1 Ha koʼág̃a ojehu Samuel, upe lamanita, oprofetisa heta mbaʼe ndaikatúiva ojehai.

2 Ha péina ápe, haʼe heʼi chupekuéra: Péina ápe, che ameʼẽ peẽme peteĩ techaukaha; ohasavétagui cinco ary, ha péina ápe, upéramo ou Tupã Raʼy orredimi hag̃ua opavave ogueroviáva hérape.

3 Ha péina ápe, péva ameʼẽta peẽme techaukaháramo ára haʼe ou vove; ha péina ápe, oĩta tesape guasu yvágape, upéicha rupi pe pyhare haʼe ou mboyve ndaiporimoʼãi ypytũ, upéicha rupi yvyporakuérape haʼetétavaicha haʼeha arakue.

4 Upévare, oĩta peteĩ ára ha peteĩ pyhare ha peteĩ ára haʼeramoguáicha peteĩ árante ha ndaiporiramoguáicha pyhare; ha péva haʼéta peẽme techaukaháramo; peikuaátagui osẽha kuarahy ha avei oikeha; upévare peikuaáta añetehápe oĩtaha mokõi ára ha peteĩ pyhare; upevére pyharekue naiñypytũmoʼãi; ha haʼéta upe pyhare haʼe heñói mboyve.

5 Ha péina ápe, ojekuaáta peteĩ mbyja pyahu, arakaʼeve ndapehechái haguéicha; ha upéva haʼéta avei peẽme techaukarã.

6 Ha péina ápe ndahaʼéi upévante, oĩta heta techauka ha mbaʼeguasu yvágape.

7 Ha ojehu penerenyhẽta ñemondýigui, ha ñemombaʼeguasúgui, upéicha rupi peʼáta yvýpe.

8 Ha ojehu opavave ogueroviáva Tupã Raʼýpe, ohupytýta tekove opaveʼỹva.

9 Ha péina ápe, péicha heʼíkuri chéve Ñandejára, hiʼángel rupi, ajuvaʼerãha ha ameʼẽ peẽme koʼã mbaʼe; heẽ, heʼíkuri chéve aprofetisa hag̃ua peẽme koʼã mbaʼe; heẽ, haʼe heʼíkuri chéve: Esapukái ko tavayguakuérape, peñearrepenti ha pembosakoʼi Ñandejára rape.

10 Ha koʼág̃a, che haʼégui lamanita, ha haʼégui peẽme ñeʼẽ Ñandejára heʼivaʼekue chéve, ha hatãgui peẽme g̃uarã, pendepochy chendive, ha peñehaʼã cherundi, ha chemosẽkuri pende apytégui.

11 Ha pehendúta che ñeʼẽ, upevarã niko ajupíkuri tavaguasu tápia rehe, pehendu ha peikuaa hag̃ua Tupã huisiokuéra peneraʼarõva pene rembiapovai haguére, ha avei peikuaa hag̃ua mbaʼéichapa peñearrepentivaʼerã.

12 Ha avei peikuaa hag̃ua Cristo jejúgui, Tupã Raʼy, yvy ha yvága Ru, opa mbaʼe Apohare iñepyrũmby guive; ha peikuaa hag̃ua techaukakuéra ijeju reheguágui, peguerovia hag̃ua héra.

13 Ha pegueroviáramo héra peñearrepentíta opa pene angaipágui, upéicha pehupyty hag̃ua peteĩ jejora umívagui imérito rupive.

14 Ha péina ápe, avei, che ameʼẽ peẽme ambue techaukaha, heẽ, peteĩ techaukaha iñemanógui.

15 Ha péina ápe, añetehápe omanovaʼerã ou hag̃ua pe salvasiõ; heẽ, haʼe ojapovaʼerã péva ha oñeikotevẽ haʼe omano, ojapo hag̃ua omanovaʼekue jeikovejey, upéva rupi yvyporakuéra ojegueraha hag̃ua Ñandejára renondépe.

16 Heẽ, péina ápe, ko ñemano ogueru jeikovejey, ha orredimi opa yvypórape upe ñemano peteĩhágui—pe ñemano espíritu rehegua; opa yvypóra, Adán jeʼa rupi oñemosẽ haguére Ñandejára renondégui, ha ojeʼe omanoha, tahaʼe mbaʼe yvyʼarigua ha mbaʼe espíritu reheguávape.

