1 Ha ojehu oñehendu peteĩ ñeʼẽ opa umi oikóva apytépe upe tetãme, opa ko yvy ape ári, ojerureʼasývo:

2 Ái, ái, ái ko tavayguakuéragui; ái umi oikóvagui opa tetãme noñearrepentíriramo; aña opuka haguére ha hiʼangelkuéra ovyʼágui, che tavayguakuéra raʼy ha rajy porã porã ñemano rupi; ha hembiapovai ha hembiapokyʼa haguére hoʼavaʼekue hikuái.

3 Péina ápe, che ahapy tatápe Zarahemla tavaguasu tuicha ha umi ipype oikóvape.

4 Ha péina ápe, upe Moroni tavaguasu tuicha che amoñapymi yguasu pypukúpe, ha ambojahoga umi ipype oikóvape.

5 Ha péina ápe, ajahoʼi yvýpe pe Moroníah tavaguasu tuicha, ha umi ipype oikóvape, añomi hag̃ua hembiapovai ha hembiapokyʼakuéra che renondégui, profetakuéra ha imarangatuvakuéra ruguy anive hag̃ua ojupi chéve hesekuéra.

6 Ha péina ápe, che ajapo toñapymi yvyguýpe Gilgal tavaguasu, ha umi ipype oikóva toñeñotỹ yvyguy pypukúpe.

7 Heẽ, ha tavaguasu Oníah ha umi ipype oikóva, ha tavaguasu Mocum ha umi ipype oikóva, ha tavaguasu Jerusalén ha ipype oikóva, che ajapo ykuéra toñemoĩkuri hendaguepekuéra, añomi hag̃ua hembiapoñaña ha hembiapokyʼakuéra che renondégui, profetakuéra ha imarangatuvakuéra ruguy anive hag̃ua ojupi chéve hesekuéra.

8 Ha péina ápe, Gadiandi tavaguasu, ha Gadiaomna tavaguasu, ha Jacob tavaguasu, ha tavaguasu Gimgimno, opa koʼãva che ajapókuri toñapymi, ha ajapo yvy tyʼã ha yvytypaʼũ hendaguépe; ha añotỹ umi ipype oikóvape yvyguy pypukúpe, añomi hag̃ua hembiapoñaña ha hembiapokyʼakuéra che renondégui, profetakuéra ha imarangatuvakuéra ruguy anivéma hag̃ua ojupi chéve hesekuéra.

9 Ha péina ápe, upe Jecobugat tavaguasu tuicha, oiko haguépe rréi Jacob tavayguakuéra, che ahapykákuri tatápe iñangaipa ha hembiapoñaña haguére, ohasáva opa tembiapoñaña tetãmeguápe, ijejuka ñemi ha imbaʼevai ñeminguéra rupi; haʼekuéra ohundígui che tavayguakuéra pyʼaguapy ha upe tetã ñeisãmbyhy; upévare ahapyuka chupekuéra, ahundi hag̃ua chupekuéra che renondégui, profetakuéra ha imarangatuvakuéra ruguy anivéma hag̃ua ojupi chéve hesekuéra.

10 Ha péina ápe, Lamán tavaguasu, ha Josh tavaguasu, ha Gad tavaguasu, ha Kishkumen tavaguasu, che ahapyuka tatápe, ha umi ipype oikóvape, hembiapoñañágui omosẽvo profetakuérape okápe ha oitaʼapi umi che amondovaʼekuépe heʼi hag̃ua chupekuéra hembiapoñaña ha hembiapokyʼakuéragui.

11 Ha omosẽ haguére hikuái maymávape, upéicha ndaipóri hekojojáva ijapytepekuéra, che amondo tata ha ahundi chupekuéra, hembiapoñaña ha hembiapokyʼakuéra oñeñomi hag̃ua che renondégui, profetakuéra ha imarangatuvakuéra ruguy che amondovaʼekue ijapytepekuéra ani hag̃ua ojerure chéve yvyguy guive hesekuéra.

12 Ha che ajapo ou hag̃ua ñehundi tuicha ko tetã ári, ha ko tavayguakuéra ári, hembiapoñaña ha hembiapokyʼakuéra rupi.

13 O opavave peẽ peñeñongatuvaʼekue penderekojojavégui chuguikuéra, ndapejeremoʼãi piko koʼág̃a cherendápe, ha napeñearrepentimoʼãi piko pene angaipágui, ha napeñekonvertimoʼãi piko che pomonguera hag̃ua?

14 Heẽ, añetehápe haʼe peẽme, pejúramo che rendápe peguerekóta tekove opaveʼỹva. Péina ápe, che jyva poriahuvereko ojeipyso peẽme, ha opavave oúvape, che amog̃uahẽta; ha ojehovasapyre umi oúva che rendápe.

15 Péina ápe, che haʼe Jesucristo Tupã Raʼy. Che ajapovaʼekue yvága ha yvy, ha opa mbaʼe ipype oĩva. Che aimevaʼekue Túva ndive iñepyrũmby guive. Che haʼe pe Túvape, ha pe Túva chepype, ha che rupi pe Túva omboverapýkuri héra.

16 Che aju chembaʼéva rendápe, ha chembaʼéva nachemog̃uahẽi. Ha escritura-kuéra che jeju rehegua oñekumplíma.

17 Ha maymáva chemog̃uahẽvape, ameʼẽkuri chupekuéra tahaʼe Tupã Raʼy; ha jepe upéicha che ajapóta opa ogueroviávape che réra, ha péina ápe, che rredensiõ oúma, ha chepype Moisés léi oñekumplíma.

18 Che haʼe yvóra resape ha rekove. Che haʼe pe Alfa ha Oméga, iñepyrũmby ha ipaha.

19 Ha peẽ napeikuaveʼẽmoʼãvéima chéve tuguy ñeñohẽ; heẽ, pende mymbajuka ha pende mymbajehapy opátama, namoporãmoʼãigui ni peteĩ pende mymbajuka ni pene mymbajehapykuéra.

20 Ha peikuaveʼẽta chéve ñeikuaveʼẽramo peteĩ korasõ mirĩ ha peteĩ espíritu ñembyasy. Ha oúva cherendápe peteĩ korasõ mirĩ ha espíritu ñembyasy reheve, che amongaraíta chupe tata ha Espíritu Santo-pe, jepe lamanita-kuéraicha, ijerovia rupi che rehe ára oñekonvertiramoguare, oñemongaraivaʼekue avei tata ha Espíritu Santo-pe, ha ndoikuaáikuri hikuái.

21 Péina ápe, che ajúkuri yvórape agueru hag̃ua rredensiõ yvórape, asalva hag̃ua yvórape angaipágui.

22 Upévare, oñearrepentíva ha oúvape cherendápe peteĩ mitã michĩcha, che amog̃uahẽta, umichaguávagui haʼe Tupã rréino. Péina ápe, koʼãvare che ameʼẽvaʼekue che rekove, ha ajagarrajey; upévare peñearrepenti, ha peju chéve peẽ yvy apýra, ha pejesalva.