1 Ha ojehu ary cincuenta y cuatro-pe oĩkuri heta pe tupaógui ñesẽ, ha oĩkuri avei peteĩ joavy tavayguakuéra apytépe, upéicha rupi oĩ heta tuguy ñeñohẽ.

2 Ha umi opuʼãvaʼekue ojejuka ha oñemosẽ upe tetãgui, ha oho hikuái lamanita-kuéra rréi rendápe.

3 Ha ojehu oñehaʼã hikuái omokyreʼỹ lamanita-kuérape ñorairõguasurã nefita-kuéra rehe; ha katu péina ápe, lamanita-kuéra okyhyjetereíkuri, upéicha rupi nohenduséi hikuái umi osẽvaʼekue ñeʼẽ.

4 Ha katu ojehu ary cincuenta y seis huekuéra ñeisambyhýpe, oĩkuri osẽvaʼekue ohóva nefita-kuéragui lamanita-kuéra ndive; ha ambuekuéra ndive omokyreʼỹ chupekuéra pochyrã nefita-kuéra rehe; ha opa upe ary aja oñembosakoʼi hikuái ñorairõguasurã.

5 Ha ary cincuenta y siete-pe ohókuri hikuái ñorairõme nefita-kuéra rehe, ha omoñepyrũ hikuái tembiapo jejuka rehegua; heẽ, upéicha rupi ary cincuenta y ocho huekuéra ñeisãmbyhy aja ojagarra hikuái Zarahemla retã; heẽ, ha avei opa tetã, upe oĩva tetã Abundancia ypýpe jepeve.

6 Ha nefita-kuéra ha Moroníah ehérsito oñembojevy jepe tetã Abundancia peve;

7 Ha upépe oñemombarete hikuái lamanita-kuéra rehe, yguasu kuarahyreikégui, jepe kuarahyresẽ meve; pe tape omombaretevaʼekue hikuái ha omoĩ haguépe ijehérsito omoʼã hag̃ua hetã nortegua, opyta peteĩ ára guatáicha nefita-pe g̃uarã.

8 Ha péicha umi nefita osẽvaʼekue, lamanita-kuéra ehérsito guasu pytyvõ reheve, ojagarrákuri opa nefita-kuéra yvy oĩva yvy súrpe. Ha opa koʼã mbaʼe oikókuri ary cincuenta y ocho ha cincuenta y nueve huekuéra ñeisãmbyhy aja.

9 Ha ojehu ary sesenta huekuéra ñeisambyhýpe, Moroníah ha ijehersitokuéra ohupyty heta upe tetã renda; heẽ, ojagarrajey hikuái heta tavaguasu hoʼavaʼekue lamanita-kuéra pópe.

10 Ha ojehu ary sesenta y uno huekuéra ñeisambyhýpe ojagarrajey hikuái jepeve opa ijyvykuéra mbytere.

11 Koʼág̃a, ko tuichaite ñehundi nefita-kuérape g̃uarã, ha ko jejukavaiete ijapytepekuéra, ndoikoivaʼerãmoʼãkuri ndahaʼéirire tekoñaña ha tekokyʼa oĩva ijapytepekuéra rupi; heẽ, ha oĩ avei umi heʼíva ijehe hikuái Tupã tupaopeguaha apytépe.

12 Ha upéva ijorgúllogui hikuái ikorasõme, ipirapire hetaitereígui hikuái, heẽ, ojopýgui hikuái imboriahúvape, onegávo hembiʼu iñembyahýivagui, ha ijao ijopívovagui, ha ojopývo ijoykeʼykuéra imirĩvape hovápe, oñembohorývo hikuái imarangatúvare, onegávo pe espíritu profesía ha rrevelasiõ rehegua, oporojukávo, omondávo, ijapúvo, ipokarẽvo, ojapóvo ñemoakãratĩ, opuʼãvo hikuái tuicha joavýpe, ha okañývo ha oho hikuái Nefi retãme, lamanita-kuéra apytépe.

