Kif Ibierek liż-Żgħażagħ is-Saċerdozju
Permezz tas-saċerdozju, aħna nistgħu nelevaw irwieħna. Is-saċerdozju jwassal id-dawl fid-dinja tagħna.
Jiena grata li ninsab hawnhekk. Meta skoprejt li kien se jkolli l-opportunità li nkellimkom illum, ħassejtni nimtela bl-eċċitament iżda, fl-istess ħin, ħassejtni wkoll nimtela b’umlità kbira. Għaddejt ħafna ħin naħseb dwar x’nista’ naqsam magħkom, u nittama li l-Ispirtu jitkellem magħkom direttament permezz tal-messaġġ tiegħi.
Fil-Ktieb ta’ Mormon, Leħi jagħti barka lil kull wieħed minn uliedu s-subien qabel imut, liema barka tgħinhom jagħrfu l-abbiltajiet u l-potenzjal etern tagħhom. Jiena ż-żgħira fost tmint itfal, u għall-ewwel darba din l-aħħar sena jiena kont l-unika waħda fost ħuti li għadni d-dar. Mingħar ħuti viċin tiegħi u mhux dejjem kelli lil xi ħadd ma’ min nitkellem kien veru diffiċli għalija. Kien hemm iljieli fejn ħassejtni verament waħdi. Jiena grata għall-ġenituri tiegħi, li għamlu l-almu tagħhom biex jgħinuni. Eżempju ta’ dan hu meta missieri offra li jagħtini barka saċerdotali ta’ faraġ waqt perjodu li kien partikolarment diffiċli għalija. Wara l-barka tiegħu, l-affarijiet ma nbidlux mill-ewwel, iżda jiena rnexxieli nħoss il-paċi u l-imħabba mingħand Missieri fis-Smewwiet u mingħand l-istess missieri. Jiena nħossni mbierka li għandi missier den li jista’ jipprovdili barkiet tas-saċerdozju kull meta jiena jkolli bżonnhom u li jgħinni biex nagħraf l-abbiltajiet u l-potenzjal etern tiegħi, l-istess kif għamel Leħi meta bierek lil uliedu.
Irrispettivament x’inhuma ċ-ċirkustanzi tagħkom, intom dejjem jista’ jkollkom aċċess għall-barkiet tas-saċerdozju. Permezz ta’ membri tal-familja, ħbieb, aħwa tal-ministeru, mexxejja tas-saċerdozju, u Missier fis-Smewwiet li qatt mhu se jiddiżappuntakom, intom tistgħu tirċievu l-barkiet tas-saċerdozju. Il-Presbiteru Neil L. Andersen qal: “Il-barkiet tas-saċerdozju huma infinitament akbar minn dak l-individwu li jintalab jamministra dan id-don. … Hekk kif aħna nkunu denji, l-ordinanzi tas-saċerdozju jtejbu ħajjitna.”1
Toqogħdux taħsbuha biex tistaqsu għal barka meta jkollkom bżonn ftit aktar gwida. Huwa fl-aktar mumenti diffiċli tagħna li aħna l-aktar li neħtieġu l-Ispirtu biex jgħinna. Ħadd mhu perfett u aħna lkoll nesperjenzaw ċerti diffikultajiet. Xi wħud minna jafu qed ibatu minn anzjetà, dipressjoni, vizzju, jew sentimenti li m’aħniex tajbin biżżejjed. Il-barkiet tas-saċerdozju jistgħu jgħinuna negħlbu dawn l-isfidi u nirċievu l-paċi hekk kif nimxu ’l quddiem lejn il-ġejjieni. Nittama li aħna nagħmlu li nistgħu biex ngħixu denji li nirċievu dawn il-barkiet.
Mod ieħor kif is-saċerdozju jberikna hu permezz ta’ barkiet patrijarkali. Jiena tgħallimt indur lejn il-barka patrijarkali tiegħi kull meta nħossni mnikkta jew waħdi. Il-barka tiegħi tgħinni nara l-potenzjal tiegħi u l-pjan speċifiku li Alla għandu għalija. Tfarraġni u tgħinni nara lil hinn mill-perspettiva mortali tiegħi. Tfakkarni fir-rigali tiegħi u l-barkiet li nista’ nirċievi jekk jien ngħix denja. Tgħinni wkoll inħossni fil-paċi u niftakar li Alla jipprovdili tweġiba għal talbi u jiftaħli ċerti bibien eżattament fil-mument opportun meta l-aktar li jkolli bżonn.
