1 Ha koʼág̃a ojehu Jesús omombeʼu rire koʼã mbaʼe omyesakã umíva atyguasúpe; ha omyesakã chupekuéra opa mbaʼe, tuicháva ha michĩva.

2 Ha haʼe heʼi: Koʼã escritura, ndaperekoivaʼekue penendive, Túva heʼi chéve ameʼẽ hag̃ua peẽme; haʼe iñarandúpe heʼi haguére toñemeʼẽ ñemoñareʼatykuéra uperireguápe.

3 Ha omyesakã chupekuéra opa mbaʼe, jepeve iñepyrũmby guive ára haʼe outaha peve iverapýpe—heẽ, jepe opa mbaʼe oikótava yvy ape ári, jepe umi mbaʼe hykupa peve hakuetereígui, ha pe yvy oñemochaʼĩ vove rrólloicha, ha ohasáta yvága ha yvy;

4 Ha jepe ára paha guasu peve, opa tavayguakuéra, ha opa avaretã, ha opa tetãnguéra ha ñeʼẽnguéra oñemboʼy vove Tupã renondépe, ojehusga hag̃ua hembiapokuére, tahaʼe iporãva térã ivaíva—

5 Iporãramo, tekove opaveʼỹva jeikovejeýpe; ha ivaíramo, kondenasiõ jeikovejeýpe; ha upéicha koʼãva oho ojoykére, peteĩva peteĩ henda gotyo ha ambuéva ambue gotyo, poriahuverekóicha, ha hustísia, ha tekomarangatu oĩva Cristo-peguáicha, oĩmava yvóra ñepyrũmby mboyve.

6 Ha koʼág̃a, ndaikatúi ojehai ko kuatiañeʼẽme ni centésimo pehẽngue umi mbaʼe Jesús añetehápe omboʼevaʼekue tavayguakuérape;

7 Ha katu péina ápe Nefi planchakuéra oguereko hetave umi mbaʼe haʼe omboʼevaʼekue tavayguakuérape.

8 Ha ahaíkuri koʼã mbaʼe, saʼivéva umi mbaʼe omboʼevaʼekue tavayguakuérape; ha ahaíkuri og̃uahẽ jey hag̃ua ko tavayguakuérape, gentil-kuéragui, Jesús heʼi haguéicha.

9 Ha oñemog̃uahẽ vove chupekuéra koʼã mbaʼe, tekotevẽva oguereko raẽ hikuái, ohechauka hag̃ua ijerovia, ha ogueroviáramo hikuái koʼã mbaʼe upéicharamo ojehechaukáta chupekuéra mbaʼe tuichavéva.

10 Ha ndogueroviáiramo hikuái koʼã mbaʼe, upéicharamo noñemeʼẽmoʼãi chupekuéra mbaʼe tuichavéva, ikondenasiõrãkuéra.

11 Péina ápe, haimetémakuri ahai, opa ojehaivaʼekue Nefi planchakuéra ári, ha katu Ñandejára ombotove, heʼívo: Che aipyʼaraʼãta che tavayguakuéra jerovia.

12 Upévare che, Mormón, ahai umi mbaʼe Ñandejára heʼivaʼekue chéve. Ha koʼág̃a che, Mormón, ambopaha che ñeʼẽ, ha añemoĩ ahai umi mbaʼe ojeʼevaʼekue chéve.

13 Upévare, che aipota peikuaaporã Ñandejára añetehápe omboʼehague tavayguakuérape, mbohapy ára aja; ha upéva rire haʼe pyʼỹi ojehechauka chupekuéra ha ombojaʼo mbujape, ha ohovasa, ha omeʼẽ chupekuéra.

14 Ha ojehu omboʼe ha oministra mitãnguérape pe atyguasugua oñeñeʼẽ haguégui, ha haʼe ojora ikũnguéra, ha heʼi hikuái mbaʼe tuicha ha hechapyrãva ituvakuérape, jepe mbaʼe tuichavéva haʼe ohechaukavaʼekuégui tavayguakuérape; ha ojora ikũnguéra ikatu hag̃uáicha oñeʼẽ hikuái.

15 Ha ojehu ojupi rire yvágape—mokõiha jey ojehechauka rire chupekuéra, ha ohojey Túvape, omonguera rire opa hasýva, ha ikarẽvape, ha oipeʼa rire ohechaʼỹva resa ha oipeʼa rire ohenduʼỹva apysa, ha jepe ojapókuri ñemonguera opáichagua ijapytepekuéra, ha omopuʼã peteĩ kuimbaʼépe omanóva apytégui, ha ohechauka chupekuéra ipuʼaka, ha ojupi Túva rendápe—

16 Péina ápe, upe koʼẽme oñembyaty atyguasukuéra, ha ohecha ha ohendu hikuái koʼã mitãme; heẽ, umi michĩvéva jepe ojejurupeʼa ha oñeʼẽ mbaʼe hechapyrãva; ha umi mbaʼe heʼivaʼekue hikuái oñembotove ani hag̃ua avave kuimbaʼe ohai.

17 Ha ojehu temimboʼekuéra Jesús oiporavovaʼekue oñepyrũ upe guive omongarai ha omboʼe opavave oúvape hendapekuéra; ha opavave oñemongaraíva Jesús rérape henyhẽ Espíritu Santo-gui.

18 Ha heta ijapytepekuérava ohecha ha ohendu mbaʼe ikatuʼỹva jaʼe, ha ndojehaírivaʼerã.

19 Ha oñomboʼe, ha oñoministra hikuái peteĩva ambuépe; ha oguereko hikuái míngape opa mbaʼe, mayma kuimbaʼe oñemboheko hustísiape, peteĩva ambue ndive.

20 Ha ojehu ojapo hikuái opa mbaʼe Jesús heʼi hagueichaite chupekuéra.

21 Ha umi oñemongaraivaʼekue Jesús rérape oñehenói Cristo tupao.