1 Ha koʼág̃a ojehu ore kuatiajehaipyrépe heʼiháicha, ha roikuaa añeteguaha, ha péina ápe, peteĩ kuimbaʼe hekojojáva oguerahákuri umi kuatiajehaipyre—añetehápe haʼe ojapókuri heta milágro Jesús rérape; ha ndaipóri ni peteĩ kuimbaʼe ikatúva ojapo milágro Jesús rérape naipotĩmbáiramo iñangaipágui.

2 Ha koʼág̃a ojehu, ko yvypóra ndojavýirirekuri ore ára jeipapápe, ohasáma ary treinta y tres.

3 Ha tavayguakuéra oñepyrũ ohaʼarõ mbarete techaukaha omeʼẽvaʼekue proféta Samuel, upe lamanita, heẽ, ára oĩtahápe pytũ yvy ape ári mbohapy ára pukukue aja.

4 Ha oñepyrũ oĩ joavy tuicha ha ñorairõ tavayguakuéra apytépe, ojehechaukáramo jepékuri hetaite techaukaha.

5 Ha ojehu ary treinta y cuatro-pe, jasy peteĩháme, irundy ára jave, ou peteĩ aravai tuicháva, arakaʼeve ojeikuaaháicha opa upe tetãme.

6 Ha oĩ avei peteĩ yvytu tuicha ha ivaietereíva; ha oĩ arasunu vai, upéicha rupi omboryrýi pe yvy oñembojaʼopataramoguáicha.

7 Ha oĩ aravera omimbipáva, arakaʼeve ndojeikuaaháicha opa upe tetãme.

8 Ha tavaguasu Zarahemla okaipa.

9 Ha tavaguasu Moroni ojahoga yguasu ipypukuvehápe, ha oikóva ipype ojahogapa.

10 Ha oñembyaty yvy tavaguasu Moroníah ári, ha upéicha tavaguasurangue opyta peteĩ yvyty guasu.

11 Ha oĩ peteĩ ñehundi tuicha ha ivaietereíva yvy surguápe.

12 Ha katu péina ápe, oĩ peteĩ ñehundi tuichaitereive ha ivaietereivéva yvy norteguápe; ha péina ápe, opa yvy ape oñemoambue, pe aravai ha torvellíno rupi, ha arasunu ha aravera, ha umi tuichaite yvyryrýi oĩva opa tetãme rupi.

13 Ha ojeka umi tape, ha umi jeguataha oñembyai, ha heta tenda ipereivaʼekue ojoavypa.

14 Ha ojahoga heta tavaguasu tuicha ha hechapyrãva, ha heta okaipa, ha heta oñemomýi hoʼapa peve yvýpe hogaguasukuéra, ha oikóva ipype omano, ha umi tenda oñemonandi.

15 Ha oĩ tavaguasu opytáva; ha katu mbaʼevai ohasáva tuichaiterei, ha heta ipype oikóva omano.

16 Ha oĩ ojegueraháva torvellíno rehe; ha avave ndoikuaái moõpa oho, oikuaánte hikuái ojeguerahahague.

17 Ha péicha oñembyaipa yvy ape, umi aravai, ha arasunu, ha aravera, ha yvyryrýi rupi.

18 Ha péina ápe, itakuéra ojeka; ha oñembojaʼo opa yvy ape ári, ha upéicha rupi oñemopehẽnguepaite, ha otiri ha ojeka, opa upe tetã ape ári.

19 Ha ojehu opávo umi arasunu, ha aravera, ha yvytuvai, ha arapochy, ha yvyryrýi—péina ápe, hiʼare mbohapy aravo rupi—ha oĩ heʼíva ipukuvehague; upevére, opa koʼã mbaʼe tuicha ha ivaietéva oikókuri mbohapy aravo aja rupi—ha péina ápe, upéramo oĩ ypytũ yvy ape ári.

20 Ha ojehu oĩ pytũ iñanambusúva opa yvy ape ári, upéicha rupi umi tekove ndoʼaivaʼekue oikóva upépe ikatu oñandu pe ypytũ timbo;

21 Ha ndaikatúi oĩ tesape, pe pytũ rupi, ni tataindy, ni tesape kangymi, ni ndaikatúi ombojepota tata ijyvyra porã ha ipirúva reheve, ha upéicha ndaikatúi oĩ mbaʼevéichagua tesape;

22 Ha ndojekuaái mbaʼevéichagua tesape, ni tata, ni tesape kangymi, ni kuarahy, ni jasy, ni mbyjakuéra, tuichaitereígui ypytũ timbo oĩva yvy ape ári.

23 Ha ojehu mbohapy ára aja pukukue upéicha ndojehechái ni peteĩ tesape; ha oĩ tuicha jaheʼo ha sapukái ha tasẽ meme opa tavayguakuéra apytépe; heẽ, tuicha tavayguakuéra pyahẽ, pe ypytũ ha ñehundi guasu ouvaʼekuére chupekuéra.

24 Ha peteĩ tendápe oñehendu chupekuéra ojerureʼasy, heʼívo: O ñañearrepentírire ko tuicha ha ivaietéva ára mboyve, upéramo ojesalvavaʼerãmoʼã ñande joykeʼykuéra, ha ndokairivaʼerãmoʼã hikuái pe tavaguasu tuichaite Zarahemla-pe.

25 Ha ambue tendápe oñehendu chupekuéra ojerureʼasy ha ojaheʼo, heʼívo: O ñañearrepentírire ko tuichaite ha ivaietéva ára mboyve, ha ndajajukái ha ndajaʼitaʼapíririre, ha nañamosẽirire okápe profetakuérape; upéicharire ñande sy ha ñande rajy porãnguéra, ha ñane mitãnguéra ojesalvavaʼerãmoʼã, ha noñeñotỹivaʼerãmoʼã tavaguasu tuichaitéva Moroníah-pe. Ha péicha tuicha ha ivaiete tavayguakuéra jaheʼo.