Il-barkiet patrijarkali jgħinu biex iħejjuna nerġgħu lura ħalli ngħixu ma’ Missierna tas-Smewwiet. Jiena naf li l-barkiet patrijarkali ġejjin minn Alla u jistgħu jgħinuna ndawru d-dgħjufijiet tagħna f’qawwa. Dan mhuwiex messaġġ minn xi “ħadd li jaqta’ x-xorti”, dawn il-barkiet jgħidulna dak li għandna bżonn nisimgħu. Huma bħal Liahona għal kull wieħed u waħda minna. Meta npoġġu lil Alla l-ewwel f’ħajjitna u jkollna l-fidi fih, Huwa jgħinna nibqgħu mexjin qalb id-deżert.
Bl-istess mod kif Alla bierek lil Joseph Smith bis-saċerdozju biex il-barkiet tas-saċerdozju jkunu jistgħu jiġu rrestawrati, aħna nistgħu nirċievu l-barkiet tal-evanġelju f’ħajjitna permezz tas-saċerdozju. Kull ġimgħa aħna ningħataw il-privileġġ u l-opportunità li nieħdu sehem fis-sagrament. Permezz ta’ din l-ordinanza tas-saċerdozju, aħna jista’ jkollna l-Ispirtu dejjem magħna, li jista’ jnaddafna u jsaffina. Jekk tħossu l-ħtieġa li teliminaw xi ħaġa minn ħajjitkom, morru għand xi mexxej li intom tafdaw biex jgħinkom terġgħu lura fit-triq il-ġusta. Il-mexxejja tagħkom jistgħu jgħinukom biex taċċessaw il-qawwa sħiħa tal-Espjazzjoni ta’ Ġesù Kristu.
Grazzi għas-saċerdozju, aħna nistgħu wkoll nirċievu l-barkiet tal-ordinanzi tat-tempju. Minn dakinhar li stajt nidħol fit-tempju, jiena ddeċidejt li għalija kienet se tkun ta’ prijorità li nattendi regolarment. Minħabba l-ħin li niddedika u s-sagrifiċċji neċessarji li jien nagħmel biex inkun aktar viċin ta’ Missieri tas-Smewwiet fid-dar imqaddsa tiegħu, jiena ġejt imbierka bl-għotja tar-rivelazzjoni u tas-suġġerimenti li verament għenuni tul ħajti.
Permezz tas-saċerdozju, aħna nistgħu nelevaw irwieħna. Is-saċerdozju jwassal id-dawl fid-dinja tagħna. Il-Presbiteru Robert D. Hales qal: “Mingħajr il-qawwa tas-saċerdozju, id-dinja tispiċċa tinqered għal kollox’ (ara D&C 2:1–3). Ma jkun hawn l-ebda dawl, l-ebda tama—dalma biss.”2
Alla qiegħed jissapportjana. Huwa jridna nerġgħu lura għandu. Huwa jafna personalment. Huwa jafkom. Huwa jħobbna. Huwa dejjem konxju tagħna u jberikna anke meta aħna nħossu li ma jixraqilniex. Huwa jaf x’neħtieġu u meta neħtiġuh.
“Itolbu u jingħatalkom; fittxu u ssibu; ħabbtu u jifħulkom:
Għax min jitlob, jaqla’; min ifittex, isib; u min iħabbat, jiftħulu” (Mattew 7:7–8).
Jekk intom għad m’għandkomx testimonjanza dwar is-saċerdozju, inħeġġiġkom biex titolbu ħalli ssiru tafu intom stess dwar il-qawwa tiegħu, imbagħad aqraw l-iskrittura biex tisimgħu kliem Alla. Jiena naf li jekk aħna nagħmlu sforz biex nesperjenzaw il-qawwa tas-saċerdozju ta’ Alla, aħna nkunu mberkin. F’isem Ġesù Kristu, amen.