1 Oh ni rahno, lih isimen pahn koledi emen ohl oh indinda: Se pahn pein tungoale kanat pilawa, oh likawih pein aht likou; ihte komw menlau mweidehng kiht sen iang adaniki edemwen pwe sen dehr namenekla.

2 Ni rahno sapwellimen Kauno rah pahn kaselel oh lingan; wahn sampah pahn kaselel oh mwahuong irail Mehn Israel me pitilah kan.

3 Oh ahnsou pahn leledo, irail akan me pahn mihmi nan Saion oh mihmi nan Serusalem pahn adanikihla aramas sarawi, koaros me ntingdi momour nan Serusalem—

4 Ahnsou me Kauno pahn ketin widensang samin en serepein en Saion, oh kamwakelehda ntahn nan werengen Serusalem sang ni tenek en ngehno oh sang ni isihs en ngehno.

5 Oh Kauno pahn ketin wiahda depwek oh ediniei ni rahn oh marain en kisiniei ni soutik pohn wasahn kousoan koaros ni nahnahn Saion; pwe e pahn mie perehre pohn mehkoaros me lingan nan Saion.

6 Oh e pahn mie wasahn kommoal me mwete me pahn perehsang karakar en ni rahn, oh wia wasahn kommoal, oh wasahn ruksang melimel oh kotou.