Escritura-kuéra
Helamán 12


Ñembyaty 12

Yvyporakuéra oñemovã ha naiñarandúi ha ipyaʼe añarã—Ñandejára ojaʼo itavayguakuérape—Yvypóra ndahaʼéiva mbaʼeve oñembojoja Tupã puʼaka rehe—Huísio árape, yvyporakuéra ohupytýta tekove opaveʼỹva térã kondenasiõ. 6 ary rupi Cristo mboyve.

1 Ha péicha jahecha añeteguaʼỹha, ha oñemovãha yvypóra raʼykuéra korasõ; heẽ, jahecha Ñandejára ipyʼaporã tuicha ha opaveʼỹvape, ohovasaha ha omoʼakãrapuʼã umi hese omoĩvape ijerovia.

2 Heẽ, ha jahecha omoakarãpuʼã jave itavayguakuérape, heẽ, iñu ñembotuichápe, ivaka ha imymbakuéra ñemoñáme, ha óro, ha pláta, ha opa mbaʼe hechapyrãva opáichagua ha ojejapo porãvape; omoʼãvo hekovekuéra, ha omosãsóvo chupekuéra ihayhuʼỹhakuéra pógui; omohuʼũvo ohayhuʼỹva chupekuéra korasõ ani hag̃ua ogueru chupekuéra ñorairõguasu; heẽ, ha peteĩ ñeʼẽme, ojapóvo opa mbaʼe itavayguakuéra vyʼapavẽ ha ñeimeporãrã; heẽ, upéramo haʼe ára omohatãha hikuái ikorasõ, ha hesarái Ñandejára Itupãgui, ha opyrũ ipýpe pe Imarangatúvare—heẽ, ha upéva oĩporãitereígui hikuái, ha oñakãrapuʼã guasuetereígui.

3 Ha péicha jahecha Ñandejára ndohavirairámo itavayguakuérape heta jehasaʼasýpe, heẽ, ndoúiramo chupe ñemano ha ñemondýi reheve, ha ñembyahýi ha opáichagua mbaʼasyvai reheve, naimanduaiha hese hikuái.

4 O iñaranduʼỹ, imbaʼerei, iñaña, ha hekoñaña, ha ipyaʼete piko ojapo hag̃ua tembiapovai, ha imbeguete piko ojapo hag̃ua iporãva, yvypóra raʼykuéra; heẽ, ipyaʼete piko ohendu hag̃ua aña ñeʼẽ, ha omoĩ hag̃ua ikorasõ yvóra mbaʼereíre!

5 Heẽ, ipyaʼete piko hikuái oñembotuicha hag̃ua pe orgúllope; heẽ, ipyaʼete piko oñembotuicha hag̃ua, ha ojapo hag̃ua opáichagua mbaʼe haʼéva tembiapovai; ha imbeguete piko imanduʼa hag̃ua Ñandejára Itupãre, ha ohendu hag̃ua iñemoñeʼẽ, heẽ, imbeguete piko hikuái oiko hag̃ua arandu rapére!

6 Péina ápe, ndoipotái Ñandejára Itupã, ijapoharakuéra, oisãmbyhy ha orreina hiʼarikuéra; jepeve tuicha ipyʼaporã ha iporiahuvereko hendivekuéra, ndoipotái hikuái iñemoñeʼẽ, ha ndoipotái haʼe omboguata chupekuéra.

7 O mbaʼeguasuete piko yvypóra raʼykuéra ndahaʼéiva mbaʼeve; heẽ, michĩve hikuái jepe yvy timbógui.

8 Ha péina ápe, yvypegua yvy okuʼe ápe ha pégotyo, oñembojaʼóvo mbyte rupi ñande Tupã guasu Ijapyraʼỹva heʼiháicha.

9 Heẽ, péina ápe iñeʼẽ rupi oryrýi ha oñemonguʼe yvytypuʼã ha yvytykuéra.

10 Ha iñeʼẽ puʼaka rupi oñembojaʼo ha oñembope, heẽ, peteĩ yvytypaʼũicha.

11 Heẽ, iñeʼẽ puʼaka rupive oryryipa pe yvy;

12 Heẽ, iñeʼẽ puʼaka rupive, umi pyenda oñemonguʼe, jepe mbytetépe.

13 Heẽ, ha heʼi pe yvýpe—Ekuʼe—ha okuʼe.

14 Heẽ, ha heʼi pe yvýpe—Tereho tapykue gotyo, oñembopuku hag̃ua upe ára heta aravo aja—ha oiko;

15 Ha péicha, iñeʼẽme heʼiháicha pe yvy oho tapykue gotyo, ha yvypórape haʼetévaicha pe kuarahy opytáva ñemovãʼỹme; heẽ, ha péina ápe, péicha; añetehápe pe yvy niko pe okuʼéva ha ndahaʼéi kuarahy.

16 Ha péina ape, avei, heʼíramo ykuéra yguasuguápe—peñemokã, péichata.

17 Péina ápe, heʼíramo ko yvytýpe—Epuʼã, ha eho ha reʼa ko tavaguasu ári, oñeñotỹ hag̃ua—péina ápe upéichata.

18 Ha péina ápe, peteĩ kuimbaʼe oñomíramo mbaʼehepy yvyguýpe, ha Ñandejára heʼíramo chupe—Toñemoñeʼẽngái, pe oñomivaʼekue rembiapovai rupi—péina ápe, oñemoñeʼẽngáita.

19 Ha Ñandejára heʼíramo—Eñemoñeʼẽngái nde, avave nandejuhúi hag̃ua ko ára guive tapiaite peve—péina ápe, avave kuimbaʼe ndohupytymoʼãi upe guive tapiaite peve.

20 Ha péina ápe, Ñandejára heʼíramo peteĩ yvypórape—Ne rembiapovaikuérare, eñemoñeʼẽngáita tapiaite—upéichata.

21 Ha Ñandejára heʼíramo—Ne rembiapovaikuérare rejeipeʼáta cherenondégui—haʼe ojapóta péicha oiko hag̃ua.

22 Ha ái pe haʼe heʼívape upéicha, upéicha ojejapótagui pe ojapóva tembiapovai ndive, ha ndaikatumoʼãi ojesalva; upévare, upéva rupi, yvyporakuéra ojesalva hag̃ua, oñemomarandúkuri pe arrepentimiénto.

23 Upévare, ojehovasapyre umi oñearrepentiséva ha ohenduséva Ñandejára Itupã ñeʼẽ; koʼãva haʼégui umi ojesalvátava.

24 Ha tomeʼẽ Tupã, imarangatu guasúpe, yvyporakuéra ojegueraha hag̃ua arrepentimiénto ha tembiapo porãme, oñemoĩjey hag̃ua chupekuéra grásia, grásia reheve, hembiapokuéicha.

25 Ha che aipota mayma yvypóra ojesalva. Ha katu ñamoñeʼẽ oĩha oñemosẽtava pe ára paha guasúpe, heẽ, oñemombótava Tupã renondégui.

26 Heẽ, oñekondenataha peteĩ tekoʼasy opaveʼỹvape, oñekumpli hag̃ua ñeʼẽ heʼíva: Umi ojapovaʼekue iporãva oguerekóta tekove opaveʼỹva; ha umi ojapovaʼekue mbaʼevai oguerekóta kondenasiõ opaveʼỹva. Ha péicha, Amén.