1 Oh tuhke pwoat pahn osesang kahlepen Sesi, oh rah pwoat pahn osadahsang ni kalewe kan.

2 Oh Ngehn en Kauno pahn ketket reh, me iei ngehn en eripit oh kupwurokong, ngehn en kaweid oh kehl, ngehn en marain oh lemwiki Kauno;

3 Oh Ngehn en Kauno pahn ketin wiahiong en mwadangete esehla lemwiki Kauno; oh e sohte pahn tenek nin duwen dahme mese kan kin kilang, de pil kapwungala nin duwen dahme salenge kan rong.

4 Ahpw me semwehmwe kan e pahn ketin teneki ni pwung, oh ong me mpahi en sampah e pahn ketkihong irail kopwung pahrek; oh e pahn ketin woakihki sampah sapwellime mahsen, oh e pahn ketin kemehkihla me suwed kan angin dauwase.

5 Oh e pahn kin katengehki lukope mour pwung, oh e pil pahn katengehki lukope loaloapwoat.

6 Kidi en wel pahn kousoan rehn sihmpwul, oh lepard pahn wendi rehn kisin kuht, oh koupwul oh laion pwulopwul kan oh mahn mand akan pahn kousoanpene; oh seri men me pahn apwalih irail.

7 Oh kou kan oh pehr kan pahn mwengepene; neirail me tikitik kan pahn pweidipene; oh laion kan pahn kang dihpw duwehte kou lekelek kan.

8 Oh seri pwelel men pahn mwadong limwahn sinek pwoisin men e sohte pahn ohla, oh seri men pahn kiheng peh nan pesen sinek oh e sohte pahn ohla.

9 Irail sohte pahn medekila de mehla nan ei nahna sarawi kan koaros, pwe sampah pwon pahn direkihla ahr marainki duwen Kauno, duwehte pihl akan ahr audehla nan sehd.

10 Oh rahno, e pahn mie ehu kalewen Sesi, me pahn wiahla kilel ehu ong aramas akan; Mehn Liki kan pahn kin rapahki kilel wet; oh sapwellime wasahn kommoal me lingan mehlel.

11 Oh rahno pahn leledo, me Kauno pahn ketin pwurehng kihwei lime kan keriapak pwe en kapwurepene luhwen sapwellime aramas akan me pahn luhwehdi, sang Asiria, oh sang Isip, oh sang Padros, oh sang Koas, oh sang Elam, oh sang Amad, oh sang pohn dekehn nan sehd akan.

12 Oh e pahn ketin kihda kilel ehu de pilaik ehu ong wehi kan, oh ketikipene Mehn Israel me pekeusla kan, oh ketin kapwurepene Mehn Suda me mwerpeseng kan sang ni keimw pahieu en sampah.

13 Ipram sohla pahn peirin, oh kahpwal en Suda pahn uhdihsang; Ipram sohla pahn peiriniong Suda, oh Suda sohla pahn kahpwalih Ipram.

14 Ahpw irail pahn pihr pohn pwopwen Mehn Pilisdia kan kohlahng palikapi; irail pahn kihsang ahn aramas me kin kousoan palimese arail dipwisou kan; irail pahn kalowehdi sahpw en Mehn Idom oh Mohap; oh Mehn Ammon kan pahn peikiong irail.

15 Oh Kauno pahn ketin kamwomwala lowen sehd en Isip; oh sang sapwellime kisinieng kehlail e pahn ketin itik lime kan pohn pilap, oh pahn wiahda piletik isipwoat, oh aramas akan pahn kotehla nan ngalangal.

16 Oh e pahn mie ahl lap ehu ong luhwen sapwellime aramas akan me pahn luhwehdi, sang Asiria, duwehte rahno me Mehn Israel kan pwurodohsang nan sahpw en Isip.