မောဇိယ ၁၅

အခန်းကြီး ၁၅

ခရစ်တော်သည်ကား၊ ခမည်းတော်နှင့် သားတော် နှစ်ဦးစလုံးဖြစ်ကြောင်းကို ရှင်းပြ၏—သူသည် မိမိလူတို့၏ လွန်ကျူးခြင်းများကို တောင်းပန်ပြီး ခံယူ၏—သူတို့နှင့် သန့်ရှင်းသည့် ပရောဖက်ခပ်သိမ်းတို့သည် သူ၏အမျိုးအနွယ်များဖြစ်ကြ၏—သူသည် ရှင်ပြန်ထမြောက်ခြင်းကို ဖြစ်ပေါ်စေ၏—ကလေးသူငယ်တို့သည် ထာဝရအသက်ကို ရရှိကြ၏။ ဘီစီ ၁၄၈ ခန့်။

၁ ယခုမူကား၊ အဘိနဒိက ဆိုလေသည်မှာ၊ ဘုရားသခင်ကိုယ်တော်တိုင် လူသားတို့၌ ဆင်းလာတော်မူပြီး၊ သူ၏လူမျိုးတို့ကို ရွေးနှုတ်တော်မူမည်ဖြစ်ကြောင်း သင်တို့နားလည်စေရန် ငါအလိုရှိ၏။

၂ ထို့အတူ၊ သူသည် ဇာတိကိုယ်ခန္ဓာ၌ နေထိုင်သောကြောင့် ဘုရားသခင်၏သားတော်ဟု အခေါ်ခံရလိမ့်မည်။ ဇာတိကိုယ်ခန္ဓာကိုလည်း ခမည်းတော်၏အလိုတော်သို့ ဩဇာခံဖြစ်စေသောကြောင့် ခမည်းတော်နှင့် သားတော်ဖြစ်တော်မူ၏—

၃ ဘုရားသခင်၏တန်ခိုးတော်အားဖြင့် ပဋိသန္ဓေစွဲယူသောကြောင့်၊ ခမည်းတော်ဖြစ်လျက်၊ ဇာတိကိုယ်ခန္ဓာကြောင့်၊ သားတော်ဖြစ်၍၊ ထိုကဲ့သို့အားဖြင့် သူသည် ခမည်းတော်နှင့် သားတော် ဖြစ်လာပေ၏—

၄ သူတို့သည်လည်း တစ်ပါးတည်းသောဘုရားသခင်၊ အထူးသဖြင့်၊ ကောင်းကင်နှင့်မြေကြီး၏ ထာဝရအဘ အမှန်ဖြစ်တော်မူ၏။

၅ ထိုကဲ့သို့အားဖြင့်၊ ဇာတိကိုယ်ခန္ဓာသည် ဝိညာဉ်တော်၏ဩဇာခံ၊ သို့မဟုတ်၊ သားတော်သည် ခမည်းတော်၏ဩဇာခံ ဖြစ်လာပြီး၊ တစ်ပါးတည်းသောဘုရားသခင်ဖြစ်လျက်၊ သွေးဆောင်ဖြားယောင်းခြင်းကို ကြံ့ကြံ့ခံ၍၊ သွေးဆောင်ဖြားယောင်းခြင်းကို အရှုံးမပေး၊ သို့ရာတွင် မိမိလူမျိုးတို့၏ပြက်ရယ်ပြုခြင်း၊ ရိုက်ပုတ်ခြင်း၊ နှင်ထုတ်ခြင်းနှင့် ပစ်ပယ်ခြင်းတို့ခံရဖို့ သူ့ကိုယ်ကို အခွင့်ပေးတော်မူ၏။

၆ ဤအရာခပ်သိမ်း၏နောက်တွင်၊ လူသားတို့၌ ကြီးစွာသော အလွန်တရာအံ့ဩဖွယ်အမှုများစွာတို့ကို ပြုတော်မူပြီးနောက်၊ သူ့ကို ခေါ်ဆောင်သွားလိမ့်မည်။ ထိုမှတစ်ပါး၊ ဟေရှာယကဟောခဲ့သကဲ့သို့ပင်၊ သိုးသည် အမွေးညှပ်သောသူရှေ့မှာ မမြည်ဘဲနေသကဲ့သို့၊ သူသည် နှုတ်ကိုမဖွင့်ဘဲနေ၏။

