1 Ha ojehu kóva ko arýpe, péina ápe, Nefi omeʼẽ huekuéra apyka peteĩ kuimbaʼe hérava Cezóram-pe.

2 Tavayguakuéra ñeʼẽ omoĩgui iléi ha hetã ñeisãmbyhykuéra, umi oiporavovaʼekue ivaíva hetave umi oiporavovaʼekue iporãvagui, upévare hiʼajúmakuri hína hikuái ñehundirã, umi leikuéra oñembyaígui.

3 Heẽ, ha ndahaʼéi upévante; haʼékuri hikuái tavayguakuéra ipyʼahatãva, upéicha rupi ndaikatúikuri oñeisãmbyhy chupekuéra pe léi ni pe hustísia rehe, ndahaʼéiramo iñehundirãkuéra.

4 Ha ojehu Nefi ikaneʼõma hembiapovaígui hikuái; ha oheja huekuéra apyka, ha oñemoĩ omboʼe Tupã ñeʼẽ opa hiʼára rembyre, ha avei ijoykeʼy Lehi, opa hiʼára rembyre;

5 Imanduʼágui hikuái ñeʼẽ itúva Helamán oñeʼẽvaʼekue chupekuéra. Ha koʼãva haʼe ñeʼẽ haʼe heʼivaʼekue chupekuéra:

6 Péina ápe, che raʼykuéra, che aipota penemanduʼa peneñeʼẽrendu hag̃ua Tupã rembiapoukapykuérare; ha che aipota peje koʼã ñeʼẽ tavayguakuérape. Péina ápe, che ameʼẽkuri peẽme ñande rukuéra peteĩha osẽvaʼekue Jerusalén retãgui réra; ha ajapókuri upéva penemanduʼávo pende rérare penemanduʼa hag̃ua hesekuéra; ha penemanduʼávo hesekuéra penemanduʼa hag̃ua hembiapokuérare; ha penemanduʼávo hembiapokuérare peikuaa hag̃ua mbaʼérepa ojeʼe, ha avei ojehai, hekojojahague hikuái.

7 Upévare, che raʼykuéra, che aipota pejapo pe iporãva, ojeʼe hag̃ua, ha avei ojehai hag̃ua, jepe ojeʼe ha ojehai haguéicha hesekuéra.

8 Ha koʼág̃a che raʼykuéra, péina ápe oĩve peteĩ mbaʼe che aipotáva pendehegui, ha péva haʼe ani hag̃ua pejapo koʼã mbaʼe peñemombaʼeguasu hag̃ua, ha katu pejapovaʼerã koʼã mbaʼe pejapo hag̃ua peẽme g̃uarã peteĩ mbaʼerepy yvágape, heẽ, opaveʼỹva, ha ndopareíriva; heẽ, peguereko hag̃ua pe don porãite haʼéva tekove opaveʼỹva, ore roimoʼãháicha oñemeʼẽhague ñande rukuérape.

9 O penemanduʼáke, penemanduʼáke, che raʼykuéra, rréi Benjamín ñeʼẽ heʼivaʼekue itavayguakuérape; heẽ, penemanduʼáke ndaiporiha mbaʼéicha ni mbaʼerehehápe yvypóra ikatuha ojesalva, ndahaʼéiramo Jesucristo ruguy expiatório rupivémante, pe oútava; heẽ, penemanduʼáke haʼe ouha orredimi hag̃ua yvórape.

10 Ha penemanduʼa avei ñeʼẽ Amulek oñeʼẽvaʼekue Zeezrom-pe tavaguasu Ammoníah-pe; heʼíguikuri chupe añetehápe Ñandejára outaha orredimi hag̃ua itavayguakuérape, ha katu ndoumoʼãiha orredimi hag̃ua chupekuéra iñangaipápe, ha katu orredimi hag̃ua chupekuéra iñangaipágui.

11 Ha oñemeʼẽkuri chupe puʼaka oñemeʼẽvaʼekue chupe Itúvare orredimi hag̃ua yvyporakuérape iñangaipágui upe arrepentimiénto rupi; upévare haʼe omboúkuri hiʼangelkuérape omombeʼu hag̃ua umi mbaʼe pyahu oñeikotevẽva arrepentimientorã, ha péva oporogueraha upe Rredentor puʼakápe, hiʼangakuéra salvasiõrã.

