1 Oh met, kilang, riei ohl kesempwal akan, I kamehlele me kumwail wie medemedewe nan amwail mohngiong kan duwen dahme kumwail pahn wia mwurin amwail pidelong nan ahlo. Ahpw, kilang, dahme kumwail medemedewehki mepwukat nan amwail mohngiong kan?

2 Kumwail sohte tamataman me I ndahiong kumwail me mwurin amwail alehdi Ngehn Sarawi kumwail kak lokaiahki mahsen en tohnleng kan? Oh met, ia mwomwen amwail pahn kak lokaiahki mahsen en tohnleng kan ma e sohte kohsang Ngehn Sarawi?

3 Tohnleng kan kin mahsen sang ni manaman en Ngehn Sarawi; eri, irail mahsenki mahsen en Krais. Eri, I ndahiong kumwail, kamadipwki mahsen en Krais; pwe kilang, mahsen en Krais kan pahn padahkihong kumwail soahng koaros me kumwail pahn wia.

4 Eri, met mwurin ei koasoaiahier mahsen pwukat, ma kumwail sohte kak wehwehki mahsen akan a pwehki amwail sohte peki, de pil sohte letelet; eri, Koht sohte pahn ketikihong kumwail nan marain, ahpw kumwail uhdahn pahn mehla nan rotorot.

5 Pwe kilang, I pwurehng ndahiong kumwail me ma kumwail pahn pidelong ni wenihmwo, oh alehdi Ngehn Sarawi, e pahn kasalehiong kumwail soahng koaros me kumwail pahn wia.

6 Kilang, met iei padahk mehlel en Krais, oh sohte pil ehu padahk likin met me pahn kohwei lao lel ahnsou me e pahn ketin kasalehiong kumwail pein ih ni paliwar. Oh ni ahnsou me e pahn ketin kasalehiong kumwail pein ih ni paliwar, soahng kan me e pahn mahsanihong kumwail me kumwail pahn nantihong kapwaiada.

7 Oh met ngehi, Nihpai, solahr kak koasoia me I kak kapatahiong; Ngehno katokehdier ei koasoai, oh I kin sengiseng pwehki me soupwoson, oh pwehki me wiewia suwed kan, oh me pohnmwahso, oh keptakai en aramas akan; pwe re sohte men rapahki kamarain, de pil wehwehkihla kamarain kesempwal kan, ni ahnsou me mahsen kan kin kohieng irail ni sansal, nin duwen mahsen me kin sansal.

8 Oh met, riei ohl kesempwal akan, I kamehlele me kumwail wie medemedewehte nan amwail mohngiong kan; oh I pahtoukihla me I pahn anahne koasoia duwen soahng wet. Pwe ma kumwail pahn rong Ngehno me kin padahkihong aramas en kapakap, kumwail pahn ese me kumwail uhdahn anahne kapakap; pwe ngehn suwedo kin padahkihong aramas en dehr kapakap.

9 Ahpw kilang, I pahn ndahiong kumwail me kumwail anahne kapakap ahnsou koaros, oh sohte luwetala; mwohn amwail pahn wia mehkot ong Kauno kumwail pahn kapakap ong Sahmo ni mwaren Krais, pwe e pahn kasarawihong kumwail amwail doadoahk kan, pwe amwail doadoahk kan en kak wia kamwahupamwail.