၇ ထိုမှတစ်ပါး၊ သူသည် ထိုကဲ့သိုပင် ခေါ်ဆောင်ခံလျက်၊ လက်ဝါးကပ်တိုင်မှာ ကွပ်မျက်ခံရ၊ အသတ်ခံရသဖြင့်၊ ဇာတိကိုယ်ခန္ဓာသည် သေခြင်း၏ဩဇာခံပင်ဖြစ်လာ၍၊ သားတော်၏အလိုတော်သည် ခမည်းတော်၏အလိုတော်အားဖြင့် လွှမ်းခြုံခံရလိမ့်မည်။

၈ ထိုကဲ့သို့အားဖြင့်၊ ဘုရားသခင်သည် သေခြင်း၏ကြိုးများကို ဖြတ်၏၊ သေခြင်းအပေါ်၌ အောင်နိုင်ခြင်းကိုရရှိ၍၊ သားတော်အား လူသားတို့အတွက် တောင်းပန်ခြင်းပြုတော်မူရန် တန်ခိုးကို ပေးတော်မူ၏—

၉ ကောင်းကင်ဘုံသို့တက်သွားတော်မူလျက်၊ ကရုဏာတော်ဝမ်း ရှိတော်မူလျက်၊ လူသားတို့အပေါ် သနားတော်မူခြင်းနှင့်လည်း ပြည့်တော်မူလျက်၊ သူတို့နှင့် တရားတော်မူခြင်းအကြားတွင်ရပ်လျက်၊ သေခြင်း၏ ကြိုးများကို ဖြတ်တော်မူလျက်၊ သူတို့၏ ဒုစရိုက်နှင့် သူတို့၏ လွန်ကျူးခြင်းများကို သူ့ကိုယ်ပေါ်၌ ခံယူတော်မူ၏။ သူတို့ကို ရွေးနှုတ်တော်မူလျက်၊ တရားတော်မူခြင်း၏ လိုအပ်ချက်များကို ပြီးပြည့်စေ၏။

၁၀ ယခုမူကား၊ သင်တို့ကို ငါဆိုသည်မှာ၊ သူ၏မျိုးဆက်ကို အဘယ်သူ ပြညွှန်မည်နည်း။ ရှုလော့၊ သင်တို့ကို ငါဆိုသည်ကား၊ အပြစ်အတွက် သူ၏အသက်ကို ပူဇော်သက္ကာအဖြစ်ပြုလေပြီးမှ၊ သူ၏အမျိုးအနွယ်ကို သူမြင်ရလိမ့်မည်။ ယခုမူကား၊ သင်တို့သည် အဘယ်အရာကို ပြောကြသနည်း။ ထို့အတူ၊ အဘယ်သူသည် သူ၏အမျိုးအနွယ်ဖြစ်လိမ့်မည်နည်း။

၁၁ ရှုလော့၊ သင်တို့ကို ငါဆိုသည်ကား၊ ပရောဖက်၊ အထူးသဖြင့်၊ ကိုယ်တော်ရှင် ကြွလာတော်မူမည့်အကြောင်း ပရောဖက်ပြု၍၊ ဟောလေသည့် သန့်ရှင်းသော ပရောဖက်ခပ်သိမ်းတို့၏ စကားများကို ကြားနာလေသည့်သူမှန်သမျှတို့သည်လည်းကောင်း—သင်တို့ကို ငါဆိုသည်ကား၊ သူတို့၏စကားများကို စေ့စေ့နားထောင်၍၊ သူ၏လူမျိုးတို့ကို ကိုယ်တော်ရှင်ရွေးနှုတ်တော်မူလိမ့်မည်ဖြစ်ကြောင်း ယုံကြည်သဖြင့်၊ မိမိတို့၏အပြစ်များမှလွှတ်ခြင်းအတွက် ထိုနေ့ကို မျှော်လင့်ကြသောသူ ခပ်သိမ်းတို့သည်လည်းကောင်း၊ သင်တို့ကို ငါဆိုသည်ကား၊ ဤသူတို့သည် သူ၏အမျိုးအနွယ် သို့မဟုတ်၊ ဘုရားသခင့်နိုင်ငံတော်၏အမွေကို ခံသောသူများ ဖြစ်ကြ၏။

