1 Ha ojehu heʼi atyguasúpe ha avei hemimboʼekuérape tombopaha iñemboʼe. Ha heʼi chupekuéra ani hag̃ua ombopaha iñemboʼe ikorasõme.

2 Ha heʼi chupekuéra topuʼã ha toñemboʼy. Ha opuʼã ha oñemboʼy hikuái.

3 Ha ojehu ombojaʼo jey mbujape ha ohovasa, ha hoʼuka temimboʼekuérape.

4 Ha hoʼupa rire hikuái heʼi chupekuéra tombojaʼo mbujape, ha tomeʼẽ atyguasúpe.

5 Ha omeʼẽ rire hikuái atyguasúpe omeʼẽ avei chupekuéra víno hoyʼu hag̃ua, ha heʼi chupekuéra tomeʼẽ atyguasúpe.

6 Koʼág̃a katu, ndogueraháikuri mbujape, ni víno, umi temimboʼekuéra, ni atyguasukueragua.

7 Ha katu añetehápe haʼe hoʼuka chupekuéra mbujape, ha avei omboyʼuka chupekuéra víno.

8 Ha heʼi chupekuéra: Pe hoʼúva ko mbujapégui hoʼu che retégui hiʼángape g̃uarã; ha omboyʼúva ko vínogui hoyʼu che ruguýgui hiʼángape g̃uarã; ha hiʼánga arakaʼeve naiñembyahýi ni ndaijyʼuheimoʼãi, ha katu henyhẽta.

9 Koʼág̃a katu, opa atyguasu hoʼu ha hoyʼu rire, péina ápe, henyhẽ hikuái Espíritugui; ha osapukái hikuái peteĩ ñeʼẽme, ha omboverapy hikuái Jesús-pe, ohecháva ha ohendúvape.

10 Ha ojehu opavave omboverapy rire Jesús-pe, haʼe heʼi chupekuéra: Péina ápe koʼág̃a che ajapopáma tembiapoukapy Túva omeʼẽvaʼekue chéve koʼã tavayguakuéra rehegua, haʼéva hikuái peteĩ Israel róga rembyre.

11 Penemanduʼáke che añeʼẽhague peẽme, ha haʼehague oñekumpli vove Isaías ñeʼẽnguéra—péina ápe umíva ojehai, peguereko penerenondépe, upévare pehesaʼỹijo—

12 Ha añetehápe, añetehápe, che haʼe peẽme, umíva oñekumpli vove, upéramo oñekumplíta konvénio Túva ojapovaʼekue itavayguakuéra ndive, O Israel róga.

13 Ha upéramo umi hembyre, oñemosarambítava yvy ape ári, oñembyatýta kuarahyresẽgui ha kuarahyreikégui, ha sur ha nórtegui; ha ojegueraháta chupekuéra Ñandejára Itupã jeikuaápe, orredimivaʼekue chupekuéra.

14 Ha Túva heʼíkuri chéve ameʼẽ hag̃ua peẽme ko yvy, pende jehejapyrerã.

15 Ha che haʼe peẽme, gentil-kuéra noñearrepentíriramo, jehovasa oñemeʼẽ rire chupekuéra, omosarambi rire hikuái che tavayguakuérape—

16 Upéramo peẽ, haʼéva peteĩ Jacob róga rembyre, pehóta ijapytepekuéra; ha peiméta umi hetáva mbytépe; ha peẽ haʼéta ijapytepekuéra peteĩ leõ mymba kaʼaguy apytépeicha, ha leõ raʼy ovechaʼaty apytépeicha, ha upéva, ohasáramo mbyte rupi, opyrũ ha oipehaʼã, ha avave ndaikatúi ojoko.

17 Nde po opuʼãta nde rayhuʼỹhakuéra ári, ha mayma nderayhuʼỹva ojeipeʼáta.

18 Ha che ambyatýta che tavayguakuérape kuimbaʼe ombyatyháicha igavílla yvaraʼỹirendápe.

19 Ajapótagui che tavayguakuérape upe Túva ojapovaʼekue ndive konvénio, heẽ, che ajapóta ne ratĩ iérrogui, ha ne pyapẽ bronce-gui. Ha remonguʼíta heta tavayguakuérape; ha akonsagráta Ñandejárape ipirapirekuéra, ha imbaʼehepykuéra opa tetãmegua Ñandejárape. Ha péina ápe, che haʼe pe ajapóva.

20 Ha ojehu, heʼi upe Túva, che hustísia kysepuku oguejýta hiʼarikuéra upe árape; ha noñearrepentíriramo hoʼáta hiʼarikuéra, heʼi Túva, heẽ, jepe opa gentil-kuéra tetãnguéra ári.

21 Ha ojehu amopuʼãta che tavayguakuérape, O Israel róga.

22 Ha péina ápe, amoĩta ko tavayguakuérape ko tetãme, oñekumpli hag̃ua konvénio ajapovaʼekue nde ru Jacob ndive; ha haʼéta peteĩ Jerusalén Pyahu. Ha umi yvága puʼaka oĩta ko tavayguakuéra mbytépe; heẽ, jepe chetevoi aiméta pende apytépe.

23 Ha péina ápe, che haʼe pe Moisés oñeʼẽhague, heʼívo: Ñandejára pende Tupã omopuʼãta peẽme peteĩ proféta pende joykeʼykuéra apytégui, cheichagua; ha chupe pehendúta opa mbaʼe heʼívape peẽme. Ha ojehúta opa tekove nohendúiva upe profétape oñemosẽta tavayguakuéra apytégui.