12 Ha koʼág̃a, che raʼykuéra, penemanduʼáke, penemanduʼáke pene Rredentor ita ári, haʼéva Cristo, Tupã Raʼy, pemoĩvaʼerãha pene pyenda; upéicha pe aña omondo vove ijyvytu vai, heẽ, hakuáva yvytujerépe, heẽ, opa iñamandáu ha hiʼarapochy vai pendehavira vove, upéva ani oguereko puʼaka pendegueraha hag̃ua yvykua tekoʼasy ha jehasaʼasy opaveʼỹvape, pe ita peñemopuʼãhague ári rupi, haʼéva peteĩ pyenda atã, peteĩ pyenda yvyporakuéra omopuʼãramo hiʼári, ndoʼamoʼãi.

13 Ha ojehu koʼãva haʼékuri ñeʼẽ Helamán omboʼevaʼekue itaʼyrakuérape; heẽ, omboʼékuri chupekuéra heta mbaʼe ndojehaíriva, ha avei heta mbaʼe ojehaivaʼekue.

14 Ha imanduʼákuri hikuái iñeʼẽre; ha upévare iñeʼẽrendúvo Tupã rembiapoukapykuérare, osẽkuri omboʼe hikuái Tupã ñeʼẽ opa Nefi tavayguakuéra apytépe, oñepyrũvo hikuái tetã Abundancia-gui;

15 Ha upégui ohókuri hikuái Gid tavaguasúpe; ha Gid tavaguasúgui Mulek tavaguasúpe;

16 Ha jepe peteĩgui ambue tavaguasúpe, oho peve hikuái opa Nefi tavayguakuéra apytépe oĩva yvy surguápe; ha upégui oho hikuái Zarahemla retãme, lamanita-kuéra apytépe.

17 Ha ojehu omboʼe hikuái tuicha puʼaka reheve, upéicha rupi omoapañuãi hikuái heta umi osẽvaʼekuépe nefita-kuéragui, jepe oñemotenonde peve hikuái ha okonfesa iñangaipakuéra ha oñemongarai arrepentimientorã, ha pyaʼe ohojey hikuái nefita-kuéra rendápe oñehaʼã hag̃ua omoĩporã umi mbaʼevai ojapovaʼekue hikuái hesekuéra.

18 Ha ojehu Nefi ha Lehi omboʼe lamanita-kuérape tuichaite puʼaka ha autorida reheve, oñemeʼẽguikuri chupekuéra puʼaka ha autorida oñeʼẽ hag̃ua, ha avei ojeʼékuri chupekuéra pe oñeʼẽvaʼerã—

19 Upévare oñeʼẽkuri hikuái lamanita-kuéra tuicha ñemondyirã, okonvense peve hikuái chupekuéra, upéicha rupi ocho mil lamanita-kuéra oĩvaʼekue Zarahemla retãme oñemongarai arrepentimientorã, ha oñekonvense hikuái ituvakuéra jepokuaa iñañaha.

20 Ha ojehu Nefi ha Lehi osẽ upégui oho hag̃ua Nefi retãme.

21 Ha ojehu ojagarra chupekuéra peteĩ lamanita-kuéra ehérsito ha oity chupekuéra kaʼirãime; heẽ, jepe pe kaʼirãi Ammón ha ijoykeʼykuéra ojeity haguépe Limhi rembiguaikuérare.

22 Ha oĩ rire hikuái kaʼirãime heta ára aja tembiʼuʼỹre, péina ápe, haʼekuéra og̃uahẽ upe kaʼirãime oguenohẽ ha ojuka hag̃ua chupekuéra.

23 Ha ojehu Nefi ha Lehi oñemongora tatareramoguáicha, jepe upéicha rupi noñanimái hikuái opoko hesekuéra okyhyjégui okáiramo g̃uarã. Upevére, Nefi ha Lehi ndokáiri; ha oĩkuri hikuái pe tata mbytépe ha ndokáiri hikuái.

