1 Oh met, riei ohl kesempwal akan, I wadekadahr mepwukat pwe kumwail en kak ese duwen inou kan me Kauno ketin inoukihongehr peneinei en Israel kan koaros—

2 Me e ketin mahseniongehr Mehn Suhs akan, sang rehn sapwellime soukohp sarawi kan, sangete nin tapio, sang ehu dih lel ehu dih, lao lel ahnsouo me irail pahn kapwuredohng nan mwomwohdiso mehlel oh sapwellimen Koht kehl; ahnsou me irail pahn kapwurupwurodohng nan uhdakarail kan, oh soandieng nan sapwerail sahpw en inou kan.

3 Kilang, riei ohl kesempwal akan, I ndahieng kumwail mepwukat pwe kumwail en perenda, oh sarada kohkohlahte, pwehki kapai kan me Kauno Koht pahn ketikihong noumwail seri kan.

4 Pwe I ese me tohto rehmwail raparapahkiher en ese soahng kan me pahn kohdo; eri I ese me kumwail ese me paliwaratail kan uhdahn pahn mehla oh sohrala; ahpw, nan paliwaratail kan kitail pahn kilang Koht.

5 Ei, I ese me kumwail ese me e pahn ketin pwarohng irail ni paliwar nan Serusalem, wasa me kitail kohsang ie; pwe e konehng en uhdahn ketido rehrail; pwe e koasoandi me Soun Kepikipik lapalapo pahn ketin mweidala pein kahlapeo pahn manaman en aramas, oh pwoukihla aramas koaros, pwe aramas koaros en mihla pahn sapwellime manaman.

6 Pwehki aramas koaros uhdahn pahn mehla, pwe en kapwaiada sapwellimen Soun Kepikipik lapalapo koasoandi kalahngano, e konehng en mie manaman en iasada, oh iasadao konehng en wiawihong aramas pwehki pwupwidio; oh sapwung me kahrehda pwupwidio; oh pwehki aramas ahr pwupwulahr irail kalipilipasangehr mwohn silangin Kauno.

7 Eri, e konehng en wia tomw me poatoapoat—ma e sohte pahn wia tomw me poatoapoat, soahng me kin mwerpeseng sohte kak kieweklahng ni soahng me sohte kak mwerpeseng. Eri, keieun kopwung me wiawihong aramas pahn duweduwehte kohkohlahte. Oh ma ih met me wiawi, paliwar pahn wonohn oh matala oh mweredieng pohn sampah, oh sohla kak pwourda.

8 Eri ia uwen kaselel en sapwellimen Koht eripit, sapwellime kalahngan oh mahk! Pwe kilang, ma paliwar pahn sohla kak pwourda, palingenatail kan pahn duwehla tohnleng me pwupwidihsang mwohn silangin Koht Soutuk, oh wiahla tepilo, oh sohla kak pwourda.

9 Oh ngenitail kan uhdahn anahne duwehla ih, oh kitail wiahla tepil kei, tohnleng en tepil, ritidihsang mwohn silangin atail Koht, oh mihla pahn pahpahn likamw akan, nan nsensuwed, duwehte pein ih; ei, ong ih me pitiedi tepin atail nohno oh pahpa, me kin kawekala pein ih en duwehte tohnleng en marain, oh kamwakidada aramas akan en wia doadoahk en mwersuwed rir kan en kamaramas oh soangoasoangen doadoahk rotorot rir koaros.

10 Eri ia uwen kaselel en kalahngan en atail Koht, me ketin kaunopadahr ahl pwe kitail en pitisang nan pehn eni kamasepwehk menet; iei, enio, mehla oh ehl, me I kin kahdaniki mehlahn paliwar, oh pil mehlahn palingehn.

11 Oh pwehki duwen sapwellimen atail Koht ahl en komourlao, Koht Sarawi en Israel, mehlahn paliwar wet, me I koasoaiao, pahn kapwurehda mehlahu; me iei mehlahn nan sousou.

12 Oh mehla me I koasoaiao, me iei mehlahn palingehn, pahn kapwurehda mehlahu; me iei mehlahn nan ehl; eri, mehla oh ehl pahn kapwurehda ara mehla ko, oh ehl pahn kapwurehda ngehn me e kalewehdi ko, oh sousouo pahn kapwurehda paliwar akan me e kalewehdi, oh paliwar oh ngehn en aramas akan pahn pwurehng pwurpene; oh met pahn wiawi sang ni manaman en iasadahn Koht Sarawi en Israel.