24 Añetehápe che haʼe peẽme, heẽ, ha mayma proféta Samuel guive ha umi haʼe rireguáva, opa umi oñeʼẽvaʼekue, otestifikavaʼekue chehegui.

25 Ha péina ápe, peẽ haʼe profetakuéra raʼy; ha haʼe Israel rogagua; ha haʼe konvéniogua Túva ojapovaʼekue pende rukuéra ndive, heʼívo Abraham-pe: Ne ñemoñarépe ojehovasáta opa yvypegua avaretãnguéra.

26 Túva chemopuʼãgui ajuraẽ hag̃ua peẽme, ha chembou pohovasa hag̃ua opavave peẽme poipeʼávo pende rembiapovaikuéragui; ha péva peẽ haʼégui upe konvénio raʼy—

27 Ha pejehovasa rire upéramo Túva okumplíta upe konvénio ojapovaʼekue Abraham ndive, heʼívo: Ne ñemoñarépe ojehovasáta opa yvypegua avaretãnguéra—oñeñohẽ meve che rupive Espíritu Santo gentil-kuéra ári, ha ko jehovasa gentil-kuérape, omombaretevéta chupekuéra opavavégui, upéicha omosarambíta hikuái che tavayguakuérape, O Israel róga.

28 Ha haʼéta hikuái peteĩ tukumbo ko tetãgua tavayguakuérape. Upevére, oñemog̃uahẽ vove chupekuéra che evanhélio plenitud, ha omohatãramo ikorasõkuéra cherehe ambojeréta hembiapovaikuéra iñakã arikuéra, heʼi upe Túva.

29 Ha chemanduʼáta konvénio ajapovaʼekuére che tavayguakuéra ndive; ha ajapovaʼekue konvénio hendivekuéra ambyatytaha chupekuéra ára oĩ porã vove chéve, ha ameʼẽ jeytaha chupekuéra ijehejapyrerã ituvakuéra retã, haʼéva Jerusalén retã, haʼéva chupekuéra g̃uarã yvy ñeʼẽmeʼẽngue tapiaite peve g̃uarã, heʼi upe Túva.

30 Ha ojehu oúta ára, oñehekomboʼetahápe chupekuéra che evanhélio plenitud.

31 Ha ojeroviáta cherehe hikuái, che haʼeha Jesucristo, Tupã Raʼy, ha Túvape oñemboʼéta hikuái che rérape.

32 Upéramo iñangarekoharakuéra omopuʼãta iñeʼẽ, ha opurahéita oñondivepa; ohechátagui hikuái hesa teépe.

33 Upéramo Túva ombyaty jeýta chupekuéra, ha omeʼẽta Jerusalén ijyvy jehejapyrerã.

34 Upéramo opurahéita hikuái vyʼápe—Pepurahéi oñondivepa, tenda nandikuéra Jerusalén-gua; Túva omoangapyhy haguére itavayguakuérape, haʼe orredimi Jerusalén-pe.

35 Túva omboi ijyva marangatu opa tetã resa renondépe; ha opa yvy opaha peve ohecháta pe Túva salvasiõ; ha Túva ha che haʼe peteĩ.

36 Upéramo oikóta pe ojehaivaʼekue: Epáy, epáy jey, ha eñemonde ne mbaretégui, O Sión; emonde nde aoporãita, O Jerusalén, tavaguasu marangatu, arakaʼeve ndoumoʼãvéimagui ndéve oñemoñandyryʼỹva ni ipotĩʼỹva.

37 Ejeityvyro yvy timbógui; epuʼã, eguapy, O Jerusalén; ejora nde ajúra jokuaha, O Sión membykuña ñeñapytĩmbýva.

38 Péicha heʼígui Ñandejára: Pejehepymeʼẽ mbaʼevére, ha pirapireʼỹre peñerredimíta.

39 Añetehápe, añetehápe, che haʼe peẽme, che tavayguakuéra oikuaataha che réra; heẽ, upe árape oikuaáta hikuái che haʼeha pe añeʼẽva.

40 Ha upéramo heʼíta hikuái: Iporãite piko yvytykuéra ári umi oguerúva chupekuéra marandu porãita pykuéra, pe pyʼaguapýgui omomaradúva; oguerúva marandu rory porãva, omombeʼúva salvasiõgui; heʼíva Sión-pe: nde Tupã orreina!

41 Ha upéramo oñehendúta sapukái: Pejei, pejei, pesẽ upégui, ani pepoko ipotiʼỹvare; pesẽ ijapytégui; penepotĩke peẽ pegueraháva Ñandejára vasokuéra.

42 Napesẽmoʼãi haguére pyaʼe ni kañyháme; Ñandejára ohótagui penerenonderã, ha Israel-gua Tupã haʼéta pende rapykuerigua.

43 Péina ápe, che rembiguái hembiapo rekokuaáta; oñemombaʼeguasúta ha oñemomorãta ha oñemoĩta yvatete.

44 Heta oñemondyiháicha ndehegui—ijaipa niko kuri hova, hetave kuimbaʼégui, ha haʼanga hetave yvyporakuéra raʼýgui.

45 Péicha ohypýita haʼe heta tetãme; henondépe rreikuéra ombotýta ijuru, ohechátagui umi noñemombeʼuivaʼekue chupekuéra; ha ohendútagui pe nohenduseivaʼekue.

46 Añetehápe, añetehápe che haʼe peẽme, opa koʼã mbaʼe añetehápe oikotaha, jepeve Túva heʼi haguéicha chéve. Upéramo oñekumplíta ko konvénio Túva ojapovaʼekue itavayguakuéra ndive; ha upéramo che tavayguakuéra oiko jeýta Jerusalén-pe, ha haʼéta ijyvy jehejapyre.