မောဇိယ ၁၁

အခန်းကြီး ၁၁

နောဧမင်းကြီးသည် ဆိုးညစ်ခြင်းဖြင့် အုပ်စိုး၏—သူသည် သူ၏ဇနီးများ၊ မယားငယ်များနှင့် နေ၍ ကာမဂုဏ်လွန်ကျူးခြင်း၌ ပျော်မွေ့၏—လူမျိုးတို့သည် ဖမ်းဆီး၍ကျွန်ပြုခြင်းသို့ ဆောင်ယူခံရလိမ့်မည်ဟု အဘိနဒိပရောဖက်ပြု၍ဟော၏—နောဧမင်းကြီးသည် သူ၏အသက်ကို သတ်ရန် ကြိုးစားအားထုတ်၏။ ဘီစီ ၁၆၀–၁၅၀ ခန့်။

၁ ယခုမူကား၊ အချိန်တန်လာသောအခါ၊ ဇေနိဖ်သည် နိုင်ငံကို သူ၏သားတို့ထဲမှ နောဧကို အပ်နှင်းခဲ့၏။ ထို့ကြောင့်၊ သူ၏နေရာ၌ နောဧသည် နန်းစံစပြု၏။ သူ့အဘ၏လမ်းများသို့ မလိုက်။

၂ အကြောင်းမူကား၊ ရှုလော့၊ နောဧသည် ဘုရားသခင်၏ပညတ်တော်တို့ကို မစောင့်ထိန်း၊ သူ့စိတ်နှလုံး၏အလိုသို့သာ လိုက်၏။ များစွာသောဇနီးတို့နှင့် မယားငယ်တို့လည်းရှိ၏။ သူ၏လူမျိုးတို့ကိုလည်း အပြစ်ကျူးလွန်စေ၍၊ ကိုယ်တော်ရှင်၏အမြင်၌ စက်ဆုပ်ရွံရှာဖွယ်ဖြစ်သောအရာကို ပြု၏။ ထိုမှတစ်ပါး၊ သူတို့သည် မတရားသောမေထုန်အမှုတို့နှင့် အမျိုးမျိုးသော ဆိုးညစ်ခြင်းတို့ကို ကျူးလွန်ကြ၏။

၃ သူသည် သူတို့ပိုင်ဆိုင်သမျှ၏ ငါးဖို့တစ်ဖို့၊ သူတို့ရွှေ၏ငါးဖို့တစ်ဖို့နှင့် သူတို့ငွေ၏ ငါးဖို့တစ်ဖို့၊ ထို့အတူ သူတို့ဇစ်ဖ်နှင့် သူတို့ကြေးနီ၏ ငါးဖို့တစ်ဖို့၊ ထို့အတူ သူတို့ကြေးဝါနှင့် သူတို့သံ၏ ငါးဖို့တစ်ဖို့၊ ထို့အတူ သူတို့ဆူအောင်ကျွေးသောအကောင်တို့၏ ငါးဖို့တစ်ဖို့၊ ထို့အတူ သူတို့စပါးမှန်သမျှ၏ ငါးဖို့တစ်ဖို့ကို အခွန်အဖြစ် ကောက်ခံ၏။

၄ ခပ်သိမ်းသောဤအရာတို့ကို သူယူခဲ့သည်မှာ သူကိုယ်တိုင်၊ ထို့အတူ၊ သူ၏ဇနီးများနှင့် သူ၏မယားငယ်များ၊ ထို့အတူ သူ၏ယဇ်ပုရောဟိတ်များ၊ ထို့အတူ၊ သူတို့၏ဇနီးများနှင့် သူတို့၏ မယားငယ်များကိုလည်း ထောက်မခြင်းငှာဖြစ်၏။ ထိုကဲ့သို့အားဖြင့်၊ သူသည် နိုင်ငံ၏ အမှုအမျိုးမျိုးတို့ကို ပြောင်းလဲပစ်လေ၏။

၅ အကြောင်းမူကား၊ သူသည် အဘခန့်ထားခဲ့လေသည့် ယဇ်ပုရောဟိတ်ခပ်သိမ်းတို့ကို ပယ်ရှား၍၊ ထိုသူတို့၏နေရာ၌ မိမိမာနစိတ်နှလုံးဖြင့်ဘဝင်မြင့်သည့် လူသစ်တို့ကို ခန့်ထား၏။

