မောဇိယ ၁၄

အခန်းကြီး ၁၄

ဟေရှာယသည် မေရှိယအကြောင်းကို ပြော၏—မေရှိယ၏နှိမ့်ချခြင်းနှင့် ဒုက္ခဝေဒနာခံစားရခြင်းများကို ဖော်ပြထား၏—သူသည် အပြစ်အတွက် မိမိအသက်ကို ပူဇော်သက္ကာအဖြစ်ပြု၍၊ လွန်ကျူးသောသူများအတွက် တောင်းပန်ခြင်းကို ပြု၏—ဟေရှာယအခန်းကြီး ၅၃ နှင့် နှိုင်းယှဉ်ပါ။ ဘီစီ ၁၄၈ ခန့်။

၁ ထိုမှတစ်ပါး၊ ငါတို့ဟောပြောသော သတင်းစကားကို အဘယ်သူယုံသနည်း။ ကိုယ်တော်ရှင်၏လက်ရုံးတော်ကို အဘယ်သူအား ဖော်ပြသနည်းဟု ဟေရှာယကပင် မဟောလေသလော။

၂ အကြောင်းမူကား၊ သူသည် အညွန့်ကဲ့သို့လည်းကောင်း၊ ခြောက်သွေ့သော မြေ၌ပေါက်သောအမြစ်ကဲ့သို့လည်းကောင်း၊ ရှေ့တော်၌ အောင်မြင်၏။ သူ့တွင် ပမာဏပြုစရာ အဆင်းလှခြင်းမရှိ။ သူ့ကို ငါတို့မြင်ရသောအခါ၊ နှစ်လိုဖွယ်သောတင့်တယ်ခြင်း မရှိ။

၃ သူသည် လူသားတို့၏ မထီမဲ့မြင်ပြုခြင်းနှင့် ငြင်းပယ်ခြင်းကိုခံရ၏။ ဝမ်းနည်းခြင်းများရှိသောလူဖြစ်၍၊ ဝမ်းနည်းပူဆွေးခြင်းနှင့် ကျွမ်းဝင်၏။ ငါတို့သည် သူ့ကို မျက်နှာလွှဲသကဲ့သို့၊ သူသည် မထီမဲ့မြင်ပြုခြင်းကိုခံရလျက်၊ ငါတို့သည် သူ့ကို ရိုသေခြင်းမရှိကြ။

၄ သူသည် ငါတို့၏ ဝမ်းနည်းပူဆွေးမှုများကို ဧကန်အမှန်ခံယူ၍၊ ငါတို့၏ဝမ်းနည်းခြင်းများကို ဆောင်ယူသွားခဲ့လေ၏။ သူ့အား ဆုံးမတော်မူခြင်းကိုလည်းကောင်း၊ ဘုရားသခင်၏ ဒဏ်ခတ်တော်မူခြင်းကိုလည်းကောင်း ခံရပြီး၊ ညှဉ်းဆဲခြင်းခံရ၏ဟု ငါတို့ထင်မှတ်ကြ၏။

၅ သို့ရာတွင်၊ ငါတို့၏လွန်ကျူးခြင်းများကြောင့်၊ သူသည် နာခဲ့၏။ ငါတို့၏ဒုစရိုက်များကြောင့်၊ သူဒဏ်ရာရခဲ့၏။ ငါတို့၏ငြိမ်းချမ်းခြင်းချမ်းသာကိုဖြစ်စေသောဆုံးမခြင်းသည် သူ့အပေါ်သို့ရောက်၍၊ သူခံရသောဒဏ်ချက်အားဖြင့် ငါတို့သည် အနာပျောက်လျက်ရှိကြ၏။

၆ ငါတို့ရှိသမျှသည် သိုးကဲ့သို့လမ်းလွဲလျက်၊ ကိုယ်လမ်းသို့ အသီးအသီးလိုက်သွားကြသည်ဖြစ်၍၊ ကိုယ်တော်ရှင်သည် ခပ်သိမ်းသောငါတို့၏ ဒုစရိုက်များကို သူ့အပေါ်၌တင်တော်မူ၏။

