1 Ha ojehu Jesús heʼi hemimboʼekuérape togueru chupe mbujape ha víno.

2 Ha oho aja ogueru hikuái mbujape ha víno, heʼi atyguasúpe oguapy hag̃ua yvýpe.

3 Ha og̃uahẽvo temimboʼekuéra mbujape ha víno reheve, haʼe ojagarra pe mbujape ha ombojaʼo ha ohovasa, ha omeʼẽ temimboʼekuérape ha heʼi chupekuéra hoʼu hag̃ua.

4 Ha hoʼu ha henyhẽ rire hikuái, heʼi toñemeʼẽ atyguasúpe.

5 Ha atyguasu hoʼu ha henyhẽ rire, haʼe heʼi temimboʼekuérape: Péina ápe oĩta peteĩva pende apytépe oñeordenátava, ha chupe ameʼẽta puʼaka ombojaʼo hag̃ua mbujape ha ohovasa ha omeʼẽ hag̃ua che tupaogua tavayguakuérape, opavave umi ogueroviáva ha oñemongaraívape che rérape.

6 Ha akóinte peñehaʼãta pejapo upéva, jepe che ajapo haguéicha, jepe che ambojaʼo haguéicha mbujape ha ahovasa ha ameʼẽ peẽme.

7 Ha pejapóta upéva penemanduʼávo che rete rehe, ahechaukavaʼekue peẽme. Ha haʼéta testimónio Túvape akóinte penemanduʼataha cherehe. Ha penemanduʼáramo tapiaite cherehe peguerekóta che Espíritu oĩ hag̃ua penendive.

8 Ha ojehu haʼe heʼívo koʼã ñeʼẽ, heʼi hemimboʼekuérape toyʼu víno upe kópagui, ha tomeʼẽ avei atyguasuguápe hoyʼu hag̃ua hikuái.

9 Ha ojehu péicha ojapo hikuái, ha hoyʼu ha henyhẽ hikuái; ha omeʼẽ hikuái atyguasuguápe, ha koʼãva hoyʼu, ha henyhẽ hikuái.

10 Ha temimboʼekuéra ojapo rire upéva, Jesús heʼi chupekuéra: Pejehovasapyre koʼã mbaʼe pejapovaʼekuére, péva okumplígui che rembiapoukapykuéra, ha kóva otestifika Túvape pejaposeha umi mbaʼe haʼevaʼekue peẽme.

11 Ha tapiaite pejapóta upéva umi oñearrepentíva ha oñemongaraíva rehe che rérape; ha pejapóta che ruguýre penemanduʼa hag̃ua, añohẽvaʼekue penderehe, petestifika hag̃ua Túvape tapiaite penemanduʼaha cherehe. Ha penemanduʼáramo tapiaite cherehe, peguerekóta che Espíritu oĩ hag̃ua penendive.

12 Ha ameʼẽ peẽme tembiapoukapy pejapo hag̃ua koʼã mbaʼe. Ha pejapóramo tapiaite koʼã mbaʼe pejehovasapyre peẽ, pejogapógui che ita ári.

13 Ha katu umi pende apytépe ojapóva hetave térã saʼive koʼãvagui ndojogapói che ita ári, ha katu ojogapo peteĩ pyenda yvykuʼigua ári; ha oguejy vove ama, ha ou vove y heta, ha oipeju vove yvytukuéra, ha oinupã vove hesekuéra, hoʼáta, ha umi añaretã rokẽ ojepeʼáma omog̃uahẽ hag̃ua chupekuéra.

14 Upévare pejehovasapyre peẽ peneñeʼẽredúramo che rembiapoukapykuérare, Túva heʼivaʼekue chéve ameʼẽ hag̃ua peẽme.

15 Añetehápe, añetehápe, che haʼe peẽme, peñangareko ha peñemboʼevaʼerã tapiaite, ani aña penepyʼaraʼã, ha pejeguaraha hese ñeñapytĩmbýpe.

16 Ha añemboʼe haguéicha pende apytépe jepeve upéicha peñemboʼéta che tupaópe, che tavayguakuéra apytépe oñearrepentíva ha oñemongaraíva che rérape. Péina ápe che haʼe tesape; che ameʼẽvaʼekue peẽme techapyrã.

17 Ha ojehu Jesús heʼipa rire koʼã ñeʼẽ hemimboʼekuérape, ojere jey atyguasu gotyo ha heʼi chupekuéra:

18 Péina ápe, añetehápe, añetehápe, che haʼe peẽme, peñangareko ha peñemboʼevaʼerã tapiaite ani peike jepyʼaraʼãme; Satana pendeipotágui, pendetyvyro hag̃ua avatimirĩcha.

19 Upévare akóinte peñemboʼevaʼerã Túvape che rérape.

20 Ha oimeraẽva mbaʼe pejeruréva Túvape che rérape, ijojáramo, pegueroviáramo oñemeʼẽtaha peẽme, péina ápe oñemeʼẽta peẽme.

