Ko e Taimí ʻEni
Ka ʻoku ʻi ai ha meʻa ʻi hoʻo moʻuí ʻoku fie maʻu ke ke fakakaukauʻi, ko e taimí ʻeni.
Lolotonga haʻaku teuteu ki ha folau fakapisinisi ʻi he ngaahi taʻu siʻi kuo hilí, naʻe kamata ke mamahi hoku fatafatá. Naʻe pehē ai ʻe hoku uaifí ke ma ō, koeʻuhí ko ʻene manavasiʻí. ʻI he ʻuluaki konga ʻo ʻema folaú, naʻe fakalalahi ʻa e mamahí ʻo aʻu ki ha tuʻunga naʻe fuʻu faingataʻa ai ʻeku mānavá. ʻI heʻema tūʻutá, ne ma mavahe mei he malaʻe vakapuná ʻo hangatonu ki he falemahaki fakafeituʻú, ʻo pehē ai ʻe he toketaá, ʻi ha hili ha ngaahi sivi, ʻoku ou sai pē pea hoko atu ʻema folaú.
Ne ma foki ki he malaʻe vakapuná ʻo heka he vakapuná ki he feituʻu ne ma folau ki aí. ʻI heʻemau fakatōtō hifó, ne lea mai e pailaté he meʻa fakaongoleá ʻo kole ke u fakahā pe ʻoku ou ʻi fē. Naʻe haʻu ʻe setuatá ʻo ne pehē ne nau toki maʻu ha telefoni fakavavevave, peá ne talamai ʻoku ʻi ai ha meʻalele falemahaki ʻoku tali ʻi he malaʻe vakapuná ke ʻave au ki falemahaki.
Ne ma heka ʻi he meʻalele falemahakí pea ʻoatu fakavavevave kimaua ki he loki tokoni fakavavevavé. Naʻa mau fetaulaki ai mo ha ongo toketā loto hohaʻa ʻo na fakamatalaʻi mai naʻe fehalaaki hono sivi aú pea ko hono moʻoní ʻoku mapuni e halanga toto ʻi hoku maʻamaʻá, pea ʻoku fie maʻu ha ngāue fakafaitoʻo fakavavevave. Naʻe talamai ʻe he ongo toketaá ko e tokolahi ʻo e kau mahaki peheé ʻoku ʻikai ke nau toe moʻui. Naʻe pehē ʻe he ongo toketaá ʻi heʻena ʻiloʻi ʻokú ma mamaʻo mei ʻapi mo ʻikai fakapapauʻi pe ʻokú ma mateuteu ki he faʻahinga meʻa liliu moʻui peheé, kapau ʻoku ʻi ai ha meʻa ʻi heʻema moʻuí ʻoku fie maʻu ke fakakaukauʻi, ko e taimí ʻeni.
ʻOku ou manatuʻi lelei ʻi he meimei momeniti pē ko iá ʻa e liliu kakato ʻo ʻeku fakakaukaú. Ko e meʻa naʻe ngali mahuʻinga ʻi he ngaahi momeniti kimuʻá kuo ʻikai toe fuʻu mahuʻinga ia. Naʻe mavahe ʻeku fakakaukau mei he fiemālie mo e ngaahi meʻa ʻoku fai ki ai e tokanga ʻo e moʻui ko ʻení ki ha fakakaukau taʻengata—fakakaukau ki he fāmilí, fānaú, hoku uaifí, pea ko e taupotú ko hono vakavakaiʻi ʻo ʻeku moʻuí.
Naʻa mau fēfē nai fakafāmili mo fakafoʻituitui? Naʻa mau moʻui fakatatau nai mo e ngaahi fuakava ne mau faí pea mo e fie maʻu ʻa e ʻEikí, pe mahalo naʻa mau tuku e tokanga ki māmaní ke ne tohoakiʻi kimautolu mei he ngaahi meʻa ʻoku mahuʻinga tahá?
ʻOku ou fie fakaafeʻi kimoutolu ke mou fakakaukau ki ha lēsoni mahuʻinga mei he aʻusia ko ʻení: ke ke holomui mei māmani ʻo vakavakaiʻi hoʻo moʻuí. Pe fakatatau mo e lea ʻa e toketaá, kapau ʻoku ʻi ai ha meʻa ʻi hoʻo moʻuí ʻoku fie maʻu ke ke fakakaukauʻi, ko e taimí ʻeni.
