1 Thiab nim no, saib seb, kuv cov kwv tij, ib yam li kuv tau hais rau nej tias kuv yuav qhia tej yuav muaj los yav tom ntej, saib seb, qhov no yog kuv txoj kev qhia tej uas yuav muaj tom ntej—hais tias tej yam uas tus yaj saub Xenos no hais, txog tsev neeg Ixayees, ntawm qhov uas nws muab lawv piv rau ib tsob ntoo txiv roj nyeg, yeej yuav muaj xwb xwb li.

2 Thiab hnub uas nws yuav tsa nws txhais tes dua zaum ob los cawm nws cov neeg, yog hnub uas, muaj tseeb tiag, twb yog zaum kawg, uas tus Tswv cov tub qhe yuav tawm mus tu thiab yim nws lub vaj txiv ntoo roj nrog nws lub hwj chim; thiab tom qab ntawd qhov kawg yuav los sai sai.

3 Thiab cov uas tau rau siab ntso ua hauj lwm nyob hauv nws lub vaj txiv ntoo roj tau koob hmoov ntau kawg; thiab cov uas yuav raug ntiab tawm mus rau hauv lawv tus kheej tej chaw raug foom tsis zoo! Thiab yuav xuas hluav taws hlawv lub ntiaj teb.

4 Thiab peb tus Vajtswv hlub tshua peb kawg li, vim nws nco ntsoov txog tsev neeg Ixayees, tag nrho tej cag thiab tej ceg; thiab nws ncav nws txhais tes rau lawv tas hnub li; thiab lawv yog ib co neeg tawv ncauj thiab ib co neeg cam ncauj; tiam sis tag nrho cov uas yuav tsis ua lawv lub siab tawv qhawv yuav txais kev cawm dim nyob hauv Vajtswv lub nceeg vaj.

5 Yog li ntawd, kuv cov kwv tij uas kuv hlub es, kuv ua tib zoo hais lus los thov nej tiag tiag kom nej yuav hloov siab lees txim, thiab los kawg siab kawg ntsws, thiab muab siab npuab Vajtswv ib yam li nws muab siab npuab nej. Thiab thaum uas nws txhais npab hlub tshua tseem cev tuaj rau nej nyob hauv qhov kaj ntawm nruab hnub, nej tsis txhob ua nej lub siab tawv qhawv.

6 Muaj tseeb tiag, hnub no, yog nej xav hnov nws lub suab, nej tsis txhob ua nej lub siab tawv qhawv; vim li cas nej ho yuav tuag?

7 Vim saib seb, tom qab Vajtswv txoj lus zoo tau tu nej tag nrho ib hnub, nej tseem yuav txi cov txiv phem, kom nej yeej yuav raug muab ntov kom vau thiab muab pov rau hauv hluav taws thiab los?

8 Saib seb, nej puas yuav xyeej tej lus no? Nej puas yuav xyeej cov yaj saub tej lus; thiab nej puas yuav xyeej tag nrho tej lus uas tau hais txog Khetos, tom qab tau muaj coob tus tau hais txog nws; thiab xyeej Khetos txoj lus zoo, thiab Vajtswv lub hwj chim, thiab lub txiaj ntsim Vaj Ntsuj Plig Dawb Huv, thiab tso tus Ntsuj Plig Dawb Huv tseg, thiab ua saib tsis taus lub tswv yim tseem ceeb uas tau npaj tseg ntawm txoj hau kev txhiv dim, uas tau npaj rau nej lawm?

9 Nej tsis paub tias yog nej ua tej no, ces lub hwj chim ntawm txoj kev txhiv dim thiab ntawm txoj kev sawv rov los, uas yog los ntawm Khetos, yuav coj nej los sawv nrog kev txaj muag thiab kev muaj txim phem heev nyob ntawm Vajtswv lub rooj txiav txim no los?

10 Thiab raws li lub hwj chim ntawm txoj kev txim lij, vim tsis muaj peev xwm xyeej tau kev txim lij, nej yeej yuav mus rau hauv lub pas hluav taws thiab leej faj, uas muaj nplaim cig tsis txawj tuag, thiab muaj pa taws ncho mus ib txhiab thiab ib txhis, lub pas hluav taws thiab leej faj uas yog kev tsim txom uas tsis muaj qhov kawg li.

11 Auj yog li ntawd, kuv cov kwv tij uas kuv hlub es, nej cia li hloov siab lees txim, thiab cia li nkag mus rau hauv lub rooj vaj nqaim, thiab kam tiag mus rau hauv txoj kev ti, kom txog thaum nej tau txais txoj sia nyob mus ib txhis.

12 Auj cia li muaj tswv yim; Tshuav dab tsi ntxiv uas kuv tsis tau hais?

13 Thaum kawg no, kuv thov kom nej noj qab nyob zoo, kom txog thaum kuv yuav ntsib nej ntawm Vajtswv lub rooj txiav txim, uas yog lub rooj txiav txim uas yuav ua rau cov neeg phem txhawj thiab ntshai heev. Amees.