24 Ha ohechávo hikuái omongoraha chupekuéra peteĩ pilar tataguigua, ha ndohapyiha chupekuéra, ikorasõkuéra oñemombarete.

25 Ohechágui hikuái lamanita-kuéra noñanimaiha omoĩvo ipo hiʼarikuéra; ni noñanimái oñemoag̃uívo hikuái hesekuéra, ha katu opyta hikuái iñeʼẽngúvaicha oñemondýigui.

26 Ha ojehu Nefi ha Lehi oñemboʼy ha oñepyrũ oñeʼẽ chupekuéra, heʼívo: Ani pekyhyje, ha katu péina ápe, haʼégui Tupã ohechaukáva peẽme koʼã mbaʼe hechapyrãva, péva rupi haʼe ohechaukákuri peẽme ndaikatuiha pemoĩ pende po orerehe orejuka hag̃ua.

27 Ha péina ápe, haʼekuéra heʼívo koʼã ñeʼẽ, pe yvy tuicha oryrýi, ha pe kaʼirãi tapiakuéra omỹi hoʼatarõguáicha pe yvýpe; ha katu péina ápe, ndoʼái. Ha péina ápe, umi oĩva hína kaʼirãime haʼe lamanita ha nefita-kuéra osẽvaʼekue.

28 Ha ojehu oñuã chupekuéra peteĩ arai ypytũ, ha ojagarra chupekuéra peteĩ kyhyje vaiete ha oporomondyietereíva.

29 Ha ojehu ou peteĩ ñeʼẽ oúvaicha pe arai ypytũ árigui, heʼívo: Peñearrepentíke, peñearrepentíke, ha anive peñehaʼã pehundi che rembiguaikuérape che ambouvaʼekue omombeʼu hag̃ua peẽme marandu porã.

30 Ha ojehu ohendúvo hikuái ko ñeʼẽ, ha ohechávo hikuái ndahaʼeiha pe arai ñeʼẽ, ni peteĩ tyapuvai ñeʼẽ, ha katu péina ápe, haʼékuri peteĩ ñeʼẽguapy mbeguemi rupive, haʼeramoguáicha ñeʼẽvy, ha oikéva ñane ánga peve jepe—

31 Ha jepe pe ñeʼẽ mbeguemi, péina ápe pe yvy tuicha oryrýikuri, ha oñemomýi jey pe kaʼirãi tapiakuéra, hoʼataramoguáicha yvýpe; ha péina ápe pe arai ypytũ, oñuãvaʼekue chupekuéra, ndojeíri—

32 Ha péina ápe ou jey pe ñeʼẽ, heʼívo: Peñearrepentíke, peñearrepentíke, yvagakuéra rréino hiʼag̃uímagui; ha anive peñehaʼã pehundi che rembiguaikuérape. Ha ojehu pe yvy oryrýi jey, ha umi tápia oñemomyimba.

33 Ha avei ou jey pe ñeʼẽ mbohapyha jey, ha oñeʼẽ chupekuéra ñeʼẽ hechapyrãva yvypóra ndaikatúiva heʼi; ha umi tápia oñemomýi jey, ha pe yvy okuʼe oñembojaʼotaramoguáicha.

34 Ha ojehu lamanita-kuéra ndaikatúi oñani pe arai ypytũ oñuãva chupekuéra rupi; heẽ, ha avei ndaikatúi oñemonguʼe hikuái pe kyhyje oúva rupi chupekuéra.

35 Koʼág̃a oĩkuri ijapytepekuéra peteĩ haʼéva nefita reñoimbyre, haʼevaʼekue ambue ára Tupã tupaogua ha katu osẽkuri chugui.

36 Ha ojehu haʼe ojere, ha péina ápe, ohecha pe arai apytépe Nefi ha Lehi rova; ha péina ápe, omimbieterei, jepe angelkuéra rováicha. Ha haʼe ohecha ohupiha hikuái hesa yvága gotyo; oñeʼẽramoguáicha térã ohupiramoguáicha iñeʼẽ peteĩ tekovépe omañávare hína hikuái.