၁၂ အကြောင်းမူကား၊ ဤသူတို့မှာ သူခံယူခဲ့သည့်အပြစ်များရှိသောသူများဖြစ်၏။ ဤသူတို့မှာ လွန်ကျူးခြင်းများမှ ရွေးနှုတ်ခြင်းငှာ၊ သူသေ၍ပေးခဲ့လေသောသူများဖြစ်၏။ ယခုမူကား၊ သူတို့သည် သူ၏အမျိုးအနွယ် မဟုတ်ကြသလော။

၁၃ ထိုမှတစ်ပါး၊ ပရောဖက်ပြု၍ဟောခြင်းငှာ၊ မိမိနှုတ်ကိုဖွင့်ကြသောသူတိုင်း၊ လွန်ကျူးခြင်းထဲသို့ မလဲကျလေသောသူ၊ ငါဆိုလိုသည်ကား၊ ကမ္ဘာဦးကတည်းက ရှိခဲ့ကြလေသည့် သန့်ရှင်းသောပရောဖက်ခပ်သိမ်းတို့သည် သူ၏အမျိုးအနွယ်မဟုတ်ကြသလော။ သင်တို့ကို ငါဆိုသည်ကား၊ သူတို့သည် သူ၏အမျိုးအနွယ်ဖြစ်၏။

၁၄ ဤသူတို့သည်ကား၊ ငြိမ်းချမ်းခြင်းကို ပြောကြားသောသူ၊ ကောင်းမြတ်ခြင်း၏ ဝမ်းမြောက်စရာသတင်းကို ပြောကြားသောသူ၊ ကယ်တင်ခြင်းကို ပြောကြားသောသူ၊ ထို့အတူ၊ သင်၏ဘုရားသခင်စိုးစံတော်မူ၏ဟု ဇိအုန်မြို့ကို ဆိုသောသူများပေတည်း။

၁၅ အို သူတို့၏ခြေတို့သည်လည်း တောင်ပေါ်မှာ အလွန်တင့်တယ်လှပေစွတကား။

၁၆ ထိုမှတစ်ဖန်၊ ငြိမ်းချမ်းခြင်းကို ပြောကြားလျက်ရှိနေသေးသောသူတို့၏ခြေတို့သည်ကား၊ တောင်ပေါ်မှာ အလွန်တင့်တယ်လှပေစွတကား။

၁၇ ထိုမှတစ်ဖန်၊ နောင်ကာလ၌၊ အမှန်စင်စစ်၊ ဤအချိန်ယခုမှစ၍၊ ကာလအစဉ်အဆက် ငြိမ်းချမ်းခြင်းကို ပြောကြားမည့်သူတို့၏ ခြေတို့သည်ကား၊ တောင်ပေါ်မှာ အလွန်တင့်တယ်လှပေစွတကား။

၁၈ ရှုဦးလော့၊ သင်တို့ကို ငါဆိုသည်ကား၊ ဤအရာသည် အလုံးစုံမဟုတ်။ အကြောင်းမူကား၊ အို ဝမ်းမြောက်စရာသတင်းကို ဆောင်ယူလာသောသူ၊ ငြိမ်းချမ်းခြင်းကို တည်ထောင်သူ၊ အထူးသဖြင့်၊ မိမိလူတို့ကို ရွေးနှုတ်တော်မူလေသည့် ကိုယ်တော်ရှင်ပင်ဖြစ်သည့်သူ၊ အထူးသဖြင့်၊ မိမိလူတို့အား ကယ်တင်ခြင်းကို ပေးလေသည့် ထိုသူ၏ခြေတို့သည်ကား၊ တောင်ပေါ်မှာ အလွန်တင့်တယ်လှပေစွတကား။

၁၉ အကြောင်းမူကား၊ ကမ္ဘာတည်ကတည်းက ပြင်ဆင်ထားတော်မူခဲ့သည့်၊ သူ၏လူတို့အတွက် ပြုထားတော်မူခဲ့လေသော ရွေးနှုတ်ခြင်းကြောင့်မဟုတ်လျှင်၊ သင်တို့ကို ငါဆိုသည်ကား၊ ဤအရာကြောင့် မဟုတ်လျှင်၊ ခပ်သိမ်းသော လူသားတို့ပျက်စီးရပေမည်။