Ko e Vakavakaiʻi ʻo ʻEtau Moʻuí
ʻOku tau moʻui ʻi ha māmani hakeʻuta ʻi he fakamatalá, ʻo puleʻia ʻe he ngaahi fakahohaʻa ʻoku fakautuutú ʻo ne ʻai ke toe faingataʻa ange ke hao mei he ngaahi felekeu ʻo e moʻui ko ʻení ʻo tokanga ki he ngaahi meʻa ʻoku mahuʻinga taʻengatá. ʻOku fepālekaki ʻetau moʻui fakaʻahó ʻe ha ngaahi ʻuluʻi tohi ʻoku nau puke e tokangá, pea tafunaki ʻe he ngaahi lelei vave ʻo e tekinolosiá.
Ka ʻikai ke tau tuku ha taimi ke fakakaukau, mahalo ʻe ʻikai ke tau fakatokangaʻi e nunuʻa ʻo e ʻātakai ngaʻunu vave ko ʻení ʻi heʻetau moʻui fakaʻahó pea mo e ngaahi fili ʻoku tau faí. Mahalo te tau fakatokangaʻi ʻoku moʻua ʻetau moʻuí ʻi ha ngaahi fakamatala ʻoku fūfūnaki ʻi he ngaahi ʻata fakaoli, vitiō, pea mo e ngaahi ʻuluʻi tohi mataʻāʻaá. Neongo ʻoku mālie mo fakaoli, ka ko e lahi taha ʻo e ngaahi meʻá ni ʻoku siʻi haʻanau fekauʻaki mo ʻetau fakalakalaka taʻengatá, ka ʻoku nau fakafōtunga e anga ʻo ʻetau vakai ki heʻetau aʻusia fakamatelié.
ʻE lava ke fakatatau ʻa e ngaahi fakahala fakamāmani ko ʻení ki he ngaahi meʻa ʻi he misi ʻa Līhaí. ʻI heʻetau fakalakalaka ko ia ʻi he hala ʻo e fuakavá mo piki maʻu hotau nimá ʻi he vaʻa ukameá, ʻoku tau fanongo mo mamata kiate kinautolu ʻoku “manuki mo tuhu ʻaki honau louhiʻi nimá” mei he fuʻu fale lahi mo ʻataʻataá (1 Nīfai 8:27). Mahalo ʻoku ʻikai ko hotau lotó ke fai pehē, ka ʻoku tau tuʻu he taimi ʻe niʻihi pea hiki ʻetau vakaí ke ʻilo pe ko e hā ʻa e ngaahi longoaʻá. ʻE ʻi ai hatau niʻihi, mahalo te nau tukuange ʻa e vaʻa-ukameá kae ʻunu ʻo ofi ange ke sio lelei. Ko e toengá mahalo te nau matuʻaki hē atu “koeʻuhí ko kinautolu naʻe lolotonga manuki mai kiate kinautolú” (1 Nīfai 8:28).
Naʻe fakatokanga mai ʻa e Fakamoʻuí ke tau “tokanga … telia naʻa ʻiloange kuo taʻomia homou lotó ʻi he … tokanga ki he moʻui ní” (Luke 21:34). ʻOku fakamanatu mai ʻe he fakahā ʻo onopōní ʻoku ui ʻa e tokolahi, ka ʻoku fili ʻa e tokosiʻi. ʻOku ʻikai fili kinautolú “koeʻuhí he ʻoku … tuku [ʻa] honau lotó ki he ngaahi meʻa ʻo e māmani ko ʻení, pea nau holi ki he fakaʻapaʻapa ʻa e kakaí” (Tokāteline mo e Ngaahi Fuakava 121:35; vakai foki, veesi 34). ʻOku ʻomai ʻe he vakavakaiʻi ʻo ʻetau moʻuí ha faingamālie ke tau kiʻi holomui mei māmani, fakakaukau ki he feituʻu ʻoku tau ʻi ai ʻi he hala ʻo e fuakavá, pea, kapau ʻoku fie maʻu, fai ha ngaahi liliu ke fakapapauʻi ʻoku tau pikimaʻu mo sio pē ki muʻa.