၆ ထိုမှတစ်ပါး၊ သူတို့သည်ပျင်းရိခြင်း၌လည်းကောင်း၊ ရုပ်တုကိုးကွယ်ခြင်း၌ လည်းကောင်း၊ မတရားသောမေထုန်အမှုတို့၌လည်းကောင်း၊ နောဧမင်းကြီးသူ၏လူမျိုးတို့အပေါ်ကောက်သော အခွန်များအားဖြင့်၊ ထောက်မခြင်းကို ခံကြရ၏။ ထိုကဲ့သို့အားဖြင့်၊ လူတို့သည် ဒုစရိုက်ကို ထောက်မရန် လွန်စွာအလုပ်လုပ်ကြ၏။

၇ ထိုမှတစ်ပါး၊ လူတို့သည်လည်း မင်းကြီးနှင့် ယဇ်ပုရောဟိတ်တို့၏ အချည်းနှီး၊ မြှောက်ပင့်သောစကားတို့အားဖြင့် လှည့်စားခံရသောကြောင့်၊ ရုပ်တုကိုးကွယ်သောသူများ ဖြစ်လာကြ၏။ အကြောင်းမူကား၊ သူတို့အား မြှောက်ပင့်သောအရာတို့ကို ပြောကြ၏။

၈ ဤသို့အားဖြင့်အချိန်တန်လာသောအခါ၊ နောဧမင်းကြီးသည် တင့်တယ်၍၊ ကျယ်ဝန်းသည့် အဆောက်အအုံများစွာကို တည်ဆောက်၏။ သစ်သား၊ အဖိုးထိုက်သည့်အရာအမျိုးမျိုး၊ ရွှေ၊ ငွေ၊ သံ၊ ကြေးဝါ၊ ဇစ်ဖ်နှင့် ကြေးနီတို့၏ တင့်တယ်သောလက်ရာတို့ဖြင့် တန်ဆာဆင်၏။

၉ သူ့အတွက် ကျယ်ဝန်းသောနန်းတော်၊ ထိုနန်းတော်၏အလယ်၌ ပလ္လင်ကိုလည်း တည်ဆောက်၍၊ ထိုအရာခပ်သိမ်းတို့သည်၊ တင့်တယ်သောသစ်သားဖြစ်၏၊ ရွှေနှင့်ငွေ၊ ထို့အတူ အဖိုးထိုက်သောအရာတို့ဖြင့် တန်ဆာဆင်ထား၏။

၁၀ သူ၏အလုပ်သမားတို့ကိုလည်း တင့်တယ်သောသစ်သား၊ ကြေးနီနှင့် ကြေးဝါတို့၏ တင့်တယ်သောလက်ရာအမျိုးမျိုးတို့ကို ဗိမာန်တော်နံရံများအတွင်း၌ ပြုလုပ်စေ၏။

၁၁ အခြားထိုင်ခုံများအားလုံးအထက်တွင်၊ ယဇ်ပုရောဟိတ်မင်းတို့အတွက် ရွေးထားသည့် ထိုင်ခုံတို့ကို ရွှေစင်ဖြင့်၊ တန်ဆာဆင်၏။ သူ၏လူတို့ကို မုသားနှင့် အချည်းနှီးစကားတို့ ပြောရာ၌ သူတို့ကိုယ်နှင့် သူတို့လက်ကို တင်နိုင်ခြင်းစေငှာ၊ ရင်ဘတ်အထိမြင့်သောလက်ရန်းခုံကိုလည်း ထိုင်ခုံတို့ရှေ့၌ တည်ဆောက်စေ၏။

၁၂ ဤသို့အားဖြင့်အချိန်တန်လာသောအခါ၊ သူသည် ဗိမာန်တော်အနီး၌ လင့်စင်တစ်ခု၊ အထူးသဖြင့်၊ အလွန်မြင့်၍၊ ထိုနေရာထိပ်၌ရပ်၍၊ ရှိလုမ်ပြည်နှင့် လာမန်အမျိုးသားတို့ကပိုင်သည့် ရှေမလုန်ပြည်ကိုလည်း အထက်မှကြည့်နိုင်သည့် အလွန်မြင့်သောလင့်စင်တစ်ခုကို တည်ဆောက်၏။ ပတ်ဝန်းကျင်ရှိပြည်ခပ်သိမ်းတို့အပေါ်ကိုပင် ကြည့်နိုင်လေ၏။

