1 Ha upéramo ojehúta ojehaivaʼekue: Epurahéi, O nemembyʼỹva, nde neremoheñóiva mitã; esapukái purahéipe, ha esapukái vyʼágui, nde arakaʼeve nanemembyivaʼekue; hetavégui imemby ojehejareivaʼekue pe omendávagui, heʼi Ñandejára.

2 Eipyso nde rogaao renda, ha tojeipyso nde koty ahoja; ani remombyky, emombuku umi ne sã ha emombareteve nde estakakuéra;

3 Rejeipysótagui po asu ha akatúa gotyo, ha ne ñemoñare ohupytýta gentil-kuéra retã ha ojapóta tojeiko tavaguasu nandikuérape.

4 Ani ekyhyje, nereñemotĩmoʼãigui; ani eñemoypytũ, noñembohorymoʼãigui nderehe hikuái; nderesaráitagui nemitãramoguare ñemotĩgui, ha nanemanduʼamoʼãi ndepyahúramoguare jejaʼóre, ha nemenaveʼỹramoguare ñeʼẽpohýire nanemanduʼamoʼãvéima arakaʼeve.

5 Nde apohare, ne ména, Señor de los Ejércitos haʼégui héra; ha ne Rredentor, pe Israel-gua Imarangatúva—oñehenóita chupe Tupã opa tetãmegua.

6 Ñandejára nerenói haguére kuña ojehejareivaʼekue ha espíritupe ohasaʼasýva, ha pyahupegua tembireko, rejehejareíramoguare, heʼi Tupã.

7 Sapyʼami rohejákuri, ha katu tuicha poriahuverekópe rombyatýta.

8 Ñekoʼõiʼimíme amokañy sapyʼami che rova ndehegui, ha katu poriahuvereko opaveʼỹvape roiporiahuverekóta, heʼi Ñandejára ne Rredentor.

9 Ha Noé ykuéraicha; che añeʼẽmeʼẽ haguéicha Noé ykuéra arakaʼeve ndojahoʼimoʼãvéimaha yvy, upéicha añeʼẽmeʼẽvaʼekue ndachepochymoʼãvéimaha nendive.

10 Yvytykuéra okañýtagui ha yvypuʼãnguéra ojeipeʼátagui, ha katu che mborayhu ndojeipeʼamoʼãi ndehegui, ni ndojeipeʼamoʼãi che pyʼaguapy konvénio, heʼi Ñandejára ndeporiahuverekóva.

11 O nde reikoʼasýva, neinupãva aravai, ha nderejuhúiva angapyhy! Péina ápe, che amoĩta nde ita parakuéra iporãvéva reheve, ha safírope amopuʼãta ne pyendakuéra.

12 Ne rovetã ajapóta ágatagui, ha ne rokẽnguéra karvúnkulogui, ha opa ne rembeʼy ajapóta ita hechapyrãvagui.

13 Ha mayma nde raʼykuéra oñemoarandúta Ñandejárare; ha tuicháta nde raʼykuéra pyʼaguapy.

14 Tekojojápe reñemopuʼãta; reiméta mombyry jejopýgui nderekyhyjemoʼãigui, ha kyhyjevaígui, noñemoag̃uimoʼãigui nderehe.

15 Péina ápe, oñembyatýta hikuái nderehe oñemoĩvo, ha ndahaʼéi chehegui; ha oñembyatýva oñemoĩ hag̃ua nderehe, nde rupi hoʼáta.

16 Péina ápe, che ajapovaʼekue erréro oipejúva tatapỹi tatápe, ha oguenohẽva tembiporu hembiaporã; ha ajapovaʼekue mbaʼevaiapohára oporohundi hag̃ua.

17 Mbaʼevéichagua árma ojejapóva oñemopuʼã hag̃ua nderehe noñakãrapuʼãmoʼãi; ha opa kũ opuʼãvape huísiope nderehe nde rekondenáta. Kóva haʼe Ñandejára rembiguaikuéra jehejapyre, ha hekojoja ou chehegui, heʼi Ñandejára.