1 Koʼág̃a ojehu ary noventa y uno opákuri ha ohasáma seisiénto ary ára Lehi osẽhague Jerusalén-gui; ary Laconeo haʼéramoguare hue guasu ha tetã sãmbyhyhára opa upe tetãme.

2 Ha Nefi, Helamán raʼy, osẽkuri Zarahemla retãgui, omeʼẽvo itaʼýra Nefi-pe, haʼéva itaʼýra ypykue, umi pláncha bronce-guigua, ha opa kuatiajehaipyre oñeñongatuvaʼekue, ha opa umi mbaʼe oñeñongatuvaʼekue marangatúpe Lehi osẽ guive Jerusalén-gui.

3 Upe rire haʼe osẽ upe tetãgui, ha moõpa oho, avave ndoikuaái; ha itaʼýra Nefi ogueraha umi kuatiajehaipyre haʼerangue, heẽ, ko tavayguakuéra kuatiajehaipyre.

4 Ha ojehu oñepyrũvo ary noventa y dos; péina ápe, oñepyrũ oñekumplipave profetakuéra profesía; oñepyrũgui oĩ techaukaha tuichavéva ha ojejapo milágro tuichavéva tavayguakuéra apytépe.

5 Ha katu oĩ heʼíva ohasamaha ára oñekumpli hag̃ua umi ñeʼẽ, heʼivaʼekue Samuel, upe lamanita.

6 Ha oñepyrũ opuka hikuái ijoykeʼykuérare, heʼívo: Péina ápe ohasáma pe ára, ha noñekumplíri Samuel ñeʼẽ; upévare, mbaʼerei raʼe pende vyʼapavẽ ha pende jerovia koʼã mbaʼe rehe.

7 Ha ojehu ojapo hikuái tuicha ayvu opa upe tetã rupi; ha tavayguakuéra ogueroviáva oñepyrũ ojepyʼapyeterei, ani mbaʼe peichahágui ndojehúi umi mbaʼe ojeʼevaʼekue oikotaha.

8 Ha katu péina ápe, ohaʼarõkuri hikuái ñemovãʼỹme upe ára ha pyhare ha ambue ára ñeg̃uahẽ haʼéva peteĩ áraichante ndaiporiramoguáicha pyhare, oikuaa hag̃ua hikuái ijeroviakuéra ndareírihague.

9 Koʼág̃a ojehu umi ogueroviaʼỹva omoĩ peteĩ ára, ojejukavaʼerãháme mayma ogueroviáva umi jepokuaa rehe, oikoʼỹramo upe techaukaha, omeʼẽvaʼekue proféta Samuel.

10 Koʼág̃a ojehu Nefi, Nefi raʼy, ohechávo itavayguakuéra rembiapoñaña, ikorasõ ojepyʼapyeterei.

11 Ha ojehu oho ha oñesũ yvýpe, ha ojerureʼasy Itupãme itavayguakuéra ñeimeporãre, heẽ, umi oñehundipotaitéva oguerovia haguére ituvakuéra jepokuaa.

12 Ha ojehu haʼe ojerureʼasy Ñandejárape opa upe ára pukukue; ha péina ápe, Ñandejára ñeʼẽ ou chupe, heʼívo:

13 Emopuʼã ne akã ha evyʼa; ha péina ápe, pe ára og̃uahẽma, ha ko pyharépe oñemeʼẽta pe techaukaha, ha koʼẽrõ che ajúta yvórape, ahechauka hag̃ua yvórape akumplipataha umi che haʼeukavaʼekue che profetakuéra marangatu juru rupi.

14 Péina ápe, che aju chembaʼekuérape, akumpli hag̃ua opa mbaʼe che aikuaaukavaʼekue yvypóra raʼykuérape yvóra ñepyrũmby guive, ha ajapo hag̃ua, peteĩcha Túva ha Taʼýra rembipota—Túva rembipota che rupi, ha pe Taʼýra che rete rupi. Péina ápe, og̃uahẽma ára, ha ko pyharépe oñemeʼẽta upe techaukaha.

15 Ha ojehu oñekumpli umi ñeʼẽ oñemeʼẽvaʼekue Nefi-pe, ojeʼe haguéicha; ha péina ápe, pe kuarahy oikévo ndaipórikuri pytũ; ha tavayguakuéra oñepyrũ oñemondýi napytũigui oúvo upe pyhare.

16 Ha oĩkuri heta, ndogueroviaivaʼekue profetakuéra ñeʼẽ, hoʼáva yvýpe ha opyta omanoramoguáicha, oikuaágui hikuái oñembyaiha pe plan ñehundirã tuicháva ojaposevaʼekue hikuái umi ogueroviáva profetakuéra ñeʼẽ rehe; pe techaukaha oñemeʼẽvaʼekue oĩmagui upépe.