၂၀ သို့ရာတွင်၊ ရှုလော့၊ သေခြင်း၏ကြိုးများပြတ်လိမ့်မည်။ သားတော်သည်လည်း အုပ်စိုး၍ သေခြင်းကို အစိုးရတော်မူ၏။ ထို့ကြောင့်၊ သူသည် သေသူတို့၏ရှင်ပြန်ထမြောက်ခြင်းကို ဖြစ်ပေါ်စေ၏။

၂၁ ထို့အတူ၊ ရှင်ပြန်ထမြောက်ခြင်း၊ ပထမရှင်ပြန်ထမြောက်ခြင်းပင်ဖြစ်ပေါ်လာလိမ့်မည်။ အထူးသဖြင့်၊ လွန်လေပြီးသောသူများ၊ ယခုလက်ရှိသူများနှင့် နောင်ဖြစ်လာမည့်သူများတို့၏ ရှင်ပြန်ထမြောက်ခြင်းသည်ပင် ခရစ်တော်၏ရှင်ပြန်ထမြောက်ခြင်းသို့တိုင်အောင်ပင် ဖြစ်ပေါ်လိမ့်မည်—အကြောင်းမူကား၊ သူသည် ထိုသို့ အခေါ်ခံရလိမ့်မည်။

၂၂ ယခုမူကား၊ ရှင်ပြန်ထမြောက်ခြင်း၌၊ ခပ်သိမ်းသောပရောဖက်များ၊ ထို့အတူ သူတို့၏စကားများကို ယုံကြည်သည့် ခပ်သိမ်းသောသူများ၊ သို့မဟုတ် ဘုရားသခင်၏ ပညတ်တော်များကို စောင့်ထိန်းသည့် ခပ်သိမ်းသောသူတို့သည် ပထမရှင်ပြန်ထမြောက်ခြင်း၌ ထွက်လာကြလိမ့်မည်။ ထို့ကြောင့်၊ သူတို့သည် ပထမရှင်ပြန်ထမြောက်သူများ ဖြစ်ကြ၏။

၂၃ သူတို့ကို ရွေးနှုတ်တော်မူလေသည့် ဘုရားသခင်နှင့် နေထိုင်ကြစေခြင်းငှာ ထမြောက်စေ၏။ ထို့ကြောင့်၊ သေခြင်း၏ကြိုးများကို ဖြတ်တော်မူလေသည့် ခရစ်တော်အားဖြင့်၊ သူတို့သည် ထာဝရအသက်ကို ရရှိကြလေပြီ။

၂၄ ဤသူတို့သည်ကား၊ ပထမရှင်ပြန်ထမြောက်ခြင်းကို ဝင်စားသောသူများဖြစ်၏။ ဤသူတို့သည်ကား၊ ကယ်တင်ခြင်းကို ဟောပြောထားခြင်းမရှိ၍၊ အသိတရားမဲ့လျက် ခရစ်တော်ကြွလာတော်မမူမီ သေမည့်သူများဖြစ်ကြ၏။ ထိုကဲ့သို့အားဖြင့်၊ ကိုယ်တော်ရှင်သည် ဤသူတို့အား ပြန်လည်အပ်နှင်းခြင်းကို ဖြစ်ပေါ်စေ၏။ သူတို့သည်လည်း ကိုယ်တော်ရှင်၏ ရွေးနှုတ်တော်မူခြင်းကြောင့်၊ ပထမရှင်ပြန်ထမြောက်ခြင်းကို ဝင်စားကြ၊ သို့မဟုတ်၊ ထာဝရအသက်ကို ရရှိကြ၏။

