1 Ao ngkai e a koro bukina bwa n aron ara rongorongo, ao ti bon ataa ara rongorongo bwa e koaua, bwa nooria, bon te aomata ae kororaoi ae kaawakin rongorongo—bwa e bon koaua ae e karaoi ^akakai n aran ^bIesu; ao bon akea te aomata ae kona ni karaoa te kakai n aran Iesu ngkana e aki kaitiakia ma ni mwakorokoron nako ana bure—

2 Ao ngkai e a koro bukina bwa, ngkana bon akea te kaairua ae karaoia te aomata aei n aron tauan ara tai, e a bon bane te ^akatenibwi ma teniua n ririki;

3 Ao aomata a moanna n taratara ma te ingainga nakon te kanikina are e a tia n anga te burabeti are Tamuera, are te Reimwanaite, eng, ibukin te tai are e na ^aroo i nanon te maan ae tenibong aon te aba.

4 Ao a moanna n reke raraoma ma kakauntaeka i buakoia aomata, e ngae ngke a mwaiti ^akanikina ake a tia n anganaki.

5 Ao e a koro bukina bwa n te katenibwi ma aua n ririki, n te moan namwakaina, n te kaua ni bong n te namwakaina, ao e a teirake te angibuaka ae korakora, ae bon akea kabotauana ae e ataaki ni kabuta te aba.

6 Ao bon iai naba te buaka ae korakora ma ni kakamaku; ao iai rurun te ^abaa ae kakamaku, n te aro are e a bon ^bioioaki te aonaba n aiaron ae kanga e na bwenaua i nanon uoua.

7 Ao bon iai ititin karawa ae korakora, ae akea kabotauana ni kabuta te aba.

8 Ao te ^akaawa are Taraemera e a bue.

9 Ao te kaawa are Moronaai e iinako nako kabin marawa, ao a bwabwa kaaina.

10 Ao e uotaki rake te tano iaon te kaawa ae bubura are Moronaaia, ao n te tabo are iai te kaawa iai e a bon riki te maunga ae korakora.

11 Ao bon iai te urubwai ae korakora n te aba nako maiaki.

12 Ma nooria, bon iai riki te urubwai ae korakora ma ni kakamaku n te aba nako meang; bwa nooria, e a bitaki tarakin te aba, ibukin te angibuaka ma taian ukeukenanti, ao rebwen te baa ma ititin karawa, ao korakoran rurun te aonaba ae bwanin;

13 Ao a uruaki ^akawai ake a bati n totouaki, ao a mwaiti kawai aika a aoraoi ake a uruaki, ao taabo aika aoraoi a riki ni mwanomwano.

14 Ao a mwaiti kaawa ake a ^aiinako, ao a mwaiti ake a tia ni bue, ao a mwaiti kateitei ake a bwaka nako aontano, ao kaaina a bon tiringaki, ao a tiku ni kamaroa taabo aikai.

15 Ao bon iai taian kaawa ake a tiku n aroia; ma te urubwai e bon rianako korakorana, ao a mwaiti kaaina ake a tiringaki.

16 Ao a bon mwaiti ake a uotaki nako n te ukeukenanti; ao a nakea bon akea te aomata ae e ataia, ma a bon ti ataa ae a bekakinako.

17 Ao mangaia are e a bitaki aron taraan aon te aonaba ni kabane, ibukin angibuaka, ao rurun te baa, ao ititin karawa, ao mwaingingin te aba.

18 Ao nooria, a raeuaki taian ^abwa; ao a uruaki iaon te aba ni kabuta, n te aro are a kuneaki ni maibibi n raeuaki ao n uruaki, ni kabuta aon te aba.

19 Ao e a koro bukina bwa ngke e a toki rebwerebwen te baa, ao ititin karawa, ao te ang buaka, ao angibuaka, ao mwaingingin te aonaba—bwa nooria, a bon waaki i nanon te maan ae ^ateniua te aoa; ao e bon taekinaki irouia tabemwaang bwa e anaanau riki taia; ma e ngae n anne, bwaai aika a korakora ma ni kakamaku aikai a bon riki i nanon te maan ae katauaki bwa teniua te aoa—ao ngkanne nooria, e a roko te roo iaon te aba.

20 Ao e a koro bukina bwa e bon matenten te roo are e kabuta te aba, n te aro are aomata ake aki bwaka a bon ^anamakina ^bbubun te roo.

21 Ao e na bon akea te oota, ibukin te roo, akea taura nenea, akea tooti; ao akea naba te ai ae kona ni kauraaki ma ni kaai aika a mwauteretere, n te aro are e na bon akea naba te oota teutana.

22 Ao bon akea te oota ae e nooraki, ke te ai, ke te ai oota, ke taai, ke namwakaina, ke itoi, bwa e rang korakora maabubun te roo are e mena iaon te aba.

23 Ao e a koro bukina bwa i nanon te maan ae ^atenibong ao bon akea te oota ae nooraki; ao e korakora te tang ni wenei ao te tatakarua ao te tatangitang i buakoia aomata n aki toki; eng, e bon korakora kakarongoaia aomata, ibukin te roo ao te urubwai are e korakora are e roko i aoia.

24 Ao n teuana te tabo e ongo te aba bwa a tang, ma ni kangai: O ngke arona bwa ti rairinanora i mwaain te bong ae korakora ma ni kakamaku aei, ao tao a na bon kamaiuaki tarira, ao a na bon aki kabuekaki n te kaawa are korakora are ^aTaraemera.

25 Ao n te tabo riki teuana e ongo te aba bwa a tang ma n nanokawaki, ni kangai: O ngke arona bwa ti a kaman rairinanora i mwaain te bong ae korakora ma ni kakamaku aei, man aki tiringia ao ma ni karebanaia burabeti n taian atibu, ma n teweia nako; ao ngkanne tinara ao natira aine aika a tikiraoi, ao natira a na bon kamaiuaki, ma n aki taunaki n te kaawa are korakora are Moronaaia. Ao ngaia are e a korakora ma ni kakamaku tangitangiia aomata.