1 Ha koʼág̃a, péina ápe, che haʼe peẽme, pehesaʼỹijovaʼerãha koʼã mbaʼe. Heẽ, peteĩ tembiapoukapy ameʼẽ peẽme jesarekópe pehesaʼỹijo hag̃ua koʼã mbaʼe; tuichágui Isaías ñeʼẽnguéra.

2 Haʼe añetehápe oñeʼẽ opa mbaʼe haʼéva che tavaguakuéra reheguáre haʼéva Israel rogagua; upévare tekotevẽ avei haʼe oñeʼẽ gentil-kuérape.

3 Ha opa mbaʼe haʼe oñeʼẽvaʼekue oñekumplíkuri ha oñekumplíta, jepe ñeʼẽ heʼi haguéicha.

4 Upévare pehendu che ñeʼẽnguéra; pehai umi mbaʼe haʼevaʼekue peẽme: ha Túva ára ha rembipotáicha ohóta gentil-kuérape.

5 Ha opavave ohendúva che ñeʼẽ ha oñearrepenti ha oñemongaraíva, ojesalváta. Pehesaʼỹijo profetakuéra, hetágui umi otestifikáva koʼã mbaʼégui.

6 Ha ojehu Jesús heʼipa rire koʼã ñeʼẽ oñeʼẽ jey chupekuéra, omyesakãmba rire opa escritura oñemeʼẽvaʼekue chupekuéra, ha heʼi: Péina ápe, aipota pehai ambue escritura-kuéra ndapeguerekóiva.

7 Ha ojehu heʼi Nefi-pe; Egueru umi kuatiajehaipyre reñongatuvaʼekue.

8 Ha Nefi ogueraha rire umi kuatiajehaipyre, ha omoĩ henondépe, Jesús omaʼẽ hesekuéra ha heʼi:

9 Añetehápe che haʼe peẽme, che haʼékuri che rembiguái Samuel, upe lamanítape, otestifika hag̃ua ko tavayguakuérape, ára Túva omboverapy vove héra chepype oĩtaha heta imarangatúva opuʼãtava omanóva apytégui, ha ojehechaukataha hetápe, ha oministrataha chupekuéra. Ha heʼi chupekuéra: Ndaʼupéichai piko raʼe?

10 Ha hembiguaikuéra ombohovái chupe ha heʼi: Heẽ, Ñandejára, Samuel oprofetisavaʼekue nde reñeʼẽháicha, ha opaite oñekumplivaʼekue.

11 Ha Jesús heʼi chupekuéra: Mbaʼére piko ndapehairivaʼekue umi mbaʼe, heta umi imarangatúva opuʼãhague ha ojehechaukahague hetápe ha oministrahague chupekuéra?

12 Ha ojehu Nefi imanduʼa umi mbaʼe ndojehaírihague.

13 Ha ojehu Jesús heʼi ojehai hag̃ua; upévare ojehai haʼe heʼiháicha.

14 Ha koʼág̃a ojehu Jesús omyesakãmba rire peteĩme opa umi escritura haʼekuéra ohaivaʼekue, heʼi chupekuéra omboʼe hag̃ua umi mbaʼe haʼe omyesakãvaʼekue.