1 Ibni, agħti widen għal kliemi; għax naħliflek, li diment li int tibqa’ tħares il‑kmandamenti ta’ Alla inti jkollok ir‑risq fl‑art.

2 Nixtieqek tagħmel kif għamilt jien, li tiftakar fil‑jasar ta’ missirijietna; għax huma kienu fil‑jasar, u ħadd ma seta’ jeħlishom ħlief l‑Alla ta’ Abraham, u l‑Alla ta’ Iżakk, u l‑Alla ta’ Ġakobb; u bla dubju huwa ħelishom fil‑hemm tagħhom.

3 U issa, O ibni Ħelaman, ara, int għadek f’żogħżitek, u għalhekk, nitolbok biex tisma’ kliemi u titgħallem minni; għax jiena naf li dawk kollha li jafdaw f’Alla jiġu sostnuti fl‑isfidi tagħhom, u fl‑inkwiet tagħhom, u fil‑hemm tagħhom, u se jiġu mgħollija ’l fuq fl‑aħħar jum.

4 U ma rridekx taħseb li jien naf dan minħabba l‑għarfien tiegħi—naf dan mhux permezz ta’ dak li hu temporali iżda li hu spiritwali, mhux permezz tal‑moħħ karnali iżda permezz ta’ Alla.

5 Issa, ara, jiena ngħidlek, li kieku ma ġejtx imwieled minn Alla ma kontx inkun naf dawn il‑ħwejjeġ; iżda Alla, permezz ta’ fomm l‑anġli mqaddsa tiegħu, żvela miegħi dawn il‑ħwejjeġ, u mhux għax kien jistħoqqli.

6 Għax jien mort flimkien ma’ wlied Mosija, nipprova neqred il‑knisja ta’ Alla; għax ara, Alla bagħat l‑anġli mqaddsa tiegħu biex iwaqqfuna fi triqitna.

7 U ara, huwa kellimna b’leħen iriegħed, u bdiet titheżżeż l‑art kollha taħt riġlejna; u aħna waqajna mal‑art, għax inħkimna mill‑biża’ tal‑Mulej.

8 U ara, ġie leħen jgħidli: Qum. U jiena qomt u waqaft fuq riġlejja, u rajt quddiemi anġlu.

9 U huwa qalli: Anke jekk inti trid li tinqered, tippruvax tkompli teqred il‑knisja ta’ Alla.

10 U ġara li jien waqajt mal‑art; u għal tlett ijiem u tlett iljieli sħaħ ma stajtx niftaħ ħalqi, u lanqas ma stajt nuża riġlejja.

11 U l‑anġlu qalli bosta ħwejjeġ oħra, li ħuti semgħuhom iżda jien ma smajthomx; għax meta jiena smajt il‑kliem—Anke jekk trid li inti tinqered, tippruvax tkompli teqred il‑knisja ta’ Alla—jiena tant inħkimt minn biża’ kbira u bqajt mistgħaġeb li kont se nispiċċa ninqered, li waqajt mal‑art u ma smajt xejn aktar.

12 Iżda bdejt inħossni niġi ttorturat minn turment bla tmiem, għax ruħi ħassejtha tiġi tturmentata bl‑akbar qawwa minħabba d‑dnubiet kollha tiegħi.

13 Iva, jiena ftakart dnubieti kollha u ħżuniti, li minħabba fihom kont qed niġi tturmentat permezz tal‑uġigħ tal‑infern; iva, jiena rajt li kont ħadtha kontra Alla, u li ma ħaristx il‑kmandamenti mqaddsa tiegħu.

14 Iva, u jiena qtilt ħafna minn uliedu, jew inkella wassalthom għall‑qerda; iva, u f’kelma waħda kbir wisq kien il‑ħażen tiegħi, li l‑ħsieb biss li kelli mmur quddiem il‑preżenza ta’ Alla wassal biex ruħi ġiet itturmentata minn biża’ tant kbira u indeskrivibbli.

15 Għax għidt bejni u bejn ruħi, mhux li kien kieku stajt niġi eżiljat u estint kemm fir‑ruħ u kemm fil‑ġisem, ħalli ma jkollix nittieħed biex nieqaf quddiem il‑preżenza ta’ Alla, biex jagħmel ħaqq minn għemili.

16 U issa, għal tlett ijiem u tlett iljieli jiena kont itturmentat sewwasew bl‑uġigħ ta’ ruħ indannata.

17 U ġara li hekk kif kont maħkum minn daqstant turment, hekk kif kont qed niġi tturmentat mill‑memorja tal‑ħafna dnubiet tiegħi, ara, ftakart ukoll li jien kont smajt lil missieri jħabbar lill‑poplu dwar il‑miġja ta’ wieħed jismu Ġesù Kristu, Iben Alla, biex ipatti għad‑dnubiet tad‑dinja.

