li nfasslu ċerta għanijiet, fuq l-emblemi ġodda ta’ appartenenza, u l-konferenzi Għas-Sodizza taż-Żgħażagħ. Iżda m’għandniex inħallu dawn iċajpru lill-veduta tagħna dwar il-prinċipji li l-programm hu mibni fuqhom u l-għan tagħhom: li jgħin sabiex l-evanġelju ta’ Ġesù Kristu jitwassal f’qalb it-tfal u ż-żgħażagħ tagħna.3
Jien nemmen li hekk kif aħna nibdew naraw b’aktar ċarezza dawn il-prinċipji, aħna nagħrfu li dan hu aktar minn sempliċiment programm għall-membri ta’ bejn it-8 u t-18-il sena. Se naraw kif il-Mulej qed jipprova jgħinna—lkoll kemm aħna—inwasslu l-evanġelju Tiegħu aktar fil-fond ta’ qalbna. Nitlob sabiex l-Ispirtu s-Santu jgħinna nitgħallmu flimkien.
Relazzjonijiet—“Kunu Magħhom”4
L-ewwel prinċipju hu r-relazzjonijiet. Peress li huma daqstant parti naturali mill-Knisja ta’ Ġesù Kristu, xi kultant ninsew x’importanza r-relazzjonijiet għandhom fil-vjaġġ kontinwu tagħna lejn Kristu. Aħna mhux mistennija nsibu jew nimxu t-triq tal-patt weħidna. Aħna neħtieġu l-imħabba u s-sapport mill-ġenituri, minn membri oħra tal-familja, u minn ħbieb, u mexxejja li jinsabu wkoll mexjin fit-triq.
Dawn it-tip ta’ relazzjonijiet jieħdu l-ħin. Ħin biex inkunu flimkien. Ħin biex nidħqu, nilagħbu, nitgħallmu u nservu flimkien. Ħin biex napprezzaw l-interessi u l-isfidi ta’ xulxin. Ħin biex inkunu onesti bejnietna hekk kif nagħmlu li nistgħu biex inkunu aħjar flimkien. Dawn ir-relazzjonijiet huma waħda mill-għanijiet ewlenin għalfejn niġbru flimkien il-familji, il-kwora, il-klassijiet, u l-kongregazzjonijiet. Huma l-pedament għal ministeru effettiv.5
Il-Presbiteru Dale G. Renlund għallimna dwar sigriet li jgħinna niżviluppaw dawn ir-relazzjonijiet meta qal: “Biex inservu lil ħaddieħor b’mod effettiv jeħtieġ inħarsu lejh … permezz ta’ għajnejn Missierna tas-Smewwiet. Hekk biss aħna nibdew nifhmu l-veru valur ta’ persuna. Hekk biss aħna nkunu nistgħu nagħrfu l-imħabba li Missierna tas-Smewwiet għandu għal uliedu kollha.”6
Li naraw lil ħaddieħor kif jarahom Alla huwa don. Jien nistieden lilna lkoll biex infittxu dan id-don. Hekk kif għajnejna jinfetħu biex naraw,7 aħna nkunu kapaċi wkoll ngħinu lil ħaddieħor jara lilu nnifsu kif jarah Alla8 Il-President Henry B. Eyring enfasizza l-qawwa ta’ dan meta qal: “L-aktar ħaġa importanti hi x’jitgħallem ħaddieħor minnek dwar min huma verament u x’jistgħu jsiru. Jien naħseb li din ma jitgħallmuhiex daqstant minn xi lekċer. Jitgħallmu dan mis- sentimenti tagħhom ta’ min intom, min taħsbu li huma, u x’taħsbu li jistgħu jsiru.”9 Li ngħinu lil ħaddieħor jifhem il-vera identità u għan tiegħu hu wieħed mill-akbar rigali li nistgħu nagħtu.10 Li nħrasu lejn ħaddieħor u lejna nfusna kif iħares lejna Alla iwassal biex jgħaqqad qlubna “flimkien f’unità u mħabba.”11
Bil-forzi sekulari li aktar ma jmorru aktar jiġbduna lejhom, aħna neħtieġu l-qawwa li nistgħu niksbuha permezz ta’ relazzjonijiet ta’ mħabba. Għalhekk hekk kif aħna nippjanaw l-attivitajiet u l-laqgħat tagħna ejjew niftakru li wieħed mill-għanijiet ġenerali ta’ dawn il-laqgħat hu li nibnu relazzjonijiet ta’ mħabba li jgħaqqduna, u jgħinuna nwasslu l-evanġelju ta’ Ġesù Kristu aktar fil-fond ta’ qlubna.12
