1 Ha koʼág̃a péina ápe, ndaipóri oikovéva opa nefita tavayguakuéra apytépe odudáva ni michĩmi opa ñeʼẽ heʼivaʼekue profetakuéra marangatu; oikuaágui hikuái tekotevẽha oñekumpli.

2 Ha oikuaa hikuái tekotevẽha Cristo oúkuri, hetaite techaukaha oñemeʼẽvaʼekuére, profetakuéra oñeʼẽ haguéicha; ha umi mbaʼe oikomavaʼekue rupi opavave oikuaa tekotevẽha oñekumpli opa mbaʼe oñeñeʼẽ haguéicha.

3 Upévare oheja hikuái opa iñangaipakuéra, ha hembiapokyʼakuéra, ha hembiapovaikuéra, ha oipytyvõ hikuái Tupãme jesarekópe ára ha pyhare.

4 Ha koʼág̃a ojehu ojagarra rire hikuái opavave mondahakuérape prisionéroramo, upéicha rupi nokañýi ni peteĩ umi omanoʼỹva, omboty hikuái kaʼirãime iprisionerokuérape, ha omboʼeuka hikuái chupekuéra Tupã ñeʼẽ; ha opavave oñearrepentívape iñangaipágui ha ojapóva konvénio ndoporojukamoʼãveimaha oñemosãso.

5 Ha katu opavave ndojapóiva konvénio, ha ojapove umi jejuka ñemi ikorasõme, heẽ, opa ojejuhúva oñeʼẽpohýi hína ijoykeʼýpe oñekondena ha ojehavira léipe heʼiháicha.

6 Ha péicha ombopahákuri hikuái umi ñaña, ñemi, ha ijejaʼeʼỹva ñembojoaju, ojeiporuvaʼekue ojejapo hag̃ua hetaite tembiapoñaña, ha hetaite jejuka.

7 Ha upéicha opákuri ary veintidos, ha ary veintitres avei, ha veinticuatro, ha veinticinco; ha péicha ohasákuri veinticinco ary.

8 Ha heta mbaʼe oikókuri, oĩva tesa ohecháva tuicha ha imbaʼeguasúvaicha; upevére, ndaikatúi ojehaipa ko kuatiañeʼẽme; heẽ, ko kuatiañeʼẽ ndaikatúi oguereko ni sentésimo pehẽngue ojejapovaʼekue hetaite tavayguakuéra apytépe veinticinco ary pukukue aja;

9 Ha katu péina ápe oĩ kuatiajehaipyre oguerekóva opa ko tavayguakuéra rembiapo; ha Nefi ojapókuri peteĩ ñemombeʼu mbykyvéva ha katu añeteguáva.

10 Upévare che ahaíkuri che kuatiajehaipyre koʼã mbaʼégui Nefi kuatiajehaipyrépe oĩháicha, ojehaivaʼekue pláncha ári hérava Nefi pláncha.

11 Ha péina ápe, che ahai kuatiajehaipyre pláncha ajapovaʼekue che pópe ári.

12 Ha péina ápe, che réra Mormón, añehenóiva upéicha tetã Mormón rupi, tetã Alma omopuʼã haguépe pe tupao tavayguakuéra apytépe, heẽ, peteĩha tupao oñemopuʼãvaʼekue ijapytepekuéra hembiapovai rire hikuái.

13 Péina ápe, che haʼe Cristo remimboʼe, pe Tupã Raʼy. Haʼe cherenói amombeʼu hag̃ua iñeʼẽ itavayguakuéra apytépe, oguereko hag̃ua hikuái tekove opaveʼỹva.

14 Ha tekotevẽkuri che, Tupã rembipotáicha, umi omanomavaʼekue ñemboʼe, imarangatuvaʼekue, oñekumpli hag̃ua ojeroviaháicha hikuái, ajapo peteĩ kuatiajehaipyre koʼã mbaʼe oikovaʼekuégui—

15 Heẽ, peteĩ kuatiajehaipyre mbykymi oikovaʼekuégui ára Lehi osẽramoguare guive Jerusalén-gui, jepe ko ára peve.

16 Upévare che ajapo che kuatiajehaipyre umi ñemombeʼu ohaivaʼekue che mboyveguarégui, oñepyrũ meve che ára;

17 Ha upéi ajapo peteĩ kuatiajehaipyre umi mbaʼe che ahechavaʼekuégui che resápe.

18 Ha che aikuaa kuatiajehaipyre ajapóva ijoja ha añeteguaha; upevére oĩ heta mbaʼe, ore ñeʼẽme, ndaikatúiva rohai.

19 Ha koʼág̃a ambopaha che ñeʼẽ, chereheguáva, ha ameʼẽ che ñemombeʼu mbaʼe oikovaʼekuégui che mboyve.

20 Che haʼe Mormón, ha haʼe Lehi ñemoñare añete. Aguereko mbaʼérepa ahovasávo che Tupã ha che Salvador Jesucristo, oguenohẽgui ñande rukuérape Jerusalén retãgui, (ha avave ndoikuaaivaʼekue ndahaʼéiramo haʼe ha umi oguenohẽvaʼekue upe tetãgui) ha omeʼẽ haguére chéve ha che tavayguakuérape hetaite jeikuaapy ñane ánga salvasiõrã.

21 Añetehápe haʼe ohovasákuri Jacob róga, ha iporiahuverekókuri José ñemoñare ndive.

22 Ha upéicha rupi Lehi raʼykuéra iñeʼẽrenduháicha hembiapoukapykuérare haʼe ohovasavaʼekue chupekuéra ha omoakãrapuʼã iñeʼẽme heʼiháicha.

23 Heẽ, ha añetehápe haʼe ogueru jeýta José ñemoñare rembyrépe Ñandejára Itupã jeikuaápe.

24 Ha añetehápe oikoveháicha Ñandejára, ombyatýta irundy tetã pehẽnguégui opavave Jacob ñemoñare rembyrépe, oñemosarambíva opa yvy ape ári.

25 Ha ojapo haguéicha konvénio opa Jacob róga ndive, upéicha upe konvénio ojapovaʼekue Jacob róga ndive oñekumplíta hiʼárape, oñemoĩjey hag̃ua jeikuaápe opa Jacob rógape upe konvénio haʼe ojapovaʼekuégui hendivekuéra.

26 Ha upéramo oikuaáta hikuái Irredentórpe, haʼéva Jesucristo, Tupã Raʼy; ha upéramo oñembyatýta chupekuéra irundy tetã pehẽnguégui hetãme, oñemosarambi haguégui; heẽ, oikoveháicha Ñandejára upéicha oikóta. Amén.