21 Peñemboʼe Túvape pende rogayguakuéra ndive, che rérape tapiaite, ojehovasa hag̃ua pene rembireko ha pende raʼykuéra.

22 Ha péina ápe, pyʼỹi peñembyatýta; ha avavépe napembotovemoʼãi oĩ hag̃ua penendive peñembyaty jave, ha katu peheja chupekuéra toñemoag̃ui penderehe ha ani pembotove chupekuéra.

23 Ha katu peñemboʼéta hesekuéra, ha napemosẽmoʼãi chupekuéra okápe; ha ou pyʼỹiramo hikuái penerendápe pejeruréta hesekuéra Túvape, che rérape.

24 Upévare, pehupi pende resape omimbi hag̃ua yvóra renondépe. Péina ápe che haʼe upe tesape pehupivaʼerã yvate—umi mbaʼe pehechavaʼekue ajapo. Péina ápe pehechákuri añemboʼehague Túvape, ha opavave peẽ haʼékuri testígo.

25 Ha pehechákuri haʼehague ni peteĩva pende apytépe noñemomombyryivaʼerã, ha katu haʼékuri peju hag̃ua cherendápe, peñandu ha pehecha hag̃ua; jepe upéicha pejapóta peẽ yvórape; ha ojapyharáva ko tembiapoukapy ojeguerahauka jeipyʼaraʼãre.

26 Ha koʼág̃a ojehu Jesús heʼipa rire koʼã ñeʼẽ, haʼe ojere jey omaʼẽ temimboʼekuéra oiporavovaʼekuére, ha heʼi chupekuéra:

27 Péina ápe añetehápe, añetehápe, che haʼe peẽme, ameʼẽta peẽme ambue tembiapoukapy, ha upéi ahavaʼerã che Rúpe akumpli hag̃ua ambue tembiapoukapykuéra haʼe omeʼẽvaʼekue chéve.

28 Ha koʼág̃a péina ápe, kóva haʼe tembiapoukapy che ameʼẽva peẽme, peikuaávo ani peheja avave hoʼu hekojojaʼỹme che roʼo ha che ruguýgui, pemeʼẽ jave;

29 Pe hoʼúva che roʼo ha hoyʼúva che ruguy tekojojaʼỹme, hoʼu ha hoyʼu kodenasiõ hiʼángape g̃uarã; upévare peikuaáramo peteĩ yvypóra ndahekojojaiha hoʼu ha hoyʼu hag̃ua che roʼo ha che ruguýgui pembotovéta chugui.

30 Upevére, napemosẽmoʼãi chupe pende apytégui, ha katu peministráta chupe ha peñemboʼéta Túvape hese, che rérape; ha oñearrepenti ha oñemongaraíramo che rérape, upéramo pemog̃uahẽta, ha pemeʼẽta chupe che roʼo ha che ruguýgui.

31 Ha katu noñearrepentíriramo ndojeipapamoʼãi che tavayguakuéra apytépe, ani hag̃ua ohundi che tavayguakuérape, péina ápe che aikuaágui che ovechakuéra, ha ojeipapa hikuái.

32 Upevére, napemosẽmoʼãi chupekuéra pene sinagógagui, térã tenda petupaitũhágui, peministráta haguére gueteri koʼãvare; ndapeikuaáigui peichahágui ojeréramo g̃uarã hikuái ha oñearrepenti, ha ou cherendápe korasõ añete reheve, ha che amongueráta chupekuéra; ha peẽ haʼéta tembiporu pegueru hag̃ua chupekuéra salvasiõ.

33 Upévare, peneñeʼẽrendu koʼã mbaʼe che haʼévare peẽme ani hag̃ua peʼa kondenasiõme; ái upe Túva okondenávagui.

34 Ha ameʼẽ peẽme koʼã tembiapoukapykuéra ñeʼẽʼapi oĩ haguére pende apytépe. Ha pejehovasapyre ndaipórirõ ñeʼẽʼapi pende apytépe.

35 Ha koʼág̃a che aha Túvape; tekotevẽgui aha Túvape pene ñeimeporãrã.

36 Ha ojehu Jesús ombopahávo koʼã ñeʼẽ, haʼe opoko ipópe temimboʼekuéra oiporavovaʼekuére, peteĩ teĩme, jepe opoko peve opavavére, ha oñeʼẽ chupekuéra opokokuévo hesekuéra.

37 Ha atyguasu nohendúi ñeʼẽnguéra haʼe heʼíva, upévare nomeʼẽi testimónio; ha katu temimboʼekuéra omeʼẽ testimónio haʼe omeʼẽhague chupekuéra puʼaka omeʼẽ hag̃ua Espíritu Santo. Ha tenondeve ahechaukáta peẽme ko testimónio añeteguaha.

38 Ha ojehu Jesús opoko rire opavavére, ou peteĩ arai ha ojahoʼi atyguasúpe upévare ndohechái hikuái Jesús-pe.

39 Ha ojahoʼi aja chupekuéra haʼe osẽ ijapytepekuéragui, ha ojupi yvágape. Ha temimboʼekuéra ohecha ha omeʼẽ testimónio ojupi jeyhague yvágape.