1 Meid suwed ong irail akan me kin kalohki kosonned sapwung kan, oh me kin ntingihda kosonned katoutou kan;

2 Me kin sohla tehk kopwung pahrek en me anahn akan, oh kin kihsang pwuhng en nei aramas semwehmwe kan, pwe irail en kak kulih lihodi kan, oh irail en kak pirapa me sopwoupwou kan!

3 Oh dahme kumwail pahn wia ni rahn en ketdohu, oh nan apwal me pahn kohdo sang wasa doh? Ihs me kumwail pahn tangala ale sawas reh? oh ia wasa me kumwail pahn pwilikihdi kalinganpemwail kan?

4 Ma sohte ngehi irail pahn wie lokolok pahn me sensel kan, oh irail pahn mehla rehn me kamakamala kan. Eri pwehki soahng pwukat koaros sapwellime engieng saikinte uhdihsang irail, ahpw e kin ketin kapahweite lime kan.

5 Kumwail Mehn Asiria kan, kumwail me wia nei tuhkehn kamakam, oh sokon me kumwail kin wiahki mehn kamakam.

6 I pahn kadarewei ih pwe en pelianda wehi liksansalamwahu, oh I pahn padahkihong en kulihasang ahn aramas me kin kahrehda ei engieng ahr dipwisou kan, oh wahsang dipwisou kan, oh tiakpene duwehte nan ahl pwelmatak kan.

7 Ahpw nan ah mohngiong e sohte medemedewehte en wia met; ahpw e koasonehdi me e pahn kawehla oh kauhdihsang wehi tohto.

8 Pwe e koasoaia: Nei pwutak kan koaros sou wia nahnmwarki kei?

9 Kalno sou lohdi duwehte Karkemis? Amad sou lohdi duwehte Arpad? Sameria sou lohdi duwehte Damaskus?

10 Duwehte pehi kat eh koasonehdi wein dikadiken eni kan, oh neirail sansal takai kaselel kan sang ahn Mehn Serusalem oh Mehn Sameria;

11 I sou pahn wiahiong Serusalem oh ah dikadiken eni kan duwehte dahme I wiahiong Sameria oh ah dikadiken eni kan?

12 Ahpw mwurin ahnsou me Kauno pahn kanekehla sapwellime doadoahk koaros pohn Nahna Saion oh pohn Serusalem, I pahn kawehla doadoahk en nahnmwarki pohnmwahso en Asiria, oh ah suwei kan koaros.

13 Pwe e koasoaia: Sang pein kehlail en pehi kat oh ei loalokong me I wiahkihda mepwukat; pwehki ei eripit; oh I katehlapahla sahpw en nei aramas akan, oh I pirapahda arail dipwisou kesempwal akan, oh I kalowehdi towe kan duwehte aramas loaloapwoat men;

14 Oh pehiet diaradahr ahn aramas kepwe kan duwehte wasahn pahs ehu; oh I pahn kihpene sampah duwehte aramas emen eh kin rikpene luhwen kitohr kan; oh sohte me pahn kamwakid pehn pihr ehu, de kihpeseng ewe, de wiahda ngihl ehu.

15 Kakete sile pwoat en nda me e kehlailsang aramas me silehkio? Kakete rasaras pwoat en kesempwalasang aramas me rasaraskio? Pil duwehte apwal lepin tuhke pwoat en kamwakid aramas me pwokadahu, de sokon pwoat en pein kesihnenda duwehte e sohte wia tuhke!

16 Eri Kauno, Wasa Lapalap, pahn ketin kadaredo kalokolok ehu rehn me nsenamwahu kan; oh Kauno pahn isikada loalerail kan duwehte kisiniei lullul ehu.

17 Oh marain en Israel pahn rasohng kisiniei ehu, oh arail Kaun Sarawio pahn rasohng lullul en kisinieio, oh e pahn isikada dihpw tekatek oh suwed koaros nan rahn ehu;

18 Oh pahn kamwomwala sapwellime tuhke kan, oh sapwellime mwaht wahn kan, ni paliwar oh palingehn koaros; oh irail pahn pingida duwehte ahnsou me soun kol pilaik nan mahwin kin pwupwidi.

19 Oh sapwellime tuhke kan me pahn luhwehdi pahn malaulau, kahrehda seri tikitik men kak ntingihdi.

20 Oh ni rahno e pahn lelledo, ahnsou me luhwen kadaudok en Israel, oh irail akan kadaudoke en Seikop me pitila kan, sohla pahn koapwoaroapwoarki ih me kin kalokeirail, ahpw irail pahn koapwoaroapwoarki Kauno, Me Sarawi en Israel, ni mehlel.

21 Irail akan me luhwehdi, iei, irail luhwen kadaudok en Seikop, irail pahn pwurodohng rehn Koht me manaman.

22 Mehndahte aramas en Israel kan ahr rasohng tohtohn pihk en ni oaroahr, e pil pahn mie ehu kadaudok me pahn pwurodo; kahpwal me wiawihero pahn kahrehda wiewiahn mour pwung mehlel pahn mie.

23 Pwe Kauno Koht Wasa Lapalap pahn ketin wiahda kamwomwomwla ehu, iei e pahn wiawi nan sahpwo pwon.

24 Eri, Kauno Koht Wasa Lapalap mahsanih: Kumwail nei aramas akan me mihmi nan Saion, kumwail dehr masak Mehn Asiria kan; irail pahn kemehkin kumwail tuhkehn kamakam, oh arail sokon kan, duwehte Mehn Isip kan.

25 Pwe mwurin ahnsou kis, oh engieng pahn uhdi, oh ei lingeringer pahn uhdi sang kamwomwirailla.

26 Oh Kauno Wasa Lapalap pahn wiahda kahpwal ehu ong ih duwehte kamakamalahn Mehn Midian kan ni paip en Orep; oh duwehte sapwellime sokono eh kolada mwohn sehdo ih pil mwomwen eh pahn ketin kolada duwehte mwohn Mehn Isip ko.

27 Oh ni rahno pahn lelledo me ah toutou kan pahn kohsang pohn pwopwe, ah mehn wisiko pahn kohsang ni tepinwere, oh mehn wisiko pahn ohla pwehki keidi sarawio.

28 E pahn kohdo Aied, e pahn kotehla Mikron; e pahn nekidala were kuruma kan nan Mikmas.

29 Irail kotehlahier ahlo; irail pahn pweidi nan Kepa; Ramad masepwehkdahr; Kipea en Sohl tangehrdoui.

30 Kumwail weriwerda, serepein en Kalim; wiahda pwe Lais en kak rong, Anadod me lokolok.

31 Madmena mweseldahier; tohn nan Kepim kohpenehier pwe re en tang.

32 Met e pahn mihmi nan Nop rahno; e pahn roakroake kumwut ong nahnahn serepein en Saion, iei uluhl en Serusalem.

33 Kilang, Kauno, Kaun Wasa Lapalap pahn lupukiraildi rasohng rahn tuhke me palasang; oh irail sohpeidi kan pahn paldihsang; oh me aklapalap kan pahn karakarahkala.

34 Oh e pahn ketin lupuk kin iraildi sile mete rasohng tuhkehn wel kan ahr paldi, oh Lepenon pahn pwupwidi pahn me keieu kehlailo.