1 Añetehápe, añetehápe, che haʼe peẽme, aipota pemeʼẽ tupãmbaʼe imboriahúvape; ha katu aníke pemeʼẽse pene tupãmbaʼe yvyporakuéra renondépe pejehechauka hag̃ua; ndaupéichairamo ndapeguerekomoʼãi ni peteĩ jehepymeʼẽ ñande Ru yvágape oĩvagui.

2 Upévare, pejapo vove pene tupãmbaʼe ani pembopu trompéta penerenondépe, ojapoháicha umi hovamokõiva sinagóga ha tapére, oguereko hag̃ua yvyporakuéra verapy. Añetehápe che haʼe peẽme, oguerekóma hikuái ijehepymeʼẽ.

3 Ha katu nde rejapo vove tupãmbaʼe ani oikuaa nde po asu ojapóva nde akatúa;

4 Ne tupãmbaʼe oiko hag̃ua ñemiháme; ha nde Ru ohecháva ñemiháme, ohepymeʼẽta ndéve aty renondépe.

5 Ha nde reñemboʼe jave ani rejapo umi hovamokõivaicha, haʼekuéra oñemboʼeségui ñemboʼyhápe sinagógape ha tape yképe, ojehechauka hag̃ua yvyporakuérape. Añetehápe che haʼe peẽme oguerekomaha hikuái ijehepymeʼẽ.

6 Ha katu nde, reñemboʼe vove, eike nde rógape, ha emboty rire pe okẽ, eñemboʼe nde Ru oĩvape ñemiháme; ha nde Ru, ohecháva ñemiháme, ohepymeʼẽta ndéve aty renondépe.

7 Ha katu eñemboʼévo, ani eiporu ñeʼẽ jey rei, paganokuéra ojapoháicha, haʼekuéra oimoʼãgui iñeʼẽ hetáre oñehendutaha chupekuéra.

8 Upévare ani peẽ haʼekuéraicha, pende Ru oikuaámagui mbaʼépa peikotevẽ pejerure mboyve chupe.

9 Péicha uvei peñemboʼe: Ore Ru yvágape reiméva, toñemomarangatu nde réra.

10 Tojejapo ne rembipota yvýpe yvagapeguáicha.

11 Oreperdona ore rembiapovaikue, ore roperdonaháicha ore rapichápe hembiapovaikuéra.

12 Ani reheja roʼa jeipyʼaraʼãme, ha katu orepeʼa aña poguýgui.

13 Ne mbaʼégui upe rréino, ha puʼaka, ha verapy, tapiaite peve. Amén.

14 Ha, peperdonáramo yvyporakuérape hembiapovaikue peneperdonáta avei pende Ru yvagapegua;

15 Ha katu napeperdonáiramo yvyporakuérape hembiapovaikue, pende Ru noperdonamoʼãi avei peẽme pene rembiapovaikue.

16 Ha avei, peajunáramo ani pejapo umi hovamokõivaicha, hova ñembyasýva, omoambuéva hova ohechauka hag̃ua yvyporakuérape oajunaha hína. Añetehápe che haʼe peẽme, oguerekóma hikuái ijehepymeʼẽ.

17 Ha katu nde, reajuna vove, emoñandyry ne akã, ha ejovahéi;

18 Ani hag̃ua rehechauka yvyporakuérape reajunaha hína, ha katu nde Rúpe, oĩva ñemiháme añónte, ha nde Ru, ohecháva ñemiháme, ohepymeʼẽta ndéve aty renondépe.

19 Ani pembyaty peẽme g̃uarã mbaʼehepy yvy ári, aoraso ha havẽ ombyaihápe, ha mondahakuéra oike ha omondahápe;

20 Ha katu pembyaty mbaʼehepy peẽme g̃uarã yvágape, aoraso ha havẽ ombyaiʼỹhápe, ha mondahakuéra oikeʼỹ ha omondaʼỹhápe.

21 Oĩháme pene mbaʼehepy, upépe oĩtagui avei pene korasõ.

22 Tete resapeha niko haʼe tesa; upévare, nde resa ipotĩramo, opa nde rete henyhẽta tesapégui.

23 Ha katu nde resa ivaíramo, opa nde rete henyhẽta pytũgui. Ha, upéicha, tesape oĩva nde pype iñipytũramo, ndatuichaitemoʼãi piko umi ypytũ!

24 Avave yvypóra ndaikatúi ombaʼapo mokõi karaípe g̃uarã; ndohayhumoʼãigui peteĩme ha katu ohayhúta ambuépe, térã ojáta peteĩre ha ojahéita ambuére. Ndaikatúi peipytyvõ Tupãme ha Mamón-pe.

25 Ha koʼág̃a Jesús oñeʼẽvo koʼã ñeʼẽ omaʼẽ umi doce oiporavovaʼekue gotyo, ha heʼi chupekuéra: Penemanduʼáke ñeʼẽ haʼevaʼekuére. Ha péina ápe, peẽ haʼe umi aiporavovaʼekue oministra hag̃ua koʼã tavayguakuéra apytépe. Upévare che haʼe peẽme, ani pejepyʼapy pende rekovére, mbaʼépa peʼúta, térã mbaʼépa peyʼúta; ni pende rete rehe, mbaʼépa pemondéta. Ndahaʼevéi piko tekove tembiʼúgui, ha tete aógui?

26 Pemaʼẽ guyra yvagapeguáre, noñemitỹiva, ni nomonoʼõiva alfolípe; upevére Pende Ru yvagapegua omongaru chupekuéra. Napeneporãitereivéi piko peẽ chuguikuéra?

27 Máva piko pende apytépe heta ombaʼapóramo jepe ikatúta omoĩve peteĩ kódo ijyvatekuépe?

28 Ha mbaʼére piko pejepyʼapýta aóre? Pemaʼẽ umi lírio ñumeguáre mbaʼéichapa okakuaa; nombaʼapói, ni nombovyvýi hikuái;

29 Ha upevére che haʼe peẽme, Salomón jepeve, opa iverapýpe, noñemondeivaʼekue haʼekuéraicha.

30 Upévare, Tupã omondéramo péicha yvoty ñumegua, ko árape oĩva, ha koʼẽrõ ojeitýva tatakuápe, jepeve upéicha haʼe penemondéta, namichĩriramo pende jerovia.

31 Upévare ani pejepyʼapy, pejévo, Mbaʼépa jaʼúta? térã, Mbaʼépa jayʼúta? térã, mbaʼépa ñamondéta?

32 Pende Ru yvagapegua oikuaágui peikotevẽha opa koʼã mbaʼe.

33 Ha katu peheka raẽve Tupã rréino ha hekojoja, ha opa koʼã mbaʼe oñemeʼẽta peẽme.

34 Upévare ani pejepyʼapy koʼẽrõ g̃uarãre, koʼẽrõ oguerútagui jepyʼapy imbaʼévare. Iporãntema pe ára imbaʼevairã.