၇ သူသည် ညှဉ်းပန်းနှိပ်စက်ခံရ၏၊ ထို့အတူ ညှဉ်းဆဲခံရ၍၊ နှုတ်ကို မဖွင့်ဘဲနေ၏။ အသေသတ်ခြင်းငှာ ဆောင်သွားသော သိုးသငယ်ကဲ့သို့ သူ့ကိုဆောင်သွား၍၊ သိုးသည် မိမိအမွေးညှပ်သောသူရှေ့မှာ မမြည်ဘဲနေသကဲ့သို့၊ သူသည် နှုတ်ကို မဖွင့်ဘဲနေ၏။

၈ သူ့ကို ထောင်မှလည်းကောင်း၊ တရားစီရင်ရာမှလည်းကောင်း ထုတ်သွားကြ၏။ အသက်ရှင်သောသူတို့၏နေရာမှ သူ့ကို သုတ်သင်ပယ်ရှင်းသည်ဖြစ်၍၊ သူ၏မျိုးဆက်ကို အဘယ်သူ ပြညွှန်မည်နည်း။ ငါ့လူမျိုးတို့၏ လွန်ကျူးခြင်းများကြောင့်၊ ဒဏ်ခတ်တော်မူခြင်းကို သူခံလေ၏။

၉ သူသည် မကောင်းမှုကို မပြု၊ သူ၏နှုတ်၌ မုသားတစ်စုံတစ်ခုမျှ မရှိသော်လည်း၊ သေသောအခါ၌ ဆိုးညစ်သောသူ၊ သူဌေးတို့နှင့်အတူ မြေမြှုပ်ခြင်းကို ခံ၏။

၁၀ သို့သော်လည်း သူ့ကိုအနာတရဖြစ်စေခြင်းက ကိုယ်တော်ရှင်ကို နှစ်သက်စေ၍၊ သူ့ကို ဝမ်းနည်းပူဆွေးစေ၏။ သူသည် အပြစ်အတွက် သူ၏အသက်ကို ပူဇော်သက္ကာအဖြစ်ပြုပြီးမှ၊ သူ၏အမျိုးအနွယ်ကို မြင်ရလိမ့်မည်။ သူ၏အသက်တော်လည်း ရှည်လိမ့်မည်။ ကိုယ်တော်ရှင်၏ အကြံတော်သည်လည်း၊ သူ၏လက်၌ အောင်မြင်ခြင်းသို့ ရောက်လိမ့်မည်။

၁၁ သူသည် မိမိစိတ်ဝိညာဉ်ခံရသော ဝေဒနာကို မြင်၍ ကျေနပ်လိမ့်မည်။ ငါ၏ဖြောင့်မတ်သောကျွန်သည် မိမိအသိပညာအားဖြင့်၊ များစွာသောသူတို့ကို အပြစ်ကင်းစေ၏။ အကြောင်းမူကား၊ ထိုသူတို့၏ဒုစရိုက်များကို သူခံယူပေလိမ့်မည်။

၁၂ ထို့ကြောင့်၊ ငါသည် သူ၏အဖို့ကို အားကြီးသောသူတို့နှင့် ခွဲဝေမည်။ သူသည် လည်း မိမိလက်ရဥစ္စာကို အစွမ်းသတ္တိရှိသောသူတို့နှင့် ခွဲဝေလိမ့်မည်။ သူသည် မိမိအသက်ကို သေခြင်း၌ သွန်းသောကြောင့်၊ လွန်ကျူးသောသူတို့နှင့် ရေတွက်ဝင်ခြင်းသို့ ရောက်၏။ ထို့အတူ၊ သူသည် များစွာသောသူတို့၏အပြစ်များကို ခံယူ၍ လွန်ကျူးသောသူတို့အတွက် တောင်းပန်၏။