13 Ia uwen kaselel en sapwellimen atail Koht koasoandio! Pwe pil ehu kahrepe, paradais en Koht pahn kapwurehda ngehn en me mour pwung kan, oh sousou pahn kapwurehda paliwar en me mour pwung; oh ngehno oh paliwaro pahn pwurehng pwurpene, oh aramas koaros pahn sohla kak mwerpeseng, oh solahr kak mehla kohkohlahte, oh irail wialahr aramas mour kei, ahneki marain unsek duwehte atail ese ni paliwar, ihte atail marain nan mour poatoapoat pahn unsek.

14 Eri, kitail pahn wehwehki ni unsek atail sapwung kan, oh atail samin kan, oh atail kilisou; oh me mour pwung kan pahn wehwehki unsek arail peren kan, oh arail wiewiahn mour pwung kan, oh kapwatkihda likou mwakelekel, iei, likou en wiewiahn mour pwung.

15 Kedekedeo ni ahnsou me aramas koaros pahn powehdi keieu en mehla wet oh mourda, pwehki ahr sohlahr kak mehla, irail uhdahn pahn uh mwohn mwoalen kopwung en Koht Sarawi en Israel; oh kopwungo ahpw pahn wiawi, oh irail udahn pahn pakadeikda nin duwen sapwellimen Koht kadeik sarawi.

16 Oh ni mehlel, nin duwen Kauno eh ketin ieias, Kauno Koht ketin mahsanih, oh iei sapwellime mahsen poatoapoat, me sohte kak sohrala, me iei irail akan me mour pwung pahn dadaurete ahr mour pwung, oh irail akan me samin pahn samisaminte; eri, me samin kan iei tepilo oh nah tohnleng kan; oh irail pahn kohla nan kisiniei poatoapoat, me kaunopadahng irailehr; oh arail lokolok duwehte lehn kisiniei oh suwepel, me mpwulen kisinieio kin lullul poatoapoat oh sohte kak uhdi.

17 Ia uwen kaselel oh kopwung pahrek en atail Koht! Pwe e kin ketin kalelehla sapwellime mahsen kan koaros, oh mahsen ko kin pwilido sang nan douwaseo, oh sapwellime kosonned uhdahn pahn pweida.

18 Ahpw, kilang, me mour pwung kan, iei souleng en Koht Sarawi en Israel, irail akan me kin kamehlele Koht Sarawi en Israel, irail akan me kin kanengamahieng lohpwu kan en sampah, oh mehndahkihla kanamenekpe, irail me pahn sohsohki wehin Koht, me kaunopadahng irailehr sangete ni tepdahn poahsoan en sampah, oh irail pahn pereperen kohkohlahte.

19 Ia uwen kaselel en kalahngan en atail Koht, me wia Koht Sarawi en Israel! Pwe e ketin doarehsangehr sapwellime souleng kan eni kamasepwehko me iei tepilo, oh mehla, oh ehl, oh lehn kisiniei oh suwepel, me iei lokolok sohte imwi.

20 Ia uwen kaselel en sarawi en atail Koht! Pwe e ketin mwahngih soahng koaros, oh sohte mehkot me e sohte mwahngih.

21 Oh e ketidihdo sampah pwe en kak ketin komourala aramas koaros ma irail pahn rong mwahu kepitie; pwe kilang, e ketin lokolongkiher ahn aramas koaruhsie medek, mehlel, medek en aramas koaros me ipwidi, ohl akan, lih akan, oh seri kan, me wia kisehn peneinei en Adam.

22 Oh e ketin lokolongkiher met pwe iasada en kak wiawihong aramas koaruhsie, pwe koaros en kak kesihnenda mwowe ni rahn en kadeik lapalapo.

23 Oh e ketin mahsanihongehr aramas koaros me re anahne koluhla, oh papdaisla ni mware, ahneki pwoson unsek Koht Sarawi en Israel, ma soh re sohte kak komourla nan wehin Koht.

24 Oh ma re sohte pahn koluhla oh kamehlele mwareo, oh papdaisla ni mwareo, oh dadaur lel imwi, re pahn kalipilipla; pwe Kauno Koht, Koht Sarawi en Israel, me ketin mahsaniher.

25 Eri, e ketikidahr kosonned ehu; oh ma sohte kosonned e sohte pahn mie kalokolok; oh ma sohte kalokolok e sohte pahn mie kadeikpen kalokolok; oh ma sohte kadeikpen kalokolok, a kalahngan en Koht Sarawi en Israel me pahn apwalih irail, pwehki tomwo; pwehki sapwellime manaman me ketin doareiraillahr.