Naʻe fakaafeʻi ʻe Palesiteni Lāsolo M. Nalesoni ʻa e toʻu tupú, ʻi ha fakataha lotu kimuí ni, ke nau kiʻi holomui mei māmani, mavahe mei he mītia fakasōsialé ʻaki hano taʻofi ʻi ha ʻaho ʻe fitu. Pea ʻi he efiafi pē ʻaneafí, naʻá ne fai ha fakaafe tatau ki he kakai fefiné ko e konga ʻo e fakatahaʻanga ʻa e kakai fefiné ʻi he konifelenisí. Naʻá ne kole leva ki he toʻu tupú ke nau fakatokangaʻi ha faʻahinga faikehekehe ʻi heʻenau ongó, meʻa ʻoku nau fakakaukauʻí, pea naʻa mo e anga ʻo ʻenau fakakaukaú. Peá ne toki fakafeʻi leva kinautolu ke “sivisiviʻi [ʻenau] moʻuí mo e ʻEikí … ke fakapapauʻi ʻokú ke tuʻu taʻeueʻia ʻi he hala ʻo e fuakavá.” Naʻá ne poupouʻi kinautolu kapau naʻe ʻi ai ha ngaahi meʻa ʻi heʻenau moʻuí naʻe fie maʻu ke liliu, “ko e ʻʻaho lelei ʻeni ke liliu aí.”1
ʻI heʻetau vakavakaiʻi e ngaahi meʻa ʻi heʻetau moʻuí ʻe fie maʻu ke liliú, te tau ala fai kiate kitautolu ha fehuʻi faingofua: ʻE founga fēfē haʻatau mavahe hake mei he ngaahi fakahohaʻa ʻo e māmani ko ʻení kae tokanga taha pē ki he vīsone ʻo ʻitāniti ʻoku ʻi muʻa ʻiate kitautolú?
Naʻe akoʻi ʻe Palesiteni Tāleni H. ʻOakesi ʻi heʻene malanga konifelenisi ʻi he 2007, naʻe ui ko e “Lelei, Lelei Ange, Lelei Tahá,” ʻa e founga ke fokotuʻutuʻu lelei ai e ngaahi fili ʻi he ngaahi fiemaʻu fakamāmani ʻoku fepakipakí. Naʻá ne faleʻi, “Kuo pau ke tau tukuange ha ngaahi meʻa lelei kae lava ke tau fili ha niʻihi ʻoku lelei ange pe lelei tahá he ʻoku nau fakatupulaki e tui ki he ʻEiki ko Sīsū Kalaisí mo fakamālohia hotau ngaahi fāmilí.”2
Tuku muʻa ke u fokotuʻu atu ko e ngaahi meʻa lelei taha ʻi he moʻui ko ʻení ʻoku fakatefito ia ʻia Sīsū Kalaisi pea mo e mahino ʻo e ngaahi moʻoni taʻengata pe ko hai Ia pea ko hai kitautolu ʻi heʻetau fetuʻutaki mo Iá.
Fekumi ki he Moʻoní
ʻI heʻetau feinga ko ia ke ʻiloʻi e Fakamoʻuí, ʻoku ʻikai totonu ke tau taʻe-fakatokangaʻi ʻa e tefitoʻi moʻoni mahuʻinga ko hai kitautolu mo e ʻuhinga ʻoku tau ʻi heni aí. ʻOku fakamanatu mai ʻe ʻAmuleki “ko e moʻuí ni ko e taimi ia … ke teuteu ai ke feʻiloaki mo e ʻOtuá,” ko e taimi “kuo tuku mai kiate kitautolu ke teuteu ki he taʻengatá” (ʻAlamā 34:32–33). Hangē ko hono fakamanatu mai ʻe he lea ʻiloá, “ʻOku ʻikai ko ha tangata kitautolu ʻoku tau maʻu ha aʻusia fakalaumālie. Ko e ngaahi laumālie kitautolu ʻoku tau maʻu ha aʻusia fakaetangata.”3
ʻOku mahuʻinga e mahino hotau tupuʻanga fakalangí ki heʻetau fakalakalaka taʻengatá pea te ne lava ke fakatauʻatāinaʻi kitautolu mei he ngaahi fakahohaʻa ʻo e moʻui ko ʻení. Naʻe akoʻi ʻe he Fakamoʻuí:
“Kapau te mou nofo maʻu ʻi heʻeku leá, pea ko ʻeku kau ākonga moʻoni ʻakimoutolu;
“Pea te mou ʻilo ʻa e moʻoní, pea ʻe fakatauʻatāinaʻi ʻa kimoutolu ʻe he moʻoní” (Sione 8:31–32).
