1 Ha koʼág̃a, oĩ heta ohendúva Samuel, upe lamanítape, oñeʼẽvaʼekue tavaguasu tápia guive. Ha opavave ogueroviáva iñeʼẽ oho ha oheka Nefi-pe; ha oho ha ojuhu rire hikuái chupe okonfesa iñangaipakuéra ha nonegái, oñemongaraisévo Ñandejárape.

2 Ha katu opavave ndogueroviáiva Samuel ñeʼẽ ipochy hendive; ha omombo hese ita upe tápia ári, ha avei heta ohaʼã chupe huʼy reheve oĩ aja tápia ári; ha katu Ñandejára Espíritu oĩkuri hendive, upévare ndaikatúi ojapi hikuái chupe ijita ni ihuʼykuérape.

3 Koʼág̃a ohechávo hikuái ndaikatuiha ojapi chupe, oĩ hetaitereive ogueroviáva iñeʼẽ, upéicha rupi oho Nefi-pe oñemongarai hag̃ua.

4 Ha péina ápe, Nefi oporomongarai, ha oprofetisa, ha oporomboʼe, ojerurévo arrepentimiénto umi tavayguakuérape, ohechaukávo techaukaha ha mbaʼeguasukuéra, ha ojapóvo milágro tavayguakuéra apytépe, oikuaa hag̃ua hikuái pe Cristo outamaha—

5 Oñeʼẽvo chupekuéra mbaʼe oikopotáva rehe, oikuaa ha imanduʼa hag̃ua hikuái ára oiko vove koʼãva oikuaaukahague chupekuéra upe mboyve, oñehaʼãvo oguerovia hag̃ua hikuái; upévare opavave ogueroviáva Samuel ñeʼẽ oho Nefi rendápe oñemongarai hag̃ua, og̃uahẽgui hikuái arrepentimiéntope ha okonfesa iñangaipakuéra.

6 Ha katu hetave ijapytepekuéra ndogueroviái Samuel ñeʼẽ; upévare ohechávo ndaikatuiha ojapi chupe ijita ni ihuʼykuérape, osapukái imburuvichakuérape, heʼívo: Pejagarra ha pejokua chupe, péina ápe oĩgui ipype aña; ha pe aña oĩva ipype puʼaka rupi ndaikatúi rojapi chupe ore ita ni ore huʼykuérape; upévare pejagarra ha pejokua chupe, ha pegueraha.

7 Ha ohóvo hikuái omoĩ hag̃ua hese ipo, péina ápe, ojeity upe tápiagui, ha okañy hetãguikuéra, heẽ, jepe hetã meve, ha oñepyrũ omboʼe ha oprofetisa itavayguakuéra apytépe.

8 Ha péina ápe, arakaʼeve noñehenduvéiva chugui mbaʼeve nefita-kuéra apytépe; ha upéicha oĩkuri tavayguakuéra ñeime.

9 Ha péicha opákuri ary ochenta y seis huekuéra ñeisãmbyhy Nefi tavayguakuéra ári.

10 Ha péicha opákuri avei ary ochenta y siete huekuéra ñeisãmbyhy, opytávo hetave tavayguakuéra ijorgúllo ha hembiapoñañáme, ha tenda mbovyvéva oguatávo jesarekovépe Tupã renondépe.

11 Ha péicha oñeimékuri avei, ary ochenta y ocho huekuéra ñeisambyhýpe.

12 Ha oĩkuri mbovy ñemoambue tavayguakuéra ñeimépe, ndahaʼéiramo tavayguakuéra oñepyrũ hatãve tembiapovaípe, ha ojapo japove umi oñemoĩva Tupã rembiapoukapykuérare, ary ochenta y nueve huekuéra ñeisambyhýpe.

13 Ha katu ojehu ary ochenta y nueve huekuéra ñeisambyhýpe, ojehechauka tavayguakuérape heta techaukaha, ha mbaʼeguasukuéra; ha oñepyrũ oñekumpli profetakuéra ñeʼẽ.

14 Ha ojehechauka angelkuéra yvyporakuérape, yvyporakuéra iñarandúvape, ha heʼi chupekuéra mbaʼe porã pyahu; upéicha ko arýpe oñepyrũ oñekumplipa umi escritura.

15 Upevére, tavayguakuéra oñepyrũ omohatã ikorasõ, maymáva ndahaʼéiriramo umi ojeroviavéva ijapytepekuéra, nefita-kuéra ha lamanita-kuéra apytépe, ha oñepyrũ ojerovia hikuái imbarete ha iñarandu rehe, heʼívo:

16 Oĩkuri mbaʼe ikatúva ojaserta hikuái, heta mbaʼe apytégui; ha katu péina ápe, roikuaa koʼã tembiapo tuicha ha hechapyrãva oñeñeʼẽhague ndaikatuiha oiko.

17 Ha oñepyrũ ojepyʼamongeta hikuái ha ojoavy oñondivekuéra, heʼívo:

18 Naiñarandúi niko outaha peteĩ tekove Cristo-ichagua; upéicharamo, ha haʼéramo Tupã raʼy, yvága ha yvy Túva, ojeʼe haguéicha, mbaʼére piko ndojehechaukamoʼãi ñandéve umi oĩva Jerusalén-peicha?

19 Heẽ, mbaʼére piko ndojehechaukamoʼãi ko tetãme Jerusalén retãmeicha?

20 Ha katu péina ápe, ore roikuaa péva haʼeha peteĩ jepokuaa ñaña, ohejavaʼekue oréve ore rukuéra, ogueroviauka hag̃ua oréve peteĩ mbaʼe tuicha ha hechapyrãva oikótava, ha katu ndahaʼéi ore apytépe, ha katu peteĩ tetã mombyry oĩvape, tetã ndoroikuaáiva; upévare ikatu oreguereko hikuái jeikuaaʼỹme, ndaikatúigui rohecha ore resápe añeteguaha.

21 Ha haʼekuéra, japu rupi ha aña katupyry mbaʼeñemimby rupi, ojapóta tuicha mbaʼeñemimby ore ndaikatúiva roikũmby, ha péva orejokóta haʼe hag̃ua iñeʼẽnguéra rembiguái, ha hembiguaikuéra avei, roñesaingógui hesekuéra oremboʼe hag̃ua hikuái upe ñeʼẽ; ha péicha oreguerekóta hikuái jeikuaaʼỹme opa ára roikove aja roñemoĩramo ipoguypekuéra.

22 Ha hetave mbaʼe tavayguakuéra oñandu ikorasõme, mbaʼerei ha vyrorei; ha oĩ hikuái korasõpererépe, Satana omokyreʼỹ memégui chupekuéra ojapo hag̃ua tembiapovai; heẽ, oiko oñotỹvo ñeʼẽ japu ha joavy opa yvy ape ári, omohatã hag̃ua tavayguakuéra korasõ umi mbaʼe iporãva ha umi oútava rehe.

23 Ha jepeve umi techaukaha, ha mbaʼeguasu ojejapóva Ñandejára tavayguakuéra apytépe, ha heta milágro ojapóva hikuái, Satana ohupyty tuicha puʼaka tavayguakuéra korasõ ári opa pe yvy ape ári.

24 Ha péicha opákuri ary noventa huekuéra ñeisãmbyhy Nefi tavayguakuéra ári.

25 Ha péicha opákuri Helamán kuatiañeʼẽ, Helamán ha itaʼyrakuéra kuatiajehaipyrépe oĩháicha.