26 Pwe tomwo kaitaralahr pwung en sapwellime kopwung pahrek rehn irail akan me sohte iang alehdi kosonnedo, irail pitisangehr eni kamasepwehko, mehla oh ehl, oh tepilo, oh lehn kisiniei oh suwepel, me iei lokolok poatoapoat; oh irail kopwurupwurlahng rehn Koht me ketikihong irail esingek, iei Koht Sarawi en Israel.

27 Ahpw meid suwed ong ih me alehdi kosonnedo, ei, me alehdi sapwellimen Koht kosonned akan koaros, duwehte kitail, oh dipikihda, oh kawehla mwahl ah rahn en kaunopada, pwe meid apwal ong aramaso!

28 Ia uwen widing en koasoandi en me suwedo! Ia uwen noahrok, oh luwet, oh pweipwei en aramas! Ahnsou me re kin esehla re kin lemehieng me re loalokong, oh re kin sohla rong mwahu kaweid en Koht, pwe re kin pohnsehsehla, oh medemedewe me re esehier soahng koaros, eri, arail loalokongo kin likamwala oh e sohte pahn sewese irail. Oh irail pahn lekidekla.

29 Ahpw en loalokong e mwahu ma re pahn rong kaweid en Koht.

30 Ahpw meid suwed ong me kepwehpwe kan, me kepwehpwehki soahng kan en sampah. Pwehki arail kepwehpwe irail kailongkihla me semwehmwe kan, oh irail kaloke me opampap kan, oh irail poakehng arail dipwisou kan; eri, re kin wiahki ahr koht ahr dipwisou kan. Oh kilang, arail dipwisou kan pahn pil iang irail lekidekla.

31 Oh meid suwed ong me salengepon kan me sohte pahn rong; pwe irail pahn lekidekla.

32 Meid suwed ong me masukun kan me sohte pahn kilang; pwe irail pil pahn lekidekla.

33 Meid suwed ong me sohte sirkumsaisla ni mohngiongarail, pwe wehwehki pein diparail kan pahn kalokeirail ni imwilahn rahn.

34 Meid suwed ong aramas likamw men, pwe e pahn lekidekidihla nan ehl.

35 Meid suwed ong soun kamaramas emen me kin kemehla aramas ni pein nsene, pwe e pahn mehla.

36 Meid suwed ong irail me kin kamwahl, pwe irail pahn lekidekidihla nan ehl.

37 Ei, meid suwed ong irail akan me kin pwongih dikadik en eni kan, pwe tepil en tepil koaros kin perenikinirail.

38 Oh, ni oaralap, meid suwed ong irail kan me kin mehla nan diparail kan; pwe irail pahn pwurala rehn Koht, oh udiahl silangi, oh mihmihte nan diparail kan.

39 Oh, riei ohl kesempwal akan, tamataman uwen kamasepwehk en wiahda sapwung ong Koht Sarawio, oh pil uwen kamasepwehk en lohdieng pahn kasongosong en me keieu widingo. Tamataman, imwilahn nsenohki momour en sampah iei mehla, oh imwilahn nsenohki momour en palingehn iei mour soutuk.

40 Oh, riei ohl kesempwal akan, kumwail rong ei kaweid kan. Tamataman kalahngan lapalap en Koht Sarawi en Israel. Dehr nda me I koasoai apwal ong kumwail; pwe ma kumwail pahn wia met, kumwail pahn uhwongada me mehlelo; pwe I koasoaiahieng kumwailehr mahsen akan en amwail Sounkapikadao. I ese me mahsen mehlel kan kin apwal ong soangen samin koaros; ahpw aramas mour pwung kan sohte kin masak, pwe re poakohng me mehlelo oh re sohte kin rerada.

41 Oh, riei ohl kesempwal akan, kohdo rehn Kauno, Me Sarawio. Tamataman me sapwellime ahl akan me pwung. Kilang, ahl me aramas pahn keidieo me tehtikitik, ahpw inen kohwei mwowe, oh me wia silepen ewen kehlo iei Koht Sarawi en Israel; oh e sohte kin ketin kadoadoahkih ladu wasao; oh sohte ehu ahl tohrohr likin ewen kehlo; pwe sohte me kak pitiedi, pwe mware iei Kauno Koht.

42 Oh mehmen me pahn letelet, e pahn ketin ritingadahng; ah me eripit, oh me loalokonglahr, oh irail akan me kepwehpwe, me pohnmwahsohki arail loalokong, arail eripit, oh arail kepwehpwe—iei, e kin ketin kalahdikinirail; oh ma irail sohte pahn kesehla mepwukat, oh wiahkinirail aramas pweipwei kei mwohn Koht, oh ma re sohte pahn karakarahkala mehlel, e sohte pahn ketin ritingadahng irail.

