1 Péina ápe, koʼág̃a ojehu Nefi oñeʼẽvo koʼã ñeʼẽ, umi kuimbaʼe oĩvaʼekue ijapytepekuéra oñani huekuéra apyka peve; heẽ, jepe haʼékuri cinco umi ohovaʼekue, ha heʼi ojupe, oho aja:

2 Péina ápe, koʼág̃a jaikuaaporãta ko kuimbaʼépa haʼe proféta ha omboúparaʼe chupe Tupã oprofetisa hag̃ua ñandéve mbaʼe hechapyrãitéva. Péina ápe, ñande ndajagueroviái haʼe ojapohague upéva; heẽ, ni ndajagueroviái haʼeha proféta; upevére, haʼéramo añetegua pe haʼe heʼivaʼekue hue guasu rehegua, omanohague, upéicharamo jagueroviáta ambue ñeʼẽ heʼivaʼekue añeteguaha avei.

3 Ha ojehu oñani hikuái opa imbarete reheve, ha og̃uahẽ huekuéra apykápe; ha péina ápe, pe hue guasu hoʼákuri yvýpe, ha ojepyso huguýpe.

4 Ha koʼág̃a péina ápe, ohechávo upéva oñemondyieterei hikuái, upéicha rupi hoʼa hikuái yvýpe; ndogueroviáiguikuri Nefi heʼivaʼekue pe hue guasu rehe.

5 Ha katu koʼág̃a, ohechávo hikuái oguerovia, ha ou chupekuéra kyhyje hoʼáramo g̃uarã tavayguakuéra ári opa huísio Nefi heʼivaʼekue; upévare oryrýi, ha hoʼa hikuái yvýpe.

6 Koʼág̃a, pe hue ojejuka riremi—ijoykeʼy oikutúkuri chupe, kañyhápe, ha oñani, ha rréi rembiguaikuéra oñani ha omombeʼu tavayguakuérape, oguerosapukáivo pe jejuka ijapytepekuéra;

7 Ha péina ápe tavayguakuéra oñembyaty pe huekuéra apyka oĩháme—ha péina ápe, iñemondyirãkuéra ohecha hikuái umi cinco kuimbaʼe hoʼavaʼekue yvýpe.

8 Ha koʼág̃a péina ápe, tavayguakuéra ndoikuaáikuri mbaʼeve pe atyguasu oñembyatyvaʼekuégui Nefi yvotytýpe; upévare heʼi hikuái ojupe: Koʼã kuimbaʼe haʼe umi ojukavaʼekue pe huépe, ha Tupã oipyʼajopy chupekuéra ani hag̃ua okañy ñandehegui.

9 Ha ojehu ojagarra hikuái chupekuéra, ha ojokua ha omoĩ kaʼirãime. Ha oñemondo peteĩ momarandu pe hue ojejukahague, ha ojejagarra ha oñemoĩhague kaʼirãime umi oporojukavaʼekuépe.

10 Ha ojehu upe koʼẽme tavayguakuéra oñembyaty ojaheʼo ha oajuna hag̃ua, ombyasy hag̃ua pe hue guasu ojejukavaʼekue ñeñotỹtaháme.

11 Ha upéicha avei umi hue oĩvaʼekue Nefi yvotytýpe, ha ohenduvaʼekue iñeʼẽ, oho avei ñeñotỹháme.

12 Ha ojehu oporandu hikuái tavayguakuéra apytépe, heʼívo: Moõ piko oime umi cinco oñemondovaʼekue ohecha hag̃ua omanóparaʼe pe hue guasu? Ha haʼekuéra ombohovái ha heʼi: Umi cinco kuimbaʼe pejevaʼekue pemondo haguégui, ndoroikuaái mbaʼeve; ha katu oĩ cinco haʼéva ijukahare, roityvaʼekue kaʼirãime.

13 Ha ojehu huekuéra ojerure ojegueru hag̃ua umíva; ha ojegueru chupekuéra, ha péina ápe haʼe umi cinco oñemondovaʼekue; ha péina ápe umi hue oporandu chupekuéra oikuaa hag̃ua umi mbaʼe, ha haʼekuéra omombeʼu chupekuéra opa mbaʼe ojapovaʼekue, heʼívo:

14 Roñani ha rog̃uahẽ pe huekuéra apyka oĩháme, ha rohechávo opa mbaʼe jepe Nefi otestifika haguéicha, roñemondyieterei ha roʼa yvýpe; ha roñemoĩporãmívo ore ñemondýigui, péina ápe orereity hikuái kaʼirãime.

15 Koʼág̃a, ko kuimbaʼe jejuka rehe katu, ndoroikuaái avápa ojaporaʼe; ha kóvante roikuaa, roñani ha rojuhague peipotaháicha, ha péina ápe omano, Nefi heʼi haguéicha.

16 Ha koʼág̃a ojehu huekuéra heʼi tavayguakuérape umi mbaʼe rehegua, ha oguerosapukái Nefi-pe, heʼívo: Péina ápe, roikuaa ko Nefi oñemoĩporã hague ambue ndive ojuka hag̃ua pe huépe, ha upéi omombeʼu hag̃ua ñandéve, ñanekonverti hag̃ua ijeroviápe, oñembotuicha hag̃ua peteĩ kuimbaʼe guasúicha, ojeiporavovaʼekue Tupãre, ha peteĩ profétaicha.

17 Ha koʼág̃a péina ápe, japilláta ko kuimbaʼépe, ha omombeʼúta hembiapovai ha oikuaaukáta ñandéve pe hue jukahare añete.

