1 Oh met kilang, riei ohl kesempwal akan, I men koasoai ong kumwail; pwe ngehi, Nihpai, sohte pahn mweidehng kumwail en medewe me kumwail mwahusang Mehn Liki kan. Pwe kilang, ma kumwail sohte pahn kapwaiada sapwellimen Koht kosonned akan a kumwail pahn pil mehla duwehte irail; oh pwehki mahsen akan me kapwilewei kumwail sohte anahne medewe me Mehn Liki kan koaros kamwomwala.

2 Pwe kilang, I pahn ndahiong kumwail me Mehn Liki kan koaros me pahn koluhla, pahn wia sapwellimen Kauno aramas en inouo; oh Mehn Suhs koaros me sohte pahn koluhla pahn lekidekla; pwe Kauno kin ketin wiahdahte inou ong aramas akan me kin koluhla oh kamehlele Sapwellimeo, me iei Koht Sarawi en Israel.

3 Oh met, I pahn kohpada ekis duwen Mehn Suhs akan oh Mehn Liki kan. Pwe mwurin pwuhko me I koasoiadahro eh pahn kohda, oh pahn ntingda ong Mehn Liki kan, oh pwurehng katengtengidi ong Kauno, tohto me pahn kamehlele mahsen kan me ntingdi; oh irail pahn walahng kadaudokatail akan me luwehdi.

4 Oh kadaudokatail me luwehdi kan ahpw pahn esehda duwen kitail, me kitail kohsang nan Serusalem, oh me irail wia kisehn kadaudoken Mehn Suhs.

5 Oh rongamwahu en Sises Krais ahpw pahn kalohki ong irail; eri, irail pahn wehwehkihda duwen arail pahpa kahlapako, oh pil wehwehkihda duwen Sises Krais, me arail pahpa kahlapako wehwehki.

6 Oh irail ahpw pahn perenda; pwe irail pahn ese me e wia kapai ehu ong irail sang nin limen Koht; oh rotorot me perehla meserail akan pahn tepda sohrala; oh dih tohto sohte pahn mehla, lao irail pahn wiahla aramas mwakelekel oh mwahu.

7 Oh kedekedeo Mehn Suhs akan me mwerpeseng kan pahn tepida kamehlele Krais; oh irail pahn tepida pwurpene pohn sahpwo; oh koaros me pahn kamehlele Krais pahn pil wiahla aramas mwahu kei.

8 Oh kedekedeo Kauno Koht ahpw pahn tapiada sapwellime doadoahk ong wehi kan koaros, keinek kan, lokaia kan, oh aramas akan, pwe en kapwurehdo sapwellime aramas akan pohn sampah.

9 Oh Kauno Koht pahn kadeik me semwehmwe kan nin duwen mour pwung, oh kapwung pahrek ong me mpai en sampah. Oh e pahn woakieki sampah angin mahsen en dauwaseo; oh angin dauwaseo pahn kemehla me suwed akan.

10 Pwe ahnsou pahn mwadang lelledo me Kauno Koht pahn ketin katohrepeseng sapwellime aramas akan, oh me suwed akan e pahn ketin kamwomwala; oh e pahn ketin komourala sapwellime aramas akan, ei, oh ma e pahn anahne kemehkihla me suwed akan kisiniei e pahn wiawi.

11 Oh e pahn katengehki lukepe mour pwung, oh loaloapwoat pahn wia katengpen sapwellime manaman en kaunda wasa.

12 Oh kidi en wel pahn kousoan rehn sihmpwul; oh lepard pahn wendi rehn kisin kuht, oh koupwul, oh laion pwulopwul kan, oh mahn mand akan pahn kak kousoanpene; oh seri men me pahn kahluwa irail.

13 Oh kou oh pehr kan pahn mwengepene; neirail me tikitik kan pahn kin wendipene; oh laion kan pahn kin kang dihpw duwehte kou kan.

14 Oh seri pwelel men pahn mwadong limwahn sinek pwoisin men e sohte pahn ohla, oh seri men pahn kiheng peh nan pesen sinek oh e sohte pahn ohla.

15 Irail sohte pahn medekila de mehla nan ei nahna sarawi kan koaros; pwe sampah pwon pahn direkihla marain en Kauno duwehte nan sehd eh kin direkihla pihl.

16 Eri, audepen wehi kan koaros pahn sansalada; ei, soahng koaros pahn kasansalohng aramas akan.

17 Sohte mehkot me pahn rir me sohte pahn sansalada; sohte doadoahk en rotorot pahn wiawi me sohte pahn kadierekda nan marain; oh sohte mehkot pahn katengetengidi pohn sampah me sohte pahn mwerada.

18 Eri, soahng koaros me kasansalohngehr aramas akan pahn sansalohng irail ni rahno; oh Sehdan sohla pahn ahneki manaman nan mohngiong en aramas akan, erein ahnsou reirei. Oh met riei ohl kesempwal oko, I pahn kaimwisekalahr ei koasoai kan.