၂၅ ထို့အတူ၊ ကလေးသူငယ်တို့သည်လည်း ထာဝရအသက်ကို ရရှိကြ၏။

၂၆ သို့ရာတွင်၊ ရှုလော့၊ သင်တို့သည် တုန်ရမည်ဖြစ်သောကြောင့်၊ ဘုရားသခင်ရှေ့၌ ကြောက်ရွံ့၍ တုန်ကြလော့။ အကြောင်းမူကား၊ ကိုယ်တော်ရှင်သည် သူ့ကိုဆန့်ကျင်ပုန်ကန်၍ သူတို့၏အပြစ်၌ သေသောသူ၊ အထူးသဖြင့်၊ ကမ္ဘာဦးကတည်းက သူတို့၏အပြစ်များ၌ ပျက်စီးလေသောသူ၊ ဘုရားသခင်ကို တမင်ဆန့်ကျင်ပုန်ကန်သောသူ၊ ဘုရားသခင်၏ပညတ်တော်များကို သိလေပြီး မစောင့်ထိန်းလိုသူ ခပ်သိမ်းတို့မှ၊ အမှန်စင်စစ် ထိုကဲ့သို့သောသူအဘယ်သူကိုမျှ၊ ရွေးနှုတ်ခြင်းမရှိ။ ဤသူတို့သည်ကား၊ ပထမရှင်ပြန်ထမြောက်ခြင်းကို မဝင်စားသူများဖြစ်ကြ၏။

၂၇ ထို့ကြောင့်၊ သင်တို့မတုန်သင့်ကြသလော။ အကြောင်းမူကား၊ ကိုယ်တော်ရှင်သည် ထိုကဲ့သို့သောသူကို ရွေးနှုတ်ခြင်းမရှိသောကြောင့်၊ ကယ်တင်ခြင်းသည် ထိုကဲ့သို့သောသူထံသို့ မရောက်ရှိ။ အထူးသဖြင့်၊ ကိုယ်တော်ရှင်သည်လည်း ထိုကဲ့သို့သောသူကို ရွေးနှုတ်တော်မူနိုင်ခြင်းမရှိ။ အကြောင်းမူကား၊ ထိုသူသည် သူ့ကိုယ်သူ မငြင်းဆိုနိုင်။ ထိုသူသည် တရားတော်မူခြင်း၏ အကျိုးပြုသက်ရောက်မှုရှိသောအခါ မငြင်းဆိုနိုင်သောကြောင့်ပေတည်း။

၂၈ ယခုမူကား၊ သင်တို့ကို ငါဆိုသည်မှာ၊ ပြည်သား၊ အမျိုးစု၊ အသီးသီးဘာသာစကားကိုပြောသူနှင့် လူမျိုးမှန်သမျှထံ ကိုယ်တော်ရှင်၏ကယ်တင်ခြင်းကို ဟောကြားမည့်အချိန်သည် ကျရောက်လာလိမ့်မည်။

၂၉ ထိုမှတစ်ပါး၊ ကိုယ်တော်ရှင်၊ သင်၏ကင်းစောင့်တို့သည် ကြွေးကြော်ကြ၍၊ တညီတညွတ်တည်းသောအသံဖြင့်၊ သီဆိုကြလိမ့်မည်။ အကြောင်းမူကား၊ ကိုယ်တော်ရှင်က ဇိအုန်မြို့ကို ပြန်လည်တည်ရှိစေတော်မူသောအခါ၊ သူတို့သည် ကိုယ်တိုင်မြင်ရလိမ့်မည်။

၃၀ ဝမ်းမြောက်စွာ ကြွေးကြော်ကြလော့၊ အတူတကွသီချင်းဆိုကြလော့၊ ယေရုရှလင်ရှိ ပြိုပျက်ရာအရပ်တို့။ အကြောင်းမူကား၊ ကိုယ်တော်ရှင်သည် မိမိလူမျိုးတို့ကို နှစ်သိမ့်စေတော်မူလေပြီ၊ ယေရုရှလင်ကို ရွေးနှုတ်တော်မူလေပြီ။

၃၁ ကိုယ်တော်ရှင်သည် သူ၏သန့်ရှင်းသောလက်တော်ကို၊ ခပ်သိမ်းသော ပြည်သားတို့ရှေ့၌၊ ဖွင့်ပြထားတော်မူ၏။ မြေကြီးစွန်းသား ခပ်သိမ်းတို့သည်လည်း ငါတို့ဘုရားသခင်၏ ကယ်တင်ခြင်းကို မြင်ရလိမ့်မည်။