13 Ha tuicha hekoñaña rupi hikuái, ha oñembotuicha haguére imbaretére, ojehejarei chupekuéra imbaretekuéra reheve; upévare noñakãrapuʼãi hikuái, ha katu oñemoingoʼasy ha ojeipyʼajopy chupekuéra, ha lamanita-kuéra oity chupekuéra henonderãkuéra, haimete ohundipa peve hikuái opa hetã rendakuéra.

14 Ha katu péina ápe, Moroníah omboʼékuri heta mbaʼe tavayguakuérape hembiapovai haguére, ha avei Nefi ha Lehi, haʼéva Helamán raʼykuéra, omboʼe heta mbaʼe tavayguakuérape, heẽ, ha oprofetisa chupekuéra heta mbaʼe hembiapovaikuérare, ha pe oútavare chupekuéra noñearrepentíriramo hikuái iñangaipakuéragui.

15 Ha ojehu oñearrepenti hikuái, ha upéicha oñearrepentívo hikuái, oñepyrũ oñakãrapuʼã.

16 Ha Moroni ohechávo oñearrepentiha hikuái oñanima ogueraha chupekuéra peteĩgui ambue tendápe, ha tavaguasúgui tavaguasúpe, jepe ojagarrajey peve hikuái imbaʼe mbyte, ha opa hetãnguéra mbyte.

17 Ha péicha opákuri ary sesenta y uno huekuéra ñeisambyhýpe.

18 Ha ojehu ary sesenta y dos huekuéra ñeisambyhýpe, Moroníah ndaikatuvéimakuri ojagarrave yvy lamanita-kuéragui.

19 Upévare oheja hikuái umi tetã rembyre jehupytyse, hetaitereígui lamanita-kuéra ndaikatúi nefita-kuéra ohupytyve puʼaka hiʼarikuéra; upévare Moroníah oiporu opa ijehérsito oñongatu hag̃ua umi tenda haʼe ojagarravaʼekue.

20 Ha ojehu, lamanita-kuéra hetaitereígui nefita-kuéra okyhyjeterei, ani mbaʼe ipuʼaka hikuái hesekuéra, ha opyrũmba hesekuéra, ha ojejuka, ha oñehundi.

21 Heẽ, oñepyrũ imanduʼa hikuái Alma profesiakuérare, ha avei Mosíah ñeʼẽ rehe; ha ohecha haʼehague hikuái tavayguakuéra ipyʼahatãva, ha nomombaʼeihague hikuái Tupã rembiapoukapykuéra.

22 Ha ombyai ha opyrũmba hikuái ipýpe Moisés léire, térã umi Ñandejára heʼivaʼekuére chupe omeʼẽ hag̃ua tavayguakuérape; ha ohecha hikuái ileikuéra oñembyaihague, ha oikohague chuguikuéra peteĩ tavayguakuéra iñañáva, upéicha rupi iñaña hikuái lamanita-kuéraicha jepeve.

23 Ha hembiapovai rupi hikuái pe tupao oñepyrũkuri hoʼa; ha oñepyrũ ndogueroviavéi hikuái pe espíritu profesía rehegua ha pe espíritu rrevelasiõ rehegua; ha Tupã huisiokuéra oúma hiʼarikuéra.

24 Ha ohecha hikuái ikangyha, ijoykeʼykuéra, lamanita-kuéraicha, ha Ñandejára Espíritu noñongatuveimaha chupekuéra; heẽ, ojeíkuri chuguikuéra, Ñandejára Espíritu ndoikóigui témplo ipotĩʼỹvape—

25 Upévare Ñandejára noñongatuvéima chupekuéra imilágrova ha ijojaʼỹva puʼaka reheve, hoʼáguikuri hikuái peteĩ jegueroviaʼỹ ñeimépe ha tembiapo ñañaitereípe; ha ohecha hikuái lamanita-kuéra hetaitereiveha chuguikuéra, ha oñemoag̃uiʼỹramo hikuái Ñandejára Itupãre, omanomantevaʼerãha hikuái.

26 Ha péina ápe, ohecha hikuái lamanita-kuéra mbarete tuichaitereiha haʼekueraichaite, jepe kuimbaʼe kuimbaʼe rehe. Ha péicha hoʼákuri hikuái ko tuichaite tembiapovaípe; heẽ, péicha ikangýkuri hikuái, hembiapovai rupi, ndahetái ary pukukue rire.