၁၃ ဤသို့အားဖြင့်အချိန်တန်လာသောအခါ၊ ရှိလုမ်ပြည်၌ အဆောက်အအုံများစွာတို့ကို တည်ဆောက်စေ၏။ နီဖိုင်း၏သားမြေးတို့ထိုပြည်မှ ထွက်ပြေးခဲ့စဉ်က၊ မှီခိုရာနေရာဖြစ်ခဲ့လေသည့် ရှိလုမ်ပြည်၏မြောက်အရပ်တောင်ကုန်းပေါ်တွင်လည်း ရဲတိုက်ကြီးတစ်ခုကို တည်ဆောက်စေ၏။ ထိုကဲ့သို့အားဖြင့်၊ သူ၏လူမျိုးတို့ကို အခွန်ကောက်ခံခြင်းမှ ရရှိသည့် စည်းစိမ်ဥစ္စာတို့နှင့် ပြုလေ၏။

၁၄ ဤသို့အားဖြင့်အချိန်တန်လာသောအခါ၊ သူသည် စိတ်နှလုံးကို သူ့စည်းစိမ်ဥစ္စာတို့အပေါ်၌ ထား၍၊ သူ၏ဇနီးများ၊ မယားငယ်များနှင့် နေ၍၊ ကာမဂုဏ်လွန်ကျူးခြင်းအားဖြင့် သူ့အချိန်ကို ဖြုန်းတီး၏။ သူ၏ယဇ်ပုရောဟိတ်တို့သည်လည်း၊ ထိုကဲ့သို့ပင် ပြည့်တန်ဆာတို့နှင့် သူတို့အချိန်ကို ဖြုန်းတီးကြ၏။

၁၅ ဤသို့အားဖြင့်အချိန်တန်လာသောအခါ၊ သူသည် ထိုပြည်တစ်လျှောက်လုံး၌၊ စပျစ်ဥယျာဉ်တို့ကို စိုက်၏။ စပျစ်သီးနှယ်ရာကျင်းကိုတည်ဆောက်၍၊ စပျစ်ရည်အမြောက်အမြားပြုလုပ်၏။ ထို့ကြောင့်၊ သူသည် စပျစ်ရည်သောက်ကြူးသောသူ ဖြစ်လာ၏၊ သူ၏လူမျိုးတို့သည်လည်း ထိုကဲ့သို့ပင်ဖြစ်လာကြ၏။

၁၆ ဤသို့အားဖြင့်အချိန်တန်လာသောအခါ၊ သူ၏လူမျိုး အနည်းငယ်တို့သည် သူတို့လယ်ကွင်းထဲ၌၊ သူတို့သိုးစုများကို ကြည့်ရှုစောင့်ရှောက်နေစဉ်၊ လာမန်အမျိုးသားတို့က သူတို့ကို ကွပ်မျက်ခြင်းငှာ၊ တိုက်ခိုက်စပြုကြ၏။

၁၇ နောဧမင်းကြီးကလည်း သူတို့ကို နှင်ထုတ်ခြင်းငှာ၊ ထိုပြည်တစ်ဝိုက်သို့ ကင်းစောင့်တပ်များ စေလွှတ်၏။ သို့ရာတွင်၊ အလုံအလောက် မစေလွှတ်သဖြင့်၊ လာမန်အမျိုးသားတို့က သူတို့ကို တိုက်ခိုက်ပြီးလျှင်၊ သတ်၍၊ များစွာသောသိုးစုတို့ကို ထိုပြည်၏အပြင်သို့ မောင်းထုတ်ကြ၏။ ထိုကဲ့သို့အားဖြင့်၊ လာမန်အမျိုးသားတို့သည် သူတို့ကို ဖျက်ဆီးရန်၊ ထို့အတူ သူတို့အပေါ် မုန်းတီးခြင်းကို ကျင့်သုံးရန် အစပြုခဲ့ကြ၏။

၁၈ ဤသို့အားဖြင့်အချိန်တန်လာသောအခါ၊ နောဧမင်းကြီးသည် ထိုသူတို့၏တစ်ဖက်၌ တပ်တို့ကိုစေလွှတ်၏၊ ထိုသူတို့လည်း ပြန်၍မောင်းထုတ်ခံရ၊ သို့မဟုတ် တပ်တို့က ထိုသူတို့ကို အချိန်အနည်းငယ်ကြာ ပြန်၍မောင်းထုတ်ကြ၏။ ထို့ကြောင့်၊ မင်းကြီး၏လူတို့သည် မိမိတို့ပြန်၍ရသည့် လုယူရာဥစ္စာတို့နှင့် ရွှင်လန်းဝမ်းမြောက်လျက် ပြန်လာကြ၏။