Naʻe fakahā ʻe Palesiteni Siosefa F. Sāmita, “Ko e lavameʻa maʻolunga taha ʻe lava ke fakahoko ʻe he faʻahinga ʻo e tangatá ʻi māmaní ko haʻanau fakafeangainga kinautolu mo e moʻoni fakalangí, ke mahino kakato, mo haohaoa moʻoni, ke ʻoua naʻa faifai angé pea lava ʻe ha sīpinga ʻo fakatafoki kinautolu mei he ʻilo ʻoku nau maʻú.”4
Kuo aʻu hono tipeitiʻi ʻo e moʻoní ʻi māmani he ʻahó ni ki ha tuʻunga ʻoku fihi, ʻo tala ʻe he ngaahi tafaʻakí kotoa ʻenau moʻoní ʻo hangē ko ha foʻi fakakaukau ʻoku fakaʻatā ki he fakaʻuhinga ʻa e fakafoʻituituí. Naʻe ʻilo ʻe he tamasiʻi kei siʻi ko Siosefa Sāmitá “naʻe hulu pehē fau ʻa e moveuveú mo e fekeʻikeʻí” ʻi heʻene moʻuí “naʻe faingataʻa ai … ke ʻiloʻi pau pe ko hai ʻoku totonú pe ko hai ʻoku halá” (Siosefa Sāmita—Hisitōliá 1:8). ʻI he “lolotonga ʻo e fakafetauʻi lea mo e moveuveu ko ʻení” naʻá ne kole ai ha fakahinohino fakalangi ʻaki ʻene fekumi ki he moʻoní (Siosefa Sāmita—Hisitōliá 1:10).
Naʻe akoʻi ʻe Palesiteni Nalesoni ʻi he konifelenisi ʻo ʻEpelelí, “Kapau ʻoku tau fakaʻamu ke lava ʻo sivisiviʻi e ngaahi leʻo kehekehé mo e fakakaukau ʻa e tangatá ʻokú ne ʻohofi ʻa e moʻoní, kuo pau ke tau ako ke maʻu e fakahaá.”5 Kuo pau ke tau ako ke falala ki he Laumālie ʻo e Moʻoní, ʻa ia “ʻoku ʻikai faʻa maʻu ʻe he māmaní, he ʻoku ʻikai mamata ia ki ai, pe ʻiloʻi ia”(Sione 14:17).
ʻI he ngaʻunu vave ko ia ʻa e māmani ko ʻení ki he ngaahi moʻoni kehé, kuo pau ke tau manatuʻi e ngaahi lea ʻa Sēkopé “ʻOku folofola ʻaki ʻe he Laumālié ʻa e moʻoní pea ʻoku ʻikai loi. Ko ia, ʻokú ne folofola ki he ngaahi meʻa ʻo hangē ko honau angamoʻoní, pea ki he ngaahi meʻa ʻo hangē ko honau angamoʻoni ʻe ʻi aí; ko ia, ʻoku fakahā mahinongofua mai ʻa e ngaahi meʻá ni kiate kitautolu, koeʻuhí ke fakamoʻui ʻa hotau laumālié” (Sēkope 4:13).
ʻI heʻetau holomui mei māmani ʻo vakavakaiʻi ʻetau moʻuí, ko e taimi pē ʻeni ke fakakaukauʻi ai e ngaahi liliu ʻoku fie maʻu ke tau faí. Te tau lava ʻo maʻu ha ʻamanaki lahi ʻi he ʻiloʻi ko hotau Faʻifaʻitakiʻangá, ʻa Sīsū Kalaisi, kuó Ne toe taki ʻa e halá. Kimuʻa ʻi Heʻene Pekiá mo e Toetuʻú, pea ʻi Heʻene ngāue ke tokoniʻi kinautolu naʻa nau feohí ke mahino Hono fatongia fakalangí, naʻá Ne fakamanatuʻi ange “Ke mou maʻu ʻa e fiemālié ʻiate au. Te mou maʻu ʻa e mamahí ʻi māmani; ka mou loto toʻa; kuó u ikuʻi ʻa māmani” (Sione 16:33). ʻOku ou fakamoʻoni kiate Ia ʻi he huafa ʻo Sīsū Kalaisí, ʻēmeni.