1 Ni sounpar me nahnmwarki Usaia pwoula, I kilangada Kauno ketket nan mwoahl ileile, oh sapwellime likou reireidihla nan tehnpas sarawio.

2 Serepim kei kapkapil mwoahlo; emenemen irail ahneki pehnpihr weneu; riau mehn perehla masarail kan, oh riau mehn perehla nehrail kan, oh riau arail mehn pihr.

3 Oh emen kin werkihlahng emen, oh ndinda: Sarawi, sarawi, sarawi, Kauno Wasalapalap; sampah pwon direkilahr sapwellime lingan.

4 Oh dihd en wenihmwo kin itikek pwehki arail kin wie weriwerki, oh tehnpaso direkihla ediniei.

5 I ahpw patohwan: Meid suwed pahn lel ong ie! pwe I pahn mehla; pwehki eweiet ewen aramas samin; oh I kin mihmi nanpwungen aramas au samin; pwe meseiet kilangadahr Nahnmwarkio, Kauno Wasalapalap.

6 Eri emen serepim ko pihrdo rehi, wa mwoalis ingkingken ehu, me e tihpwiada sang pohn pei sarawio;

7 Oh e kihieng ni eweiet, oh patohwan: Kilang, met sairehr keilen ewemwen; oh ahmw wiewia suwed kan kohsanguhkehr, oh dipom kan kamwakelsangehr.

8 I pil rongada kepitien Kauno, mahsanih: Ihs me I pahn kadarala, oh ihs me pahn wiliankitailla? Ngehi eri nda: Iet ngehi; komw ketin poaroneiehla.

9 Oh e mahsanih: Patohla oh kairehki aramas pwukat—Kumwail rong mwahu, ahpw re sohte pahn wehwehki; oh kumwail kilang mwahu, ahpw re soht pahn kak kasawihada.

10 Kamworourouihala mohngiong en aramas pwukat, oh katoutouihla salengarail kan, oh perehla meserail kan—pwe irail de kilangki mesarail kan, oh rongki salengarail kan, oh wehwehki nan mohngiongarail kan, oh weliakapwala oh mwahula.

11 Ngehi eri patohwan: Maing Kaun, ia uwen werei? E ahpw mahsanih: Lao kahnihmw kan ohla oh sohla kanenge, oh sohla aramas nan ihmw akan, oh sahpwo pwon wiahla sapwtehn;

12 Oh Kauno pahn ketin kadohwanwei aramas akan, pwe nan sahpwo pwon e pahn sohla kanenge.

13 Ahpw e pahn mie eisek kis ehu [en aramas] pahn pwurodo, oh re pahn mwongehla, duwehte tuhke deil ehu, oh duwehte tuhke ohk ehu me momour oh teh kapw akan kin masalpeseng; kadaudok sarawio pahn rasohng [tuhke] momouro.