17 Ha péina ápe, Cristo jeikovejey orredimi opa yvypórape, heẽ, jepe opa yvypórape, ha oguerujey chupe Ñandejára renondépe.

18 Heẽ, ha ojapopa pe arrepentimiénto ojeruréva upéicharupi, opavave oñearrepentíva noñeikytĩmoʼãi ha noñemombomoʼãi tatápe; ha katu noñearrepentíriva oñeikytĩta ha oñemombóta tatápe; ha ou jey hiʼarikuéra peteĩ ñemano espíritu rehegua, heẽ, ñemano mokõiha, ojeipeʼajeýgui mbaʼe tekojoja reheguágui.

19 Upévare peñearrepenti, peñearrepenti, ani peikuaa haguére koʼã mbaʼe ha napekumplírigui pejeity kondenasiõ guýpe, ha peñembotyryry ko ñemano mokõihápe.

20 Ha katu péina ápe, haʼe haguéicha peẽme ambue techauka rehe, peteĩ iñemano rechauka, péina ápe, ára ohasa vove ñemano pe kuarahy iñypytũta ha nomeʼẽsemoʼãi peẽme hesape; ha avei jasy ha mbyjakuéra; ha ndaiporimoʼãi tesape ko yvy ári, jepe ára haʼe ohasa guive ñemano, ára oikovejey peve omanomavaʼekue apytégui.

21 Heẽ, ára omeʼẽ vove ijespíritu oĩta arasunu ha aratiri heta aravo aja, ha pe yvy okuʼe ha oryrýita; ha itakuéra oĩva yvy ape ári, oĩva yvy ári ha iguýpe, ha ko árape peikuaáva ndojekaiha, térã heta ndojekáiva, ojekapaitéta.

22 Heẽ, oñembojaʼóta mbyte rupi, ha tapiaite peve otiríta ha ojeka pypukúta, ha ipehẽnguéta opa yvy apére, heẽ, yvy ári ha iguýpe.

23 Ha péina ápe, oĩta tuicha aravai, ha oĩta heta yvyty oñembopéva, peteĩ yvy ipereívaicha, ha oĩta heta tenda koʼág̃a hérava yvy ipereíva oikótava chugui yvyty, ijyvatetereíva.

24 Ha heta tape ojekáta, ha heta tavaguasu oñemonandíta.

25 Ha ojeipeʼáta heta ñeñotỹha, ha omeʼẽta heta omanovaʼekue; ha heta imarangatúva ojehechaukáta hetápe.

26 Ha péina ápe, péicha oñeʼẽkuri chéve upe ángel; heʼígui chéve oĩtaha arasunu ha aratiri heta aravo aja.

27 Ha heʼi chéve oĩ aja arasunu ha aratiri, ha aravai, oikotaha koʼã mbaʼe, ha ypytũ oñuãtaha opa yvy ape mbohapy ára aja.

28 Ha heʼi chéve upe ángel oĩtaha heta ohecháva mbaʼe tuichavéva koʼãvagui, oguerovia hag̃ua koʼã techaukaha ha mbaʼeguasukuéra oikotaha opa yvy apére, anive hag̃ua oĩ jegueroviaʼỹ yvypóra raʼykuéra apytépe—

29 Ha péva umi ogueroviáva ojesalva hag̃ua, ha umi ndogueroviáiva ári, ou hag̃ua peteĩ huísio ijojáva; ha avei oñekondenáramo chupekuéra ogueru hiʼarikuéra ikondenasiõ.

30 Ha koʼág̃a penemanduʼa, penemanduʼa, che joykeʼykuéra, pe omanóva, omano ipoite rupi; ha pe ojapóva tembiapovai, ojapo ijehe; ha péina ápe, penesãso; oñemeʼẽ peẽme pejapo hag̃ua pejaposeháicha; ha péina ápe, Tupã omeʼẽkuri peẽme jeikuaa ha pendeʼapo ñemosãsóme.

31 Ha omeʼẽ peẽme peikuaa hag̃ua iporãva ivaívagui, ha omeʼẽ peẽme peiporavo hag̃ua tekove térã ñemano; ha ikatu pejapo pe iporãva ha peñemoĩjey pe iporãvape, térã pejapo oñemeʼẽjey peẽme pe iporãva; térã ikatu pejapo pe ivaíva, ha pejapo oñemeʼẽjey peẽme pe ivaíva.