37 Ha ojehu ko kuimbaʼe osapukái pe aty guasúpe, ojere ha omaʼẽ hag̃ua hikuái. Ha péina ápe, oñemeʼẽ chupekuéra puʼaka ojere ha omaʼẽ hag̃ua; ha ohecha hikuái Nefi ha Lehi rova.

38 Ha heʼi hikuái pe kuimbaʼépe: Péina ápe, mbaʼe piko heʼise opa koʼã mbaʼe, ha mávandi piko oñeʼẽ koʼã kuimbaʼe?

39 Koʼág̃a ko kuimbaʼe héra Amínadab. Ha Amínadab heʼi chupekuéra: Oñeʼẽ hína hikuái Tupã angelkuéra ndive.

40 Ha ojehu heʼi chupekuéra lamanita-kuéra: Mbaʼépa rojapovaʼerã, ojeipeʼa hag̃ua orehegui ko arai ypytũ oreñuãva?

41 Ha Amínadab heʼi chupekuéra: Peñearrepentivaʼerã, ha pejerureʼasy pe ñeʼẽme, jepe peguereko peve jerovia Cristo rehe, penemboʼevaʼekuégui Alma, ha Amulek, ha Zeezrom; ha pejapo rire upéva, ojeipeʼáta pe arai ypytũ peneñuãva.

42 Ha ojehu opavave oñepyrũ ojerureʼasy upe ñeʼẽ omboryryivaʼekuépe yvy; heẽ, ojerureʼasy hikuái jepe ojeipeʼa peve arai ypytũ oñuãvaʼekue chupekuéra.

43 Ha ojehu omaʼẽvo hikuái ijerére, ha ohecha ojeihague pe arai ypytũ oñuãvaʼekue chupekuéra, péina ápe, ohecha hikuái oñemongoraha chupekuéra, heẽ, peteĩ teĩ haʼekuéra, peteĩ pilar tataguiguápe.

44 Ha Nefi ha Lehi oĩkuri ijapytepekuéra; heẽ, oñemongora chupekuéra; heẽ, oĩkuri hikuái oĩramoguáicha tata rendy mbytépe, ha ndojapói hesekuéra mbaʼeve, ni ndohapýi umi kaʼirãi tápia; ha henyhẽkuri hikuái pe vyʼapavẽ ijojahaʼỹva ha henyhẽva verapýgui.

45 Ha péina ápe, pe Tupã Espíritu Santo oguejýkuri yvágagui, ha oikékuri ikorasõkuérape, ha henyhẽvaichakuri hikuái tatágui, ha heʼíkuri hikuái ñeʼẽ hechapyrãva.

46 Ha ojehu og̃uahẽ chupekuéra peteĩ ñeʼẽ, heẽ, peteĩ ñeʼẽ iporãitereíva, haʼeramoguáicha ñeʼẽvy, heʼívo:

47 Pyʼaguapy, pyʼaguapy peẽme, pende jerovia rupi pe che Ahayhuporãitévare, haʼevaʼekue yvy jejapo ypy guive.

48 Ha koʼág̃a, ohendúvo hikuái upéva ohupi hesa ohecha hag̃ua moõguipa ou pe ñeʼẽ; ha péina ápe, ohecha hikuái ojepeʼa pe yvága; ha oguejy angelkuéra yvágagui ha oministra chupekuéra.

49 Ha oĩkuri trescientos tekove rupi ohecha ha ohendúva koʼã mbaʼe; ha ojeʼe chupekuéra oho hag̃ua ha ani hag̃ua oñemondýi, ha ani hag̃ua oduda hikuái.

50 Ha ojehu oho hikuái, ha oministra tavayguakuérape, omombeʼúvo opa tenda jerereguápe opa mbaʼe ohendu ha ohechavaʼekue hikuái, upéicha rupi heta lamanita-kuéra oñekonvense umívagui, tuichaitereígui umi mbaʼe ojehechaukavaʼekue chupekuéra.

51 Ha opavave oñekonvenséva oheja hiʼárma ñorairõguasurã, ha avei ijehayhuʼỹ ha ituvakuéra jepokuaa.

52 Ha ojehu omeʼẽ hikuái nefita-kuérape yvy imbaʼekuérava.