1 Мөнхүү болгоогтун, эдүгээ улиран тохиох дор тэдгээр леменчүүд ах дүүсээ алсан учир илүү их ууртай байв; тиймийн тул тэд нифайчуудаас өшөө авахаар тангараглав; мөн тэд тэр цагт Антай-нифай-лихайн хүмүүсийг алахаар дахин завдсангүй.

2 Харин тэд их цэргээ авч мөн Зарахемла нутгийн хилийг давж, мөн Аммонайха нутагт байсан хүмүүсийг довтлон мөн тэднийг устгав.

3 Мөн түүний дараа, тэд өөрсдөө туугдаж мөн алагдсан олон тулааныг нифайчуудтай хийв.

4 Мөн алагдсан леменчүүдийн дунд, Ноагийн пристүүд болох Амюлоны мөн түүний ах дүүсийнх нь бараг бүх үр удам байв, мөн тэд нифайчуудын гарт алагдав;

5 Мөн үлдэгдэл нь, дорнын аглаг буйд тийш зугтаж, мөн тэд леменчүүдийн дээрх хүч мөн эрх мэдлийг хууль бусаар булаан эзэлснийхээ дараа, леменчүүдийн олныг итгэлийнх нь учир галд үхэх болгов—

6 Учир нь тэднээс олон нь их хохирол болон маш олон зүдгүүрийг туулсны дараа, Аарон болон түүний ах дүүсийн өөрсдөд нь, нутагт нь номлосон үгсийн санамжинд өдөөгдөж эхлэв; тиймийн тул тэд эцэг өвгөдийнхөө уламжлалуудад итгэл алдарч, мөн Их Эзэнд, мөн тэрээр нифайчуудад агуу хүчийг өгсөн гэдэгт итгэж эхлэв; мөн тийн аглаг буйдад тэднээс олон нь хөрвүүлэгдэв.

7 Мөнхүү улиран тохиох дор Амюлоны хүүхдүүдийн үлдэгдэл асан тэдгээр захирагчид тэднийг, тийм ээ, эдгээр зүйлд итгэсэн тэд бүгдийг үхэлд хүргэв.

8 Эдүгээ энэ аллага тэдний ах дүүсээс олныг уур хилэнд өдөөн хатгав; мөн аглаг буйдад зөрчилдөөн болж эхлэв; мөн леменчүүд Амюлоны мөн түүний ах дүүсийн үр удмыг ангуучилж эхлэн мөн тэднийг хөнөөж эхлэв; мөн тэд дорнын аглаг буйд тийш зугтав.

9 Мөн болгоогтун тэд энэ өдөр ч леменчүүдээр ангуучлагдсаар байна. Тийнхүү өөрийг нь галд шатаан үхэхэд хүргэсэн пристүүдийн үр удмын талаар хэлсэн Абинадайн үгс улиран тохиосон болой.

10 Учир нь тэрээр тэдэнд хэлсэн болой: Та нар намайг яах нь тохиох зүйлсийн бэлгэдэл байх болно.

11 Мөн эдүгээ Абинадай Бурханд итгэх итгэлийнхээ учир галд эрсдэх үхлийг үзсэн эхнийх нь байв; эдүгээ, түүний хэлсэн үгийн утга нь ийм болой, түүний амссаны дагуу галаар эрсдэх үхлийг олон хүн амсах болно.

12 Мөн тэрээр Ноагийн пристүүдэд ийн хэлжээ, тэдний үр удам олныг, өөрийг нь үхэлд хүргэсэн маягаар үхэлд хүргэх болно, мөн тэд тараагдаж мөн алагдах болно, бүр хоньчингүй хонь туугдаж мөн зэрлэг араатнуудаар алагдах адил буюу; мөн эдүгээ болгоогтун, эдгээр үг нотлогдсон билээ, учир нь тэд леменчүүдээр туугдаж, мөн тэд ангуучлагдсан, мөн тэд цохигдсон бөлгөө.

13 Мөнхүү улиран тохиох дор леменчүүд нифайчуудыг дийлж чадахгүйгээ ойлгоод, нутагтаа дахин эргэж ирсэн буюу; мөн тэдний олон нь Ишмэилийн нутагт мөн Нифайн нутагт оршихоор ирж, мөн өөрсдийгөө Антай-нифай-лихайн хүмүүс болох, Бурханы хүмүүстэй нэгтгэв.

14 Мөн тэд ах дүүсийнхээ хийсний дагуу, дайны зэр зэвсгүүдээ түүнчлэн булшилж, мөн тэд зөв шударга хүмүүс болж эхлэв; мөн тэд Их Эзэний замуудаар алхалж, мөн түүний зарлигуудыг мөн түүний дүрмүүдийг дагахаар мэрийсэн билээ.

15 Тийм ээ, мөн тэд Мосегийн хуулийг дагадаг байв; учир нь бүгд гүйцэлдээгүй байсан учраас, тэд тухайн үед Мосегийн хуулийг дагах нь зайлшгүй байв. Харин Мосегийн хууль байсан хэдий ч, Мосегийн хууль нь түүний ирэлтийн бэлгэдэл байсан хэмээн бодсон учир, мөн тэрээр тэдэнд илчлэгдэх тэр цагийг хүртэл нүдэнд ил харагдах ёслолуудыг дагах ёстой гэдэгт итгэсэн учир тэд Христийн ирэлтийг харуулдан хүлээж байв.

16 Эдүгээ тэд Мосегийн хуулиар аврал ирдэг гэж бодсонгүй; харин Мосегийн хууль нь Христэд итгэх тэдний итгэлийг хүчирхэгжүүлэхэд тустай байв; мөн ирэх тэдгээр зүйлийн тухай ярьсан бошиглолын суу билиг дээр тэд тулгуурлан, тийн тэд мөнхийн авралд хүргэх, итгэлээр ирэх найдварыг хадгалж байсан болой.

17 Мөн эдүгээ болгоогтун, Аммон, Аарон, Омнер, мөн Химнай, мөн тэдний ах дүүс леменчүүдийн дунд гаргасан өөрсдийн амжилтын төлөө үлэмж баяссан болой, Их Эзэн өөрсдийнх нь залбирлуудын дагуу тэдэнд өгснийг, мөн түүнчлэн тэрээр өөрийн үгсийг тэдэнд зүйл бүр дээр нь нотолсныг хараад болой.