1 Boe blong mi, harem ol toktok blong mi; from we mi promes long yu, se folem hamas we bae yu obei ol komanmen blong God, bae yu kam antap gud long graon ia.

2 Mi wantem se yu mas mekem semmak olsem we mi bin mekem, blong tingbaot taem we ol papa blong yumi oli bin stap long fasin blong stap slef; from we oli stap slef, mo i no gat wan man we i save mekem oli kamaot be God blong Ebraham nomo, mo God blong Aesak, mo God blong Jekob; mo i tru we hem i mekem olgeta oli kamaot long ol hadtaem blong olgeta.

3 Mo nao, o boe blong mi Hileman, luk, yu stap long yangfala laef blong yu, mo from hemia, mi askem strong long yu se bae yu harem ol toktok blong mi mo lanem samting aot long mi; from mi save se eni man we bae i putum tras blong hem long God, bae God i sapotem olgeta long ol tes blong olgeta, mo trabol blong olgeta, mo ol hadtaem blong olgeta, mo bae God i leftemap olgeta long las dei.

4 Mo mi no wantem blong yu ting se mi save hemia tru long save blong miwan nomo—i no tru long wanem we i blong laef ia be tru long wanem we i blong spirit, i no tru long maen blong wol be tru long hemia blong God.

5 Nao, luk, mi talem long yu, sapos we mi no bin bon long God bae mi no save ol samting ia; be God, tru long maot blong tabu enjel blong hem, i bin talemaot ol samting ia long mi, be i no from se mi klin inaf;

6 From we mi bin go olbaot wetem ol boe blong Mosaea, blong lukaot blong prapa spolem gud jos ia blong God; be luk, God i sendem tabu enjel blong hem blong stopem mifala long rod.

7 Mo luk, hem i bin toktok long mifala, olsem we hem i voes blong tanda, mo ful graon i bin seksek andanit long leg blong mifala; mo mifala i foldaon long graon, from fraet long Lod i kavremap mifala.

8 Be luk, voes ia i talem long mi se: “Girap.” Mo mi girap mo mi stanap, mo mi luk enjel ia.

9 Mo hem i talem long mi: “Sapos yu no wantem blong prapa spolem gud yuwan, yu no gohed blong lukaot blong prapa spolem gud jos ia blong God.”

10 Mo i bin hapen se mi foldaon i go long graon; mo mi no save openem maot blong mi blong tri dei mo tri naet, mo mi no save yusum ol han mo ol leg blong mi.

11 Mo enjel ia i talemaot plante moa samting long mi, we ol brata blong mi oli harem, be mi mi no harem; from taem we mi bin harem ol toktok ia—Sapos yu no wantem blong prapa spolem gud yuwan, yu no gohed blong lukaot blong prapa spolem gud jos ia blong God—Mi kasem bigfala fraet mo sapraes from maet bae samting ia i prapa spolem gud mi, nao mi foldaon long graon mo mi no harem eni moa samting.

12 Be mi bin filim i soa wetem trabol we i no save finis, from we sol blong mi i filim nogud go kasem mak ia we i bigwan olgeta, mo mi harem nogud from evri sin blong mi.

13 Yes, mi bin tingbaot ol sin mo ol rabis fasin blong mi, mo from hemia, ol soa blong hel oli mekem mi harem nogud tumas; yes, mi bin luk se mi go agensem God blong mi, mo mi no obei ol tabu komanmen blong hem.

14 Yes, mo mi bin kilimded plante long ol pikinini blong hem, o long narafala toktok, se mi bin lidim olgeta oli go lus; yes, mo blong mekem i sot, ol rabis fasin blong mi oli bigwan tumas, mekem se tingting ia blong kam stap wetem God blong mi, i bin terem sol blong mi wetem fraet ia we i nogat toktok we i save talem.

15 O, mi bin tingting, se mi save lus, mo sol tugeta wetem bodi blong mi bae i nomo stap mekem se bae mi no save stanap long fored blong God blong mi, blong hem i jajem mi long ol wok blong mi.

16 Mo nao, blong tri dei mo blong tri naet mi bin harem nogud tumas wetem ol soa blong wan sol we devel i stap kontrolem.