43 Ahpw soahng kan me pid me eripit oh loalokong pahn ekiekla sang irail kohkohlate—iei, pereno me kaunopdahngehr souleng kan.

44 Oh, riei ohl kesempwal kan, kumwail tamataman ei kaweid kan. Kilang, I pahn kapwuhrasang ei likou, oh siped mwohmwail; I kapakapkihong Koht me ketin wia komourpei, me ketin kasawih ie ni eh kin mahsanih ie; eri, kumwail pahn ese ni imwilahn rahno, ni ahnsou me aramas koaruhsie pahn pakadeingki arail wiewia kan, pwe Koht en Israel en ketin kadehde me I sipedasangehr dipamwail kan sang ei mour, oh I ahpw kesihnenda mwowe ni mwakelekel, oh I sohte pahn pwukoahki ntahmwail.

45 Oh, riei ohl kesempwal akan, kumwail sohpeisang dipamwail akan; kamweidpeseng nein tepil selmete me pahn mwadang salihkumwaildi; kohdo rehn Koht me iei paipalap en komourpamwail.

46 Kaunopada amwail mour kan ong rahn lingano ni ahnsou me kopwung pahrek pahn wiawihong irail me mour pwung kan, me iei rahn en kadeiko, pwe kumwail en dehr roingkipene amwail masepwehkada mehlel; pwe kumwail en dehr tamataman dipamwail kan, oh itoitieng en wehkada oh koasoia: Komwi me sarawi, sapwellimomwi kadeik me sarawi, Maing Kaun Koht Wasa Lapalap—ahpw I ese ei sapwung kan; I kasapwungelahr sapwellimomwi kosonned, oh I en pein pwukoahki ei sapwung kan; oh tepilo kaleweiedier, pwe I lohdiengehr pahn ah kalokolok mwuledek.

47 Ahpw kilang, riei ohl oko, e kesempwal I en kasalehiong kumwail duwen soahng kamasepwehk kan me uhdahn pahn wiawi? Ia duwe I anahne kamwakidkumwailda ma amwail madamadau kan mwakelekel? Ia duwe I anahne lokaia sansal ong kumwail ni duwen padahk mehlel kan ma sohte dipamwail?

48 Kilang, ma kumwail aramas sarawi kei I pahn koasoaiahieng kumwail duwen sarawi; ahpw pwehki amwail sohte sarawi, oh kumwail kin wiahkinie amwail sounpadahk men, e konehng I en padahkihong kumwail duwen pwukoahkihdi dihp.

49 Kilang, palingeniet kin udahn kailongki dihp, oh mohngiongi kin pereniki soahng pwung kan; oh I pahn kepinga mwar sarawi en ei Koht.

50 Kohdo, riei ohl oko, kumwail koaros me men nimpil, kumwail kohdo ni wasahn nimpilo; oh kumwail me sohte noumwail mwohni, kohdo pwain oh mwenge; mehlel, kohdo pwain wain oh milik me sohte anahne mwohni oh sohte pweipwei.

51 Eri, kumwail dehr netiki mwahl noumwail mwohni kan ong me sohte katepe, de koadoahke mehkot me sohte pahn kaitarahla amwail anahn. Nantihong rong ie mwahu, oh tamataman mahsen kan me I koasoaiahier; oh kohdo rehn Koht Sarawi en Israel, oh kamadipwki soahng me sohte kak mehla, de pil sohte kak ohla, oh mweidehng amwail mour en nsenamwahukihla amwail mworouroula.

52 Kilang, riei ohl kesempwal akan, kumwail tamataman mahsen akan en amwail Koht; kumwail kapakap ong ih ahnsou koaros nirahn, oh kaping kalahngankihong mware sarawio nihpwong. Mweidehng amwail mohngiong kan en pereperen.

53 Oh kilang uwen kaselel en sapwellimen Kauno inou kan, oh uwen kaselel en eh ketikihdi pein ih rehn aramas akan; oh pwehki sapwellime manaman, oh sapwellime kalahngan oh mahk, e ketin inoukihong kitail me kadaudoketail kan sohte uhdahn pahn kamakamala, nin duwen paliwar, ahpw e pahn doareirailla; oh irail pahn wiahla ehu rah mour pwung en peneinei en Israel nan dih en mwuhr akan.

54 Oh met, riei ohl oko, I men koasoiaiong kumwail laudsang mepwukat; ahpw lakapw me I pahn kanekehla luhwen ei kaweid ong kumwail. Ahmen.