17 Ha oñepyrũ oikuaa hikuái Tupã raʼy pyaʼe ojehechaukatamaha; heẽ, peteĩ ñeʼẽme, opa tavayguakuéra yvy ape arigua kuarahyreike guive kuarahyresẽ meve, yvy nortegua ha surpegua, oñemondyieterei hikuái hoʼa peve yvýpe.

18 Oikuaágui hikuái profetakuéra otestifikahague koʼã mbaʼégui heta ary aja, ha pe techaukaha oñemeʼẽvaʼekue oĩmaha henondepekuéra; ha oñepyrũ okyhyje hikuái hembiapovai ha ojeroviaʼỹ haguére.

19 Ha ojehu ndaipóri pytũ opa upe pyhare aja, ha katu hesakã asajeramoguáicha. Ha ojehu pyhareve osẽ jey kuarahy, osẽháicha jepivoi; ha oikuaa hikuái upéva haʼeha pe ára heñoivaʼerãha Ñandejára, upe techaukaha oñemeʼẽvaʼekue rupi.

20 Ha ojehúkuri, heẽ, opa mbaʼe, opa pehẽngueʼi, profetakuéra ñeʼẽme heʼiháicha.

21 Ha ojehu ojekuaa avei peteĩ mbyja pyahu, upe ñeʼẽme heʼiháicha.

22 Ha ojehu upe ára guive Satana oñepyrũ omosarambi japu tavayguakuéra apytépe, omohatã hag̃ua ikorasõkuéra, ani hag̃ua oguerovia hikuái umi techaukaha ha mbaʼeguasukuéra ohechavaʼekue; ha jepeve koʼã japu ha añeteguaʼỹ, hetave tavayguakuéra oguerovia, ha oñekonverti Ñandejárape.

23 Ha ojehu Nefi osẽ tavayguakuéra apytépe, ha avei heta ambue, oporomongaraívo arrepentimientorã, ha upéva rupi oĩ peteĩ tuicha angaipa jora. Ha péicha tavayguakuéra oñepyrũ ipyʼaguapy jey upe tetãme.

24 Ha ndaipórikuri joavy, ndahaʼéiramo mbovymi oñepyrũva omboʼe, oñehaʼãvo ohechauka umi escritura rupive natekotevẽimaha oñeñeʼẽrendu Moisés léire. Koʼág̃a upévape ojavy hikuái, noikũmbýigui umi escritura.

25 Ha katu ojehu ndaʼaréi oñekonverti hag̃ua hikuái, ha ohecha oĩha jejavýpe, ojeikuaaukágui chupekuéra pe léi neʼĩra gueteriha oñekumpli, ha oñekumplivaʼerãha opaite mbaʼépe; heẽ, og̃uahẽ chupekuéra ñeʼẽ tekotevẽha oñekumpli; heẽ, ni peteĩ hóta ni peteĩ tílde ndohasamoʼãiha oñekumpli mboyve opa mbaʼe; upévare ko arýpe ojeikuaauka chupekuéra ijejavy ha okonfesa hikuái hembiapovaikuéra.

26 Ha péicha opákuri ary noventa y dos, oguerúvo mbaʼe porã pyahu tavayguakuérape umi techaukaha ojehechaukavaʼekue rupi, opavave profetakuéra marangatu ñeʼẽme heʼiháicha.

27 Ha ojehu ary noventa y tres ohasa avei pyʼaguapýpe, ndahaʼéiramo Gadiantón mondahakuéra rupi, oikóva umi yvytýpe, ha omyenyhẽva upe tetã; imbaretetereígui henda moʼãha ha henda kañyhakuéra tavayguakuéra ndaikatúi ipuʼaka hesekuéra; upévare ojapo hikuái heta jejuka, ha ogueru tuicha ñemano tavayguakuéra apytépe.

28 Ha ojehu oñepyrũ hetaiterei hikuái ary noventa y cuatro-pe, oĩgui heta nefita-kuéra osẽvaʼekue oho ijapytepekuéra, ha upéva ogueru tuicha vyʼaʼỹ nefita-kuéra opytavaʼekuépe upe tetãme.

29 Ha oĩ avei tuicha jepyʼapyrã lamanita-kuéra apytépe; ha péina ápe, oguereko hikuái taʼyrakuéra okakuaáva ha oñembotuicháva ohóvo arýpe, ojapo hag̃ua mbaʼe ijeheguikuéra, ha oĩ zoramita, ogueraháva chupekuéra ijapu ha iñeʼẽ tieʼỹme, ojoaju hag̃ua hikuái umi Gadiantón mondahakuéra ndive.

30 Ha upéicha oñemoingoʼasy avei lamanita-kuérape, ha oñepyrũ omomichĩ hikuái ijerovia ha hekojoja, umi ñemoñare pyahu rembiapovai rupi.