Rivelazzjoni, Volontà, u Ndiema—“Nikkonnetjawhom mas-Smewwiet”13
Bla dubju, mhux biżżejjed li nkunu magħudin flimkien. Hemm diversi gruppi u organizzazzjonijiet li jingħaqdu flimkien f’kawżi differenti. Iżda l-għaqda li aħna nfittxu hi li nsiru ħaġa waħda fi Kristu, li nikkonnetjaw ruħna miegħu.14 Biex ngħaqqdu qlubna mas-smewwiet, neħtieġu esperjenzi spiritwali individwali, kif għadu kif kellimna dwarhom b’mod elokwenti l-Presbiteru Andersen.15 Dawk l-esperjenzi niksbuhom hekk kif l-Ispirtu s-Santu jwassal il-kelma u l-imħabba ta’ Alla f’moħħna u f’qalbna.16
Din ir-rivelazzjoni niksbuha permezz tal-iskrittura, speċjalment il-Ktieb ta’ Mormon; permezz tal-kliem ispirat tal-profeti ħajjin u dixxipli fidili oħra; u permezz tal-leħen ħelu, u sieket.17 Dan il-kliem hu ferm aktar minn sempliċi inka fuq karta, ħoss f’widnejna, ħsibijiet f’moħħna, jew sentimenti f’qalbna. Il-kelma ta’ Alla hi qawwa spiritwali.18 Hi verità u dawl.19 Hi kif aħna nisimgħuh! Il-kelma twassal biex tagħti bidu u tkabbar il-fidi tagħna fi Kristu u tħeġġeġ fina xewqa li nsiru aktar bħas-Salvatur—jiġifieri li nindmu u nimxu fit-triq tal-patt.20
April li għadda, il-President Russell M. Nelson għenna nifhmu l-irwol ewlieni tal-indiema f’dan il-vjaġġ rivelatorju.21 Hu qal: “Meta aħna nagħżlu li nindmu, aħna nagħżlu li ninbidlu! Aħna nħallu lis-Salvatur jittrasformana fl-aqwa verżjoni tagħna nfusna. … Aħna nagħżlu li nsiru nixbhu aktar lil Ġesù Kristu!”22 Il-proċess tal-bidla, stimulat permezz tal-kelma ta’ Alla, hu kif aħna nikkonnetjaw ruħna mas-smewwiet.
Sottostanti fl-istedina tal-President Nelson biex nindmu hemm il-prinċipju tal-volontà. Jeħtieġ nagħżlu l-indiema għalina nfusna. L-evanġelju ma jistax jiġi sfurzat ġo qlubna. Kif qal il-Presbiteru Renlund, “L-għan ta’ Missierna tas-Smewwiet bħala ġenitur mhuwiex li jwassal lil uliedu biex jagħmlu t-tajjeb; hu li jwassal lil uliedu jagħżlu li jagħmlu t-tajjeb.”23
Fil-programmi li posthom ittieħed minn Tfal u Żgħażagħ, kien hemm ’il fuq minn 500 ħtieġa x’wieħed iwettaq biex ikun jista’ jirċievi numru ta’ rikonoxximenti.24 Illum, essenzjalment teżisti waħda biss. Hi stedina biex nagħżlu li nsiru nixbħu aktar lis-Salvatur. Aħna nagħmlu dan billi nirċievu l-kelma ta’ Alla permezz tal-Ispirtu s-Santu u nagħtu ċans lil Kristu biex jibdilna fl-aqwa verżjoni tagħna nfusna.
Dan hu ferm aktar minn eżerċizzju kif infasslu l-għanijiet tagħna jew kif intejbu lilna nfusna. L-għanijiet huma biss għodda li tgħinna nikkunnetjaw mas-smewwiet permezz tar-rivelazzjoni, tal-volontà, u l-indiema—li nersqu lejn Kristu u nirċievu l-evanġelju Tiegħu b’aktar intensità fil-fond ta’ qalbna.
Ingaġġ u Sagrifiċċju—“Ħalluhom Imexxu”25
Finalment, biex inwasslu l-evanġelju ta’ Ġesù Kristu fil-fond ta’ qalbna jeħtieġ li ningaġġaw ruħna fih—li noffru l-ħin u t-talenti tagħna għalih, li nissagrifikaw għalih.26 Aħna lkoll irridu ngħixu ħajja li fiha skop, u dan japplika speċjalment għall-ġenerazzjoni li għadha tielgħa. Huma jixtiequ li jkollhom kawża għal xiex jaħdmu.
