1 Eri, Kauno ahpw mahsanihong ie: Ale ehu doaropwe laud, oh ntingihdiong loale, duwen Maer-salal-as-pas.

2 Oh I ahpw pilada sounkadehde loalloapwoat kan me pahn kadehde, samworo Uraia, oh Sakaraia nein Seperekaia pwutak.

3 Oh I ahpw kohla rehn lih soukohpo; oh e ahpw liseianda oh naitikiada pwutak emen. Kauno ahpw mahsanihong ie: Kihong ede, Maer-salal-as-pas.

4 Pwe kilang, serio pahn saikinte ese weriwerki [nda], Pahpa, oh nohno, a nahnmwarki en Asiria pahn kuliasang dipwisou en Damaskus oh kepwehn Sameria kan.

5 Kauno ahpw ketin pwurehng mahsanihongie, ketihtihki:

6 Pwehki aramas pwukat ar soikala pihl en Siloa me kin pwilipwilwei ni keneinei, oh [ar] perenkihdahr Resin oh nein Remalaia pwutako;

7 Eri met, kilang, Kauno pahn kadaredo nahnmwarki en Asiria oh sapwellime kan koaros me pahn rasohng pilap me lapakehda kehlail oh laud; oh e pahn kohda pohn angin keile kan.

8 Oh e pahn kohwei nan Suda; e pahn kadirehla oh widekla, e pahn lel ni tepin were; oh e pahn kadangpeseng ah pehnpihr kan pwehn perehkihla sapwemw sahpwo, Maing Immanuel.

9 Kumwail aramas akan pahn ehupene, oh e pahn kamwereikumwailpeseng; oh kumwail wehi dohkan kumwail rong; katengeikumwaildi, oh e pahn kamwereikumwailpeseng; katengekumwaildi, oh e pahn kamwereikumwailpeseng.

10 [Kumwail] ehupene kaweid, oh e pahn sohte katepe; [kumwail] pahn koasoaia koasondi en kaweido, oh e sohte pahn kak pweida; pwe Koht kin ketket reht.

11 Pwe Kauno mahsanihongie rasohng peh kehlail ehu, oh kaweidkinie me I sohte pahn keid nan koasondi en aramas pwukat, e ketihtihki:

12 Ke sohte pahn nda, kitail ehu, ong irail koaros me aramas pwukat pahn ndaiong, kitail ehu; ke pil sohte pahn masak dahme irail masak.

13 Kepingahte Kauno Wasalapalapie, oh kumwail mweidehng ihte me kumwail pahn masak, oh mweidehng ihte me kumwail pahn lemwiki.

14 Oh e pahn wia wasa kumwail pahn pwongih; ahpw [e pahn wia] takain kadipekelekel oh paip en kansensuwed ong peneinei en Israel kan, oh e pahn wia lidip ong mehn Serusalem.

15 Oh tohto irail me pahn dipekelekel oh pwupwidi, oh ohla, oh lohdi nan lidip, oh wisik sang.

16 Katengehdi kadehdeh oh kosonnedo rehn nei tohnpadahk kan.

17 Oh I pahn awiawih Kauno, me solahr kin pwarohng keinek en Seikop kan, oh I pahn rapahki ih.

18 Kilang, ngehi oh serihkan me Kauno ketkidohngie e wia kilel kei oh [doadoahk] kapwuriamwei kei nan Israel sang Kauno Wasalapalapie, me kin ketiket pohn Nahna Saion.

19 Oh ni ahnsou me irail pahn ndaionguhk: Rapahki rehn sounwunani kan, oh sounketieni kan me kin wedwedei mwahl—e sou konehng aramas akan en rapahki rehn Koht pwe irail me momour en kak rong sang me melahr akan?

20 [Rapahki] nan kosonnedo oh kadehdehu; oh ma irail sohte kosoia nin duwen mahsen wet, a pwehki sohte marain loale.

21 Oh irail pahn kohwei nan kahpwal laud oh duhpek; oh ni ahnsouo me irail pahn duhpekla, irail pahn lingeringerda, oh keriahla arail nahnmwarki oh arail Koht, oh saradalahng nanleng.

22 Oh irail pahn kilang nan sampah oh kilangada kahpwal, oh rotorot, rotidi en lokolok, oh pahn kohlahng nan rotorot.