17 Mo i bin hapen se taem we mi stap harem nogud ia, long semtaem ia mi stap tingbaot wetem bigfala soa, ol plante sin blong mi, luk, mi bin tingbaot tu we mi bin harem papa blong mi i profesae long ol pipol long saed blong wan Jisas Kraes, wan Pikinini blong God, we bae i kam blong pem praes blong ol sin blong wol.

18 Nao, taem we tingting blong mi i fas long tingting ia, mi bin prea insaed long hat blong mi: “O Jisas, yu yu Pikinini blong God, gat sore long mi, mi we mi stap long konkon rabis ples, mo ol jen blong ded we i no gat en, oli raonem mi.”

19 Mo nao, luk, taem we mi tingbaot samting ia, mi nomo save tingbaot ol soa blong mi; yes, mi nomo tingbaot ol sin blong mi we oli bin givim hadtaem long mi.

20 Mo, !o, glad ia we mi gat, mo gudfala laet ia we mi bin luk; yes, sol blong mi i bin fulap long glad, i bigfala olsem soa blong bodi blong mi!

21 Yes, mi talem long yu, boe blong mi, se i no save gat eni samting we i dip tumas mo i konkon tumas olsem ol soa blong bodi blong mi. Yes, mo bakegen mi talem long yu, boe blong mi, se long narafala saed, i no save gat eni samting we i dip tumas mo swit olsem glad blong mi.

22 Yes, mi ting mi bin luk, olsem we papa blong yumi Lihae i bin luk, God i stap sidaon long jea blong hem, wetem ol grup blong ol enjel we oli plante tumas blong kaontem, oli stap raonem God blong olgeta mo oli stap singsing mo presem hem; yes, mo sol blong mi i wantem tumas blong stap long ples ia.

23 Be luk, ol han mo leg blong mi oli kasem paoa blong olgeta bakegen, mo mi stanap long ol leg blong mi, mo mi soemaot long ol pipol se mi bin bon long God.

24 Yes, mo stat long tetaem ia go kasem naoia, mi no stop nating long wok, blong mi save tekem ol sol oli kam blong sakem sin, blong mi save tekem olgeta blong testem bigfala glad we mi bin testem; blong olgeta tu oli save bon long God, mo Tabu Spirit i fulap long olgeta.

25 Yes, mo nao luk, O boe blong mi, Lod i stap givim bigfala glad long mi from frut blong ol wok blong mi.

26 From trutok ia we hem i bin givim long mi, luk, plante oli bin bon long God, mo oli testem olsem we mi bin testem, mo oli luk wetem ae blong olgeta olsem we mi bin luk; from hemia, oli save ol samting ia we mi bin tokbaot, olsem we mi save; mo save we mi gat, i kam long God.

27 Mo mi bin kasem sapot long ol tes mo ol trabol long evri kaen, yes, mo long evri kaen hadtaem; yes, God i tekemaot mi long kalabus, mo long olgeta samting we i fasem taet mi, mo long ded; yes, mo mi stap putum tras blong mi long hem, mo bae hem i mekem mi kam fri oltaem.

28 Mo mi save se hem bae i leftemap mi long las dei, blong stap wetem hem long glori; yes, mo bae mi presem hem blong oltaem, from we hem i bin tekem ol papa blong yumi oli aot long Ijip, mo hem i bin mekem Ol Man Ijip oli draon long Red Si; mo hem i bin lidim olgeta wetem paoa blong hem i go long promes graon; yes, mo hem i bin tekem olgeta aot long fasin blong stap slef mo aot long kalabus long ol defren taem.

29 Yes, mo tu, hem i bin tekem ol papa blong yumi oli aot long graon blong Jerusalem; mo tu, tru long paoa blong hem we i no gat en, hem i bin tekem olgeta aot long fasin blong stap slef mo long kalabus, long ol defren taem kam kasem dei ia; mo oltaem mi stap tingbaot taem ia we oli stap long kalabus; yes, mo tu, yu nid blong holem long tingting blong yu, olsem we mi bin mekem, taem ia we oli bin stap long kalabus.

30 Be luk, boe blong mi, i no hemia nomo; from yu nid blong save olsem we mi save, se folem hamas we bae yu obei long ol komanmen blong God, bae yu kam antap gud long graon ia; mo yu nid blong save tu, se folem hamas we bae yu no obei long ol komanmen blong God, bae hem i katemaot yu long fes blong hem. Nao hemia i folem toktok blong hem.