L-evanġelju ta’ Ġesù Kristu hu l-akbar kawża fid-dinja. Il-President Ezra Taft Benson qal: “Aħna ġejna mitlubin minn Alla biex nieħdu l-evanġelju fid-dinja kollha. Din hi l-kawża li għandha tgħaqqadna llum. Hu biss l-evanġelju li se jsalva d-dinja mis-sofferenza tal-qerda tagħha stess. Hu biss l-evanġelju li se jgħaqqad fil-paċi flimkien lill-irġiel u n-nisa ta’ kull razza u ġens. Hu biss l-evanġelju li jwassal il-ferħ, l-hena, u s-salvazzjoni lill-familja umana.”27
Il-Presbiteru David A. Bednar wegħedna, “Hekk kif aħna nsaħħu liż-żgħażagħ billi nistednuhom u nagħtuhom iċ-ċans li jaġixxu, il-Knisja timxi ’l quddiem b’mod mirakoluż.”28 Kemm-il darba aħna ma stedinniex u ma tajniex ċans liż-żgħażagħ biex jissagrifikaw għal din il-kawża kbira ta’ Kristu. Il-Presbiteru Neal A. Maxwell osserva, “Jekk iż-żgħażagħ tagħna qed iħossu li ma jistgħux ikampaw mal-ħidma ta’ Alla, probabbilment li huma mhux qed ikampaw mad-dinja.”29
Il-programm Tfal u Żgħażagħ jiffoka fuq it-tisħiħ taż-żgħażagħ. Ikunu huma li jagħżlu l-għanijiet tagħhom. Il-presidenzi tal-kworum u tal-klassi qegħdin inpoġġuhom fl-irwol xieraq tagħhom. Il-kunsill taż-żgħażagħ tal-qasam, bħal kull kunsill ieħor tal-qasam, jiffoka fuq il-ħidma tas-salvazzjoni u l-eżaltazzjoni.30 Il-kwora u l-klassijiet jibdew il-laqgħat tagħhom billi jiddiskutu flimkien dwar kif għandhom iwettqu l-ħidma li Alla tahom.31
Il-President Nelson qal liż-żgħażagħ tal-Knisja: “Jekk hi l-għażla tagħkom, jekk intom tridu … intom tistgħu tkunu parti importanti minn xi ħaġa kbira, xi ħaġa grandjuża, xi ħaġa maestuża! … Intom fost l-aqwa li l-Mulej qatt bagħat f’din id-dinja.” Intom għandkom il-kapaċità li tkunu aktar intelliġenti u għaqlin u għandkom impatt akbar fuq id-dinja mill-ġenerazzjoni ta’ qabilkom!”32 F’okkażjoni oħra, il-President Nelson qal liż-żgħażagħ: “Jiena għandi kunfidenza sħiħa fikom. Inħobbkom, u l-istess il-Mulej. Aħna l-poplu Tiegħu, ninsabu ingaġġati flimkien fil-ħidma mqaddsa Tiegħu.”33 Intom iż-żgħażagħ, tistgħu tħossu l-fiduċja li l-President Nelson għandu fikom u kemm intom importanti għal din il-ħidma?
Intom il-ġenituri u l-mexxejja adulti, nistedinkom biex tħarsu lejn iż-żgħażagħ kif iħares lejhom il-President Nelson. Hekk kif iż-żgħażagħ iħossu fihom l-imħabba u l-fiduċja, hekk kif intom tħeġġuhom u tgħallmuhom kif imexxu—u mbagħad iżżulu minn nofs—huma jgħaġġbukom bl-ideat ul-abbiltajiet tagħhom, u bl-impenn tagħhom lejn l-evanġelju.34 Huma jħossu l-ferħ li jagħżlu li jingaġġaw irwieħhom u jissagrifikaw għall-kawża ta’ Kristu. L-evanġelju Tiegħu jidħol b’aktar qawwa fil-fond ta’ qalbkom, u l-ħidma timxi ’l quddiem b’modi mirakolużi.
Wegħda u Testimonjanza
Jiena nwegħidkom li hekk kif aħna niffokaw fuq dawn il-prinċipji—relazzjonijiet, rivelazzjoni, volontà, indiema, sagrifiċċju—l-evanġelju ta’ Ġesù Kristu jinżel aktar fil-fond ta’ qalbna. Aħna naraw ir-Restawrazzjoni timxi ’l quddiem lejn l-għan aħħari tagħha, il-fidwa ta’ Iżrael u t-twaqqif ta’ Sijon,35 fejn Kristu se jsaltan bħala s-Sultan tas-Slaten.
Jiena nixhed li Alla jkompli jagħmel dak kollu neċessarju biex iħejji l-poplu Tiegħu għal dak il-jum. Jalla aħna naraw idu f’din il-ħidma glorjuża hekk kif nagħmlu li nistgħu biex “nersqu lejn Kristu u nipperfezzjonaw ruħna fih.”36 F’isem Ġesù Kristu, amen.