1 Ao e koaua ae I tuangkami, I anganingkami te kanikina, n te aro are kam na ataa te tai are a nang riki iai bwaai aikai—are N na ikotiia iai man maenakoia n te tai ae maan, au botanaomata, O te bata are Iteraera, ao N na katea i buakoia au Tion;

2 Ao nooria, aio te bwai are N na anganingkami ibukin te kanikina—bwa e koaua ae I tuangkami bwa ngkana bwaai aika I a tia n taekin nakoimi, ao are N na taekin nakoimi rimwi, ni mwaakan te Tamnei ae Raoiroi are kam na anganaki mai iroun te Tama, a na kaotaki nakoia Tientaire bwa aonga n ataia aomata aikai bwa nikiraia kaain te bata are Iakobwa, ao rongorongoia au botanaomata aikai ake a na kamaenakoaki irouia.

3 E koaua, e koaua, ae I tuangkami, ngkana bwaai aikai a kaotaki nakoia mai iroun te Tama, ao e na roko mai iroun te Tama, mai irouia nakoimi;

4 Bwa ni wanawanan te Tama ao e bon riai bwa a na kateaki n te aba aio, ma ni karikaki bwa aomata aika a inaomata ni mwaakan te Tama, bwa aonga n roko bwaai aikai mai irouia nakoia nikiraia ami kariki, n te aro bwa e na kakoroaki bukin ana berita ae tabu te Tama are e berita n ae tabu iai ma ana botanaomata, O te bata are Iteraera.

5 Ngaia are, ngkana te mwakuri, ao mwakuri ake a na karaoaki i buakomi i mwin aio a roko mai irouia Tientaire, nakoia ami kariki ake a na kerikaaki n aia aki onimaki ibukin te bure.

6 Bwa bon nanon te Tama bwa e na roko mai irouia Tientaire, n te aro are e na kaota mwaakana nakoia Tientaire, ibukin aei bwa ngkana Tientaire aki kamatoatoai nanoia, bwa aonga n rairinanoia man roko nakoiu ma ni bwabetitoaki n arau man atai koauan raoi au reirei, bwa aonga ni warekaki i buakoia au botanaomata, O te bata are Iteraera;

7 Ao ngkana a koro bukin bwaai aikai ao ami kariki a moanna n atai bwaai aikai—e na riki bwa te kanikina nakoia, bwa a aonga n ataia bwa e a tia ni waaki ana mwakuri te Tama ibukin kakoroan bukin ana berita ae tabu are e a tia ni karaoia ma te botanaomata ake kaain te bata are Iteraera.

8 Ao ngkana e roko te bong arei, e na koro bukina bwa a na kaini wiia Uea; bwa te bwai are a tuai n tuangaki a na nooria; ao te bwai are a tuai ma n ongo ana iangoia.

9 Bwa n te bong arei, ibukiu ao te Tama e na mwakuria te mwakuri, are e na kakannato ao e na kamimi i buakoia; ao e na iai i buakoia ake a na aki kakoaua, e ngae ngke e na taekinna te aomata nakoia.

10 Ma nooria, maiuin au toro e na mena i nanon baiu; ngaia are a na bon aki kammarakia, e ngae ngke e na nibwaibwai irouia, ma N na kamarurungnga, bwa N na kaotia nakoia bwa wanawanau e korakora riki nakon ana kamwamwane te riaboro.

11 Ngaia are e na koro bukina bwa ane e rawa ni kakoauai au taeka, Ngai Iesu Kristo, are e na karokoa te Tama irouia Tientaire, man anganna te mwaaka bwa e na karokoia nakoia Tientaire, (e na bon karaoaki n aron are e taku Mote) a na bon kaokoroaki mai i buakoia au botanaomata ake kaain te berita ae tabu.

12 Ao au botanaomata ake nikiraia ana aomata Iakobwa a na mena i buakoia Tientaire, eng, i buakoia n aron te raian i buakoia manin te buakonikai, n aron te raian te teei i buakoia nanai n tiibu, are ngkana e rimarenaia e toubekaia ao e raebitia nakon mwakorokoro, ao akea ae kona ni kamaiuia.

13 A na tabekaki rake baia i aoia taan ribaia, ao a na kaokoroaki mai irouia aia kairiribai ni kabane.

14 Eng, te maraia nakoia Tientaire ngkana a aki rairinanoia; bwa e na koro bukina n te bong arei, e taku te Tama, are N na kaokoroia ami aoti mai i buakomi, ao N na urui ami kaa ni buaka.

15 Ao N na tuki kaawa ake n abami, ma ni kabwakai ni kabane ami tabo ni katantan;

16 Ao N na tuka te mwakuri n tabunea man abami, ao e na manga aki oki n iai ami taan tabunea;

17 N na tuki naba ami boua aika a kaaraki, ao ami boua aika a tei i buakomi, ao kam na manga aki oki n taromauria ana mwakuri baimi.

18 Ao N na kiniki am buakoako mai i buakomi, ao N na urui naba ami kaawa.

19 Ao e na koro bukina bwa ni kabane te kewe ma te mwaamwana te aba, ao te bakantang, ao te ikakaiwi, ao nakoa n ibonga aika kewe, ao aaro ni kabekaau, a na bane ni kamaunaki.

20 Bwa e na koro bukina bwa, e taku te Tama, bwa n te bong arei ao ane e aki rairananona man nakon Natiu ae Moan te Tangiraki, ao N na kanakoia mai buakoia au botanaomata, O te bata are Iteraera;

21 Ao N na karaoa te karekekai ao te un ae korakora i aoia, n aiaron naba nakoia beekan, n te aro ae a tuai ma n ongoongoo mai mwaaina.

22 Ma ngkana a rairinanoia man ongo n au taeka, man aki kamatoai nanoia, N na katea au ekaretia i buakoia, ao a na rin nakon te berita ae tabu ma ni warekaki i buakoia nikiran kanoan Iakobwa, are I a tia n anga te aba aio bwa aia bwai;

23 Ao a na buokiia au botanaomata, ake nikiran kanoan Iakobwa ao ake mwaitin naba kaain te bata are Iteraera ake a na roko, bwa a na katea te kaawa ae bubura, are e na aranaki bwa Ierutarem ae Boou.

24 Ao ngkanne a na buokiia au botanaomata bwa aonga n ikotaki, ake a maenako iaon te aba, nakon Ierutarem ae Boou.

25 Ao ngkanne e na roko mwaakan karawa i aoia i buakoia; ao N na mena i buakoia.

26 Ao ngkanne e na waaki ana mwakuri te Tama n te bong arei, n te tai naba are e kabwarabwaraki te euangkerio aio i buakoia nikiraia te botanaomata. E koaua ae I tuangkami, n te bong arei ao e na waaki ana mwakuri te Tama i buakoia au botanaomata, eng, irouia naba baronga ake a tia ni bua, are e kairia nako te Tama ma i Ierutarem.

27 Eng, e na waaki te mwakuri i buakoia au aomata ake a kamaenakoaki, ma te Tama ni katauraoa te kawai are a na kona ni kawarai, n te aro are a na wetea te Tama n arau.

28 Eng, ao ngkanne e na waaki te mwakuri, ma te Tama n aaba nako ni katauraoa te kawai are a na ikotaki iai aomata nakon mwengaia nakon abaia ni bwaibwai.

29 Ao a na otinako man aaba nako; ao a na aki ienikuri n nako, ke ni birinako, bwa N na rimoaia, e taku te Tama, ao N na mena i bukia.