၁၉ ယခုမူကား၊ ဤကြီးစွာသောအောင်နိုင်ခြင်းကြောင့်၊ သူတို့သည် မိမိတို့မာနစိတ်နှလုံးဖြင့် ဘဝင်မြင့်ကြ၏။ သူတို့အယောက်ငါးဆယ်သည် ထောင်ပေါင်းများစွာသော လာမန်အမျိုးသားတို့ကို ဆီးတားနိုင်ကြကြောင်းဆို၍၊ မိမိတို့ ခွန်အား၌ ဝါကြွားကြ၏။ ထိုကဲ့သို့အားဖြင့်၊ သူတို့သည် ဝါကြွားကြ၊ လူ့အသက်ကိုသတ်ခြင်းနှင့် မိမိတို့ညီအစ်ကိုတို့ကို အသွေးသွန်းလောင်းခြင်းတို့၌ မွေ့လျော်ကြ၏။ ဤအမှုသည်ကား၊ သူတို့၏ရှင်ဘုရင်နှင့် ယဇ်ပုရောဟိတ်တို့၏ ဆိုးညစ်ခြင်းကြောင့်ပေတည်း။

၂၀ ဤသို့အားဖြင့်အချိန်တန်လာသောအခါ၊ သူတို့၌ အဘိနဒိဟုအမည်ရှိသောသူတစ်ဦးရှိ၏။ သူတို့ထံသွား၍၊ ပရောဖက်ပြု၍ဟောစပြု၍ ဆိုလေသည်ကား၊ ရှုလော့၊ ထိုကဲ့သို့ ကိုယ်တော်ရှင်မိန့်တော်မူသည်မှာ၊ ထိုကဲ့သို့ ငါ့ကို မြွက်ဆို၍ မိန့်မှာထားတော်မူသည်ကား၊ ဤလူမျိုးတို့ထံ သွား၍၊ ပြောလော့၊ ထိုကဲ့သို့ ကိုယ်တော်ရှင်မိန့်တော်မူသည်ကား—ဤလူမျိုးတို့သည် အမင်္ဂလာရှိကြ၏။ အကြောင်းမူကား၊ ငါသည် သူတို့၏ စက်ဆုပ်ရွံရှာဖွယ်အမှုများ၊ ထို့အတူ သူတို့၏ဆိုးညစ်ခြင်းများ၊ ထို့အတူ သူတို့၏မတရားသောမေထုန်အမှုများကို မြင်တော်မူလေပြီ။ သူတို့နောင်တမရလျှင်၊ ငါသည် အမျက်ထွက်၍ ဆုံးမတော်မူမည်။

၂၁ သူတို့သည် နောင်တမရ၍ သူတို့၏ဘုရားသခင်ကိုယ်တော်ရှင်ထံသို့ ပြန်မလာကြလျှင်၊ ငါသည် သူတို့ကို သူတို့၏ရန်သူတို့လက်သို့ ပေးအပ်တော်မူမည်။ ထိုမှတစ်ပါး၊ သူတို့သည် ကျွန်ပြုခြင်းသို့လည်း ဆောင်ယူ ခံရလိမ့်မည်။ သူတို့၏ရန်သူတို့၏လက်ဖြင့် ညှဉ်းဆဲသည်ကိုလည်း ခံကြရလိမ့်မည်။

၂၂ ဤသို့အားဖြင့်အချိန်တန်လာလတ္တံ့သောအခါ၊ ငါသည်ကား၊ သူတို့၏ဘုရားသခင်ကိုယ်တော်ရှင်ဖြစ်တော်မူကြောင်းနှင့် ငါ့လူမျိုးတို့၏ဒုစရိုက်တို့ကို ဆုံးမလျက်၊ အပြစ်ရှိသည်ဟုယုံလွယ်သောဘုရားသခင် ဖြစ်တော်မူကြောင်းကို သူတို့သိကြလိမ့်မည်။

၂၃ ဤသို့အားဖြင့်အချိန်တန်လာလတ္တံ့သောအခါ၊ ဤလူမျိုးတို့သည် နောင်တမရ၍ သူတို့၏ဘုရားသခင်ကိုယ်တော်ရှင်ထံသို့ ပြန်မလာလျှင် ကျွန်ပြုခြင်းသို့ ဆောင်ယူခံရလိမ့်မည်။ အနန္တတန်ခိုးရှင်ဘုရားသခင်ကိုယ်တော်ရှင်မှတစ်ပါး၊ အဘယ်သူကမျှ သူတို့ကို ကယ်လွှတ်လိမ့်မည်မဟုတ်။

