1 Ha ojehu oiko peteĩ ñembojaʼo tavayguakuéra apytépe, upéicha rupi ojei hikuái ojuehegui peteĩva peteĩ hendápe ha ambuéva katu ambue hendápe ha ojeʼói hapére, ohejávo Nefi-pe haʼeño, haʼe oĩ aja imbytepekuéra.

2 Ha ojehu Nefi oho hóga gotyo, omombaʼeguasúvo umi mbaʼe Ñandejára ohechaukavaʼekue chupe.

3 Ha ojehu péicha ojepyʼamongeta jave—ndovyʼaietereívo Nefita tavayguakuéra hekoñaña rupi, hembiapoñemi ypytũnguéra, ha ijejuka, ha iñemonda, ha opáichagua hembiapovai rupi—ha ojehu ojepyʼamongeta jave péicha ikorasõme, péina ápe, og̃uahẽ chupe peteĩ ñeʼẽ heʼíva:

4 Ejehovasapyréva nde, Nefi, umi mbaʼe rejapovaʼekuére; ahechágui remboʼehague kaneʼõʼỹre ko tavayguakuérape umi ñeʼẽ, ameʼẽvaʼekue ndéve. Ha nderekyhyjéi chuguikuéra, ni nereñehaʼãi nde rekovére, ha katu reñehaʼã rejapo che aipotáva, ha neñeʼẽrendu che rembiapoukapykuérare.

5 Ha koʼág̃a, rejapógui upéva kaneʼõʼỹme, péina ápe, che rohovasáta tapiaite; ha romombaretéta ñeʼẽ ha mbaʼapópe, jerovia ha tembiapópe; heẽ, jepe opa mbaʼe ojejapóta ndéve ereháicha, nde nderejeruremoʼãigui che aipotaʼỹva.

6 Péina ápe, nde haʼe Nefi, ha che haʼe Tupã. Péina ápe, haʼe ndéve che angelkuéra renondépe, reguerekotaha puʼaka ko tavayguakuéra ári, ha rejopýta yvy ñembyahýi reheve, ha mbaʼasyvai reheve, ha ñehundi, ko tavayguakuéra hekoñañaháicha.

7 Péina ápe, che ameʼẽ ndéve puʼaka, opa reselláva yvýpe ojesellataha yvágape; ha opa rejoráva yvýpe ojejorataha yvágape; ha péicha reguerekóta puʼaka ko tavayguakuéra apytépe.

8 Ha upéicha eréramo ko témplope oñembojaʼo hag̃ua mbyte rupi, oikóta.

9 Ha eréramo ko yvytýpe, reʼa ha eñembope, oikóta.

10 Ha péina ápe, eréramo Tupã oipyʼajopytaha ko tavayguakuérape, péicha oikóta.

11 Ha koʼág̃a péina ápe, che haʼe ndéve, tereho ha ere ko tavayguakuérape, péicha heʼiha Tupã Ñandejára, Ipuʼakapáva: Napeñearrepentíriramo pejeipyʼajopýta, peñehundi peve jepe.

12 Ha péina ápe, koʼág̃a ojehu oñeʼẽvo Ñandejára koʼã ñeʼẽ Nefi-pe, haʼe opyta ha nog̃uahẽi hógape, ha katu ohojey atyguasúpe oñemosarambíva yvy ape ári, ha oñepyrũ heʼi chupekuéra umi ñeʼẽ Ñandejára heʼivaʼekue chupe, iñehundikuéra rehegua noñearrepentíriramo hikuái.

13 Koʼág̃a péina ápe, upevére pe tuichaite milágro Nefi ojapovaʼekue oikuaaukávo chupekuéra pe hue guasu jejuka, omohatã hikuái ikorasõ ha nohendúi Ñandejára ñeʼẽ.

14 Upévare Nefi heʼi chupekuéra Ñandejára ñeʼẽ, heʼívo: Napeñearrepentíriramo, péicha heʼi Ñandejára, pejeipyʼajopýta, jepe peñehundi peve.

15 Ha ojehu Nefi heʼívo chupekuéra pe ñeʼẽ, péina ápe, omohatã gueteri hikuái ikorasõ ha nohenduséi iñeʼẽ; upévare oñembohory hese hikuái ha oñehaʼã ojagarra chupe oity hag̃ua kaʼirãime.

16 Ha katu péina ápe, Tupã puʼaka oĩ hendive, ha ndaikatúi ojagarra hikuái chupe oity hag̃ua kaʼirãime, pe Espíritu oguerahágui chupe ha oipeʼa ijapytepekuéragui.

17 Ha ojehu péicha ojegueraha pe Espíritupe, atyguasúgui atyguasúpe, omombeʼúvo Tupã ñeʼẽ, jepe omombeʼu peve opavavépe, térã omondo peve opa tavayguakuéra apytépe.

18 Ha ojehu nohenduséi hikuái iñeʼẽ; ha oñepyrũ oĩ joavy, upéicha rupi oĩ ñembojaʼo ijapytepekuéra ha oñepyrũ ojojuka hikuái kysepukúpe.

19 Ha péicha opákuri ary setenta y uno huekuéra ñeisambyhýpe Nefi tavayguakuéra ári.