18 Ha ojehu opoi hikuái umi cinco-gui upe ñeñotỹha árape. Upevére, koʼãva oikovai huekuéra ndive umi ñeʼẽ heʼivaʼekuére Nefi rehe, ha ojoavy hikuái hendivekuéra peteĩ teĩ, upéicha rupi omoapañuãi chupekuéra.

19 Upevére, huekuéra ojagarrauka Nefi-pe ha ojokua ha oguerahauka hikuái chupe atyguasu renondépe, ha oñepyrũ oporandu hikuái chupe opaicharei, omoñeʼẽjoavy hag̃ua hikuái chupe ha okondena hag̃ua ñemanorã—

20 Ha heʼi hikuái chupe: Nde reime mbaʼevai apohare ndive; máva haʼe pe kuimbaʼe oporojukavaʼekue? Ere oréve, ha ehechauka ne rembiapovai; erévo: Péina ápe ko pirapire; ha avei rohejáta reikove reikuaaukáramo oréve, ha eréramo pe ñeʼẽmeʼẽ rejapovaʼekue hendive.

21 Ha katu Nefi heʼi chupekuéra: O tekove tavy, pene korasõ potĩʼỹva; tavayguakuéra ohechaʼỹva, ha ipyʼahatãva, peikuaa piko arakaʼe pevépa Ñandejára pende Tupã ohejáta pepyta pene angaipa ñeimépe?

22 O peñepyrũmavaʼerã pesapukái ha pejaheʼo, pe tuichaite ñehundi koʼág̃a peneraʼarõvare, napeñearrepentíriramo.

23 Péina ápe peje añemoĩporãhague peteĩ kuimbaʼe ndive ojuka hag̃ua Seezóram-pe, ñande hue guasu. Ha katu péina ápe, che haʼe peẽme, péva haʼe atestifikáguikuri peẽme peikuaa hag̃ua upe mbaʼégui; heẽ, jepe testimónioramo peẽme, aikuaaha tekoñaña ha tekokokyʼa oĩva pende apytépe.

24 Ha ajapo haguére upéva, peje añemoĩporã hague peteĩ kuimbaʼe ndive ojapo hag̃ua ko mbaʼe; heẽ, ahechaukágui peẽme ko techauka pendepochy chendive ha peñehaʼã pehundi che rekove.

25 Ha koʼág̃a péina ápe, che ahechaukáta peẽme ambue techauka, ha jahecháta pévapepa peñehaʼãta cherundi.

26 Péina ápe che haʼe peẽme: Tapeho Seántum rógape, haʼéva Seezóram joykeʼy, ha peje chupe—

27 Nefi, upe proféta guaʼu, oprofetisáva hetaite mbaʼevai ko tavayguakuéra rehe, oñemoĩporã piko raʼe nendive, rejuka hag̃ua Seezóram nde joykeʼýpe?

28 Ha péina ápe, haʼe heʼíta peẽme, Nahániri.

29 Ha pejéta chupe: Nde piko rejukáraʼe nde joykeʼýpe?

30 Ha haʼe henyhẽta kyhyjégui, ha ndoikuaamoʼãi mbaʼépa heʼíta. Ha péina ápe, onegáta pendehegui; ha ojapóta oñemondyiramoguáicha; upevére, heʼíta haʼe ndojapoihague upe mbaʼevai.

31 Ha katu péina ápe, pejepovyvýta hese, ha pejuhúta tuguy ijaóre.

32 Ha pehechávo upéva, pejéta: Moõgui piko ou ko tuguy? Ndoroikuaáingaʼu nde joykeʼy ruguyha?

33 Ha upéramo oryrýita, ha hesaʼyjúta, jepe og̃uahẽramoguáicha chupe ñemano.

34 Ha upéi pejéta peẽ: Ko kyhyje ha tesaʼyju oúva rupi nde rováre, péina ápe, roikuaa nde haʼeha pe oporojukavaʼekue.

35 Ha upéramo ouvéta hiʼári kyhyje; ha upéi omombeʼúta peẽme, ha nonegamoʼãvéima haʼe ojapohague ko jejuka.

36 Ha upéi heʼíta peẽme, che Nefi, ndaikuaaiha mbaʼeve upe mbaʼégui noñemeʼẽirire chéve Tupã puʼaka rupive. Ha upéramo peikuaáta che haʼeha peteĩ kuimbaʼe ijapuʼỹva, ha añembouha peẽme Tupãre.

37 Ha ojehu oho ha ojapo hikuái Nefi heʼi haguéicha chupekuéra. Ha péina ápe, ñeʼẽ haʼe heʼivaʼekue haʼe añetegua; ha pe ñeʼẽme heʼi haguéicha haʼe onega; ha avei pe ñeʼẽme heʼiháicha haʼe omombeʼu.

38 Ha ojegueru ojeikuaauka hag̃ua haʼeha pe oporojukavaʼekue, upéicha rupi opoi hikuái umi cinco-gui, ha Nefi-gui avei.

39 Ha oĩ nefita-kuéra ogueroviáva Nefi ñeʼẽ; ha oĩ avei, ogueroviáva umi cinco testimónio rupi, koʼãva oñekonvertíguikuri oĩ aja kaʼirãime.

40 Ha koʼág̃a oĩ tavayguakuéra apytépe heʼivaʼekue Nefi haʼeha proféta.

41 Ha oĩ ambue heʼíva: Péina ápe, haʼe peteĩ tupã, ha ndahaʼéirire peteĩ tupã ndaikatumoʼãikuri oikuaa opa mbaʼégui. Ha péina ápe, haʼe heʼíkuri ñandéve ñane korasõ oñandúva, ha avei heʼíkuri ñandéve heta mbaʼe; ha jepe oikuaauka ñandéve mávapa haʼe pe ojukavaʼekue ñande huépe.