1 Ha koʼág̃a péina ápe, che haʼe peẽme Ñandejára ohecha porã vove, iñarandúpe, og̃uahẽ koʼã mbaʼe gentil-kuérape iñeʼẽme heʼiháicha, upéramo peikuaáta konvénio Túva ojapovaʼekue Israel raʼykuéra ndive, iñemoĩjeykuéra rehegua ijyvy jehejapyrépe, oñepyrũmaha oñekumpli.

2 Ha peikuaáta Ñandejára ñeʼẽ, oñemombeʼuvaʼekue profetakuéra marangatu rupive, oñekumplipataha; ha natekotevẽmoʼãi peje Ñandejára ombopukuha ijeju Israel raʼykuérape.

3 Ha natekotevẽi pejepyʼamongeta pene korasõme reiha umi ñeʼẽ oñeñeʼẽvaʼekue, ha péina ápe, Ñandejára imanduʼáta ikonvénio ojapovaʼekuére itavayguakuéra Israel rogagua ndive.

4 Ha pehecha vove koʼã mbaʼe ojekuaa pende apytépe, upéramo anivéma pembotove Ñandejára rembiapokuéra, ihustísia kysepuku oĩmagui ipo akatúape; ha péina ápe, upe árape, perrechasáramo hembiapokuéra haʼe ojapóta pyaʼe tapenderupyty.

5 Ái pe orrechasávagui Ñandejára rembiapokuéra; heẽ, ái pe onegávagui Cristo ha hembiapokuéra!

6 Heẽ, ái pe onegátava Ñandejára rrevelasiõnguéra, ha pe heʼíva Ñandejára nombaʼapoveimaha rrevelasiõ rupive, térã profesía, térã don, térã ñeʼẽ, térã ñemonguera, térã Espíritu Santo puʼaka rupive!

7 Heẽ, ái upe árape heʼítavagui, ohupyty hag̃ua jehepymeʼẽ, Jesucristo ndaikatuiha ojapo mbaʼevéichagua milágro; péicha heʼíva haʼétagui aña raʼýicha, ndohupytyivaʼekue poriahuvereko, Cristo ñeʼẽme heʼiháicha!

8 Heẽ, ha natekotevẽvéima peñembohory, ni perrechasa judio-kuérape, ni pepuka hesekuéra, ni avave Israel róga rembyreguáre; ha péina ápe, Ñandejára imanduʼa ikonvénio hendivekueraguáre, ha ojapóta hendivekuéra oñeʼẽmeʼẽ haguéicha.

9 Upévare, ani peimoʼã pembojeretaha Ñandejára po akatúagui asúpe, ojapoʼỹ hag̃ua ihuísio okumpli hag̃ua konvénio ojapovaʼekue Israel rógape.