၂၄ ထိုမှတစ်ပါး၊ ဤသို့အားဖြင့်အချိန်တန်လာလတ္တံ့သောအခါ၊ သူတို့သည် ငါ့ထံသို့ တောင်းလျှောက်လျှင်၊ ငါသည် သူတို့၏တောင်းလျှောက်ခြင်းတို့ကို ကြားရန် နှေးကွေးမည်။ ထိုမှတစ်ပါး၊ ငါသည် သူတို့အား သူတို့ရန်သူတို့၏နှိပ်စက်ခြင်းကို ခံရမည့်အကြောင်း အခွင့်ပေးမည်။

၂၅ ထို့အတူ၊ သူတို့သည် လျှော်တေအဝတ်ကိုဝတ်၍၊ ပြာနှင့်လူး၍၊ နောင်တရပြီး၊ သူတို့၏ဘုရားသခင်ကိုယ်တော်ရှင်ထံသို့ စိတ်အားထက်သန်စွာတောင်းလျှောက်ခြင်းမရှိလျှင်၊ ငါသည် သူတို့၏ဆုတောင်းခြင်းတို့ကို ကြားလိမ့်မည်မဟုတ်။ သူတို့၏ဆင်းရဲဒုက္ခတို့မှလည်း ကယ်လွှတ်တော်မူလိမ့်မည်မဟုတ်ဟုဖြစ်လေသတည်း။ ထိုကဲ့သို့ ကိုယ်တော်ရှင်သည် မိန့်တော်မူ၍ ငါ့ကို မှာထားတော်မူလေပြီ။

၂၆ ယခုတွင်၊ အချိန်တန်လာသောအခါ၊ အဘိနဒိ ဤစကားတို့ကို ပြောလေလျှင်၊ သူတို့သည် အမျက်ထွက်၍၊ သူ့အသက်ကို နုတ်ယူရန် ကြိုးစားအားထုတ်ကြ၏။ သို့ရာတွင်၊ ကိုယ်တော်ရှင်သည် သူ့ကို ထိုသူတို့၏လက်မှ ကယ်လွှတ်တော်မူ၏။

၂၇ ယခုတွင်၊ နောဧမင်းကြီးသည် လူတို့အား အဘိနဒိဟောပြောလေသောစကားတို့ကို ကြားလျှင်၊ အမျက်ထွက်၍ ဆိုလေသည်ကား၊ ငါနှင့် ငါ၏လူမျိုးတို့ကို တရားစီရင်သည့် အဘိနဒိဆိုသူကား၊ အဘယ်သူနည်း။ ငါ၏လူမျိုးတို့အပေါ် ထိုမျှကြီးစွာသောဆင်းရဲဒုက္ခကို ဖြစ်စေမည့် ကိုယ်တော်ရှင်ဆိုသူကား၊ အဘယ်သူနည်း။

၂၈ ငါသည် သင့်အား အဘိနဒိကို ဤနေရာသို့ ဆောင်ယူလာရန် အမိန့်ပေး၏။ ငါ သူ့ကို ကွပ်မျက်နိုင်ခြင်းငှာပင်တည်း။ အကြောင်းမူကား၊ သူသည် ငါ၏လူမျိုးတို့ကို အချင်းချင်းအမျက်ထွက်စေ၍၊ ငါ၏လူမျိုးတို့၌ ရန်တွေ့ခြင်းတို့ကို ဖြစ်ပေါ်စေခြင်းငှာ နှိုးဆော်ရန် ဤစကားတို့ကို ပြောလေပြီ။ ထို့ကြောင့်၊ ငါသည် သူ့ကို ကွပ်မျက်မည်။

၂၉ ယခုတွင်၊ လူမျိုးတို့၏မျက်စိများကွယ်ကြလေပြီ။ ထို့ကြောင့်၊ သူတို့သည် အဘိနဒိ၏စကားတို့နှင့်ဆန့်ကျင်၍၊ သူတို့စိတ်နှလုံးကို မာကျောစေကြ၏။ ထိုအချိန်မှစ၍၊ သူ့ကိုဖမ်းဆီးရန် ကြိုးစားအားထုတ်ကြ၏။ နောဧမင်းကြီးသည်လည်း၊ ကိုယ်တော်ရှင်၏နှုတ်ကပတ်တော်ကို ဆန့်ကျင်၍၊ စိတ်နှလုံးကို မာကျောစေ၍၊ သူ၏ဆိုးသောအမှုတို့မှ နောင်တမရ။