18 Issa, moħħi ggranfa ma’ dan il‑ħsieb, jiena tlabt f’qalbi: O Ġesù, Inti Bin Alla, ikollok ħniena minni, għax ninsab għaddej minn daqstant imrar, u ninsab imdawwar bil‑ktajjen eterni tal‑mewt.

19 U issa, ara, meta f’moħħi feġġ dan il‑ħsieb, ma bqajtx niftakar aktar l‑uġigħ tiegħi; iva, ma bqajtx niġi ttormentat aktar bil‑memorja ta’ dnubieti.

20 O, dik hena! u x’dawl tal‑għaġeb jiena rajt quddiemi; iva, ruħi mtliet b’hena li tisboq l‑uġigħ li ħassejt!

21 Iva, jien ngħidlek, ibni, li ma jista’ jkun hawn xejn aktar skwiżit u aktar morr mill‑uġigħ tiegħi. Iva, u għal darb’oħra jiena ngħidlek, ibni, li mill‑banda l‑oħra, ma jista’ jkun hawn xejn aktar skwiżit u ħelu mill‑hena li ħassejt.

22 Iva, għax jien niftakar li kont rajt, kif kien ra missierna Leħi, lil Alla bilqiegħda fuq it‑tron tiegħu, imdawwar bi qtajja’ bla għadd ta’ anġli, u huma bdew jgħannu u jfaħħru lil Alla tagħhom; iva, u ruħi xtaqet tkun fosthom.

23 Iżda ara, riġlejja reġgħu kisbu saħħithom lura, u jien waqaft fuq saqajja, u għarraft lin‑nies li kont ġejt imwieled minn Alla.

24 Iva, u minn dak iż‑żmien sal‑ġurnata tal‑lum, jiena ħdimt bla heda, biex inkun nista’ nwassal l‑erwieħ lejn l‑indiema; biex inkun nista’ nwassalhom ħalli jduqu l‑hena mill‑aktar kbira li minnha jiena doqt; biex ikunu jistgħu wkoll jiġu mwielda minn Alla, u jimtlew bl‑Ispirtu s‑Santu.

25 Iva, u issa ara, O ibni, il‑Mulej verament jagħtini hena mill‑aktar kbira fil‑frott ta’ ħidmieti;

26 Għax ara, grazzi għall‑kelma li huwa żvelali, ħafna kienu li ġew imwielda minn Alla, u daqu dak li doqt jien, u raw b’għajnejhom stess dak li rajt jien; għalhekk huma jafu dwar dawn il‑ħwejjeġ li jien tkellimt dwarhom, kif naf jiena issa; u l‑għarfien li jien għandi ġej minn Alla.

27 U jiena ġejt sostnut qalb kull tip ta’ sfidi u nkwiet, iva, u qalb kull tip ta’ taħbit; iva, Alla ħelisni mill‑ħabs, u mill‑jasar, u mill‑mewt; iva, u jiena nafda fih, u hu xorta waħda jeħlisni.

28 U jiena naf li hu sejjer iqajjimni fl‑aħħar jum, biex ngħammar miegħu fil‑glorja; iva, u jiena nibqa’ nfaħħru għal dejjem, għax huwa ħareġ lil missirijietna ’l barra mill‑Eġittu, u huwa bela’ lill‑Eġizzjani fil‑Baħar tal‑Qasab; u huwa mexxihom permezz tal‑qawwa tiegħu lejn l‑art imwiegħda; iva, u minn żmien għall‑ieħor huwa ħelishom mill‑eżilju u mill‑jasar.

29 Iva, u huwa ħareġ ukoll lil missirijietna ’l barra mill‑art ta’ Ġerusalemm; u permezz tal‑qawwa ta’ dejjem tiegħu, minn żmien għall‑ieħor sal‑ġurnata tal‑lum huwa ħelishom ukoll mill‑eżilju u mill‑jasar; u jiena dejjem bqajt niftakar fil‑jasar tagħhom; iva, u intom ukoll għandkom tibqgħu tiftakru fil‑jasar tagħhom, kif għamilt jien.

30 Iżda ara, ibni, dan mhux kollox; għax għandek tkun taf kif naf jien, li diment li int tibqa’ tħares il‑kmandamenti ta’ Alla inti jkollok ir‑risq fl‑art; u għandek tkun taf ukoll, li jekk inti ma tħarisx il‑kmandamenti ta’ Alla inti tispiċċa tinqata’ mill‑preżenza tiegħu. Issa dan huwa skont kelmtu.